الاثنين، يونيو 23، 2008

أستودعكم الله ( تحديث)

تحديث::
السلاام عليكم جميعاً
أنا وصلت مصر من 3 ساعات ونصف أنا بجد كنت مفتقداكم اوى اوى
كل واحد او واحدة قالتلى على دعوة انا دعيتها الحمد لله بنية
صافية...
ومش لاقية كلمة شكر... ولا كلمة حب ... تعبر عن إحساسى ناحية أجمل
ناس ف
الأرض اللى كانوا متابعين المدونة وواخدين بالهم منها وبيسألوا عنى
وكل حد دخل عندى لأول مرة وعجبة كلامى...
وكل حد جميل دعالى بالهداية.. والمغفرة
وكل حد كان نفسة أدعيلة دعوة معينة انا الحمد لله فعلا دعيت بكل الدعوات اللى اتنوا كنتوا عاوزينها لكل شباب المسلمين وخصيت شباب مصر كمان..
وأنا الحمد لله راجعة متغير فيا حاجات كتير
وواخدة قرارات كتيير .. أتمنى ربنا يعينى عليها..
عندى كلاام كتير اوى اوى اوى ورغى ياما عاوزة أرغية معاكوا..
بس أنا تقريباً من يومين منمتش.... وميتة تعب...
هنام وأفوقلكوا وأحكيلكوا على كل حاجة فى الرحلة الجميلة دى..
وهتستحملونى يعنى هتستحملونى.. ما انا مريحاكوا منى من زماان..
لو حد لاحظ : إنى مقولتش كلمة (وحشتونى)
فدة لأنى شايفة إن الكلمة دى متوصفش إحساسى بإفتقادكم وحبى ليكوا كلكم بجد الكلمة دى صغيرة اوى بالنسبة لإحساسى...
ربنا يديم الحب بيننا
ديما ياارب..
سلاام مؤقت
_________________________________________________________





السلاام عليكم

(محدش يتخض من العنوان)

أكتب إليكم بيد واحدة بعد أن عجزت يدى اليسرى تماما عن أداء المهام المساندة لليد اليمنى.... حتعرفوا ف الآاخر لية...

المهم البوست ونظراً لنفس الظروف منقسم لجزئين :



الجزء الأول:

واجب وصلنى من أخين عزيزين الأول الأستاذ (طارق مؤمن) صاحب مدونة (عابر سبيل) والعزيز (فوكس) صاحب مدونة ( الكيت كات) ..

السؤال الأول :

إذكر إسم من طلب منك حل الواجب؟
بصوا فووق وإنتوا تعرفوا

السؤال الثانى:

إذكر القواعد والقوانين الخاصة بهذا الواجب؟
جارى الكتابة والحل بدون تفكير

السؤال الثالث:

تحدث عن ست أشياء قد لايكتشفها من يقابلك للمرة الأولى؟؟؟؟؟؟
جينا بقى للصعب... هحاول أجاوب ع أد ما أقدر

1- لو جوايا حزن كبير بقدر أخبية عن اللى حوليا واتعامل عاادى .
2- طيبة لدرجة الهبل بس بحاول أظهر العكس .
3- عصبية وممكن أدارى عصبيتى عن الأغراب بس أصحابى وقرايبى لأ..
4- مش بعرف أخبى أخبارى عن الناس اللى بحبهم حتى ولو دة مفروض يحصل مش بعرف أسكت ..
5- اللى يشوفنى يفتكرنى ناصحة اوى بس الحكاية مش كدة اوى ..
6- بقدر أفهم الإنسان اللى بيتكلم معايا ولو كذاب بحس ومش بظهر إنى فاهماة كويس..

السؤال الرابع:

حول الواجب لستة مدونين وأخبرهم بة؟


(العرضحالجى- ميوشة - إنجى- إيمو (برميل فاضى) -دكتور بهدووء - عبدالله (واحد إنسان) )



جاارى العمل.......

نيجى للجزء التانى اللى أكيد كلكوا منتظرينة...

قولوا ورايا الأول..

سبحان الله وبحمدة... سبحان الله العظيم
سبحان الله وبحمدة... سبحان الله العظيم
سبحان اللة وبحمدة ... سبحان الله العظيم

يارب لك الحمد كما ينبغى لجلال وجهك وعظيم سلطانك..
يارب لك الحمد كما ينبغى لجلال وجهك وعظيم سلطانك..
يارب لك الحمد كما ينبغى لجلال وجهك وعظيم سلطانك..


