الجمعة، يوليو 18، 2008

أحلم .. رغم أنفى هى أمى .


أمى رغم أنفى…

بعد التشجيع الجامد جداً من كل الناس الحلوين إنى أكمل كتابة عن (العمرة) قررت إكمال ما بدأت وباااردو هقسم البوست دة لجزئين :

الأول عن حبيبتى... والثانى عنى أنا...

فبصراحة لم أجد أكثر إلحاحاً فى ذهنى أكثر من مصر للحديث عنها (مصر)…. آة مصر تنحتوا لية… آة مصر بتاعتنا اللى احنا عايشين فيها دى …

وزى ما النااس بتقوول معرفتش قيمتك ياما إلا…….

بقوول أنا كدة لية بقى وإية لازمة الحكاية كلها على بعضها؟؟؟
أنا أقولكوا طبعاً أمال حجيب حد من برا يقولكوا..؟؟؟

أصلى فى الفترة الأخيرة دى شوفت نااس كتيير اوى عمالة تقوول كلام على شاكلة كفاية على مصر كدة … أنا حسيبها وأهاجر بقى أشووف نفسى..
والتانى يقولك مش أنا إكتشفت إن مصر مش أمى.. والتالت يقوول دى محصلتش مرات أبويا..

دا غير بقى إنى عرفت قيمة بلدى أكتر لما بعدت عنها أسبوعين بس فمابالك باللى بيغيب بالسنين عنها ولا بتفرق معاة ولا بيعد أصلا ً……… ودول كتيييييييييييييير.

وبصراحة الحكاية دى مش أول مرة أحسها طبعا ً لأنى حسيتها قبل كدة فى العمرة اللى فاتت واللى كانت اول مرة ليا أبعد فيها عن مصر فترة طويلة.. …

منذ اللحظة الأولى لخروجى من باب الطائرة (وصولا ً لمصر).. هواء مختلف ... رائحة مختلفة.. عبق مختلف.. إحساس مختلف .. نسمات مفتقدة .. هدوء نفسى وراحة غير مسبوقة.....

المعاملة بالمطار .. ناس جدعة .. أماكن للإنتظار.. سهولة الإجراءات .. إبتسامة مصراوية صافية
عكس المعاملة تماماً بالمطار فى جدة .. ناس عصبية .. 3 كرااسى ف المطار كلو.. إنتظار لانهاية لة لإنهاء الإجراءات .. خلع أحذية وأحزمة ..( للرجال) كإجراءات أمنية ...

وفى المنزل (تفتح الحنفية ) تشرب طوالى مش تدوخ على كوب ماء نظيف.. دا مش تهكم على فكرة دى حقيقة انت فى السعودية متعرفش تشرب كوباية مية من الحنفية لو مت حتى متقدرش أساسا ً بجد ياجماعة إحنا فى نعمة كبيرة للأسف مش حاسين بيها خاالص ....

كفاية ودا الأهم إن ربنا ذكرها فى ( القرآن الكريم) وبجد دا أكبر تكريم ليها ودليل على أهميتها
لأن البلاد التى ذكرت فى القرآن هى (مكة والمدينة ومصر) أى أن مصر فى أقرب مكانة لهذة الأماكن المقدسة… ودة يخلى كتيير اوى يفكر قبل ما يقوول عنها كلمة غير مسئولة..

وغييير كل دا ياعم كفاية إنك منها ... وإنها بلدك .. دى لو حدها كفاية.........

وفى النهاية تحضرنى الكلمة الجميلة للجميل عبدالمنعم مدبولى :

( لف العالم ودو عن وطن لو عرفت تشتريلك بلد غيرها وأرض تحميك غيرها.. إ شترى....)

الجزء الثانى:

واللى زى ما قولتلكوا هيكون عنى أنا ..

أنا الحمد لله حاسة بشئ من الطمأنينة والهدوء الغير مسبوق بداخلى حاسة بمساحة من البياض النفسى جوايا مهما اتضايقت أو زعلت بقيت بحس إنى جوايا مساحة محدش يقدر يقربلها أبداً
من التسامح والنسيان والتكبر على الصغائر والهفوات .. بقى جوايا منبة بيحذرنى من أى خطأ ويصحينى لما بغفل ...

منكرش طبعاً إن الشيطان اوقات كتير بيزين ليا أشياء خطأ أنا قررت البعد عنها .. إلا أن رحمة الله أكبر وأوسع بكثير وأجدها تحذرنى وتنبهنى فى الحال إلى أن هذا هو الشيطان...
فأبعد حامدةً لله شاكرةً له ...

مثلا ً : قررت ما أحطش على الموبايل غير القرآن والأغانى الإسلامية
ألاقينى أول ماأشوف الأغانى ع الكمبيوتر أنزلها وأقول واحدة بس.. أصلى كنت بحبها أوى..
وهووب يرن المنبة ويقوللى كدة هترجعى واحدة.. واحدة.. مينفعشى يادودو... لااازم تبقى قوية أكتر من كدة... فأفووق وأمسحهم فوراً .. وأقوول إنتى قوية يادودو..

مهى دى فعلا القوة إنك تقدر تتحكم فى نفسك وتحكم الصح وترجحة على ميزان رغباتك والأشياء اللى بتحبها وبتموت فيها كمان..

أكتر دعوة كنت بدعيها هناك هى (الثبات) على الحق وعلى دين الله عز وجل وكل حد بيقرأ كلامى دلوقتى يدعيلى بيها لعل الله يتقبل ويثبتنى أكثر ...

(ربنا لاتزغ قلوبنا بعد إذ هديتنا وهب لنا من لدنك رحمة إنك انت الوهاب)

حلمت (حلم ) غريب نفسى لو حد بيعرف يفسر يقوللى معناة ::

حاسة إن وراة مغزى بس مش فهماة...

