الاثنين، يوليو 21، 2008

ماليش ف السياسة... (تحديث)

تحديث : نظراً للتفاعل والإنفعال والإندماج الشديد مع القصيدة قررت
إنشاء جزء ثانى لها من تأليف الأصدقاء.....
أفضل 2 هيتنشروا بأسماء أصحابهم
للإرسال(الميل الخاص بى الموجود فى البروفايل)
_____________________________________________



ماليش ف السياسة



ماليش ف السياسة
ماليش ف الخباثة
ماليش ف العوء

ولو مرة واحد
نادانى وسألنى
هقولوا
عبَط

ماليش ف السياسة
ولية بيسألونى؟؟
وجابونى
وخدونى
ورمونى
غلط

ماليش ف السياسة
غٌلبت أقولها
وبردو
طرَش
أصابهم ياعالم؟؟
ولا دا هبَل؟؟

ماليش ف السياسة
وبردو مصممين
ياتعترف
يإما تعترف
ولو مش هتعترف
يبقى لازم تعترف

كرَروها ياناس كتيير...
قولت أفتكر..
أدعبس ..
أدور..

يمكن ألاقى إنى
كنت يوم مٌستيس.؟؟

ماليش ف السياسة
وقعدت
أفتكر..

يوم مرة واحد
قاللى
ياعبدو
المَم غلِى

ورديت ساعتها
وقولت
ما يتغلى
بس ابقى ركز
لا يفوور ويتحرق

ماليش ف السياسة
ودى مش سياسة
ورجعت أفتكر...

ف يوم مرة صاحبى
قاللى الجاز غلى
قاللى النقل غلى
قاللى الهوا غلى
قاللى النوم غلى

رديت قولتلوا
ياعم رووح بعيد...
نووم إية اللى غلى
وشديت لحاافى
لجل ما أكدبة

ومن يوميها نايم
لجل ما أكدبة....

وجم هما فجأة صحونى
بيسألونى
يللا إعترف؟؟

ماليش ف السياسة
غلبت أقولها
وقالولى هتعترف
يعنى هتعترف...؟؟؟
______________________________________

الآن بوست مواجهاتى جديد على مدونة (على حريتنا) بعنوان

(رحلة البحث عن المجهول)

هناك 109 تعليقات:

دعاء مواجهات يقول...

كانت هذة القصيدة هى المفاجأة الأولى

لأنها أول قصيدة عامية أكتبها

وأتمنى تعجبكم....

اتكلموا براحتكم بكل صراحة..

Mohamed Dawod يقول...

تسمحيلى أكمل حته صغنونه:

ملقيتش قدامى غير انى اعترف
اعترف أنى خايف على موت البلد
بس نايم
أعترف انى خايف على ضياع الولد
بس تايه
أعترف انى رحلت وسبتهالكم صفرا
بلون الحرايق
بلون الشجر الدبلان فى الحدايق
بلون الملل
اعترفت وجاهز لحكمكم يا أوطى الخلايق


القصيده جميله جدا وتخللى الواحد غصب عنه يتفاعل معاها برغم دمها الخفيف واسلوب السخريه فيها بس كلها جديه...تحياتى ليكى على الأسلوب والفكره....شكرا

mohamed ghalia يقول...

لا أنا مش هتكلم أصل يجى ولاد الإيه يودونى ورا إيه
أصل أنا مليش فى السياسة
خلينى ماشى جنب ....
تحياتى

bedo يقول...

دعاء
اخيرا اعترفتي ان ملكيش في السياسة
ده كمان اعتراف هيحاسبوكي عليه
القصيدة حلوة اوي بس كلنا لينا في السياسة مادام عايشين وبنحب البلد دي اللى عذبتنا ما بين حبنا لها وظلم اهلها لينا
بيدو

Ehab يقول...

جــــــــــــــــامده موووووووووت

تسلم ايدك انا نزلت تحت ادور بتاعة مين بحسبك ناقلاها من حاجات الفاجومي

بس بجد فكرتها حلوه قوي

تسلم ايدك
سلاااااااااااااااااااااام

Empress appy يقول...

حلوة يا دودو وبتعبر عن خوف جوه الكتير قوى

Lobna Ahmed Nour يقول...

موضوع جميل .. وواضح ان مالكيش في السياسة خااااالص

هههههه

kafrawy يقول...

برىء يا بية

ولو ......ولو.....

يرىء يابية




تحياتى يا افندم

zOzO يقول...

اول مره
امال لو مش كانت اول مره كنتي عملتي ايه
بجد حلوه
ما شاء الله
تسلم ايديكي بجد

أحمد هشام يقول...

