الجمعة، يونيو 06، 2008

فاصل ونوااصل



إستراحة تاجية ونوااصل المواجهاات.....

وصلنى تاجين من إتنين بحبهم اوى وبيتابعوونى اوى وبحب كلاامهم اوى اوى التاج الاول والمختلف كل الإختلاااف من (عبدالله) صاحب مدونة( واحد إنسان)..
أما التانى فمن حبيبة قلبى واللى من اول تعليق ليها عندى حسيت انى اعرفها من زماان اوى (نور)
صاحبة مدونة سيبك إنت والبنوتة دى بجد جميلة اوى وزى العسل ياجمااعة
..

بالنسبة للتاج الأول انا بقول مختلف لأنة من تأليف وإخراج وإنتاج (عبدالله غنيم) بنفسة وأنا بقى يعجبنى العقل المنتج والمبتكر ودا بالرغم من إنة فى الثانوية العامية ودى حاجة طبعاً يحسد عليها إن عقلة فى ظل الظرووف المنيلة دى لسة شغاال.....


والتاج بيقوول..

- هل سبق أن فكرت فى أفعال مجنونة؟
يووووووووووة كتيير متعدش.

- هل نفذت أحد هذة الأفعال؟
آة بس اللى بنفذة منها مش بيكون مجنون اوى يعنى بيكون نص نص أهم حاجة ميضرش حد غيرى.

- هل علم بها أحد؟ وما رد فعلة عليها؟
أصحاابى عاادى بيقولولى انتى مجنونة وأن بعترف بردو إنى بموووت ف الجنون .

- ما هو إحساسك بعد أن قمت بهذة الأفعاال المجنونة؟
.يااااااة محكيلكوش ياجماعة بصراحة بحس بإرتياح غريب ونعنشة وإنى لسة عندى مساحة من الحرية علشان أعمل اللى يخطر على بالى بدون ما حد يقفلى فى زوورى(فاهمينى طبعاً) .

- هل ندمت على فعل جنونى كاد يودى بحياتك؟
ندمت؟؟ لا أنا أساسا شايلة كلمت ندم دى من قامووس حياتى لأنى مقتنعة إنى أقدر آخد قراراتى وبالتالى لازم أكون أدها وأكون مسئولة عنها- كما أننى مقتنعة للغاية- بالجملة الشهيرة
(وتفييد بإيية ياندم ياندم) ....

أما بقى لحتة - يودى بحيااتك- أنا منكرش إنى أحياناً بفكر فى الإنتحار بس لسة منفذتهاش علشان لو نفذتها مش هلحق أندم حتى أما الأفعال الجنونية العادية فهى لاتصل أبداً لحد القرب من الموت – مش للدرجة دى يعنى- لسة فية شوية عقل بردووو.

- هل سبق ووقفت أمام المرآة لتقول لنفسك أنك مجنون؟
ههههههههههههههههههههه كتيييييييييييييييييييييييييييييييييير ...

- سؤال من عندى انا بقى ( إذكر أمثلة لتلك الأفعال المجنونة وسبب تسميتك لها بالمجنونة وهل هى مجنونة فعلاً ولا إنت موسعها حبتيين؟؟؟
- كمان سؤال من عندى سامحونى ( ما هى الأفعال المجنونة من وجهة نظرك؟؟؟

- ياترى هتبعت التاج دا لمين؟؟؟ - سؤال يطرح نفسة طرحاً-

نور حبيبتى
ضياء باشا
وزة أنين الحزن (لما ترجع يعنى)
البرنس الغزالى( مصر ياما يابهية)
نيجرو الضربشمسااوى
....


التاج التانى ف السريع كدة...

-إذكر خمسة أحلام تخص ماضيك وتحلم فيها بتغيير الأشياء ماذا ستعدل وماذا ستترك؟
أولا بمناسبة الأحلااام أنا من النااس اللى بتحلم كتير جدا جداً يعنى مكن أنام ساعة أحلم 3 أحلاام لأ وإية أحلام كما الأفلااام زى ما بسميها وبحكيها لأصحابى وبتبقى غريبة اوى المهم خلينا ف السؤال..

1- كنت بحلم أكون مٌصلِحة- بفتح الحاء- يعنى انى احااول أصلح من الناس والأشياء وخاصة الشباب اللى فى سنى او حتى أكبر وكنت حاسة بمسؤلية كبييرة اوى ناحيتهم –ومازلت- لكنى إكتشفت إن رغبتى دى مش كافية وإن كل شخص ليية شخصيتة اللى محدش يقدر يأثر فيها بسهولة فتقدر تقوول إن الحلم دة بدأ يبعد أووى...

2- كنت بحلم أدخل كلية - إقتصاد وعلوم سياسية- أصلى كنت شايفة نفسى فيلسوفة أوى وكنت خلاااص دخلااها ع فكرة بس - عمو مكتب التنسيق موافقش- وأنا مقدرش أكسرلو كلمة .. وبعدين - آداب - من علوم سياسية متفرقش كتير يعنى ...

3- كنت بحلم ومازلت إنى أكون حاجة ليها لازمة فى الحياة بمعنى انى مش زى ما جيتها أخرج منها م الآخر نفسى تكون ليا بصمة وعلامة ف كل شخص وكل شئ حوليا وأعمل حاجة كويسة الناس تفتكرنى بيها...