ياحى ياقيوم برحمتك نستجير فأجرنا...
اللهم آتنا فى الدنيا حسنة ً وفى الآخرة حسنة ً وقنا عذاب النار.
اللهم آتنا فى الدنيا حسنة ً وفى الآخرة حسنة ً وقنا عذاب النار..

ربنا لاتسلط علينا بذنوبنا من لايخافك ولا يرحمنا...
ربنا لاتسلط علينا بذنوبنا من لايخافك ولا يرحمنا...

ربنا لاتؤاخذنا بما فعل السفهاء منا...
ربنا لاتؤاخذنا بما فعل السفهاء منا...

اللهم لاتجعل الدنيا مبلغ علمنا ولا مطمع همنا....
اللهم آتنا من لدنك رحمة ً وهيئ لنا من أمرنا رشدا...
اللهم إعفوا عنا وإغفر لنا وإرحمنا برحمتك يا أرحم الراحمين...

اللهم إسترنا فوق الأرض وتحت الأرض ويوم العرض عليك......


رَبَّنَا لاَ تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلاَ تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلاَ تُحَمِّلْنَا مَا لاَ طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنتَ مَوْلاَنَا فَانصُرْنَا عَلَى الْقَوْمِ الْكَافِرِينَ) ـ صدق الله العظيم ـ


سبحان الله وبحمدة... سبحان الله العظيم
سبحان الله وبحمدة... سبحان الله العظيم
سبحان اللة وبحمدة ... سبحان الله العظيم


وآخر دعوانا أن الحمد لله رب العالمين.. (أحلى كلام علشان تفتكرونى بالخير ديما) ً...

(الخميس القادم ) تقلع بى الطائرة بإذن الله( للمملكة العربية السعودية) ( لأداء العمرة ) رزقكم الله بها ونفعكم بخيرها وأجرها ..

وأحب أشكر كل الناس الى دعولى قبل كدة لما قولت إنى نفسى أسافر فى عمرة وإن شاء الله هدعيلكوا كلكم بظهر الغيب..

أى حد عاوز دعوة معينة يقوللى عليها وان شاء الله أكتبها وأدعيهاله
لو دعوة خاصة إبعتلولى ع الميل وأنا هشوفها وأكتبها بردوو.. وربنا ييسر ويغفرلى ويتقبل منى قولواا ياارب...

يستمر تلقى الدعوات حتى فجر الخميس بعد كدة هكون سافرت بقى ..

تعرفوا نفسى فى إية؟؟

نفسى أموت هناك بعد ماربنا يغفرلى ذنوبى إن شاء سبحانة وتعالى..

هغيب عنكوا بتاع 16 – 17 يوم بالكتير إبتداء ً من الخميس القادم 26/6/2008 إدعولى ربنا يتقبل منى ويغفرلى
قولوا يااارب....

آة نسيت أقولكوا أنا إدينى وجعانى من (حقنة التطعيم) اللى بياخدوها المسافريين ...

أستودعكم الله..

الجمعة، يونيو 20، 2008

صفر يمين... وصفر شماال

صفر يمين وصفرشمال.....
صفر فووق وصفر تحت ياترى انت مين فيهم


رغم عدم الوفاق بينى وبين الحسابات والرياضيات بشكل عام إلا أنى أقدر وبشدة رقم واحد فقط .......................
ويمكن كمان ميكونش رقم لأنة مش محسووب أصلا من ضمن الأرقام والرقم اللى ماهووش رقم أصلا دة هو ( الصفر) وبالرغم من الإستهانة بة إلا أنة يعطى قيمة كبرى لما يلية من أرقام


ولاقيت إن فية علاقة قوية أوى بيننا كمصريين بسطاء( وهذا بإستثناء طبقة علية القوم)وبين الرقم اللى مهووش رقم آآة الصفر اللى بيمثلة شريحة عريضة من المجتمع المصرى أى الأفراد الغير مؤثرين فى القررات العليوى اللى بتخص الأرقاام اللى بجد بس تفتكر هما بقوا أصفار كدة برغبتهم أم بالقدر أم بفعل مباشر من السلطة .......