ما ليش في السياسة ...
طيب بجد سؤال ؟ ! يعني ايه سياسة ؟
هل المقصود اني ما أكونش مهتم بالسياسة... اني ما يكونش ليا رأي عن الخدمات العامة المتدهورة مياه ونور و كهرباء و مواصلات عامة وتعليم ...
اني ما يكونش ليا رأي في الفساد المنتشر والبيروقراطية العفنة ...
اني ما يكونش ليا رأي فيمن يحكم بلدي ..
مش عارف ... فعلا .. هل كده الواحد متشائم .. لما يكون مش عاجبه الوضع .. لما يكون بيطالب بحقه ...

2ensan wnsan يقول...

عارف انك زعلانه بس والله النت والكمبيوتر بيلاعبوني بس ان شاء الله هيتظبطوا في اقرب فرصه ..

المهم ان انا مليش في السوياسه وبحب امشي جوه الحيط

بس بجد دي او قصيده عاميه تكتبيها ؟؟؟

اوك بدايه جامده جدا

Unknown يقول...

حلوة يا دودو كالعادة بس انت متاكدة انها اول قصيدة عامية تكتبيها؟؟؟؟
والله انت بترجعى لى الامل فى البنات كل ما ادخل مدزنتك ..........
اكتبى اكتبى على طووووووووووووووول

Desert cat يقول...

بطبق نظرية يا ما فى السجون مظاليم
تحياتى يا جميل

blue-wave يقول...

بجد بجد تحفه يا دعاء

منال (محبة عائشة رضي الله عنها وأمهات المؤمنين) يقول...

جميلة ما شاء الله يا دعاء ، بس بجد و حقيقي ، ملكيش في السياسة خاااااااااالص. تحياتي...

Mafrousa يقول...

حلوه يا دعاء جامده جدااااا
مليانه خوف و رعب من انهم ياخدوه
نام ياعيني علشان مش يتهموه بحاجه
و جولو برضه و هوه نايم
حلوه اوي

اربعين سنة ستيوتند يقول...

حلوة اوي يا دعاء
تسلم ايدك

نشأت العمده يقول...

ههههههههههههههههههه
واحنا ورانا غير السياسه الى خاربه بيتنا
انا بقى ليا فى السياسه
انا بسياس ابويا فى البيت وبسايس اخواتى وبسايس صحابى
مش دا كله سياسه
جميله والله انتى ليكى اسلوب جميل فى العاميه وغالبا الزجل هو المفهوم دلوقت

أبوعبيده يقول...

سلام عليكم
ماليش فى السياسه. وياريت يلحمولى جيبى اللى اتخرم.
ماليش فى السياسه. وليه ياقفايا واخدعالصرم.
ماليش فى السياسه. ماليش فى الحياه.
ماليش فى السياسه. ومبقولش أاااه.
ماليش انى اعيش ودايما مفيش.
بكل اختصار. بدون انفجار.
راح أخد قرار انى ابقى عدم.
كلمتين لسه طالعين سخنين من نفوخى
...انتى اللى اوحيتى ليه بيهم....
بجد انتى عصبتينى.
الى الامام دائما ومواضيع افظع وافظع.
مواضيعك متميزه ماشاء الله.
سلام عليكم

Ahmed Al-Sabbagh يقول...

قمت اعترفت
وقولت انى سياسى قديم
ابويا كان راجل بيعارض
وعيلتى عيلة سياسية
غير انى عضو ف حزب معارض
وتنظيم
وحركة
وجمعية
وعندى فى البيت مليون منشور
وميثاق وخطة انقلابية

قام قالى : غور ياض انت يا واد
شكلك اساسا هجاص
هههههههه
:))

احمد

منه مرتجى - عازفة الأوتار يقول...

مش مصدقة انها اول قصيدة ليكى
حلوة جدا و دخلتها رائعة
هى بس الوزن و القافية عايزين شوية تظبيط صغنطوط اد كدة
بس كلامك جميل يا قمر بجد

و مش حتكون دى اخر زيارة ليا فى مدونتك الجميلة دى

دعاء مواجهات يقول...

محمد داوود

ياخبر على الكلام الجميل

الى بتمنى بس اكون استحق نصفة

التكملة بتاعتك جميلة اوى بجد

من اجمل التكملات اللى وصلتنى...

وانا مبسوطة جدا لتفاعل الجميل دة

نورت

دعاء مواجهات يقول...

محمد غاليا

مااشى ياعم ياللى مالكش ف السياسة انت

وكمان خاايف تقوول اسمهم

مااشى براحتك يابا

نورتنى

دعاء مواجهات يقول...

بيدو

لا يابيدو أهلها مبيظلمووش

كلهم مغلوبين على أمرهم

فبيطلعوا كل دا فى أى حجاة فى اى كلمة تصرف فعل غير مسئول كدة يعنى

الضغط يابيدو بيولد..

زى ما انت عااارف

نورتنى

دعاء مواجهات يقول...

الشنكوتى الكبير

كنت لسة بكلم الصباغ

وبقولوا احلى تعليق وصلنى

بتاع الشنكوتى

لأنة بيشبهنى بحد أسطورة

تحيااتى الجامدة لذووقك

مكهرب الدنيا ...