4- كنت بحلم بالقوة الذاتية بمعنى انى مضعفش ابداً لأى سبب ولا لأى حد وأنى أبقى أقوى من ان اى شئ يكسرنى او يهزنى ممكن نقوول الحلم دا لسااة شغاااال...

5-
كفااية بقى أحسن خلاااص هعيط ....


- إذكر خمسة أحلام تخص مستقبلك؟

1- أموت وربنا راضى عنى حق الرضا .

2- ما أخلييش أى حد يزعل منى أبداً وأصالح كل حد زعلان منى .

3- أنجح فى المجال الى ربنا هيعيننى وأشتغل فية .

4- ماما وبابا يرضوا عنى بجد وما أزعلهومش أبداً . (صعبة دى)

5- أكون أم ناجحة جداً فى بيتى ويكون ليا أولاد وبنات زى العسل وزوج يرضى عنى ويحبنى مووووووت...

- إذكر شخصين متواجدين فى حياتك حالياً كنت تود وجدهم قبل ذلك؟

1- ريما صحبتى الأنتيم لأنها بجد مرايتى ورووحى اللى متخيلش ممكن اعيش بدونها ازااى..
2- عالم التدوين والمدونين كلهم كدة على بعضهم ...


كفاية كدة بقى.. إوعوا أكوون طولت عليكوا
أنا أصلى بحب أجيب م الآااخر ومش بحب الرغى ..

سلااامووز

بحبكم أوى.........

هناك 117 تعليقًا:

wa7ed 2ensan wnsan يقول...
أزال المؤلف هذا التعليق.
wa7ed 2ensan wnsan يقول...

صباح الخييييييييييييييير

أول تعليق

والله الف شكر بقى بتقولي عليا عقلية ابتكاريه اومال حضرتك تبقى ايه دا التاج بتاعي في مستوى الطالب المتوسط ( قصدي المدون المتوسط ) حطيتي سؤالين جامدين جدا دا الناس هتتعصر كده حرام عليكي
وهيقضوها عليكي دعا


لا بس اجاباتك جامده وصريحه وغير متوقعه

sigon1977 يقول...

دائما مبروك يا ملكة التيجان و سيدة سيدات البلوجز 0
لا ادرى لم لست قادرا على كتابة اى شئ سوى تلك الجملة التى احملها فى قلبى 0
هلال +صليب = مصر

كاميليا يقول...

هههههههههه

عسولة اوى

بريئة اوى

ناعمة فى رداء غزال شارد

احلامك جميلة ربنا يحققها لك يارب

تحياتى وحبى

حوبة يقول...

ازيك يا دؤدؤ
ايه الاجابات الحلوة دي
فكرتيني بجنوني والعمايل اللي انا بعملها وماما بتتجنن مني
بس انا مش بندم الحمد لله
وبعدين يعني احنا هنعيش اد الي عشناه عشان نندم عليه ؟ عيشي حياتك بجنونك ورقتك وهدوئك وزي ما انتي عايزة ياقمر وربنا معاكي

Mero يقول...

ههههههههههههههههه
اجاباتك ظريفة..
وكويس انك منتحرتيش لسه..
بس فعلا البلد دي تخلي الواحد يفكر جديا..

تحياتي :)

زى الهوا يقول...

ايه التاجات الجامدة دى , بس طلعتى بريئة اوى فين الاعمال الجنونية اللى بالنار والمسدسات والحاجات دى هههههههه , ويارب تحققى احلامك وخصوصا رضا ربنا عنك

maiosha يقول...

سلام عليكم

أنا جيت نورت البيت .. مقدرش أتأخر عليك يا جميل

شوفتى التاج المجنون بتاع عبد الله .. أدى أخرة الثانوية العامة واللى بتعمله فى الناس

أه صحيح كنت عايزة أستأذنك فى حاجة .. المفروض إنى إن شاء الله لما أخلص هجاوب على التاج ده .. ممكن أبقى أستلف السؤالين الزياده بتوعك كمان علشان تبقى بقى بايظة على الأخر؟؟

وإن شاء الله ربنا يوفقك ويحققلك كل أحلامك .. العاقل منها طبعا

تحياتى

Sometimes يقول...

هههههههههههههههههههههه
يا واد انت يا مجنون


ياااااااارب يحقق لك احلامك يا قمر

د/أبويحيى وادم يقول...

السلام عليكم ورحمه الله وبركاته

بخصوص التاج الاول فلا تعليق

بخصوص التاج الثانى
أسال الله أن يحقق لك كل احلامك وامانيك ويوفقك لما تحبه ويرضاه

والسلام عليكم ورحمه الله وبركاته

ADAM يقول...

السلام عليكم


والله باين عليكي طيبة

ولا مجنونة ولا حاجة

انتي بس بتحبي الحرية

زي حالاتي

ودي مودياني في داهية

لأن من قواعد الحرية عندي

إني مأذاكرش اللي الدكاترة يفرضوه عليا

بذاكر اللي على مزاجي

شوفتي الجنان ؟

أقصد الحرية!