(حلمت إنى راجعة من العمرة اللى كنت فيها وأنا فى المطار قابلت إنسان أساء ليا بطريقة ما وفى نفس اللحظة هو كان مسافر يعمل عمرة وأنا المفروض راجعة وأنا من جوايا بقول هتعمل عمرة ربنا يتقبلها منك ويغفرلك.. وساعتها جانى تليفون رديت قالولى ماما مسافرة عمرة ومفيش حد يروح معاها إستنيها وسافرى إنتى معاها العمرة وفعلاً إنتظرتها .. إتأخرت وركبت الطيارة وقولت أستناها جوا الطيارة عادى يعنى فوصلت بس إكتشفت إنها نسيت بطاقتها أو الباسبور مش فاكرة.. المهم رجعت تجيبة .. وإستنيتها وف الفترة دى الإنسان دة كان بينظر ليا نظرات غريبة ويضحك مع أصحابة .. أنا ماكانش هاممنى وفجأة الطيارة بدأت تطير قلقت اوى وقولت هسافر لوحدى وماما لسة ماجاتش .. الطيارة رجعت تانى ففرحت إنى هلاقى ماما بس للأسف كانت لسة موصلتش وسافرت من غيرها وكنت خايفة وقلقانة أوى.
الغريب إن الطيارة دى بقى كانت مكشوفة وإحنا بنطير المفروض إن فية ليها مسار راحت تمر من المسار دة إصطدمت بطائرة ( هيلوكبتر) وكان حجمها صغير جداً وكل الناس كانوا خايفين منها أوى وبيصرخوا وأنا حاولت أضربها بإيدى علشان أبعدها وفعلاً نجحت فى دة بس جرحتنى فى رجلى وبكيت من الألم وصحيت وأنا بمسح دموع كتيير أوى حقيقية وأنا فعلاً فاكرة الدموع دى أوى..

ويمكن هى دى اللى مخليانى حاسة إن فية رسالة من الحلم دة بس أنا مش فهماها – الحلم كان فى مكة- قبل السفر لمصر ب3 أيام تقريبا ً... )
بس كدة ..

اللى مش بيعرف ياريت ميفتيش ياجماعة بليز..

وفى النهاية أؤكد عليكم متنسوش تدعولى بالثبات وتمام الهداية والمغفرة
وبجد لااازم كل واحد أو واحدة تسعى أوى للعمرة للتطهير النفسى والسمو بالروح بشكل مش عاادى وصدقونى اللى هيجربها مش هيقدر يتنازل عن الزيارة مراات ومراات..

حاجة أخيرة بقى بجد (أنا لحد دلوقتى حاسة إنى جاية مصر فى مهمة وراجعة هناك تانى لمكانى وطقوسى اليومية دا إحساس قوى جداً جوايا مازال منذ وصلت مصر مستمراً)

ملحوظة :-

(كل واحد عاوز يعلق على كل كلمة براحتة جداً ويطول براحتة أوى كمان أنا بحب أسمعكم ومحدش يتكسف دى مدونتكم كلكم... )
( وبالنسبة للمفاجآت إنتظروها فى أقرب وقت) وياارب تعجبكم..

والحمد لله رب العالمين...

هناك 84 تعليقًا:

بطوط حبوب يقول...

انا الاول انا الاول

هاتى خمسه جنيه

Ahmed Al-Sabbagh يقول...

حجز تانى تعليق رخامة

هقرا وراجع

بطوط حبوب يقول...

احساسك انك فى مهمه هنا وراجعه تانى يااااااااااه احساس حلو اوى

عارفه الاحساس ده احيانا الواحد لما ربنا بيفتح عليه ويقوم الليل كام يوم ورا بعض

بيحس انه منتظر الليل اوى واحشه الليل اوى
وواحشه انه يناجى ربه اوى


مش بحس بده كتير - يمكن ولا قليل - هى مره ولا حاجه بس مفتقده اوى وحسيت بيكى وانتى بتقوليه

حكايه الاغانى دى انصحك اشترى تاب ابن القيم الداء والدواء
الكتاب فكرته كلها او معظمها فى انه بيعدد عقوبات الذنوب وبخوف الواحد اوى
هتلاقيه فى اى مكتبه اسلاميه والكتاب رخيص اوى حوال 7 او 8 جنيه

لو اشترتيه وعجبك ادعيلى
سلاااااااااام

Ahmed Al-Sabbagh يقول...

جميل اوى

حمدلله على السلامة تانى مرة

"أنا لحد دلوقتى حاسة إنى جاية مصر فى مهمة وراجعة "

راجعة فين يا حاجة هو دخول مصر زى خروجها .. على جثتى هههههه

والله بوست كله جميل اوى

بس عجبتنى الطيارة المكشوفة اوى

رغم ان ماليش فى تفسير الاحلام بس انا اقدر اقول انك ملاك حارس لناس كتير اوى حواليكى وان كل الناس بتحبك اوى

ايه رأيك بقى ؟ انفع فى تفسير الاحلام

تسلم ايديكى

احمد

مدينه الملائكه يقول...

جميل البوست يا دعاء
عندك حق الي عايز يسيب مصر انت ضامن برة ايه ضامن هتعيش يوم برة اذاي ضامن توصل اصلا لبره ده
فوقو يا بشر
هقوم دلوقتي واكلم وقت تاني

مي

المحارب المتيم يقول...

السلام عليكم

ثبتك الله على الحق وهداك وهدانا وكتب لنا الحج والعمرة ان شاء الله

جميل ان تحبى بلدك والاجمل ان تشعرى بالشوق لها

ولكن الاجمل من كل هذا أن تسعى فى مرضات الله وتتحملى المشاق والصعاب من أجله
وتلك حكمته

لا اعرف ماذا اكتب فقد كتبت انت ِ كل شئ يقال

تحياتى

عرفة فاروق السيوطى

اعتذر عن تأخرى فى الرد على البوست السابق لظروف قهرية

Mero.. يقول...

كدا يبقي تضميني للي بيقول مصر مش أمي هههههههههههههههه
وبعدين هدوء وهوا وجمال وراحة نفسية وانتي نازلة من الطيارة هنا في مصر..!!
انا وانا نازل كان هيجيلي سكتة من منظر السحابة السودا..كنت فاكر انها اسطورة خيالية طلعت كارثة حقيقية..
وبتوع شركات السياحة وقفين بكروش ومكشرين وعرقانين مستنيين الافواج اللي جايلهم..
دا حتى اللي شغالة في السوق الحرة كرهتني في نفسي على ما بعتلي..
ع العموم هيا تجارب شخصية ووجهات نظر ..
بس ع العمرة معاك حق ..
جو تاني لوحده
تحياتي :)))

همس الاحباب يقول...