دعاء مواجهات يقول...

آبى

أما آن لليل أن

ينقشع؟؟؟

(حلوة ينقشع دى)

صح؟؟؟

نورتى ياجميل

بس كل مرة تعليقكو ينقرض خايفة يتمنع خاالص......

دعاء مواجهات يقول...

unique

آآآآآآة مااالييش


كويس ان عندك قوة ملاحظة

اهم حاجة التركييز

نورتنى

دعاء مواجهات يقول...

kafrawy

هههههههههههههههههههههه

هو كداا بالظبط

عليك نووور

بيس

نورت

دعاء مواجهات يقول...

زوزو

يابنتى دى أقل

حاجة عندنا

هههههههههههههههههههههه

الله يكرمك

دا بس من ذوقك


منوراانى

دعاء مواجهات يقول...

- أحمد باشا هشام

اولا عاوزة اقولك شووف مدونتك مالها بقالى مليون سنة عاوزة اعلق ومش عاارفة....

____________________________

ثانياً بالنسبة للسياسة فهى أكلنا وشربنا ونومنا وصحاياننا

مفيش حد ملووش ف السياسة يابرنس

ولا انت شاايف اية

ثالثاً لا انت مش متشائم ولا حاجة لأن كل الحكاية انك حاسس بالواقع وملتحم فية اوى وبالتالى مهموم بية وبالتالى ايضا مش قاادر تسكت

يبقى اية

يبقى السياسة

نورتنى اااخر نووووور بجد

زيارة غالية.....

دعاء مواجهات يقول...

عبدالله غنيم

بص بقى يابيدو ياابنى انت مش غريب

وعلشان كدة حقولك الصراحة الصراحة يعنى

دى تانى واحدة بس الاولى انا مش حسباها لانها مش كوزيسة اوى يعنى

فبعتبر دى الاولى لأنى حساها اوى ومعجبة بيها كماان

نورتنى ياعم

ابقى اسال...

دعاء مواجهات يقول...

- إنجى

مدياانى ساايز جميل اوى

وكبيير اوى

اتمنى يجى على مقااسى ياارب

حااضر انا بتنفس بتشجيعكوا ليا بجد

نورتى

دعاء مواجهات يقول...

dsert cat

وانتى الصادقة ياقمر

ياما فى المظاليم

سجوووون

بيس

دعاء مواجهات يقول...

بلو وويف

سانكس يادكتور


نورت

دعاء مواجهات يقول...

منال مصطفى

عاوزة الجد

الحقيقى ولا الجد الهووزار

والجد الجداانى؟؟؟

حددنى مهى تفرق بردوو؟؟

نورتى

دعاء مواجهات يقول...

واحدة مفروسة

شوفتى يامفروسة ياحبيبتى

متااخد متااخد

اوعى تكونى اتفرستى؟؟؟

الحكاية مش ناااقصة اصلها

نورتى الحياة..

جهاد خالد يقول...

معاني

هم يضحك وهم يبكي

نظم القصيدة

جميل فب حتت حسيت انك محترفة فيها
وحتت حسيت عاوزة شوية تظابيط

بس بشكل عام

سيري سيري

D:

تحياتي

دعاء مواجهات يقول...

أربعين سنة استيوتند


ميرسى


اتمنى تكون على قدر الاعجاب فعلا

نورت..

دعاء مواجهات يقول...

عاوز حقى

صح كلاموو

السياسة هى فن التعامل

فكيف نحيا بلا تعامل

نورت


بيس

دعاء مواجهات يقول...

أبو عبيدة

إسمحلى انا بقى

اقولك انى مبسوطة جدت نم التفاعل الحى دة مع البوست وكلامة

ومبسوطة كمان للإنفعال لأن معناة انة عمل علامة كويسة

الكلام اللى طلع من نافوخك جاامد اوى

انا شكلى كدة هعملها جزء تانى من تأليفكوا نتوا


نورت

دعاء مواجهات يقول...

- أحمد باشا الصباغ

هههههههههههههههههههههههه

اة صح فعلا شكلك هجااص.........

اية ياعمنا الابداع اللحظى دة

الكلام دة وسام على اروقة مدونتى..

__________________---

فرشتلك الأنترية زى ما اتفقنا

خد راحتك

المدونة مدونتك....
بيس

دعاء مواجهات يقول...

ورود وأشواك

ياخبر

دا شرف كبير ليا طبعا

تنورينى

بس هى تعد التاية لكنى لااحسب التجربة الاولى

نورتى

دعاء مواجهات يقول...

النجمة الصامدة

اكيد لازم يكون فية نقاط ضعف طبعا

واشكرك على التوضيح

شرفتينى

غير معرف يقول...