تحياتي لصراحتك وبساطتك


آدم

همس الاحباب يقول...

ههههههه
حلوة اجاباتك وصريحة يا مجنوووونة هانم
بس بجد هما المنوفيه كله كده دمه خفيف
ودماغها لاسعة هههههههه
انا كده افكر اتجوزمرة تانية بس تكون منوفايية مجنووونة ونعيش فى العباسية ههههههههه
احلامك رقيقة جدا
يا رب يكرمك وتحقيقها كلها
تحياتى وتقديرى

nigro يقول...

إيه يا ست دعاء التدبيسة التمام دي
ما شاء الله ما شاء الله
شكلك كده هتفضحينا
بس ولا يهمك يا جميل
جاري العمل على حل التاج

بس تعالي هنا
انت رميتي السؤالين الجامدين اللي في الآخر دول و هربتي؟
فين إجابتك إنتِ يا مواجهات
طيب
أنا مش هأنزله غير لما تجاوبي انت الأول
هه.. مليش دعوة

يلا سلام

dido يقول...

حلوه اوي فكره التاج دي
وردودك تدل انك شخصيه عسوله واحلامك كمان تدل علي ان قلبك ابيض مووووت
ربنا يحميكي ويحفظك يا رب

مدحت محمد يقول...

ربنا يحققلك كل احلامك يادعاء

صاحب المضيفة يقول...

يعني بتكتبي في الدستور وكمان منوفية

ليه كده يا بنتي طيب


خبطتين في الراس توجع


وبعدين الحكاية دي مش ليكي لوحدك برضو


احنا برضو منايفة وكتبنا في الدستور برضو

هههههههههه

دي بجد فعلا


مدونتك رقيقة وجميلة

واجاباتك تلقائية وبسيطة


أتمنى تكرار الزيارة مرات اخرى




تحياتي

Dr-hema يقول...

هى التاجات انتشرت فى البلد اليومين دول

توب علينا يارب من التاجات

أهو تاج الأحلام ده قبل ماكان عندك كان عندى

وربنا يحقق كل أحلامك

د/هيما

appy يقول...

اخلا بكي فى عالم المجانين ههههههههه ايه الصراحه دي بس
المهم كان نفسي تيجي معانا كان يوم هايل بجد قوي احنا كمان بنحبك قوي

رئـــــيسـة حزب الأحلام يقول...

السلام عليكم
انا اسفة على التاخير بس بجد النت كان فاصل بقالة يومين
تاجين جامدين بس التاج الاول اسئلته غريبه اوى
هل سبق ووقفت أمام المرآة لتقول لنفسك أنك مجنون؟
السؤالدة انا لو اتسألتة هرد زيك بالضبط
تحاتى لكى ياقمر واشكرك على السؤال عنى

nona يقول...

مبروك يا برنسس دودو على التاجين اللى اسئلتهم اجمل احلى حاجة فى التاجات بتخلينا نعرف عنك اكتر واحلى حاجة فى الاجاباتك واحلامك بسيطة اكتر حاجة مجنونة انك تفكرى فى الانتحار بعد الشر عليك والاكتر جنونا انك تفكرى فى الانتحار وكمان عايز تموتى وربنا راضى عنك الاتنين مع بعض طب ازاى ه يبقى جنان رسمى

سومه...مجنونه فى بلد عاقل يقول...

هههههههههه هل سالت المرايه هل انت مجنون اكييييييييييييييد
على فكره انا نزلت الموضوع اللى قلنلك عليه بتاع التدخين
تيحاتى ليكى سومه_87

دعاء مواجهات يقول...

- wa7ed ensan wnsan

لا شكر ع حقيقة يابرنس

ربنا معاك ياارب ويوفقك

لااازم تطمنى اول ما ترجع من الامتحاان

ع فكرة التاجين دوول أقل حاجة عندى

والصراحة كمان دى اقل حاجة عندى..

ههههههههههههههههههههههه

ربنا يوفقك..

دعاء مواجهات يقول...

- sigon

ميرسى بجد

اية كل الالقاب الجامدة دى

ربنا يخلييك
بس اية مناسبة الهلال والصليب دلوقتى؟؟؟

سلاااااااام

دعاء مواجهات يقول...

- كاميليا

اية كل الرقة دى بس

منقدروش احنا على كدة

ياجمييل

نورتينى بجد

سلاام ياقمر

دعاء مواجهات يقول...

- حوبة

حبيب قلبى

منورنى ياعم

اية اخباراتك يابنتى؟؟

ايوى انا كمان رايى انى اعيش زى ما تيجى ف بالى اعمل وبس

بيييس

دعاء مواجهات يقول...

- mero
لينا حظ لسة ياعم

نعرف نااس حلوة زيكم

ونكلمهم

ويكلموونا

بيييس

سنووايت يقول...

انا من رأيي بقي بعد التاج ده تغير ي اسم المدونة الي
مواجهات مجنونة هههههههههههه
لا بجد حسيت من اجاباتك انك عاقلة
وعجبني اوي الحلم بتاع القوة الذاتية
مش عارفة حسيت المصطلح لوحده كدة فيه قوة

ربنا يحققلك كل احلامك يا دعاء

دعاء مواجهات يقول...