ربنا يثبتك وايانا على الحق والهداية دائما
بوست رائع جدا
وانا متفق معك فى الكلام عن مصر مع انى ما بعدتش عنها بس حاسس انها اجمل واعظم بلاد الدنيا وحاسس انى لو خرجت منها ابقى زى السمك بعيد عن الميه
وثانيا مشاعرك بعد العمرة واحساسك بالراحة النفسية والجو الروحانى ده شىء اكيد ودليل على ان ربنا اكرمك وان شاء الله عمرة مقبولة
وربنا يكرمك بعمرات وعمرات وحج كمان
وحمدلله على السلامة

PrInCeSS BeRy يقول...

دودووووووووووو وحشتينى اخبارك اية
ربنا يثبتك يا حببيتى ويوفقك ويهديلك الحال

اما عن مصر فا انا زيك بجد بحب البلد دى اوى ومحبش اسيبها وبحس بحنين ليها طول الوقت حتى وانا فيها


اما عن الحلم فا انا اوقات بعرف فى الاحلام واوقات بسكت فا انا ساكتة هههههههه مش عارفة افسرة بس انا فهمت منو حاجة انو صاحبة الحلم حد طيب وبيحب ربنا وربنا بيحبة وبينصرك دايما مع انة فى حناس بتكنلك ضغائن بس انتى ربنا بينصرك والحق دايما معاكى وحتى وحواليكى خوف وطيارة مكشوفة وانتى فى سماء الله الواسعة مش خايفة بل بالعكس انسانة طيبة وبتدافعى عن اللى معاكى فا ربنا دايما معاكى وبيقويكى ومبيسبكيش بس حلم حلو


اتمنى مكنش طولت عليكى باى يا قمر

enjy يقول...

يا خبر بمبى فاتح انا التعليق العاشر؟ ربنا يثبتك يا دودو يا حبيبتى وترجعى تانى كتيييييييييير

rovy يقول...

السلام عليكم و رحمة الله

كلامك جميل قوى يا دعاء ربنا يحميكى فعلا مصر حلوه قوى و لو كلنا نحسها كده مهما حصل اكيد حتكون احلى و احلى يا رب يحفظها لنا و لاولادنا من بعدنا ..
كلامك عن العمره خلانى اشتاق لها قوى اكثر و اكثر ان شاء الله ربنا يكتبها لى قريب .. و ربنا يثبتك يا رب و يحفظك و يكون معاكى دايما و يوفقك ..

بالنسبه للحلم ان شاء الله خير
و توقعى ان الرحمن دايما حيكون معاكى و ينصرك ما دمتى مدافعه عن الحق و الله سبحانه اعلى و اعلم ده مجرد احساسى بالحلم ..
دمتى بخير فى رعاية الله و حفظه

تقديرى و تحياتى

maiosha يقول...

دودو
ألف حمدلله على السلامة تانى يا جميل

مصر هى أمك وأمنا كلنا غصب عننا فعلا والله.. مصر دى زى بيتك لما بتغيبى عن بيتك مده وترجعيله تانى بتحسى براحة نفسية كبيرة جدا حتى لو كنتى مثلا قاعدة فى فندق 5 نجوم شعور ودفى البيت حاجة تانية خالص

للأسف أنا معملتش عمرة قبل كده .. بس بجد وصلتنى كل كلمة قولتيها وكل إحساس إنتى حاسة بيه .. ربنا يكتبهالك تانى وتالت ورابع كمان

أما بالنسبة للحلم .. فأنا للأسف مليش فى الأحلام .. لكن إطمنى إن شاء الله خير متحوليش تفسريه تفسير وحش ومتخليش حد يقنعك بكده .. بس حاولى تسألى حد بيفهم فىتفسير الأحلام ويكون عارف هو بيعمل إيه

معلش طولت عليكى بس وحشنى الكلام معاكى والله .. حمد لله على السلامة تانى

فاتيما يقول...

دودو يا جميلة
اللى إنتى فيه دا كله من نفحات الزيارة
ربنا يهدى نفسك علطول و يثبتك
ربنا كبير قوى و رحمته وسعت كل شىء
مش عارفة أفسر حلمك دا بس متهيالى خير و الشخص اللى إذاكى دا مش هيقدر يأذيكى تانى بعد كدا
و مامتك مش مصدقة كدا و خايفة عليكى
الضحك اللى ضحكه مع اصحابه دا معناه العكس و العياط بتاعك معناه الفرج بعد الشدة
دى رؤية أتصور كدا
بفتى أهو بس أصلى أنا كمان بهتم قوى بالأحلام و تفسيراتها و كتاب أبن سيرين هايل بس إنتى أدرى بتفاصيل حياتك أكتر فيعنى ممكن تفكى الرموز اكتر منى ..
مصر دى اجمل و احسن بلد فى الدنيا
اللى ماسكينها بس هما اللى زفت
لكن البلد نفسها ارض و ناس و هوا و نيل و كل حتة تتقال بالروح و الدم بس إحنا اللى عاجزين نحميها و نخليها احسن و كل واحد بيحاول لوحده و على قدر جهده
و يلعن فيها بعشق زى الداء على رأى صلاح جاهين ما قال
أنا رغيت و طولت اهو
ربنا يسعد ايامك دايماً

صاحب المضيفة يقول...

بص ياست دعاء

اولا
الناس لما بتتكلم عن مصر بالشكل ده اكيد مش بتتكلم من فراغ لان الوضع الان لا يسر عدو ولا حبيب فهمه بيقولوا كده من الحسرة على ما ضاع


ثانيا الحلم ده كده لازم تشوفي حد له في تفسير الأحلام أحسن لان واضح ان له مدلول قوي وبلاش تاخدي الكلام من الغير متخصص .

ربنا يسعد قلبك يارب ويرزقك الثبات دنيا واخرة

امين

رئـــــيسـة حزب الأحلام يقول...