وبالتامل الفاحص لوجوة وأشخاص الشعب المصرى تجد أن عددهم فى الليمون أنا مش بحسد ولا حاجة طبعا لان شعبنا دا ما يجوزش علية حسد بس لاقيتنى بتخيل كل هذة الاشخاص والوجوة وكانها أصفار نعم أصفار أى شئ ملووش أى قيمة بس ياترى فعلا الصفر مالووش اى قيمة ؟؟؟

لاطبعا الصفر زية زى اى حاجة فى حياتنا لو اتحطت فى المكان الصح بيبقى ليها معنى صح يعنى الصفر على اليمين لا يمكن ان يتساوى باى حال من الاحوال بالصفر على الشماال فذلك يعطى قيمة كبرى وتلك لا قيمة لة وبالمثل تطبيقا على كل الاصفار المصرية الشخص الصح اللى فى المكان الصح بيكون لية قيمة وتأثير حتى وان كان محدودا فالمهم أن لة تأثير فى حياة من حولة وليس صفراً يساريا لاقيمة لة
مش بس كدة لا دا كمان الاصفار أنواع منها من يملك ومنها من يحكم ومنها من جمع بين الاثنين ولكل تأثير حسب موقعة وسلطاتة ولكن....

التأثير هنا يكون جبرى وليس إختيارى رغما عن أنووف الأصفار جميعاً يمينها ويسارها ولكل صفر كبير الصفر الأكبر الذى يتحكم فى لعبة الأصفار من لايقال لة (لا) أو( كيف) أو ( لماذا ) لكن النتيجة فى النهاية أننا جميعا أصفار أمام اليد الكبرى المتحكمة ولكن بما أننا جميعا أصفار

لما لانحول أنفسنا من أصفار يسارية لاقيمة لها إلى أصفار يمينية تعطى قيمة للرقم الذى يسبقها بس يا ترى دا مسموح ولا أصول اللعبة إن صفر الشمال يفضل شمال وصفر اليمين يفضل يمييين؟؟؟

___________________________________
أدعوكم لزيارة مدونة (على حريتنا)
مدونة كل إنسان إختار أن يحيا على حريتة
http://3la7orytna.blogspot.com

الاثنين، يونيو 16، 2008

لست ٌ ملاكا ً


لستُ ملاكاً

لستٌ ملاكاً
ولستُ أملك أجنحة
ليس بى ما يدعوا

لتقديسى...
وتلك هى المشكلة.........

هذى يدان وتلكما قدمان
وهذا قلبٌ نابضُ

ما يعلو عنقى ..
دوماً.......ما

تحكمة الأسئلة.....

على شاكلة…
لما أتيت؟
لما أحببت؟

ولما رحلتَ بلا أجوبة؟؟

لست ملاكاً
قلتها ….
رددتها….
لم تقنعك…..

أأذهلتك أفكارى؟؟؟
أم أذهلتك الأقنعة؟؟؟

فلا أحد يمكنة أن يحيا
بلا أقنعة....
إبحث.......
وفتش .....
فإن وجدت ..

إناثٌ بلا أقنعة...
لك أن تلومنى ...
وقتها.....

قناعى معك....
كان قناع...

الصدق..
لكنة.
لم يعجبك........
لم يقنعك.........

أسئلة تموووج بخاطرى.....
تحطم أشرعتى..
وتهزم قاربى........

إن كان حبك لى
كما..
أشعرتنى...

لما الرحيل؟ لما الفراق؟؟
بلا سبب...

صمتك يقتلنى
يمزقِ أشلائى
ويعصف بوجدانى

تكلم...
إنطق...
قل حتى أنك

كرهتنى
فلن أبالى
بعدهاااا ........

لست ملاكاً


قد قلتها......
_______________________________________________
أدعوكم لزيارة مدونة (على حريتنا)
مدونة كل إنسان إختار أن يحيا على حريتة

الجمعة، يونيو 13، 2008

لو لم اكن مصرياً ... لإرتحت نفسياً





لو لم أكن مصرياً .. لإرتحت نفسياً؟؟؟

لو لم اكن مصرياً لإرتحت نفسياً ::: هكذا قالها وجعلها شعاراً له فى الغربة بعد أن ذااق كميات لابأس بها من السخرية والإستهزاء من أهالى البلد العربى الذى يعمل به.. كطبيب

والسؤال الذى يطرح نفسة طرحاً الآن لماذا تلك السخريات والخفات من الناس او الشعب دة هل لأنة خفيف الظل بفطرتة؟؟ - بالطبع لا- فلم يخلق بعد من الشعوب من فاقة خفة ً ف الدم..(الشعب المصرى)