- زى الهواا

نار مين ومسدسااات مين

اية يابنتى

حد قالك انى مسجلة خطر ولا ايية؟؟؟

نورتى ياقمر

احنا مش خطر اوى كدة..

دعاء مواجهات يقول...

- miyosha

الجميل يتفضل وياخد اللى هو عاوزة

بدون استإذاان كماان

احنا عندنا كام ميوشة يعنى؟؟؟

نورتى ياقمر

منتظراكى

دعاء مواجهات يقول...

- sometimes

وما نيل المطالب بالتمنى

ولكن تؤخذ الدنيا غلااااااابااااا


نورت ياجميل

دعاء مواجهات يقول...

- د/ أبا يحيى وآدم

وعليكم السلام ورحمة الله وبركاتة

ممكن اعرف سبب عدم التعليق على التاج الاول

هو فية حاجة غلط ولا ايية؟؟

نورت

دعاء مواجهات يقول...

- آدم

ههههههههههههه

تقريبا والله اعلم

كلامك كلو صح

بس مشحرية ابدا انك تزاكر ع مزااجك يعنى

ممكن تلغى جزء اوك بس كتير نوووو

نورتنى

المتحرش بها يقول...

اجابات موفقه

دعاء مواجهات يقول...

- همس الأحباب

ههههههههههههههههه

ربنا يخليك ياخالد

باشا

وبعدين دا اقل حاجة عندنا

اصلا....

اخفض صوتك لا المدام تسمعك..

ولا انت مبتخفش؟؟؟

سلاااااااام يامنورنى ديما

دعاء مواجهات يقول...

-nigro

وانا اقدر بردوو

دى بس تحية صغنونة مننا

هبقى اجاوبلك ع السؤالين بس ف السر

بيييس

دعاء مواجهات يقول...

-dido

ميرسى ياجميل

دا بس من شفافيتك

الجامدة

انك لمستى كل الحقائق دى

هههههههههه

نورتى بجد

دعاء مواجهات يقول...

- مدحت محمد

ياااااااااااااااااااارب



نورتناا

دعاء مواجهات يقول...

- صاحب المضيفة

بجد منوفى

قوول والله

اصلى من يوم ما دخلت هنا

ولا لاقيت غير وزة بس اللى منوفياية

لاازم نبقى حزب

جااااااااااامد

نورتنى جدااااا

سلاام

دعاء مواجهات يقول...

- د/ هيما

فكرتنى بهيما التاانى لو كنت سمعت عنة

اة بقى شكلها فيروسات ف الجو

التاجاات دى

الناس بقت فاضية مش عارفة تعمل اية

قالت تالف تاجات وتبعتها

تحيااتى لييييييك

دعاء مواجهات يقول...

- آبى

متغيظينيش بقى

كنت همووت وااجى

بس الظرووف

انتى عسولة اوى

رسماكى ف خياالى



نورتى

دعاء مواجهات يقول...

- رئيسة حزب الأحلام

ولا غريب ولا حاجة

ثانوية عامة بقى ربنا لايوريكى

المهم انك كويسة وبخييير

سلااااام

دعاء مواجهات يقول...

- nona

ازيك ياقمر؟

وحشاانى

انتى بتربطى بين التاجين لية

دا حاجة ودا حااجة

هههههههههههههههههه

نورتنا

دعاء مواجهات يقول...

- سومة

مااشى

شكلنا كلنا مجانين باين

ف الآخر

جايالك ياقمر

بييس

دعاء مواجهات يقول...

- سنو وايت

ياارب يستجيب ياجميل

انا اصلى طوول عمرى بتاعت مصطلحاات



نورت الدنيا وهفهفت علينا ياجمييل...

نور يقول...

ديدى حبيبه قلبى
ايه يا بنتى الكلام ده انتى كسفتينى خالص -قال يعنى انا وش كسوف -
دا انتى طلعتى مجنونه على كده
بس انتحار ايه يابنتى مفيش حاجه تستاهل وبعدين هنقدر احنا نعيش ازاى من غيرك
و ميرسى يا قمرى على التاج هجاوبه علطول
اما بقى احلامك ايه يا بنتى الجمال ده
اقتصاد وعلوم سياسيه بابا دخلها شهر و بعدين سابها ظرفهم زمان ماساعدتوش
بس مالها اداب المهم اللى فى الدماغ
و بعدين انتى عامله فى مامتك وباباكى ايه ربنا يباركلك فيهم
و ان شاء الله ربنا يحققلك باقى احلامك دلوقتى وبعد كده
احلى سلام لأحلى دعاء

Foxology يقول...

التاج الأول بتاع الحاجات المجنونة حلو اوى والأجابات لذيذة جدا

التاج التانى بتاع الأحلام اجباتك منطقية جدا خصوصا اول اجابة بخصوص ان كنتى بتحلمى انك تكونى مصلحة تصلحى اللى حواليكى كلنا تقريبا او معظمنا نفسه يكون كدة يصلح شوية بس المشكلة اننا بقينا ف وقت كلنا بنقول يلا نفسى انا هعمل ايه لوحدى

تحياتى :)

Tamer Nabil يقول...