حمد الله على السلامه تانى وخصوصا يعد الخواطر الجميلة دى
وفعلا من كلامك حسيت بحبى لليلد دى
رغم اننا مش مرتاحين
الف تحيه لكى اختى الحبيبه دعاء

نور يقول...

ازيك يا دو
وحشانى انتى عارفه الجهاز بقى احواله عامله ازاى
الأول حمدالله على السلامه يا قمرى
بصى بقى عن مصر فالكلام بيكون تنفيس مش اكتر
انما هل فعلا الواحد بيحبها فاكيد دا الواحد بعيط لما بيسمع اغنية وطنيه
اما عن احساسك فيا رب ربنا يديمه عليكى ويثبتك و تقدرى تعملى عمره كل ما تحبى
و يهدينا كلنا ان شاء الله
اما الحلم بقى فماليش فى التفسير
و بعدين راجعه فين احنا مش هنسيبك اساسا
سلام يا ديدى

بسنت يقول...

عمره مقبوله ان شالله يا دعاء
وربنا يوعدنا ان شا الله
الواحد من كتر ما بيشوف ويسمع عن الرحله الروحيه دى بقت امنيه حياته
ربنا يثبتك لان الثبات دا فعلا اصعب حاجه
سلمتى

دعاء مواجهات يقول...

بطوط

يادكتور دا الشرف ليا أنا

خد ياعم آدى 10 جنية بحالها

برة ع باب المدونة

__________________________________


ربنا يكرمك لنصايحك الغالية بجد

ودعيالك ياابنى

دعيالك

من غير حاجة

ربنا يكرمك ياارب

نورت

مدحت محمد يقول...

بسم الله

اولا

الحلم خير

ثانيا

مصر نعمة دى حقيقة بس للاسف خيرها منهوب بس هى بجد نعمة فعلا انا مرة شربت ماية من الحنفية فى السعودية بجد معدتى اتقلبت من كتر ماكانت سخنة اصلا

بس السعودية برضه تحفة والمدينة ومكة والمدينة راااااااااااااااااااااائعة جدااااااااااااااااااااااا
حاسس انك جواكى خير كتير يادعاء ربنا يثبتك يارب

حاولى تحافظى على النور اللى انتى راجعه بيه لان الشيطان من النوع اللى ياخد الانسان للمعصية واحدة واحدة
لحد مايقدر يملكه لانه مش هيقدر يحولك للمعصية مرة واحدة دلوقتى لانك جاية من طاعة كبيرة جدا ومحفوظة بأمر الله

تحياتى وربنا يتقبل منك وتزورى سيدنا النبى تانى وتطوفى بالكعبة تانى

سلام عليكم

دعاء مواجهات يقول...

أحمد باشا الصباغ

لاعاش ولا كان اللى يوصفك بالرخامة

دا انت منورنى ديما

وشكلك كدة مشوفتش جملة(اللى ميعرفش ميفتيش)

بس والله بجد بفرح لما بشوفك عندى

وانت عارف كدة كويس اوى

سلااام

دعاء مواجهات يقول...

مدينة الملائكة

مستنيااكى

بس من وجهة نظرى الموضوع مش ضمان وبس

نورتى

دعاء مواجهات يقول...

عرفة فاروق

تقبل الله دعائك

وأعانك على ظروفك

نورتنى

دعاء مواجهات يقول...

- ميرو

صح كدة ياميرو

لكل واحد ظروفة

ووجهة نظرة..

تحياتى لييك

اة صح لية بقى مصر مش أمك؟؟؟؟؟؟

دعاء مواجهات يقول...

همس الأحباب

ايوا كدة انصفنى فى رأييى

أحسن حاسة انى محدش معايا كان بقوول

اى كلااام

نورت يا أبو همس..

دعاء مواجهات يقول...

برنسيس بيرى

ياارب ياقمر ياارب

واتمنى انة يكون فعلا حلم جميل

لان دة إحساسى الداخلى

منورة طبعا

دعاء مواجهات يقول...

إنجى

اللهم آمييييييييين

كويس انو بمبى فاتح مش غامق

اصلى مش بحب الغامق


بمووت فيكى..

دعاء مواجهات يقول...

- rovy

ياارب ياجميل يحميهالنا

ويحميها بينا


احلى امنية بجد

منورااانى

دعاء مواجهات يقول...

- ميوشة

ازيك انتى ياقلبى

الله يسلمك

بجد انتى بنوتة عسولة جدا

وانا مرتحالك اوى

وان شاء الله نكتشف بعض عن قرب اكتر

بيس

دعاء مواجهات يقول...

فاتيما

ياحبيبة قلبى انتى بالذات

ترغى زى ما تحبى انتى متعرفيش اصلا

انى بدور على تعليقك من وسط التعليقات واقرااة الاول

وياارب يكون الحلم زى ما قولتى كدة

نورتينى ياأم يوسف..

دعاء مواجهات يقول...

صاحب المضيفة


كلامك صح بس مش معنى كدة اننا نعلن عدم انتمائنا للبلد

وبالنسبة للحلم فانا معرفش حد بيفسر بصرااحة

بس حسيت انى عاوزة احكية

نورت

دعاء مواجهات يقول...

رئيسة حزب الأحلاام

انتى هتاخدينىف دوكة ولا اية؟؟

فين تفسيير لاحلم ياسيادة الريسة

والا هعمل ثورة عليكى واعزلك

انتى حرة

منورة

دعاء مواجهات يقول...

نور

حبيبة قلبى ربنا يخليكى ليا

وياريت فعلا يكون تنفيس وبس

نورتى

موضوعك الاخير تحفة بجد..

دعاء مواجهات يقول...

بسنت

اللهم إرزقنا جميعا

الثبات عزيزتى بسنت

قولى آمييييييييين

نورتينى

دعاء مواجهات يقول...

مدحت محمد

ربنا يسمع منك ياارب

وكويس انك مجرب هناك وعاارف


علشان بس يصدقوونى

شرفتنى

دكتور بهــدوء يقول...