طب هل لأنهم رأو من هذا الطبيب فى تصرفاتة أو مظهرة ما يميزة بشكل يدعو للسخرية؟؟
بردوو لأ

يبقى أكيد أكيد لأنة كان بيستهزء منهم وبيعاملهم بتعالى وعجرفة متناهية؟؟؟ بااااردو لأ
الله حيرتنا معااك ما تجيب م الآااخر ياعمنا وتقوول لية؟؟
(- إحنا جايين هنا نحل الكلمات المتقاطعة ولا إية هيبقى فى الشغل وهنا كمان أما غريبة-)

أقولك يامعلم الحكاية بقى إن الشعب بتاع الدولة دى من أكتر الشعوب العربية عجرفة وعنجهية وشايفين إن مفيش فى الدنيا غيرهم ولا أحسن منهم – طبعاً البترول يعمل أكتر من كدة –

اللهم طولك يارووح ياعم لخص وجييب م الآاخر...

الحكاية ياسيدى إن فضيحتنا كشعب مصرى (بقت بجلاجل) وسط شعوب المنطقة العربية منها والغربية بعد أزمة- رغيف العيش- والنااس اللى بتموت بعضها علشانة واحنا زى ما انت عارف فى زمن العولمة والفضائيات يعنى متقوليش هما عرفوا إزاى – هناولك على طوول –

يعنى م الااخر زمايلة وكل اللى حوالية بيعايروة بالمجاعة اللى فى بلدة والشحاتة والسلف اللى احنا فيهم دا بعيداً عن المعونة طبعا ً -لأنها حق طبيعى من حقوقنا القومية-

وعلشان كدة – إنت نمت ولا إية – الراجل الطبيب المصرى دة تعب نفسياً جداً فخرجت العبارة(لو لم أكن مصرياً لإرتحت نفسياً ) منة بكل تلقائية وعفوية تااامة .....

سؤال آخر يلوح لى فى الأفق..(حلوة يلوح دى) – معلش إستحملنى –
هل ياترى رد الفعل على قدر الفعل ذاتة ؟؟؟ يعنى هل فعلا ً اللى بيحصل فى بلدة واللى نتج عنة معايرة أصحابة ليية.. يستحق إنة يطلق عبارة زى دى ويجعلها شعاراً لة فى الماسينجر كمان؟؟؟

أجاوبك أنا بقى- أمال انا بعمل إية هنا كيس جوافة مثلاً- ؟؟؟
طبعاً لا وألف لأ لأن كتيير من دول العالم فيها اللى عندنا وزيادة ومبيعملوش كدة خارج بلدهم ياعزيزى التسييح للبلد وانت خارجها – خيانة عظمى- من وجهة نظرى المتواضعة


عندك مثلاً الراجل المسئول الكبير فى مجلس الشيوخ الأمريكى- زى مجلس الشعب عندنا-
كانوا مستضيفينة مرة فى التليفزيون بصفتة الداعم الأول لمصالح المنطقة العربية والمؤيد لحقوق الشعب الفلسطينى واللبنانى – ركزلى بقى فى الحتة اللى جاية دى – (والمعاارض الأول لسياسات الرئيس بتاعة بوش ...)
سامعة واحد بيقوللى وهو الراجل دة بيدعمنا لية ؟؟؟ ...اقولك بخلاف إن لية جذور عربية لبنانية هو واحد ملوش مصلحة مع بوش ولا يهمة رضاة – سامعنى – ولا يهمة رضاة يعنى نقدر نقوول واحد عندة ضمير...

المهم بقى هتقوللى إية العلاقة بين الفيلم التسجيلى دة والفيلم الأولانى بتاع الدكتور المصرى؟؟؟ أقولك.. المذيع المصرى سألة لماذا تعارض سياسات بوش؟؟ أو ما الوجه السئ للأدارة الأمريكية من وجهة نظرك؟؟

الراجل رد قاال إيية؟؟؟
نط وإتنفض والدم غلى ف عروقة؟؟ لااااااا
الحمااس خدة وقالوا انا مش هتكلم عنة لأنة ميستاهلش أجيب سيرتة على لساانى؟؟ لاااااااااااا بردوو
الوطنية خدتة وقعد يعدد فى مساوئ بوش؟؟؟؟؟؟؟؟ لااااااااااااا ابداً

أقولك أنا قاال إية الراجل رد وبكل هدوء : أنا لاأنتقد رئيسى خارج البلاد (اللى هى أمريكا يعنى))

ولا تعليق.........

