الخميس، مارس 27، 2008

يومياتى..




منوف طنطا رايح جاااى 2



وقفنا فين المرة اللى فاتت آة وقفنا عند القطار وناسة بصراحة يعنى أنا مش هعمل فيها أجنبية ولا حاجة ولا إن الناس دوول مفييش منهم بل بالعكس إكتشفت بعد أن أتممت الأسبوع الرابع أن هذا هو أصل المجتمع وأساسة ففية ترى الناس التعبانة الشقيانة اللى بتجرى على لقمة عيشها وفية تلاقى الناس اللى مفروض بيمثلوا الطبقة المتوسطة فى المجتمع المصرى واللى المفروض بردو إنهم يكونوا الموظفين (المفروض) تمام كدة يمكن ف البداية كنت مستغربة الجو وحاسة إنى فى مغامرة لذيذة من منطلق إن الواحد لازم يحتك بكل حاجة فى مجتمعة ويجربها علشان يعرف أكتر الحكاية ماشية إزاى
بس بعد كدة لاقيت إن الحكاية مش ماشية خالص بالعكس دى واقفة فى إشارة ولا إشارة شارع (القصر العينى) فى القاهرة الساعة 2 ظهراً والناس مخنوقة وتعبانة وزهقانة ومفيش ركنة ولا حتى تاكسى يوصلهم وحتى لو فية تاكسى مش عارفين هيوصلهم فين......
وعاوزة ألخصلكم تجربتى دى فى كام حاجة كدة....
الحاجة الأولى : إنى إكتشفت إن جو القطار(لما يكون فاضى) بيكون أمتع جو فى الدنيا للكتابة والتفكير وتوالد الأفكار وتتاليها لدرجة إنى ساعات مببقااش عارفة أودى الأفكار دى كلها فين فبلحق أكتب عناوين منعنا للزهايمر المبكر.
الحاجة التانية: إن القطار دة واللى بنتكلم عنة فى كلامنا كتيير وبنشبة أى حاجة مبتتأخرش ومبتقفش على إنها قطار طلع كل دا تهييس جامد مووز
وطلع القطار أكتر حاجة بتتأخر فى الحياة مرة كنت رايحة أركب قطار 11.30 لاقيت الدنيا زحمة وأنا عارفة إن الوقت دة بيكون فاضى فسألت هو فية إية قالولى أصل قطار 8.30 لسة ماجااشى فضحكت من جوايا وسكتت هقوول إية يعنى.
الحاجة التالتة: والأكثر أهمية من وجهة نظرى هو إنى عرفت أو تقدر تقوول إتأكدت إن الناس فكرتها عن المنايفة سيئة للغاية بل سيئة بشدة بل سيئة بعنف وبصراحة بقى أنا كلو عندى إلا الحتة دى فأنا أقولها دائماً وكلى فخر لو لم أكن منوفياية لوددت أن أكون منوفياية ومحدش يقوللى لية الأسباب واضحة وضووح الشمس بقى عمرك شوفت فى حياتك شعب محافظة مصرية
منتشر هذا الإنتشار فى أرجاء المعمورة ترووح القاهرة تلاقيهم جداً ترووح طنطا تلاقيهم أوى ترووح إسكندرية تلاقيهم طبعاً حتى برة مصر تلاقيهم ع الآخر ودة مش علشان المنوفية محافظة طاردة للسكان لاسمح الله لأ دا لأن نسبة التعليم عالية جداً فيها وكمان نسبة الذكاء وليس أدل على ذلك من تاريخ مصر الماضى والمعاصر ولا لازم يعنى أفكركم طب دا أنا متهيألى إنى لو نزلت تحت الأرض هلاقى واحد يقوللى أنا سفير المنوفية تحت الأرض ودة شئ يسعدنى طبعاً
لأن الإنتشار دة أهم حاجة فى أى حاجة.
طبعاً هتقولولى إية الموقف اللى حسسك أوى إن المنايفة سمعتهم كدة أقولك ياسيدى مرة روحت أقطع تذكرة عادى يعنى بقوول للراجل واحدة منوف رد قاللى إية تخيل كدة
قاللى منوف قطيعة..... ياخبر إسود أيقنت ساعتها أنى سوف ألبس قضية بتهمة التعدى على موظف عام أثناء تأدية مهامة الوظيفية دون شك
وتملكت نفسى ورديت علية بصوت يملؤة الثقة والبراءة فى الوقت ذاتة لية؟؟
قاللى: بقى متعرفيش لية ؟؟
قولتلو: بنفس البراءة أيضاً لأ معرفش؟؟
قاللى :كنت فاكرك أذكى من كدة....
وعندها كانت العناية الإلهية قد أرادت إنقاذة من بين براثنى وطلعلى التذكرة فأخذتها ومشيت يملؤنى الغيظ والرغبة فى الإنتقاام من هذا الكائن الذى لايعرف تاريخ بلدة صح...
واللى عاوزة أوصلكم ليية م الآخر يعنى إن اللى يحكم على حد لازم يكون يعرفة الأول واللى يحكم على شعب محافظة كاملة لازم بردوو يكون إتعامل معاهم كلهم واحد واحد مبحبش أنا التسطييح والتهميش الفكرى المطلق فى إطلاق التهم وإلصاقها بالناس الطيبيين
ولا إنتوا إية رأيكم؟؟؟؟

الجمعة، مارس 14، 2008

ممنوع ياقلبى تدق ..