صباح الخير فى البدايه كنت عايز اوضح شويه حاجات انا مش بتطفل عليكى فى المدونه لا انا بيوصلى دعوة انى اعلق زى اى واحد عالميل بتاعك رغم انى زى مابتقولى متعرفنيش بس يمكن انا اعرفك كدعاء اللى بتراسل الصحف ثانيا والله انا ماكنت اقصد انى اسكتك زى ماقولتى لا انا كنت عايز اخرج من جو الاشاده اللى بيصل للنفاق فى بعض التعليقات واعتقد ان الهدف من التعليقات هو الحوار ثالثا وده الاهم موضوع النقاب انا مكنتش باخد رايك فى النقاب هل هو فريضه او لا الموضوع واضح الكلام كان عن النقاب فى الحج والعمره وحديث ابن عمر عن النبى ص لا تنتقب المراه المحرمه ولاتلبس القفازين بس ممكن اكون خانى التعبير او مفهمتش كلامك وده وارد لكن مدامتى اتكلمتى فى موضوع كون الحجاب فريضه ام لا ولان الدين النصيحه وطبعا مفيش حاجه اسمها فضيله فالامور الشرعيه بتنقسم الى فريضه سنه اوبدعه والنقاب من الامور اللى فيها جدل وخلاف كبير ولكن الراجح انها فريضه لعده حجج اولا قوله تعالى , وازا سالتموهن متاعا فسالوهن من وراء حجاب , كزالك قوله تعالى.وليضربن بخمرهن على جيوبهن ولا يبدين زينتهن الا لبعولتهن,صدق الله العظيم ثانيا حديث ابن ام مكتوم حيث دخل على زوجتى الرسول ص ميمونه وام سلمه والنبى حاضر فقال النبى احتجبا عنه قالتا يارسول الله انه اعمى ولا يبصرنا فقال ص الستما تبصرانه ثالثا ماروته السيده عائشه عن نفسها فى حادثه الافك عندما راها صفوان ابن المعطل متخلفه عن الركب قالت راى سواد انسان نائم فاتانى فعرفنى حين رانى وكان يرانى قبل الحجاب فاستيقظت فعرفنى فخمرت وجهى عنه,رابعا حديث ابن عمر يدل على انه هناك حجاب مفروض تم تحريمه فى هزا الموقف فقط00000000000000000فى الختام اليكى اعتزارى مع وعد بعدم التعليق بعد اليوم والسلام عليكم ورحمه الله

ahmed_k يقول...

ايه الجمال ده
احنا في ايام حتي اللي ليه في السياسه
بقى مالوش فيها ومش عارف ايه اللي بيحصل في البلد ده
امور كتييير متلخبطه
مفاهيم معكوسه
حكومه بتنفز سياسات ضد مصالحها
أو بلأصح ضد مصالح شعبها وبلدها

ربنا يرحمنا

صالح سعيد يقول...

ازيك يا حاجه دعاء
عامله ايه
وحشتينى بجد
وانا مش هسيبك الا لما اخد السبحه والطاقيه بتاعتى منك
ويا سلام بقى لو حتة جلابيه تبقى تمام
انا عاجبنى حماسك يا دعاء
واسلوب ادارتك لدعاية مدونتك
واعذرينى لو كنت مقصر لكن غصب عنى
انما الثابت انى بعتز جدا بمعرفتك
تحياتى يا جميل
من غير اشطاط

غير معرف يقول...

دؤدؤ حبيبي وحشاني كتيييييييييييييييييير
والله عارفه اني مقصرة معاكي بس انت كنتي عارفه ظروفي كويس من امتحانات وكده يعني ثم اي حاجه بعد كده بلاش تقوليها لعمرو الطاروطي انت عارفه ان عمرو الطاروطي وكاله اخبار عالمية
المهم انك وحشاني موووت مووووت
وقريب ان شتء الله اكلمك واشوفك

Mahmoud البطراوى يقول...

قصيده رائعه بجد فى انتظار الجزء التانى

شهرزاد يقول...

قصيدة جميلة..
إنها السياسة فعلا
أن تعترف بأنك إنسان جئت إلى هذه الأرض
تبحث عن لقمة العيش
وتريد أن تعيش بأمان
وتمشي جنب الحيط وتقول يا ستار يا ستار مش عاوزين غير الستر والعيش
ورغم كل ذلك
لا يتركوك بحالك وعايزين الاعتراف!!

ربنا يسترها معانا

تحياتي لك

كاميليا بهاء الدين يقول...

قصيدة تندرج تحت المواجهات ايضا

جمييييييلة ،، فيها قوة وإصرار على القرار

مالييش فى السياسة



ملاحظاية صغنونة
مالك حبيبى؟
ايه ضايقك؟
حد يضايق اجمل دعاء فى الدنيا؟
مش ممكن
يابخت اللى انتى وسطهم
عندهم أجمل انسانة

بحبك اوى اوى اوى
من هنا عندى لحد عندك


حضن كبيييييييير اوى خالص
ودعوة من قلبى
ربنا يسعد قلبك يارب


تحياتى وحبى

دعاء مواجهات يقول...