يبقى بجد عيب علينا أوى نلعن ف البلد واللى جابوها وللى شالوها واللى حطوها وإحنا بعيد عنها
طب إفرض شرقت هتبقى تجيبلها كوباية مية تكفيها منين ياخفيف؟؟؟؟

وبعدين لية اصلاً نحمل مصر الوطن أخطاء ومساوئ مصر الحكومة والحكام ؟؟
سؤال نفسى حد يجاوبلى علية بجد .... وبتغاظ أووووى لما حد يعيب فيها وكأنها هى السبب فى كل المشاكل اللى إحنا فيها والغم والقهر المنيل بزفت أسود على دماغنا دة .....

إشطااااااااط إشطااط إية بس فى اللى احنا فية دة...... جننتونى قصدى أقوول....

زفتاااااااااااااااات...



الاثنين، يونيو 09، 2008

متطرفة









مذكرات متطرفة

لم أعد أعى هويتى
السياسية

فقد فقدت الأيديولوجية
صرت متطرفة
أو هامشية....

لاأدرى تماماً
فقد أنسانى حبك
ماذا تعنى الليبرالية؟؟؟

لم أعد أنتمى
للماركسية
لم تعد تؤثر فيى
خطب جيفارا الحماسية....

ولا نظريات لينين القوية..
ولا حتى البلشفية

فقد إنتزعت منى
قدرتى على البقاء حية

لم أعد أستطيع الإنتماء لغيرك..
أحبٌ هذا أم هو دربٌ
من الأسحار القوية؟؟؟؟؟

أخبرنى فقد فقدت أيضاً
قدرتى على التفكير الذكية

أخبرنى لما كل تلك الديكتاتورية؟؟؟
أحبٌ هذا أم إمتلاك بلا تضحية؟؟
تاهت منى المعانى
واستوت لدى
النازية... والمواطنة اليوتوبية ..

فاشىٌ أنت فى حبك لى
فقد قضيت على ماتبقى
لى من أحلام ديمقراطية

نادمة ٌ أنا؟؟؟؟
لااااااا اااااااا....

لن تصدر منى يوماً
فقد إخترتك مذهبا ً
عقلياً......

تقبل منى إعتزاراتى
على
ما صدر منى من

أفعال بشرية..
وأقوال بشرية..
وحماقات بشرية..
وإعتقادات بشرية..

بأن الملائكة
فى السماء يحيون
حياة أبدية...

فلم يخطر ببالى يوماً
أن أقابل منهم أحداً..
أن أحب منهم أحداً..
أن يملكنى منهم أحداً..

يا أحداً لم أرى
مثلة ف البشرية
سامحنى على ما بدر منى
من افعال عشوائية
......................






الجمعة، يونيو 06، 2008

فاصل ونوااصل



إستراحة تاجية ونوااصل المواجهاات.....

وصلنى تاجين من إتنين بحبهم اوى وبيتابعوونى اوى وبحب كلاامهم اوى اوى التاج الاول والمختلف كل الإختلاااف من (عبدالله) صاحب مدونة( واحد إنسان)..
أما التانى فمن حبيبة قلبى واللى من اول تعليق ليها عندى حسيت انى اعرفها من زماان اوى (نور)
صاحبة مدونة سيبك إنت والبنوتة دى بجد جميلة اوى وزى العسل ياجمااعة
..

بالنسبة للتاج الأول انا بقول مختلف لأنة من تأليف وإخراج وإنتاج (عبدالله غنيم) بنفسة وأنا بقى يعجبنى العقل المنتج والمبتكر ودا بالرغم من إنة فى الثانوية العامية ودى حاجة طبعاً يحسد عليها إن عقلة فى ظل الظرووف المنيلة دى لسة شغاال.....


والتاج بيقوول..

- هل سبق أن فكرت فى أفعال مجنونة؟
يووووووووووة كتيير متعدش.

- هل نفذت أحد هذة الأفعال؟
آة بس اللى بنفذة منها مش بيكون مجنون اوى يعنى بيكون نص نص أهم حاجة ميضرش حد غيرى.

- هل علم بها أحد؟ وما رد فعلة عليها؟
أصحاابى عاادى بيقولولى انتى مجنونة وأن بعترف بردو إنى بموووت ف الجنون .