الجزء الأول
**********
على اسم مصر التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء
بحبهااااااا أوي يادودو
مهما عملت ومهما حصل فيها
اهلها شوارعها
نيلها
فسحها
اثارها
مشاكلها كل حاجه فيها
انا بردو اول مارجعت م السعوديه حسيت باللي بتقولي عليه ده بالظبط

ثانيا
*****
بالنسبه للثبات ربنا يثبتك يارب دايما

وتفضلي ع الروحانيات الجمييييله اللي جايه بيها
ويكتبهالك ربنا مرات ومرات
وكل المسلمين يارب

Eno يقول...

حمد الله علي سلامتك يادعاء
وصف احساسك حلو اوووووووووي

بالله عليكي ادعي لكل اللي نفسه يعتمر ربنا يسهلهاله ربنا يكرمك ويثبتك ويبركلك :)
سلام :)

appy يقول...

بصى يا دودو مصر حلوة وبحبها
بس بينى وبينك متقارنيش المطارات يا حبيبه قلبى انا سافرت بره بصراحه كتير ومطار المغرب اللى تعتبر اقل بلد برقبه مطار مصر بس خلاص
اما باقى الرحله ربنا يا رب يقبل منك وتفضلى كده على طول

شهد الكلمات يقول...

شوفي انتي بتقولي اية ان مصر اتذكرت في القران هي و مكة و المدينة بس
شوفي مكة و المدينة عاملة ازاي و ناسها بيحبوها ازاي و بيخافوا ع نضافتها و ع الصلاة و بيتقوا ربنا
و شوفي احنا بقي مش حسين بقيمتها ولا بنصلح فيها و لا بنخاف عليها و حتي لا بنتقي ربنا ولا نيلة

ربنا يهدي بجد

بوست جميل بجد

تحياتي

nona يقول...

مصر دى باد جميلة فيها كل العوامل انها تبقى احسن بلد فى الدنيافيها الموارد البشريه الكويسة والموقع الجامد والموارد الاقتصادية زى السياحة وقناة السويس وحاجات كتيرةتخلينا احسن بلد وحتى لو هيا مش حلوة حلوة اووى الجملة بتاعة فيلم مافيا زى ما هيا حبها الانتماء لبلدنا او حبنا ليها ده المفروض شعور فطرىزى لما بنتولد بنحب ابونا وامنا واللى عنده شعور تانى ناحية بلده انا فى رايى انه ده حد مش متوازان فى ناس كتير بتسيب البلد وتهاجر وتنساها وفى ناس تانية زيك يادودو كده متقدرش تبعد عنها

WhItE HeArT يقول...

انتي عارفه يادعاء انتي قلتي كل اللي كان نفسي اقوله بس انتي رجعتي لبلدنا اللي هيه مامتي رغم انفي "مصر" انا لسه بس هانت كلها يومين

وفعلا الواحد ميحسش بقيمتها الا لما يسيبها كنت انا من ضمن الناس اللي كتبت اني بفكر اسيبها في بوست اسمه بفكر اسيبك بس الظاهر اني مقدرش اسيبها كل حاجة فيها بتنادي

طبعا مش الحنفيه

هههههههههههههههههه

لا دي هيه بتناديدي

بوست بحييكي عليه بجد وربنا يباركلك


تحياتي

نهر الحب يقول...

دعاء ازيك
يارب تكونى بخير
اولا حلو اوى البوست
وعجبنى جدا الكلام عن امنا مصر
واتمنى ان يرتفع الاتنماء شوية عن بعض الشباب او خلينى اصلح الجملة ان موجة الغضب الشعبى دى تزول على خير
وان كل واحد يحاول الاول يصلح من نفسة ويراعى ربنا لتكون مصر احلى
بدل من القاء وابل من السباب او اللوم على مصر ونحن سبب فى ما الت اليه
الامور هناا


ثانيا عنك
فأنت انسانة جميلة عنيدة مش عارفة لية بس انا حساكى كدة عنيدة
المهم يعنى ربنا يثبتك يارب
وتكونى دايما بترتقى فى مشاعرك الايمانية
باستمرار

ثالثا
سلمت ايدكى على البوست داا

كلام.....لبنات حوا يقول...

عزيزتى
معلش مقصر معاكى

احلا حاجه الثبات اتمنا دايمن الثبات فى الحق والصح

وربنا ينولك اللى فى بالك وتحجى يا رب قريب حج سياحى كمان

مصر حلوة بس بلاد كتير حلوة برضوا واكل العيش يحب الخفية

واسعى يا عبد وانا اسعى معاك

ولازم الانسان يجرى على رزقه حتى لو فى الصيين

وحب المكان لايتعارض مع مصلحتى واحتياجاتى

تحياتى

سلام

غير معرف يقول...

السلام عليكم على فكره انتى لو من ادغال افريقيا بعد متمشى منها اكيد هتحنلهااما بقى بالنسبه لميه الحنفيه وبعيدا عن الكلور والحاجات المسمه دى اسالى اهل برج البرلس وبالنسبه لريحه مصر اكيد انتى نزلتى مطار القاهره واخيرا القران بيقول فى حقا قال تعالى واستخف قومه فاطاعوة , هتقوليلى احنا هزمنا الصليبين والمغول هقولك والمصحف المماليك تعرفى اخر نكته سمعتها ايه تانى الجمهوريه علمى علوم مثلها الاعلى ابوتريكه مع احترامى له كا بنى ادم محترم0000000نادر

غير معرف يقول...

نسيت حاجه انا بتاع النقاب قبل مانسى ايه راى عامل السنترال فى اغنيه ماشربتش من نلها لشرين احمد من غير زعل 000نادر برضه

واحد من الناس يقول...

ازيك
الاول مبروك علي العمرة

التاني حكايه المعاملة في مطار القاهرة دي واسعه اوى
كلنا عارفين الحقيقه المره

ياريت كلنا صافيين زيك


MOOOD

دعاء مواجهات يقول...

otoo
دكتور بهدوء

طبعا مش عاوزة اقولك

اد اية انا بمووت فى الرباعية دى بجد

بشكل مش عااادى

وربنا يكرمك انت كمان وتنجح بتفووق

نورت

كيكى يقول...