كاميليا

ربنا يخليكى ليا ياارب

ابدا بس شوية إكتئاب ع المااشى كدة

نفسى اعمل حاجة جامدة ومش بعمل حاجة

انا كسولة اوى

ومقصرة اوى

بيس ياجميل

canary يقول...

قصيدة هجائيه ساخرة من الطراز الاول
تحياتى

سنووايت يقول...

حلوة يا دعاء اوي
بس ليه كدة؟!
دلوقتي لازم تعترفي ايه اللي خلاكي تكتبي القصيدة دي

رحــــيـل يقول...

جميله يادعاء جدا بجد

دمك شربات شربات

مبروك عليك اول قصيده عاميه بدايه موقفه جدا
هههههههههههههههه

فى انتظار الجزء التانى ان شاء الله

حمامة يقول...

احسن حاجة
انا كمان مليش ف السياسة ووجع الدماغ :D

nigro يقول...

وشي مش في الأرض منك
لأ
ده تحت الأرض
ماتقوليش إنك مش زعلانة مني
لأني أصلاً زعلان من نفسي إني لحد اللحظة دي لسه ما قولتلكيش حمدلله على السلامة
بجد بجد بجد يا دؤدؤ أنا زعلان مني
بس و الله يا دعاء غصب عني
أخوكي كان طالع عينه في مشروع التخرج
و ما كانش بيفضي ربع ساعة يبص فيها على أي حاجة غير الشغل
و بعد ما ناقشت المشروع نمت 3 ايام و صبحت السبت و استلمت شغل عند دكتور من اللي كانوا مشرفين عليا و برده طالع عيني
10 ساعات شغل في اليوم يا دؤدؤ
و الله يا دعاء تقصيري ده مش بإيدي
بالله عليكي ما تزعليش مني بقى
انت عارفة انت غالية عندي قد إيه

بالنسبة للبوست
يا بنتي انت دماااااااااااغ
و عبقرية دعائية مواجهاتية فريدة

و أنا ماليش في السياسة

مش زعلانة مني ... صح؟


يلا سلام

همس الاحباب يقول...

بجد رائعة جدا
تسلم ايديكى
انتى بتعبرى بيها عن مشاعر واحلام الملايين والاغلبية المقهورة
والناس اللى بتظلم بدون ذنب
تحياتى وتقديرى وتمنياتى بمزيد من النجاح والتفوق

همس الاحباب يقول...
أزال المؤلف هذا التعليق.
maiosha يقول...

ههههههههههه
هتعترف يعنى هتعترف .. غصب عنك هتعترف
إحنا خلاص قبضنا على كل شراكائك

سياسة إنك ملكش فى السياسة هى بذات نفسها سياسة

جميلة يا دودو .. جميلة جميلة جميلة

والتجديد بتاع العامى رائع

ودمها خفيف مووووت

تسلم إيديكى

maiosha يقول...

يا دودو .. معلشى صحيح نسيت

إعتذار بس لتأخيرى فى الرد .. علشان بس أنا مشغولة موووت الأيام دى

إدعيلى ربنا يقوينى ويعدى الأيام دى على خير

سلام يا جميل

Amgad يقول...

بجد المعني بتاعها هايل
وانا حسيت انك جيتي ع الجرح الحقيقي فعلا
كل واحد فينا بيقول مليش دعوة مليش دعوة لحد مبتتطربق علي دماغنا
ولا اجد في الموضوع ده اروع من بيتين شعر قالهم نجيب سرور مش هينفع اقولهم طبعا
بس فعلا يا دعاء القصيده دي سامحيني غيرت رايي فيكي خالص
تقبلي خالص تقديري وتحياتي

دكتور بهــدوء يقول...

دودو
ازيك


انا بس معدي طبعا استمتع بالعامي بتاعك واللهي تحفه

بس جاي جري عشان مينفعش ماجيش يومين واخلص امتحانات يومين بالظبطططططططططط


وارجعلكو بأه يا عالمي اللذيذ
وياصحابي يا حلوييييييين

قلب ينبض لله يقول...

هو بعد اللي انتي كتبتيه دا ممكن أصدق ان مالكيش في السياسه بس هايبئي بمزاجي ياقمر لأني متأكده ان ليكي في السياسة:(

لكن اللي ممكن ماعديهوش خاااااااااالص انك شاعرة جامدة جداا جدا
واتفاجئت بتعليقك وانتي بتقولي ان دي اول مرة تكتبي فيها شعر عامي

ربنا يوفقك كمان وكمان وتكتبي شعر تاني وتالت ورابع

غير معرف يقول...