ههههههههه


افعال محنونة

تعرفى ان كل واخد فينا ولية حاجات مجنونة عايشة جواة والناس كلها ممكن تحكم عليها بالجنون الا صحاب الفكرة نفسها مش شايف انها غريبة

كل تاج وانتى طيبة
تحياتى

ayman badr يقول...

ازيك يا دعاء
بصراحة التاجين اسئلتهم مبتكرة ولذيذة قوى بس ايه بقى الافعال المجنونة اللى انتى عملتيها لازم نعرفها
اجابات منطقية جدا بس مش هتنازل عن معرفة مظاهر هذا الجنون غلاسة بقى
تحياتى

عمرو النوبى يقول...
أزال المؤلف هذا التعليق.
عمرو النوبى يقول...

صباااااح الخيــرات

جميــــل اوى التاج اسألة واجابات كلها تحفة

اسألة فعلا جديده مش تطلع غير من عقلية مبتكره

واجابات صادقة مش تطلع غير من انسانة صريحة ولا تخشى شىء

اما بالنسبة للتاج التانى فده بقا مش يقل جمال وروعة عن التاج الاولانى بجد تحفــة ...

اتمنالك التوفيق فى حياتك
وادعو الله عز وجل ان يحقق كل احلامك
تحياتى الى اجمل مجنونة
واتمنى زيارتك لمدونتى المتواضعة
وان شاء الله يكون فى تواصل مستمر بينا

عايش ولكن يقول...

لا بجد اسم على مسمى
مواجهات
اصل اجاباتك صريحه جدا
وقديتى تواجهى الاسئله صح
واحلى حاجه انك مبتندميش على حاجه
اصل احنا اللى بنعملها يبقى نندم عليها ليها
وبايه هيفيد الندم
دمتى متألقه
تحياتى
علاء

Desert cat يقول...

اجابتك لذيذه يا دعاء
وبتدل على انك انسانة طيوبة جدا

shayma يقول...

يا اجاباتك يا دودو

حلوة اوى احلام وربنا يحققهالك

وحلو برضه جنانك
:)))))))))))))

سلاماتى
:))

Amr Ezeldeen يقول...

الأجوبة جميلة جدًا خصوصًا المتعلقة بالجنون.. و كنت متوقعها الصراحة، لأني متابع سطورك فى ضربة شمس و كلامك مع خلووووووووووود - بفتح الخاء - و أفكارك.. و قلت أكيد هتكون الأجوبة كده..

مدونة جميلة و أحلى حاجة المواجهة..

تحياتي

nona يقول...

بصى هما تاجين صحيح بس اجابات التاجين اجابات بنوتة واحدة مش اجابات اتنين صح ولا ايه؟ وحشتينى انتى كمان من اخر توبك مش تغيب علينا مااااااااااااااشى

wael يقول...

ايه الجمال ده
بجد برافو عليكي اصل الواحد منغير تصرفات جنونيه يبقى بنى ادم تقليدي وانا مش بحب التقليد بجد والله جامده جدا اجاباتاك
والتاج التاني اجاباتك فيه حلوه اوي
تقبلي تحياتي

bar2ash يقول...

دعاء هانم
ايه الاجابات دي
ماشاء الله جميله ومقنعه
ربنا يوفقك



برقش فوريفر

رئيس جمهوريه نفسى يقول...

بتفق معاكى جدا فى موضوع الجنون لانى بالاختصار الشديد مجنون رسمى وليه من افعال الجنون طرق كتير الى بتلغى العقل اساسا

HOSSAM ELMOTAIM يقول...

عن الجنون تكتبون أم فقط تتهامسون
ربما صار وطني مرتعاً للمجانين
بعدما صار ترويع المواطنين
ورداً يومياً لآل العادليين
تحياتي لكل مجنون على أرض الوطن

karim يقول...

ازيك عمله يا دعاء المواجهات
التاجات فرحانه باجبتك


تحياتى

جنّي يقول...

ربنا يكفينا شر الجنون ..
مش كفاية سوما علينا ..
أما أحلامك ربنا يحقق كل أمانيكي ..

said

mohamed يقول...

ههههههههههههههههههه دمك خفيف أوي و طرأتك جميله اوي و شكرا انك زورتيني في مدونتي يأتمنه انها تكون عجبتك و أكيد هتابع المدونه بتاعتك على طول.تحياتي

كيكى يقول...

عووووووووووووووووو انا جيت... اية الاجابات الحلوة دى

واحد من الناس يقول...

اجابات صريحة مفيش عليها تعليق

مستنى الجديد

ادم المصرى يقول...

دعاااااااااء انا نزلت جزأ تانى من اميره بكل النساء تعليقك مهم

دعاء مواجهات يقول...

- نور

حبيب قلبى ياهوووة

ولا كسوف ولا بتااع احنا بيننا كدة بردو

بعتلك اووف لاين فيهارقمى معندكيش حجة ابعتى رقمك بقى

بابا وماما مفيش بس مش بيرضوا بسهولة والادق مش بترضى

اقصد ماما طبعا

بييس

دعاء مواجهات يقول...

- فوكس

بصراحة يافوكس

الحكاية مش انا هعمل اية لوحدى بقدر ما هى الدنيا بقت عاملة ازااى وانا هغير مين ولا مين

نورتنى

دعاء مواجهات يقول...