عووووووووووووووووووووووووو انا جيت اتخديتى
.............................
متهيل بعد الكلام
دة لو طلعلك عفريت علاء الدين ابو شعرة واحدة
ولا هيتهزلك شعرة
..............................
بجد انتى اديتننى احسااااااااااااس
عالى اوووووووووووووووووووووى
بجد
بجد
ربنا يثابيتك
ونولها كلناااااااااااا
ياااااااااااااااااااارب
بجد
ومصر هى ام ااحمد بالنسبة لية
............................
بجد يا دودو..
شوقتينى اروح
..................
واية يابت
المفاجات شوقتينى بجد
..............
ياترى
مين يقدر يخد
كيكى
؟
؟
؟
فى الانتظاااااااااااااااااااااار
.........................
دومتى فى حفظ الرحمن وربنا يخليكى ويسعدك على طول الخط
......................
ااااااااااااااااااااة
صحيح
فين الجلباية والطاقية
؟
؟
.....................
عووووووووووووووووووووو

دعاء مواجهات يقول...

eno

وصل ياجمييل

الله يسلمك ياقمر

وحشتينى اوى

بيس

دعاء مواجهات يقول...

- آبى

ياارب ياجميل

بس انا مقارنتش المطارات من حيث التقدم والجمال

انا بقول المعاملة والراحة فى الاجراءات

واول ما اروح المغرب هحكم طبعا

ممكن اغير رايي

سلاام

دعاء مواجهات يقول...

- شهد الكلمات

بلااش الاحكام المطلقة

الناس عمرهم ما كانوا ولا هيكونوا ملايكة أبداً مهما حصل

ومش كل اهل مكة والمدينة زى ما انتى متخيلة كدة...

مش عاوزة انم بس

نورتى

دعاء مواجهات يقول...

- نونا

صح ياحبيبتى

هو كدا بالظبط

مش كل الناس زى بعضيها

نورتى كعادتك الجميلة

بييس

دعاء مواجهات يقول...

- whit heart

ان شاء الله ترجع

بألف سلامة وخير لمصرك ومصرنا كلنا

هو دة المصرى ميقدرش يطلع من المية أبداً

نورت

دعاء مواجهات يقول...

نهر الحب

انا تمام الحمد لله

يخرب عقلك

عرفتنى منين انى عنيدة


نورتينى ومستنياكى كتيير اوى

بييس

دعاء مواجهات يقول...

كلام لبنات حوا

كلامك صح اكيد

بس انا بقى ضد الهجرة

مش ضد العمل ولا السفر ولا التعليم خارجها ابدا


نورتى

دعاء مواجهات يقول...

نادر اللى مهووش ناادر

اكيد طبعا انت مش اسمك نادر

بس بتقوول كدة علشان تسكتنى عموما

انا مشكلتى انى مبعرفش اسكت وانت لو عارفنى اكيد عارف الحتة دى فيا

ثانيا مع احترامى الكامل لتعليق حضرتك إسمحلى أقولك

انك مش مركز باين ولا اية ومدخل ميت حاجة ف بعض قرآن كريم مع ثانوية عامة مع إية مش فاهمة انا بالظبط عاوز تقول اية

او يمكن فاهمة بس مش عارفة العلاقة اية بردوو .. انا لااتكلمت عن حكم ولا فسادولا قيم اخلاقية..

______________________________-

بالنسبة لبتاع السنترال

(بما انى فاهمة قصدك كويس اوى فأنا مش هرد على السؤال التهكمى دة)

_____________________________

دعاء مواجهات يقول...

ناادر

تعالى هنا

(إية حكاية المغول والصليبيين دوول كمان)

طب والنعمة ما جبت سيرتهم....

دعاء مواجهات يقول...

واحد من الناس

لا بقى يامحمود

مش واسعة ولا حاجة

الناس بجد معاملتهم كويسة جدا وبيسهلوا مش زى هناك صدقنى

نورت

دعاء مواجهات يقول...

كيكى

اية يابت مين ام احمد دى؟؟؟؟

اة فعلا انا مش بتخد خالص ع فكرة

انا مش قولتلك مرة الجلابية والطاقية برة ع باب المدونة

ولا انتى بتنسى


المفاجآت مش بتخض بتفرح المفروض ياعبيطة

نورتى يابت....

كاميليا يقول...

أنا جاية أسلم

واقول حمد الله على السلامة للمرة الثانية

بوست جميل

حسيت بكل كلمة فيه

وانتى عارفة ليه


وحشتيييييييييييييييينى


تحياتى وحبى

bedo يقول...

سلام عليكم

بما اني مغترب فكلامي هيكون واقعي
بجد مصر غالية اوي عندي ومعرفتش ده الا بعد اول شهر من البعد عنها احنا بنحبها يادعاء بس هما بيكرهونا فيها والظروف بتجبرنا على البعد بس الاكيد اننا بنحبها ونتمني نبوس ترابها بس غصب عننا وفي اول فرصة للرجوع لا يمكن نتأخر لحظة
سعدت بوجودي في مدونتك التي شعرت فيها بالنضوج ما شاء الله
بيدو

حبيبـــــــة القمـــــر يقول...

السلام عليكم
حمدا لله بسلامتك ياجميله وعمرة مقبوله باذن الله
ربنا يثبتك وتفضلي في حالة نقاء نفسي وروحاني لحد العمرة الجايه وربنا يكتبلك الحج كمان
بس دعواتك مش تنسيني

اقولك حاجه ومش تستغربي
انا لما بسافر مجرد كام يوم لأي بلد داخل مصر مش خارجها بحس ان اسماعيلية وحشتني وان الهوا ريحته اختلفت والميه طعمها اتغير وكل حاجه حواليا متغيره رغم استمتاعي بالصحبه والناس لكنها بتوحشني
وافضل اقول امتى ارجع بقى
مابالك لو خرجت بره مصر كلها
اكيد هتبقى اصعب واصعب

بجد مهما حسينا بالملل من بلدنا لكن حبها بيسري في دمنا
وافتكر لو مش بنحبها مكناش نتكلم عن سلبياتها ونتمنى انها تتحسن اكتر واكتر

دودو البوست بجد هايل
دمتي جميله ياقمرى

غير معرف يقول...