فعلا يا دعاء كل حاجة غليت ماعادا النوم بقي رخيص جدا
علشان كدة كل الشعب نايم
ولكل واحد اسبابه

- بالنسبة للأخ غير المعرف
مااعرفه ان الحجاب بشروطه الشرعية
- مش الموضة اللي بيتلبس دلوقتي او الي بيتسمي احتشام - هو الفريضة والتي جاء ذكرها في القرآن اما النقاب فهو سنة او مستحب على اقصي تقدير وللعلامة الألباني كتاب في ذلم مسمي حجاب المرأة المسلمة
وله ايضا كتاب يرد فيه بالأدلة الشرعية علة من يقول بفرضية النقاب ووجوبه
وفقنا الله للصواب
تحياتي لك

momken يقول...

حلوة اوى القصيده
وحقيقيه جدا جدا

ومن الواضح انك مالكيش فى السياسه

احبسينا يا مواجهات
ودينا ورا الشمس علشان ترتاحى خالص

اعمل فيكى ايه بس
ارطك فى الستاره علشان متعمليلناش مشاكل

ههههههههههههههههه
حلوة اوى القصيده جميله جمال مالوش مثال
تسلم ايدك
تحياتى

PrInCeSS BeRy يقول...

دودووووووووووو واو بجد حلوة اوى اكتبى بالعامية تانى اسلوبك حلو اوى ما شاء الله اموااااااااااة

محمد مارو يقول...

برغم انها عاميه بس بجد لذيذه انا احب النوع ده من القصائد اوى

اما عن الرابطه اللى نتمنى تشاركينا فيها فده مييلى لو حابه تعرفى عنها اكتر
maro_tatu@yahoo

نونو يقول...

بجد دى اول قصييدة عامية
بس حلوة هيبقى لييكى شان فى المدونات
يا بنتى
انا بحبك فى الله يا دودو بجد
وبتيجى فى دماغى كتيير

دعاء مواجهات يقول...

نادر

مش عارفة لية كل اللى انت عاملة دة واية الى حصل علشان تاخد الموضوع بالشكل دة ..


عموما انا لما كنت بتكلم كنت بتكلم عن النقاب وليس الحجاب والادلة اللى بتقول عليها انا اللى أعرفة منها الآية الكريمة(وليضربن بخمورهن على جيوبهن)

والآية مفسرة نفسها والجيب هو ماتحت العنق بمسافة

اما حديث الرسول لزوجاتة صراحة لا اعرف مدى صدقة واول مرة اسمعة

وعموما القليل من الشيوخ من ينادون بأنة فريضة وزى ما انت عارف إختلافهم دة رحمة لناس كتيير

وزى ما انت ذكرت بنفسك إن الإحرام لايجوز معة النقاب فأولى أن تنتقب المرأة فى أثناء أداء العمرة او الحج إذا كان فريضة زى مابتقول

وأولى بالفريضة أن تتبع

وعموما لكل رأية وانا لا افند حججك ولكن دة اللى اعرفة ولا ادعى العلم
الشامل الخالى من النواقص..

المدونة مفتوحة لكل الناس ولكل الحوارات الجادة ..

تحياتى ليك.

دعاء مواجهات يقول...

- أحمد

باتت المصالح الشخصية هى الاهم

تحياتى لمرورك

دعاء مواجهات يقول...

صالح سعيد

ازيك ياصاصا

منور البلوج والبلوجات المجاورة يارااجل

انا قولت أمل نستك الدنيا ومافيها..

وبعدين دى مدونتك وتيجى وقت ما تحب

وبالنسبة للهدية انت تؤمر

نورت.

يللا من غير إشطاط بردو..

دعاء مواجهات يقول...

حوبة

اولا كل سنة وانتى طيبة

وعقباال مليون سنة ياقمر

ثانيا اية حكاية عمرو دى انا اصلا ولا بكلموا من فترة ع الطاير كدة بس

وضحى قصدك؟؟؟

قلقانة عليكى.. غيابك طول

طمنى هيما كمان علشان قلقان اوى

نورتى ياقمرة..

دعاء مواجهات يقول...

بطوط حبوب

والله بقى الجزء التانى دة

متوقف على الجمهور نفسة

لانها هتكون من تاليفكوا انتوا

واتمنى دا يحصل ويعجبكوا

سلااام

دعاء مواجهات يقول...

شهرذاد

مهو الحيط دلوقتى

مبقاش يجيب همة ياقمر


نورتى

نونو يقول...

دودو حبيبتى وحشتينى جيت اشال عليييييكى
مع انى لسة كنت عندك بس رخامة بقى عاااااادى
وحشتينى

دعاء مواجهات يقول...

كنارى

هى ساخرة اة

بس مش متهيألى هجائية

انا مشتمتش حد فيها خاالص

نورتى

دعاء مواجهات يقول...

سنو وايت

ابدا ياجميل

تخريفاات الوحدة يعنى وانا قاعدة كدة لوحدى

مفيش سبب معين صدقينى

نورتى

دعاء مواجهات يقول...

رحيل

الله يبارك فيكى

ان شاء الله

قريبا

نورتينى

دعاء مواجهات يقول...