- تامر نبيل

وانت طيب ياتمووور

صح بداخل كل منا انساان مجنون خفى

نورت ياكبير

دعاء مواجهات يقول...

- أيمن بدر

لية بس الإحرااج ياباشا

ما تخلينا اصحاااب احسن ولا اية بقى رايك؟؟

حااضر حبقى اقولك بس ف السر

نورت يابرنس

دعاء مواجهات يقول...

- عمرو النوبى

ربنا يخليك ياعموور بجد

انت كمان حد جميل اوى ومدونتك اكتر من تحفة
وانا بعتبرها رمز جميل

نورتنا فعلا..

دعاء مواجهات يقول...

- عايش ولكن

ازيك ياعلاء

انت فين من فترة مختفى كدة

ميرسى ع رايك وكويس ان الاجابات عجبتك

انت كيفتنى اوى لما قولت اسم على مسمى

فعلا كلت دمااغى

نورت

دعاء مواجهات يقول...

- desert cat

دا بس علشان متعاملتيش

دا انا شرسة

ههههههههههههههههههههه


انتى الى طيبوبة بجد

نورتى الدنيا

دعاء مواجهات يقول...

- shymaa

اة طبعا

هو فية احلى من الجناان

وانتى اية اخبار الجنان معاكى كدة

نورتى البلوج كلو

دعاء مواجهات يقول...

- عمرو عز الدين

بجد ياعمرو انا سعيدة اوى انى اتعرفت عليك هنا

وكويس انك ضربشمسااوى

انت دماغك متكلفة ياابنى

مستنية ردك ع طلبى

نورت

دعاء مواجهات يقول...

-nona

عديها بقى وخلينا حبايب متمسكيش ع الواحدة

انتى يابنتى ابعتيلى ميلك ولا اى حاجة

علشان بردو بتوحشينى مووت

بيس

دعاء مواجهات يقول...

- ,WAEL


تقبلتة

وائل باشا

طبعا الجنون سر الحياة

نورتنى

دعاء مواجهات يقول...

- برقش

ازيك عامل اية يادكتور؟؟

اية اخبار الدكترةع حسك كدة؟؟؟؟

متغيبش كدة

نورتنا بجد اوى

دعاء مواجهات يقول...

- رئيس جمهورية نفسة

كدة بقى يزيد احترامى وتقديرى

لشخصك الجميل بجد

ايوا كدة اااخر تمااامووز

تحيااتى

دعاء مواجهات يقول...

- حسام المتيم

والله فكرتنى بالجملة الشهيرة

(الناس ف المدينة يتكلمون- يتهامسون - يهجصون)

هههههههههههههه

بجد نورتنا

دعاء مواجهات يقول...

- كريم

ازيك انت ياكوكى

انا اهووة

عمالة اتكلم وارغى

وانت مستخسر

تعلق بضمير حتى

ورغم كدة

بردوو نورت

اشطاااط

دعاء مواجهات يقول...

- جنى

دا انت نااقص تقوول

ربنا يكفينا شر مواجهات

كدة بردو

ماكانش العشم

اشطااط

دعاء مواجهات يقول...

- محمود

فعلا مدونتك عجبتنى

ويشرفنى متابعتك ياريس

بيس

دعاء مواجهات يقول...

- كيكى - واحد من الناس

ميرسى ياجماعة

الجديد قريب خاالص

نورتوا

اشطاطكوا

wa7ed 2ensan wnsan يقول...

اخ اتقفشت

لا وكمان الادله موجوده يعني مش هعرف انكر او اهرب

بس والله العظيم معلش

انا الحمد لله تمام والامتحان تمام التمام

وكما قلت عالفيس بوك الامتحان اشطا اللوز

شكرا على ردك وتعليقك وسؤالك

ادعيلي بس عالفيزيا

بس تعالي هنا ايه موضوع المفاجأه ده انتي هتشوقينا ولا ايه

يا رب تتم عشان نعرف ايه هيا ستي

دعاء مواجهات يقول...

- عبدالله

وكمان صاحى لدلوقتى

دا انت جريمتك

بقت دووبل

هدعيلك

واسكت بقى متجيبش سيرة المفاجاة

سلااااااام

Eldebug يقول...

ايه ده تاجين فى خبطة واحدة كده
ده انتى جامدة اوى بقى على كده ... انا لو واحد سالنى اسمك ايه بقعد افتكر ولا بتاع نص ساعة ... بصراحة بفكر الاول المغزى ايه من السؤال

wa7ed 2ensan wnsan يقول...

ايوة يا ستي للاسف لسه صاحي

اصلي قبل الامتحان كنت مطبق يومين من غير نوم 48 ساعه ولما رجعت نمت لحد الساعه واحده صباحا

وصحيت اذاكر شويه وانا قاعد عالنت

وبعدين انا عندي فيزيا بعد 11 يوم يعني لسه بدري


بالمناسبه البلوج بتاع الضربشمساويين جاهز للتدوين

http://darbetshamss.blogspot.com/

اللينك فوق اهه يا ريت بقى تذيعي هذا النبأ الهام على كل الضربشمساويه اللي تعرفيهم اللي هينضم للمدونه يبعتلي رساله عالميل دا
wa7ed_2ensan@yahoo.com
or
wa7ed2ensan@gmail.com
او يحطلي تعليق في المدونه بتاعتك اوبتاعتي اوك
معلش بقى هتعبك معايا

Gannah يقول...