انتى بتسالى ايه اللى دخل القران فى الموضوع انا كنت اقصد ان زى مالقران مدح مصر فى نفس الوقت زم اهلهااما بالنسبه للصليبين والمغول اصل حسيت انك مصدقه التاريخ شويه لو مكنتش اعرفك كنت قلت انك معاكى كانيه الحزب بس انا عارف ده كله ليه ده طبعا علشان الجيره الطيبه لعز والشازلى قبل مانسى بالنسبه للثانويه العمشه دى كانت نكته بيخه مش عارف اضحك عليها 000000فى النهايه انا بوجه ليكى دعوه للمناقشه فى موضوع النقاب 000000000000نادر وكتاب الله

ادم المصرى يقول...

مشاء الله عليكى فى حديث جميل عن الاغانى رواه ابن ماجه بيقول قال رسول الله صلى الله عليه وسلم سيأتى زمن على امتى يستحلون فيه الحر والحرير والخمر والمعازف صدق رصول الله صلى الله عليه وسلم الاغانى محرمه شرعا لئن بها كلام يهز القلوب لمعاصى والحب الحرام وكدا يعنى والمسيقه وكدا ولكن طبعا الانشاد ذى مشارى راشد كدا دى طبعا حاجه روعه وتقبل الله منا ومنكو جميعا ان شاء الله وربنا يقدرك على قيام الليل كلو ولكن فى نصيحه اخرا يا دعاء بلاش تقولى الى بتعمليه من العبدات لئن رسول الله حظر من كدا لئلا لا يصيبك مكروه وأيمانك ينقص الايمان منظور يا دعاء وربنا يقوى ايمانك

Mohamed Dawod يقول...

سلام عليكم
اولا بالنسبه للجزء الأول من الموضوع....متصدقيش حد مصرى ابدا يقولك انه مبيحبش مصر ممكن يكون زعلان منها زعلان من الناس زعلان من اللى ماسكينها بس ابدا ابدا محدش يكره بلده.....ممكن يكون الغضب والملل هو الرغبه انها تكون احسن بلد.....مشكلتنا كمصريين دايما اننا بنكون عايزين حافز يخرج طاقتنا مش عارف ليه مبنعرفش نبقى ايجابيين قبل المصايب ما تحصل.....انا اسف انى اقول كده بس مع الأسف احنا فى مصر مستنيين مصيبه تحصل علشان نصحى ونفوق وربنا يستر.......بالنسبه للعمره مش عاوز اقول يا بختك لا تقولى انى بحسدك بس بقولك ماشاء الله وربنا يثبتك ويثبتنا ويحسن خاتمتنا.....احنا داخلين على زمن معدش حينفع فيه اللون الرمادى....يا ابيض يا اسود ولا زم مختار ونثبت على اختيارنا.....يارب اجعلنا مع اهل البياض......بالنسبه للحلم فأنا ماليش فيه ومش حفتى بس اتمنى لك كل خير وسلامه......خالص تحياتى وشكرا ليكى

سبهللة يقول...

تعرفى فعلا ان اللى يسافر برة مصر وخاصة دول الخليج يعرف قيمة جو البلد وقيمة مية الحنفية
وبالنسبة للحلم انا هاحاول اسالك واحدة شيخة بتفسر الاحلام وابقى اقولك

جنّي يقول...

إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said

دعاء مواجهات يقول...

كاميليا

الله يسلمك ياجميل

بجد انا بفتقدك اكتر

ربنا يهون عليكى


تحيااتى

دعاء مواجهات يقول...

بيدو

ربنا يعينك ع الغربة

وترجع بألف سلااامة

سورى يعنى مفيش حاجة اسمها يكرهونا فيها

اللى بيحب محدش يقدر يغير مشاعرة

تحيااتى

نورت

دعاء مواجهات يقول...

حبيبة القمر

الله يسلمك

ويتقبل دعواتك آمييييين

شوفتى بقى

طب لما تسيبيها فترة كبيرة كمان بقى هتعملى اية؟؟

نورتى

دعاء مواجهات يقول...

- نادر

مادام قولت وكتاب الله مضطرة أصدقك

بالنسبة للجزء بتاع وإستخف قومة فأطاعوة دة لفرعون وقومة فى العصر البائد مااشى

اما عن اهل مصر فالحديث الشريف بيقول (وإتخذوا منها جنداً فإن جندها خير أجناد الأرض)

(ادخلوا مصر إن شاء الله آمنين)

يعنى مفيش سيرة ان اهلها سيئين ولو فية ذكرنى وورينى الادلة
......

(اما بقى موضوع النقاب

فأنا لاقولت حلال ولا حرام ولا أقدر لأنى مش أهل لذلك بس اللى أعرفة وقلبى مطمئن لية إنة فضيلة وليس فريضة كما يقول البعض ...

وبعيدا عن العصر اللى إحنا عايشينة وان فعلا الواحد مفروض يحمى نفسة من عيون الذئاب دى بالنقاب...

إلا أنة أيضاً ليس فريضة......

اما عن ذكرى لية فى الموضوع بتاعى فدة لأنى إعتقدت إن البعض ممكن يفتكر إنى لبست نقاب وانا هناك ولما جيت رجعت عاادى

وانا مش مع اللى بيلبسوة هناك ويرجعوا يقلعوة لأنة رمز قوى للإلتزام مينفعش يكون ديكور ولا ستارة

بس كدة الموضوع خلص..)

وانا ع فكرة معرفكش ولا انت كمان...

دعاء مواجهات يقول...

آدم المصرى

ربنا يخليك بجد على التوضيح الكريم

بس انا مقولتش عن عبادة بعملها ولا دة صح انة يحصل


تحيااتى ليك

دعاء مواجهات يقول...

محمد داوود

اخدت منك اعترااااف

تمااااااااام كلامك

طبعا

نورت

دعاء مواجهات يقول...

سبهللة

اة طبعا كلامك صح

منتظرة التفسير

نورتى

دعاء مواجهات يقول...