حمامة

فينك من زمااااااان

ليكى وحشة

نورتى بلوجك

دعاء مواجهات يقول...

نيجرو

مهو لو قولتلى الواحد يعرف يزعل

من نيجرو ازاى كنت زعلت.....


مااشى يامان

مقبولة منك

ولا يهمك

ربنا يعينك ويوفقك

وابقى حااول تفتكرنا.. حاول ..حاول

نورت

دعاء مواجهات يقول...

همس الأحباب

أستاذنا خالد

ربنا يكرمك

اتمنى كلامى يعجبك ديما

واكون قدر رايك دة

نورت مدونتك

دعاء مواجهات يقول...

- ميوشة

حبيب قلبى

اللى عايش فى دور الدكترة اليومين دول

ربنا معاكى ويعينك

نورتى

دعاء مواجهات يقول...

أمجد

ياترى غيرت رايك من انهى ناحية بقى؟؟

عاوزة اعرف بجد


وياريت تقول بيتين الشعر


نورتنى

دعاء مواجهات يقول...

دكتور بهدوء

منتظرينك يادكتور

عاوزينها عودة قوية

نورتنى واسعدتنى بالزيارة الخاطفة

انت اة مرديتش تشرب الشاى بس انا مقدرة

ربنا يعينك..

دعاء مواجهات يقول...

قلب ينبض لله

لا بجد انا كدة هتغر بقى

رايك دة بجد

اتمنى انى اكون استاهل نصفة

نورتينى

دعاء مواجهات يقول...

مصطفى ريان

أشكرك لرأيك

وردك على الاخ نادر


نورت البلوج

دعاء مواجهات يقول...

momken

اية ياعم انت جاى تسيح هنا ولا اية


احبسكم لية

دا اان حتى ماليش ف السياسة

بعد كدة تعلق بصوت واطى مش تلم علينا الجيران

نورت..

دعاء مواجهات يقول...

بيرى

مش عارفة لية بيجيلى احساس

انك بتكتبى وانتى واقفة

ومستعجلة

منورانى ديما ياقمر

دعاء مواجهات يقول...

محمد مارو

اكيد واحب اعرف تفاصيل اكتر

نورتنى..

دعاء مواجهات يقول...

نونو

بجد القلوب عند بعضها

انا كمان كتير بفتكرك

ميرسى ع النبؤة دى

اتمنى تتحقق

نورتينى

ليكوريكا يقول...

مليش في السياسه

يا عالم ياللي فوق

وماله طاب الطناش ؟

ده حتي كله ذوق !


مش عاوز ابقي رئيس

والناس تقوللي ياريس

بحب يوم الخميس

انزل بلدنا واهييس :) !


سياسة ايه يا جدع

روح هاتلي برجر وكاتشب :)

وطنا فيه البدع ...

بصراحه حاله مشقلب !


سياسة ام علي

هيا اللي ماشيه فبلدنا

سيبوكوا مالسياسه

وهاتولنا حاجه تفيدنا !


صدقني يا عم بوش

وغلاوة كونداليزا

سياسة كَفرنا

طعمه وحلوه ولذيذه !


الحزب اللي عملته

حزب الكشري بدقه

بصراحه اللي أكَلته

خلاني مقلشي لأه !


والشعب كله واكل

طبعا موش عالقفا :)

ومفيش حد عاطل

والامه مثقفه !


وهرجع اقولها تاني

مليش غير في الأغاني

سياسة يعني صداع

موش عاوز اوجع وداني :)


من وحي كلماتك ومواجهاتك

ليكوريكا

واسف عالتقصير بس بجد انا مقصر مع الناس كلها

سامحوني بقي

ويارب التفاعل ده يعجبك

سلام فور ناو

ليكوريكا

مدحت محمد يقول...

اولا هى حلوة جدا كبداية كتابة عامية

استمرى واقرى كتير ثانيا كموضوع بقى

مفيش حد مالوش فى السياسة بالذات فى مصر

لان احوال البلد تضطر اى حد انه يبقاله فى السياسة

مشمشة كامل يقول...

بصى انا بس عايزة اعرف يعنى اية ماليش فى العوء الى انتى كاتباها اوك ثانيا عايزة اقولك حاجة هو من حق اى حد يعلق يشتم فى الى معلقين ؟ بليز اريد الرد على مدونتى مشمشة كامل سعد الدين

Ahmed Kamal يقول...

تصدقي بقى دلوقت بس اقتنعت إنك 10 على 10 في السياسة :)

عايزين نشوف تجارب كتير إن شاء الله

Mero.. يقول...

ايه الحلاوة دي ؟؟
بتكتبي شعر كمان ..ما شاء الله
انا كنت هنا قبل كدا بس اجلت التعليق شوية كدا عشان اتكيف بالقصيدة..
ربنا يحفظك..
بس كدا بقى لكي في السياسة
تحياتي :)

مشمشة كامل يقول...