- ما هو إحساسك بعد أن قمت بهذة الأفعاال المجنونة؟
.يااااااة محكيلكوش ياجماعة بصراحة بحس بإرتياح غريب ونعنشة وإنى لسة عندى مساحة من الحرية علشان أعمل اللى يخطر على بالى بدون ما حد يقفلى فى زوورى(فاهمينى طبعاً) .

- هل ندمت على فعل جنونى كاد يودى بحياتك؟
ندمت؟؟ لا أنا أساسا شايلة كلمت ندم دى من قامووس حياتى لأنى مقتنعة إنى أقدر آخد قراراتى وبالتالى لازم أكون أدها وأكون مسئولة عنها- كما أننى مقتنعة للغاية- بالجملة الشهيرة
(وتفييد بإيية ياندم ياندم) ....

أما بقى لحتة - يودى بحيااتك- أنا منكرش إنى أحياناً بفكر فى الإنتحار بس لسة منفذتهاش علشان لو نفذتها مش هلحق أندم حتى أما الأفعال الجنونية العادية فهى لاتصل أبداً لحد القرب من الموت – مش للدرجة دى يعنى- لسة فية شوية عقل بردووو.

- هل سبق ووقفت أمام المرآة لتقول لنفسك أنك مجنون؟
ههههههههههههههههههههه كتيييييييييييييييييييييييييييييييييير ...

- سؤال من عندى انا بقى ( إذكر أمثلة لتلك الأفعال المجنونة وسبب تسميتك لها بالمجنونة وهل هى مجنونة فعلاً ولا إنت موسعها حبتيين؟؟؟
- كمان سؤال من عندى سامحونى ( ما هى الأفعال المجنونة من وجهة نظرك؟؟؟

- ياترى هتبعت التاج دا لمين؟؟؟ - سؤال يطرح نفسة طرحاً-

نور حبيبتى
ضياء باشا
وزة أنين الحزن (لما ترجع يعنى)
البرنس الغزالى( مصر ياما يابهية)
نيجرو الضربشمسااوى
....


التاج التانى ف السريع كدة...

-إذكر خمسة أحلام تخص ماضيك وتحلم فيها بتغيير الأشياء ماذا ستعدل وماذا ستترك؟
أولا بمناسبة الأحلااام أنا من النااس اللى بتحلم كتير جدا جداً يعنى مكن أنام ساعة أحلم 3 أحلاام لأ وإية أحلام كما الأفلااام زى ما بسميها وبحكيها لأصحابى وبتبقى غريبة اوى المهم خلينا ف السؤال..

1- كنت بحلم أكون مٌصلِحة- بفتح الحاء- يعنى انى احااول أصلح من الناس والأشياء وخاصة الشباب اللى فى سنى او حتى أكبر وكنت حاسة بمسؤلية كبييرة اوى ناحيتهم –ومازلت- لكنى إكتشفت إن رغبتى دى مش كافية وإن كل شخص ليية شخصيتة اللى محدش يقدر يأثر فيها بسهولة فتقدر تقوول إن الحلم دة بدأ يبعد أووى...

2- كنت بحلم أدخل كلية - إقتصاد وعلوم سياسية- أصلى كنت شايفة نفسى فيلسوفة أوى وكنت خلاااص دخلااها ع فكرة بس - عمو مكتب التنسيق موافقش- وأنا مقدرش أكسرلو كلمة .. وبعدين - آداب - من علوم سياسية متفرقش كتير يعنى ...

3- كنت بحلم ومازلت إنى أكون حاجة ليها لازمة فى الحياة بمعنى انى مش زى ما جيتها أخرج منها م الآخر نفسى تكون ليا بصمة وعلامة ف كل شخص وكل شئ حوليا وأعمل حاجة كويسة الناس تفتكرنى بيها...

4- كنت بحلم بالقوة الذاتية بمعنى انى مضعفش ابداً لأى سبب ولا لأى حد وأنى أبقى أقوى من ان اى شئ يكسرنى او يهزنى ممكن نقوول الحلم دا لسااة شغاااال...

5-
كفااية بقى أحسن خلاااص هعيط ....


- إذكر خمسة أحلام تخص مستقبلك؟

1- أموت وربنا راضى عنى حق الرضا .

2- ما أخلييش أى حد يزعل منى أبداً وأصالح كل حد زعلان منى .

3- أنجح فى المجال الى ربنا هيعيننى وأشتغل فية .