ممنوع ياقلبى تدق

ممنوع ياقلبى تدق

وتقولها آآآة لو مرة ..

جتلك مصيبة أوية ...

وتقوول يارب وذدنى ....

ما الدنيا بالمقلوب ..

ماشية وأدينا يادووب

بنعيشها يوم ورا يوم ....

ممنوع ياقلبى تدق وتقوول.....

بحب وبكرة .............

مش بس علشان هو

الأنون واللا يحة ...

لا ياحبيب الروح

ياللى ملياان جرووح

وتحب إية وهتكرة مين؟؟؟

خلييك ف نفسك يلا ...

يمكن فى يوم...

يفتكرك..............

تاريخ مزيف زييف

ما الدنيا بالمقلوب

ماشية وأدينا يادوب....

بنعيشها يوم ورا يوم

ممنوع ياقلبى تدق

مش بس علشان ....

مش فااضى للدقة

دا بردو علشان.....

من يوم ما جييت للدنيا

ومافيكش نبض ياقلبى
............................................

دعاء عمرو









وراح الراجل يدور ع الدعم ....وياريتة ما راااح ؟؟؟؟؟؟؟؟؟؟؟

إنت عارف قبلا معنى الدعم إية - دعم -يعنى مشاركة من الحكومة لفئات الشعب الفقيرة أو الغير قادرة والمسماة مجازاً بمحدودى الدخل والذى يتغنى بة المسئولين فى شتى المناسبات القومية الدينية منها والسياسية بضرورة وصولة لمستحقية من فئات الشعب المطحونة والذى يصل حاليا فى شكل عينى ممثل فى زيت العربيات الذى نستخدمة مكرهين فى الطهى والشظايا المسماة أرزاً نأكلة متغاضين الى آخر ذلك من السلع الفاخرة إسما والرديئة شكلاً ومضموناً بالاضافة طبعا لدعم رغيف الخبز الذى صدرت له تصريحات خيالية وأخرى جهنمية والنتيجة أنة يباع على الأرصفة بخمسة أضعاف ثمنة ولا نستطيع أن ننكر الدعم الأكبر فى دعم شتى السلع الاستراتيجية وأهمها البنزين الذى يتضاعف ثمنة شهراً بعد االأخر بصراحة ياجماعة الواحد خايف ينسى حاجة من اللى بتدعمهالنا الحكومة الذكية النظيفة اسما وشكلا ومضمونا واحد بقى يقوللى طب الحكومة بتجيب فلوس الدعم دى منين ياترى بتجبى علينا أـقولة طبعا لأ دى فلوسنا بردوو اللى بندفعها فى صورة ضرايب او فلوس من مرافق الدولة بدءً بقناة السويس اللى بتجيب فى المتوسط يوميا حوالى 15 مليون دولار على الاقل ومروراً بتصدير الغاز الطبيعى وما أدراك ما الغاز الطبيعى وبيتصدر لمين وبكاام؟؟ ومترو الأنفاق والمواصلات العامة والصادرات المصرية المتعددة من معادن او بترول وخلافة ووصولاً لبيع الهوا آة بيع الهوا يعنى تراخيص الإتصالات وجيل تانى وجيل تالت (وسمعنى احلى سلام للموبايل أبو كاميرتين) دا غير بقى الخصخصة إشى بنووك إشى شركاات وهيئات ومرافق كمان أقوول إية ولا إية بس؟ أنا خايفة بردو أنسى مصدر من المصادر ...نيجى بقى لحتة تحويل الدعم العينى لدعم كااشى أحب أقوول ان الحكاية مش فارقة بردوو سواء عينى سلعى أو كاشى ملاليمى مش حتفرق كتير وعلى رأى المثل حيسخطوك ياقرد يخلووك إية؟؟؟؟؟؟؟ وبعدين هو فين أصلا الدعم اللى بيقولوا علية دة لما رغيف العيش أبو 5 قروش يبقى ب25 قرش ومش لاقينة أصلا ولما زجاجة الزيت (العادى) تبقى ب 10 جنية وكيلو المكرونة ب5 جنية وكيلو الدقيق (اللى منعووة أصلا )بقى ب 4,50 لا بصراحة فعلا لا مساس بمحدودى الدخل لأن هذا لايسمى مساسا بل يسمى إقتناصاً ونهشا ً وتجويعا ً متعمداً ومنظما ً لأهداف يعرفها جميعنا تمام المعرفة

المهم سيبنا من كل الكلام المتفلسف دة وهحكيلكم حكاية حصلت والله بجد فى بلد جمبنا

واحد راجل عادى راح يشترى عيش لعيالة وقف فى الطابور كتييييييير أوى لما زهق والآخر معرفش يجيب عيش قام مشى وراح لأقرب بقاال وإشترى نص كيلو مكرونة وروح البيت عملو للعيال الجعانة وضااف كمية كبيرة من سم الفئران فى المكرونة وأكلها لعيالة ............ إية بس خلاص خلصت الحكاية ؟؟؟؟؟؟؟؟؟؟؟؟؟؟؟؟؟
وأترك لكم التعلييييييييق
؟؟؟؟؟؟؟؟؟؟؟

دعاء عمرو




منوف طنطا رايح جاااااى..........