جنى

تعود بألف سلااامة


سلااااامى

مصطفي ريان يقول...
أزال أحد مشرفي المدونة هذا التعليق.
مصطفي ريان يقول...

دعاء ازيك ويارب يثبتك على الحق والخير دايما
بصي بالنسبة للناس اللي بتمشي من مصر ومابتعدش لأن مصر بقت طاردة لأبنائها الناس تعبانة علشان كدة بتروح لأي مكان تحس فيه بأدميتها وتعيش حياة محترمة
عارفة واحد قربيبي بيشتغل مدرس رسم ودلوقتي هو في الكويت امه عايزاه يرجع لكن هو قالي مش راجع غير لما اخلص عقدي ولو جددود هجدد انا ماحستش اني بني ادم غير هناك
الكلام كتير قوي يادعاء
ياريت مصر تبقي حنينة معانا وماتخلناش نبعد عنها
تحياتي ليكي يا دعاء

مصطفي ريان يقول...

دعاء ازيك ويارب يثبتك على الحق والخير دايما
بصي بالنسبة للناس اللي بتمشي من مصر ومابتعدش لأن مصر بقت طاردة لأبنائها الناس تعبانة علشان كدة بتروح لأي مكان تحس فيه بأدميتها وتعيش حياة محترمة
عارفة واحد قربيبي بيشتغل مدرس رسم ودلوقتي هو في الكويت امه عايزاه يرجع لكن هو قالي مش راجع غير لما اخلص عقدي ولو جددود هجدد انا ماحستش اني بني ادم غير هناك
الكلام كتير قوي يادعاء
ياريت مصر تبقي حنينة معانا وماتخلناش نبعد عنها
تحياتي ليكي يا دعاء

دعاء مواجهات يقول...

مصطفى ريان

دا طبعا على اساس

ان الفلوس هى مقياس الحب

والآدمية

اكيد لا؟؟؟؟

نورت

ميرو انتكة يقول...

دودى ازيك يا جميل
مدونتك بجد حلوة قوى
وبجد مصر حلوة قوى بشعبها وباهلها وبتقاليدها الى مش هتلاقيها غير هنا

حمد الله على السلامة يا قمر

بيس

Foxology يقول...

اجمل ما فى البوست اخر فقرات

انك حاسة انك فى مهمة ف مصر وهترجعى تانى لطقوسك اليومية

نفس الأحساس اللى حسيته

وانا برضه حسيت قد ايه بدلنا حلوة واننا بنشتاق لها مهما عملت فينا لو غبنا عنها بس اسبوعين وده برضه حسيته فى العمرة

تحياتى وربنا يرزقك الزيارة مرات ومرات :)

دعاء مواجهات يقول...

- ميرو أنتكة

الله يسلمك ياقمر

واتمنى ديما كلامى يعجبك

نورتينى بجد

بيس

دعاء مواجهات يقول...

فوكس

ياترى ما سر غياابك عننا

ياارب يكون خير

نورتنى بعد غياب

بيس

Diyaa' يقول...

ربنا يكتر من الأحاسيس الحلوة جواكي ويثبتك علي الحق
بصراحة مش فاهم الحلم وحاسس فيه بفانتازيا وطمع..عايزة تجمعي كل حاجة في حلم واحد..عندك عقل باطن متعب بسم الله ما شاء الله

بالنسبة لمصر..مكان ونعم..طبعاً بموت فيها..بس للأسف غلطاتنا وغلطات اللي حكموا البلد بداية من بعضها لعبد الناصر والكثير منها في عصر السادات والكارثي منها في عصر أبو جمال حبيب الملايين من الدولارات في بنوك سويسرا
وبصراحة متربيتش علي الصبر أو قوة الإرادة..أصل بابا كان مشغول في لقمة العيش وماما مشغولة في مذاكرة أخواتي
بس بحاول أدور عليهم..لأني مش قادر أصبر علي النفسيات المشوهة في مصر
علي الرشوة والسرقة والتقليد والسطحية والتفاهة والنفاق..حتي الدستور الجريدة اللي كنت بحبها ما بقيتش تخلو من بعض ما سبق ويكفيني أوي حوار دعاء سلطان مع الرقاصة دينا وحاجات تانية كده..نفسي ابراهيم عيسي يعمل مدونة لول

ما علينا ..فعلاً البلد تستاهل كل خير وكل حب وكل اهتمام..بس يمكن لأني واقف علي أرضية رخوة..أو لا أرضية..فمش عندي طاقة أصبر ومش عندي وقت أستجمع فيه إرادتي..أغلب الوقت في شغل وإرهاق ما بعد الشغل والحصيلة لا شئ وموت يا حمار ..من غير واسطة المشوار طويل..ولو عايز أعمل خير أو أحاول أفيد مصر اللي بحبها لازم أبقي مستغني ومش عايز حاجة ومش باقي علي حاجة
بخاف علي عيلتي أوي لو دخلت معتقل
عشان كده بسكت ومش بكتب لأن لساني أطول مني
ما علينا
ربنا يحمي البلد من ضعفنا وخوفنا وجبننا ..ويهدي المسلمين والمصريين
قولي آمين

دعاء مواجهات يقول...

ضياء

آآآآآآآآآآآآميـــــــــــــن

ياارب ياديو

تغيب تغيب انت وترجع تشعلل التعليقات بكلامك الجامد فعلا

سيبنى بقى ارد عليك حتة حتة كدة اوكى


اولا بالنسبة لعقلى الباطن فدى حقيقة فعلا هو غنى اوى اكتر مما تتخيل وممكن يحلم 4 او 5 احلام ف ساعة واحدة .. سيبك منو ..

ثانيا لفت انتباهى حتة انك عاوز ابراهيم عيسى يعمل مدونة

تصدق فكرة اكتر من تحفة بجد ولو حصل هتكسر الدنيا وتوفر علينا شرا الجورنال
هههههههههههههههههه

بالنسبة للعيوب الموجودة ف الدستور فدى انا ملاحظاها من زمان بس يمكن عاملة نفسى ناااايــــــــــمة

ربنا يعيننا ياارب ياضياء ويهدينا..

تحياتى وسلاماتى الجامدة جدا لييك

ياديوو ..