بصى اولا مرسية على تعليقك عندى بس انا زعلانة منك عارفة لية يا مواجهات
المواجهة الاولى حبيبتى لما تقولى فى تعليقك على مدونة على صوتك بالغنا فوقو بقى من الى انتم بتشربوة وانت هتعملهم علينا معناة تعليقك ان معلقين سهل يضحك عليهم بكدب عارفة يادعاء رغم انى اكبر منك بسنة بس عايزة اقولك كلمة انا مؤمنة بيها
الكدب اكتر حاجة بتتحس عارفة يادعاء فاتك حاجة مهمة اوى اوعى تحكمى على حد مش تعرفية الانسان الى بتردى علية حد صادق اقولك لية
دليل بسيط اوى حبيبتى لما حد يقول على نفسة انا بحب اكون فى يوم من الايام من الذين يظلهم الله بظلة حد بيتمنى الجنة هنقول بيرسم نفسة علينا بس حبيبتى ازاى ارسم نفسى على الخالق
ونقطة كمان عجبتنى بصراحة صاحب مدونة انة يقول انة غير مثالى يبقى حد صادق وبالاضافة كمان يادعاء انا زى اختك بردة مش يصح طلعينا اغبية او يضحك علينا وطلعى صاحب مدونة كداب لما هو كداب بتسلمى علية لية الطيور على اشكالها تقع صح ولالا دة مش هجوم حبيبتى بس عشان انا زى اختك بوضحلك بس بجد ربنا يكرمك وبلاش تقولى لحد اكبر منك واد انا سورى ماليش ادخل بس انا مش اعرف الراجل دة غير 70% بس صدقينى حسيت صدقة فى كلامة يادودو زى ماانا حسة انك امورة وهنبقى صحاب ياريت تعتبرى فرق سن دودو بليز وخصوصا لو حد صادق ياسياسية لاالة الا الله حبيبتى

غير معرف يقول...

دعاء

السياسة عندك بقت ملوخية

عموما انا بأكد للمرة المليون إن السياسة بتعمللي صداع في صباع زجللي الصغنن

ارحمو صباعي شوية

فاتيما يقول...

دودو
معلشى جيت متأخرة
بس تأتى متأخراً خير من أن لا تأتى أبداً
القصيدة حلوة جدا
بس الأحلى
فكرتها
أحييكى عليها
تحياتى يا حبيبتى

الرسائل الرومانسية يقول...

مدونة جديدة نرجو الزيارة وابداء الرأى

دعاء مواجهات يقول...

ليكو ريكا

اية الابداع الجامد دا بس ياراجل

ربنا يعينك

مقدرين مشغولياتك

نورتنا

بيس

دعاء مواجهات يقول...

مدحت محمد

اشكرك ع رايك

واكيد القراية اهم حاجة

نورتنا

دعاء مواجهات يقول...

مشمشة كامل

اولا: ماليش ف العوء يعنى اللف والدوران والطريق اللى مش سالك)

ثانياً: قولتلك طبعا انة مش من حق حد إنة يعمل كدة

ووضحتلك إن صاحب المدونة المذكورة أخ ليا وكلامى كان كلو هزار مش اكتر وكنت متخيلة إنة هيفهم دة بس للأسف دة محصلش

عاادى سوء تفاهم سوء تقدير للأمور عشم زيادة فى غير محلة..

كلها حاجات ممكن تداركها ..

وطوول ما إحنا عايشين بنتعلم ..

بيس..

دعاء مواجهات يقول...

afew good men

هههههههههههههههههههههه

ومالو ملوخية ملوخية

هو فية احلى من الملوخية

سلامة صباع رجلك الصغنن

نورتنا

دعاء مواجهات يقول...

فاتيما

القمر يجى وقت ما يجى

بس لازم تعرفى ان البوست مش بعتبرة نزل

الا لما بشوفك منورااة

بيس ياجميل

canary يقول...

الهجاء مش يعنى شتيمه انتى بتهجى وضع
واعتقد ان الكلام معناة واضح هو ساخر من وضع وبيحمل الرفض والهجاء ليه

Amgad يقول...

غيرت رايي للاحسن كتير بجد يا دعاء
بيتين الشعر مش مهم بقي
لاني بقولك نجيب سرور


خالص تحياتي

دعاء مواجهات يقول...

;cnary

اشكرك ع التوضيح

سورى اصلنا ف المدرسة اخدنا هجاء يعنى شتيمة

ههههههههههههههههه

نورتينى

دعاء مواجهات يقول...

amgad

الحمد لله انة للاحسن

بس ممكن اعر ف لية كان

رأيك مش احسن ف الاول؟؟

نورتنى

دعاء مواجهات يقول...

ميرو

كويس والله ان القصيدة كيفتك

بجد انا مردتش عليك ولا ع الى قبلك

زهايمر مبكر

هقولك لية

سلااام