4- ماما وبابا يرضوا عنى بجد وما أزعلهومش أبداً . (صعبة دى)

5- أكون أم ناجحة جداً فى بيتى ويكون ليا أولاد وبنات زى العسل وزوج يرضى عنى ويحبنى مووووووت...

- إذكر شخصين متواجدين فى حياتك حالياً كنت تود وجدهم قبل ذلك؟

1- ريما صحبتى الأنتيم لأنها بجد مرايتى ورووحى اللى متخيلش ممكن اعيش بدونها ازااى..
2- عالم التدوين والمدونين كلهم كدة على بعضهم ...


كفاية كدة بقى.. إوعوا أكوون طولت عليكوا
أنا أصلى بحب أجيب م الآااخر ومش بحب الرغى ..

سلااامووز

بحبكم أوى.........

الاثنين، يونيو 02، 2008

سألتوا نفسكوا؟؟ وقاالت إيية؟؟؟


سألت نفسى كتير؟؟؟ مارسيتش يوم على بر...


سالت نفسي كتير- مارسيتش يوم علي بر - ده مش مقطع من اغنية فيلم الشبح
للمتميز احمد عز لا بالعكس ابسولوتلي ده لسان حالي الداخلي او اقدر اقول ده
الحوار اللي دايما يدور داخل اعماق نفسيتي المحطمة علي صخور الحقيقة الحياتية
المرة وانا بتساءل في لحظة من لحظات الصفا النفسي القليلة جدا هوا انا

ليه واللي زيي بندخن ؟يعني ليه نشرب سجاير وشيشة وجوزة كمان وساعات
كتيرمتغمسين بالذي منه اذا لزم الامر مع اننا عارفين ومتاكدين تمام التاكد انه
ضار جدا بالصحة ويسبب الوفاة وبيجيب امراض الدنيا كلها ومن ضمنها المرض
اللي مايتسماش ده اللي راسمينله اخوانا المسئولين رسمة ظريفة لطيفة كده علي
ضهر كل علبة سجاير عبارة عن رئة مصابة بذلك المرض اللعين وبدوري هنا

اتساءل والكل يتساءل معايا هوا التدخين بس هوا السبب الرئيسي ف البلوة
السرطانية دي ولا هوا يعني مقدروش ع الحمار هيتشطروا علي البردعة يروحوا يشوفوا
مبيدات والي المسرطنة اللي خلت كل محاصيل مصر من اقصاها الي دلتاها مش
اورجانيك بالمرة -والاورجانيك بقي بالشئ الفلاني-ولا يشوفوا مصانع الاسبستوس
ولا دخان مصانع الكيماويات طيب بلاش ده كله يشوفوا تصريحات وزراء الحكومة
الذكية اللي تجيب اكتر من المرض واخطر منه بمراحل يشوفوا السرطان اللي
استشري فيهم الاول قبل ما يرموا بلاهم علي سجايرنا حرام عليكوا يامسئولين
طيب بعد كل العوء والاشتغالات دي كلها ليه بندخن لحد دلوقتي ؟هوا ده