دعاء
انا اخدتلى مشروب ع الماشى.ميرسى
اجاباتك بتدل على انك شخصية تلقائية وطيبة فعلا انا زيك كان نفسى اعمل فرق فى حياة الناس ولسه باحاول
ربنا يحققلك كل احلامك يا دعاء وعلى فكرة النجاح فى الحياة مالوش علاقة بالكلية يعنى ان شاء الله ممكن تنجحى اكتر بكتير من خريج اقتصاد وعلوم سياسية.
تحياتى

nigro يقول...

دعاء
بالنسبة للمدونة
أنا معاكم
شوفوا انتم نظامكم إيه و هتعملوا إيه و بلغوني

إشطاط

غير معرف يقول...

مساء الخيير

واضح جدا انك بتحبي تجيبي من الاخر ومبتحبيش الرغي
بس بجد دمك خفيف اوي
واجباتك منطقيه اوي
ان شاء الله تحققي كل أحلامك
هو صحيح .. انتي عايزه تبقي ايه
انا شايف انك تنفعي دبلوماسيه
او وزيره خارجيه
اوعي تطمعي وتقولي عايزه ابقي اكبر من كده


أحمد سلامه

gannah يقول...

مبروك مبروك على التاج

واحدة مفروسة يقول...

ايه ده هوه انا لسه ماجتش لغاية دلوقتى....
انا بعتذر بشده ...شديداً مشدوداًً

الاحلام كلها جميله و انتي جميله

عرفة فاروق السيوطى ( الاديب العاشق) يقول...

السلام عليكم

انا قريت البوست ده تلات مرات

عارفه ليه

العنوان فاصل ونواصل

والكلام مليان ومحتاج مواجهات

كل نقطة فيه

بخصوص الاعمال المجنونة

وبخصوص الاحلام والاصلاح والاصلاح الاجتماعى

ومعايير التصرفات والحرية

بس بما انك متكلمتيش فى المواضيع دى

وعاوزة البوست فاصل

فمش هنتواجه

رغم انى شايف انه مفيش مواجهات ولا حاجة

والى مواجهة اخرى

والعيب فى سهى وميرنا والجنتل مان بتاعهم والناس كلهم


تحياتى

enjy يقول...

دعاء كواجهات بتاعة ضربة شمس... اشطات اشطات اشطات..
اول مرة اجى هنا بس واضح جدا انى هاقرفك اجابات حلوة واضح منها شخصيتك
ممكن تقبلى تيجى مدونتى المتواضعة ونبقى اصحاب يعنى وكدة؟؟؟
سلام مربع

Amr Ezeldeen يقول...

أنا الأسعد يا دعاء بالتعارف ده

و بالنسبة لطلبك انا رديت عليكي فعلا بس عندى :)

لو المشوار بعيد قوليلى اجيبه بنفسي لحد هنا :D

monaliza يقول...

ربنا يحقق لك كل احلامك ويهيئلك كل الخير

جنّي يقول...

أنا أقصد أفعال الجنون المطلوب عملها في التاج ..
ما أقدرش يا أفندم على زعلك ..

بس أنا مش متخيل إني أقف أمام المرآم وأقوم بأي عمل جنوني .. ها أضحك على نفسي .. وتبقى مصيبة لو حد شافني ..

وربنا يابنتي يكملك بعقلك .. دا انتي ست العاقلين .. مش كده ولا أيه ؟!

rovy يقول...

السلام عليكم
ربنا يحقق لكى كل احلامك اللى بتدل على انك انسانه طيبه و جميله
ربنا يخليلك ماما وبابا ويكونوا دايما راضين عنك ويرزقك بالزوج الصالح والذريه الصالحه ويحقق كل اللى بتتمنيه ياارب
خالص تقديرى وتحياتى
rovy

عرفة فاروق السيوطى ( الاديب العاشق) يقول...

السلام عليكم

بعيدا عن المواجهات

يارب يحقق كل احلامك

احسن حلمين

- أموت وربنا راضى عنى حق الرضا

- ماما وبابا يرضوا عنى بجد وما أزعلهومش أبداً . (صعبة دى)

ان شاء الله مش صعبة ابدا

احسن كلام قلتيه

ندمت؟؟ لا أنا أساسا شايلة كلمت ندم

دى من قامووس حياتى لأنى مقتنعة إنى

أقدر آخد قراراتى وبالتالى لازم أكون

أدها وأكون مسئولة عنها- كما أننى

مقتنعة للغاية- بالجملة الشهيرة

(وتفييد بإيية ياندم ياندم) ....

ياريت الناس كلها زيك كده

تحياتى

دعاء مواجهات يقول...

-eldobug

خبر ابيااض

نص ساعةاسمك

اومال ينك بقى بقيت عمرك

لا انا عادى ف الريع اللذيذ

نورتنا

دعاء مواجهات يقول...