أكتب إليكم بعد 3 أسابيع من التعذيب المتواصل والذى لا يحمل أى معنى من معانى الشفقة والرحمة بين طياتة

بدأ السيناريو بإحساسى البشع بالفراغ القاتل والمميت الذى كاد أن يقضى على ما تبقى لدى من عقل بعد إنتهائى من دراستى الجامعية فى آداب قسم الصحافة 8 شهوور مرووا من عمرى كما السرااب وهو الشئ الأشبة بالموت البطئ سيناريو يومى محفوظ ومكرر ما بين النوم والصحيان والصحيان والنوم وبينهم فترة من الراحة أقضيها غالبا ً فى النوم

سامعة واحد بيقول ولية ما أخدتيش كورساات تسلى وقتك بيها أقولك ياسيدى المشكلة بقى إنى أخدت كل الكورسات أثناء الدراسة توهما ً منى أنى بمجرد إنتهائى من الدراسة سوف أعمل فورا ً وهو الإعتقاد الذى أثبت خطأة تماما ً

دا أنا مش بس أخدت الكورسات العادية اللى هى ال ICDL والإنجليزى لا دا أنا كمان أخدت كورس بورصة وحقوق إنسان وفوتو شوب وكل دة طبعا ً من ذكائى المفرط فلم أدع شيئا ً لأيام فارغة كتلك التى قضيتها بعد تخرجى مباشرة ً لأنى بصراح كنت متأكدة أو متوقعة إن أبويا بأى واسطة ولا بتاع هيشغلنى بس المشكلة بقى إن الحاج عجبتة قعدتى جمبة أوى وقاللى شوية كدة بس تستريح من الدراسة ودوشتها هو تقريبا ً فاكر إن الكلام دة بيأثر فينا
المهم سكتت وإستسلمت فترة كدة ورجعت تانى أفكر طب أعمل إية .. أعمل إية مالقتش غير إن أدور على كورس أكون لسة ما أخدتووش ولاقيتة أخيرا ً( المحادثة الإنجليزى) وبالفعل بدأت ارسم الخطط وأضع السيناريوهات المستقبلية المتوقعة وأخرى بديلة لإقناع السيد الوالد بهذا الأمر وقبل ذلك كنت قد بحثت عن مكان معتمد آخد الكورس فية ومالاقتش أحسن من الجامعة الأمريكية دا من تخيلى طبعا ً طب الكورس بيتاخد فين ..فيين؟؟ أتارى بقى المحادثة بتكون فى المراكز الرئيسية فقط ف القاهرة وطنطا والإسكندرية وأنا لمن لايعرف من الجمهورية المنوفية المتحدة يعنى الموضوع أصبح أكثر تعقيدا ً ومسألة إقناع الوالد أصبحت درباً من دروب المستحيل .....

أأيأس أنا بقى لأ طبعا ً ووجدتها فرصة لمعرفة شعب شقيق مجاور وهو الشعب الطنطاوى وبعد محاولات ومداولات وتطنيشات دامت مدة 3 شهور أقنعت بابا أخيرا ً بمدى أهمية هذا الكورس وأنى ممكن أموت ويضيع مستقبلى لو ما أخدتهووش ووافق بابا أخيرا ً

وجاء اليوم الأول الى كنت بحجز فية الكورس وكان يوم الفالانتين اللى فات وبصراحة أنا الى ظبطت المشوار ع اليوم دة أصلى بحب اشووف الحب فى عيون الناس والأماكن وعدى اليوم آخر تمام رغم الأمطار ....

ثم أتى يوم الإمتحان وعدى بردو آخر تمام وطلعت فى المستوى الثالث علما بأن مجموع المستويات 4 فقط

ثم جاءت المفاجأة المواعيد هتبدأ من بعد الساعة 2 ظهراً مما يعنى أنى لن أصل المنزل قبل العشاء على أقل تقدير لا وكمان 3 ايام فى الأسبوع حاولت إبتلاع الصدمة وصبرت نفسى بعد الكثير من التردد فى إتمام هذة الصفقة وتوكلت على الله وعزمت على إكمال ما بدأتة

لتظهر أمامى مشكلة أكبر وهى إنى ماليش فى بهدلة المواصلات والكلام دة ودلنى أصحابى على القطار كـأسرع وأسهل وسيلة وليتهم ما فعلوا دنيا تانية وعيشة تانية ودماغ تانية ركاب القطارات دول بجد

إية دة أنا طولت عليكم أوى أكملكم الحكاية بعدين بقى ........سلاااااام