السؤال اللي بيطرح نفسه ومحتاج اجابة من الاجابات التالية لانه وزي ما كلنا
راسيين وفاهمين التيتة انه التدخين من غير سبب قلة ادب
من الممكن جدا وبالذات لاننا شعب فرعوني دماغه ناشفة جدا ولا حجارة
الاهرامات التلاتة انه يكون التدخين ده من باب العناد مع النفس علي خلفية هيا
يعني موتة ولا اكتر وخليها علي الله واحييني النهاردة وموتني بكرة او ماشي
مع مبدا انا ادخن اذا انا موجود وهكذا
لكن ارجع واقول لنفسي ممكن يكون بسبب تاني خالص هوا انه الممنوع مرغوب في
حياتنا ف البيت التدخين وحش ياحمادة ويسبب الوفاة ف المدرسة التدخين ضار
ياابني ويسبب الوفاة ف كل حتة الاعلانات والملصقات مالية الشوارع لا
للتدخين ولا للادمان
لكن ده برضه مش سبب كافي اننا ندخن ونملي رئتينا بالتبغ اللعين والقطران
وخلافه من مخلفات السيجارة المحترقة
لعل السبب فلوس زيادة مثلا عن حاجتنا اليومية -قطع لسان اللي يقول كده علي
حكومتنا الذكية -بقي هوا نظيف واعوانه خللوا ف جيوبنا فلوس اساسية عشان
يفضل منها لبند السجاير ده المصري من دول فيه اللي مكفيه وماشي طول الشهر
بالزق وشادد حزام الجوع علي بطنه زي ما حكومته قالتله ويمكن اكتر كمان
لكن فلوس زيادة نووووووووووووو- خبيبي انا مفيس ميزانية السنة اللي جاي ان
ساء الله خريستوا-
من الممكن كمان انها تكون مضيعة كويسة للوقت لكن ارجع واقول ازاي
يااخوانا ماهو فيه حاجات كتير اوي غيرها بتضيع الوقت يكفي قراءة نشرات الحكومة
اليومية او مشاهدة جلسات مجلس الشعب ف التليفزيون دي ممكن تضيع عقلك -ولا
مؤاخذة -مش الوقت وبس يعني ده مش سبب كافي برضه للتدخين اللعين ده
احتمال يكون تقليد للغرب او يكون السبب محاولة استرجال -من الرجولة يعني-
بدري شوية عن وقتها من بعض الشباب اللي بيدخن ومحاولة من كبار السن اللي
بيدخنوا يداروا بيها عجزهم الجنسي الطبيعي بسبب السن والمرض -او بكلمة
الطف واظرف واخف شوية نقول مثلا يداروا بيها قلة نسبة هرمون التوستيرون
عندهم ف تلك الفترة -فيتم استخدام السيجارة او غيرها كوسيلة الهاء وتعتيم
علي فاجعة قلة الرجولة
لكن ارجع واقول فيه حاجة مهمة جدا احنا ناسينها ومركونة علي رف الاحتمالات
وهي انه التدخين ممكن يكون سببه وراثي وبما اننا داخلين علي ايام توريثية
مفترجة -اووووووووي- وبما انه التوريث بقي ف كل حاجة وكل موقع ف حياتنا
ولاننا ف بلد الحضارة والحجارة وال50مليون فقير نلاقي انه ابن العامل بيطلع
عامل وابن المهندس مهندس وابن الدكتور دكتور -غالبا- وابن الوزير طبعا
هيطلع ايه يعني غير وزير وابن الباشا بيطلع باشا علي فكرة -ده للعلم- يعني
لكنه مجرد احتمال برضه
احتمالات ورا احتمالات ومافيش اي سبب مقنع لحد دلوقتي
طيب ايه السبب الحقيقي الممكن قبوله ف عادة التدخين السيئة دي
اكاد اجزم انه وفي خلال الكام وعشرين سنة الاخيرة-واخدلي بالك- دول زاد
عدد المدخنين علي مستوي المحروسة-والسبب معروف طبعا وواضح وضوح الشمس
والبركة ف البركة وحكوماته المتتابعة زي ما الكل راسي - لكن بجد جل ما
اخشاه-حلوة جل ما اخشاه دي !!!!!!!!!! في يوم اغبر من الايام من الايام المباركة
الكبري او الصغري-بمناسبة التوريث يعني- ان يتم اتهامنا اننا السبب
الرئيسي ف السحابة السودة لكن ارجع واعذر مدخني مصر من الجنسين لاننا في عصر
مبارك والحريات وعشان كده احنا اخترناه والفكر الجديد والحركات دي كلها فكان
ده سبب كافي وفعال انه الواحد مننا يلاقي حتة سيجارة يولع فيها وينفث
دخانها بدل مايولع ف هدومه ده لو كان لسه عنده هدوم يولع فيها اصلا وتيجي
فالاخر وتقولي التدخين ضار جدا بالصحة ومعرفشي ايه ياعم روح ماهو اصل اللي
مايعرفشي يقول تبغ
سمعت مؤخرا انه وبعد الحركة الافعوانية الاخيرة بتاعة الرئة المصابة
بالسرطان دي علي ضهر كل علبة سجاير هيتم استبدالها قريبا بصورة تانية اكثر خطرا
واكثر سوءا وهيا عبارة عن رسمة لسيجارة متنية يعني م الاخر كده وعلي
بلاطة سيجارة مش قادرة تصلب حيلها وتقف والكل طبعا قاريني وهارش الصورة
معناها ايه ويالحسرتنا نحن معشر الرجال بعد كده دي هتبقي مصيبة سودة ونكسة
جديدة ولا نكسة 67 وضربة ف مقتل لرجولة كل شاب وكل فتاة تجراوا وشبروا سيجارة
حتي وان كانت بفم فلتر
وسمعني سلام هاابطل السجاير واكون انسان جديد وهيييييييييييييييييييه