- gannah

اة طبعا معاكى تماما ان الانسان مش بكليتة ابدا

المهم الدماغ والاصرر والشخصية


نورتى بجد

بيس

دعاء مواجهات يقول...

- نيجرو

كنت متاكدة من دة طبعا

وانا قولتلك عند ف بيتك بقى ع التفاصيل

بييس

دعاء مواجهات يقول...

- أحمدسلااامة

ازيك يابرنس

بجد بفرح لما بتزورنى

بما انك ضربشمساوى

بدعيك للمشااركة معانا فى مدونة ضربة شمس لو بتعرف تكتب كويس يعنى

لو موافق خد ميلى من البروفايل وابعت

اوكى
بيس

دعاء مواجهات يقول...

- gannah

الله يبارك فيك يا قمر


انتى جنة تااانية؟؟؟


نورتى

دعاء مواجهات يقول...

- مفروسة

ياقمر انت تيجى وقت ما تحب

ويخليك ليا ياجمييل

بيس

دعاء مواجهات يقول...

- عرفة فاروق الاسيوطى

يااااة

يازاكرتك

انت لسة فاكر سهى وميرنا يارااجل

دا انت زاكرتك حديد

دا طلع بعدها

مها وولاء وانجى

وناااس كتيييييييييير

نورت

دعاء مواجهات يقول...

- انجى
ياخبر يانااس

دا انا الشرف الكبير ليا

حسااكى عسوولة وزى القمر

وخلاااص بقينا اصحاب فعلا

اشطاط اشطاط اشطاااط

دعاء مواجهات يقول...

- عمرو عز الدين

ما جينا بىق خلاااص

نورت

دعاء مواجهات يقول...

- موناليزا

اللهم آآمين ياجميل

تحياتى

دعاء مواجهات يقول...

- جنى

لااااااااااااااا

فية سوء تفاهم

انا اقصد ان الواحد يكون عمل حاجة فيها غباء اوجنون ولما يفتكرها يضحك ويبص ف المرايةويضحك ع جنوونة

بس كدة

نورتنى

دعاء مواجهات يقول...

- rovy

بجد احلى واجمل كومنت

ولكى مثل ما سألتى اللى لى ان شاء الله

تحيااتى

رندا يقول...

دعاء

اسمك جميل جدا

من منا لا يطلب الدعاء

عارفة موضوع التاج دة عبقرى
لاننا بنتعرف اكتر على قلوب الكل
وبنحس قوى بيهم
زى ماانا حسيتك قوى

حسيت فيكى البراءة والطفولة
حسيت فيكى الانثى والعفوية
حسيت فيكى الانسانة الوفية
وحسيت فيكى الصداقة
وحسيت فيكى القلب الى مليان ايمان بحب الله تعالى

ربنا يكرمك يارب بحفظ القرآن كلة

ربنا يسعد قلبك بالزرية الصالحة

دمتى بالحب كلة

رندا

دعاء مواجهات يقول...

- عرفة فاروق الاسيوطى

متشكرين يابرنس

بس لو كل النااس بقت نسخة واحدة هتبقى مشكلة بردوو

هنتخانق مع مين وهنضرب ميين؟؟

ولا ايية؟؟

تحيااتى

دعاء مواجهات يقول...

- راندا

اية يانااس الجمال والرقة

الدوبل دى

بجد ربنا يخليكى

انتى حد رقيق بشكل مش عاادى بجد

وحساسة اوى كمااان

قدرتى تكتشفي ما بين السطور

ربنا يوفقك لما يحب ويرضى

تحياااتى

صحفية روشة يقول...

النهاردة عيد ميلادى تعالو على مدونتى وسمعونى احلى هابى بيرث داى تو يووووووووو

هيما كووووووووووول يقول...

دودو العزيزة مع اني مش فاهم ولا كلمة من اللي مكتوب ف البوست ده لكن عاوز اقولك حاجة مهمة اوي تحطيها حلق في وداناتك ياقمر مطرح ماترسي دقليها زي ما بيقولوا يعني امشي امشي ودوسي وعيشي حياتك بالطول والعرض والارتفاع كمان لو حبيتي طبعا بحدود وخطوط حمرا وشفي رجليكي هتوصلك لحد فين واتعلمي كتير ف الدنيا دي لاننا فعلا مهمن حيينا فيها هنفضل نتعلم لحد مانموت وحرام بصراحة او ده رايي المتواضع الواحد مننا او الواحدة يدخل الدنيا دي ويخرج منها ولا كانه دخلها وميكونش اتعلم منها ولو حتي ازاي يعمل طبق سلطة ؟وحياة الاخوة ما ينفع يامعلمة
سلامي وتحياتي والي الامام دائما ياروووميل-اوووه اسف قصدي يادؤدؤ- يللا صباح المواجهات والسنجفة الهيماوية اللي بسنجفهالك
ابسطي يللا وزااطي بقي مش حارمك من حاجة اهو يااستاذة
الف مليون سلام وتحية لدماغك الجامدة

دعاء مواجهات يقول...

- هيما كووووووووول

ازيك ياواد يادكتوور

هههههههههههههههههههههههههههههههههه


ماشى ياعم تشكر ع السنجفة والمنجهة وكل حاجة

بيس يابرنس