الأربعاء، يونيو 03، 2009

بردو بحبك ...


بــــردو بحبــــك ..

برغم الحزن
اللى بيتكلم فيا
بــردو بحبـــك

وبرغم الألم اللى إديتيهونى
قدام الخلق ليلتها
بـــردو بحبـــك

وبرغم كرامتى اللى اتوجعت
وضلوعى اللى إتكسرت فيـا
بــردو بحبــك

رغم كلام الخلق عليا
هفضل أفكر فيكى
وعنيا لغيرك ما هتسمع

رافض أشوف ف عنيكى ضيــاع
أو كســرة نفس بحنيه
رافــض تمشى طريقك وحدك
رافض تنسى وعودك ليـا

هفضل ليكى بحبك وحدك
وايديا لغيرك ما هتبنى

قالوا : وجودى معاكى ضياع
قالوا : عمل واتحكم فيا

احمينى وخبى دموعى
عن كل الشمتان ف عنيا

رافض أشوف غيرك أودامى
يادموعى فى بعدك عنى
ياهنايا ف قربك ووجودك

ومصمم هتكونى يوم ليا

اوعى تحاولى تسمعى ليهم
أو تجرى ف الضلمة لوحدك

أنا وياكى هاخد بإيديكى
أنا عينك وإيديكى وودنك

يابلادى الغاليه أوى عليـا
بردو بحبــك
ولا طمعان يوم ف البشاويه

يابلادى الغاليه اوى عليا
فاكرين ليه العشق خطيه؟؟

يــابـــلادى

فقعوا عنيا
طفوا النور القايد فيا
قطعوا لســانى وشلوا ايديــا

وبــردو بحبــك

يابلادى شاوريلهم على قلبى
الساكن فيه الحنيه

يمكن أبطل لحظة أحبــك ..

هناك 49 تعليقًا:

Nasimlibya يقول...

الام تقسو ع اولادها وبرضو بيحبوها وتحبهم


بردو بحبك برافو دعاء


ربي يخليلك مصر ويخليك ليها
قولي اميييين

Unique يقول...

جميل اوي ان في ناس لسة مصدقة
والاجمل انك قادرة تعبري عن ده بالطريقة الجميلة دي

شمس النهار يقول...

حلوه جدا يادعاء
ماشاء الله منجاة وطن

ماء تشرين يقول...

ايوه بحبك

رغم الظلمه

رغم العتمه

رغم الخوف الساكن فيه

بس الحب ياناس مش خطيه

بجد جميله

مهو الانسان مش باايدو بيختار اهلو وطنو دول اتخلقو معاه وهما اجمل حاجه مهما قسو ومهما الزمان تعبهم وتعبنا


تقبلى مرورى

adel يقول...

ايوه بجبك :):)

بحبها و العن ابوها و محبش حد ينطق عليها كلمة
مش امي ؟
(امي انا بس) :):):)

بجد حلوة قوي

نعكشة يقول...

مش عارفة ليه مبحسش

او يمكن مجاش عليا يوم و حسيت كل دة

أنا بس اللي عارفاه إني بحبها
و نفسي أكون بنت صالحة من ولادها تعلي اسمها

محستش انها آلمتني
ولا كرامتي اتهانت فيها

يمكن ساعات بحس العيشة صعبة شوية

بس الحياة عمرها ما كانت للرفاهية
الحياة وجدت عشان نتعب فيها عشان نرتاح في الاخرة

انا بحب بلدي
و ان شاء الله لو قدرت هرفع راسها عالي فوق

فكرتيني

وانا راكبة المايكروباص كان علم مصر بيرفرف و جميل قوي مع نسمة الهوا اللي عدت فيه

بس كان فيه مشكلة واحدة

كان مش نضيف خالص

no comment! db

يلا خير

سلام عليكِ

احساس طفلة محبة للرومانسية بس واقعية يقول...

مرة سمعت حد شاعر
بيقول فى برنامج القاهرة اليوم
الوطن عبارة عن 3 حاجات

تاريخ
وجغرافيا وشعب
وشركات او حكام

التاريخ ثابت والجغرفيا والشعب ثابتين
بس الشركات والمؤساسات والحكام هم اللى بيأثروا عليها سواء بالسلب او بالايجاب

المعنى دا كبير اوى وواضح جدا
وهو اللى احنا بنعبر عنه بكذا طريقة
بس هو لخصهم وقال اخر حاجة

تاريخ لوحدة مينفعش
جغرفيا وشعب وحب وثقافة مينفعوش

لازم المثلث يكمل بالعدل والحرية والاخلاق
وهو دا الجزر الناقص

تعبيرك حلو يا دعاء
ورغم كل الالم لسة بنحبها
اسمى واعظم حب

شكرا ليك
تقبلى مرورى

آه وكفى يقول...

غلاسة هحبك يعني هحبك بالذوق بالعافية هحبك

وحشتيني يا دودو وحلو الكلام يلامون عليكي يا لولو

romansy يقول...

مهما حاولوا يهدوا فيها هيه امه
امه رافعه راسها فوق
حره ولا يهزمها طوق

كلاماتك جميله قوى

عاشقة القمر يقول...

طبعا لازم كل احد يحب الوطن لان هي امانه مهمه حصل نلزم نحبها كلكاتك جميل

مها العباسى يقول...

جميله اوى
فعلا تحسى ان الحب دة جوانا مهما اعترضنا ومهما زعلتنا برضه بنحبها

Foxology يقول...

مواجع كتيرة كدة يا دعاء بس والله فعلا حلوة وفكرتنى بأغنية احمد سعد الحسنة الوحيدة فى فيلم دكان شحاتة لما قال :

مش باقى غير شوية ضى ف عنيا انا هديهوملك وامشى بصبرى فى الملكوت

تحياتى وبنحبها كلنا والله ونفسنا تبقى حنينة علينا شوية :)

blue-wave يقول...

تحفه
بجد

بدراوى يقول...

جميل اوووى
ما شاء الله عليكى
البوست ده اثر فيا اووووى

ملكة بحجابى يقول...

الله
جميلة يادعاء
راقيه هى مشاعرك
بوحتى بالكثير وبداخلنا الكثير مما بوحتى
:)

تقبلى مرورى وحبى
أميرة

(ملكة بحجابى)

Sweet Violet يقول...

بجد جميلة جدااا

تسلمى قووووى عليها ^_^

thunder يقول...

ممممممممممممممممممم
اية دا كلووووو اية دا كلووووووووو
ودا قر عالى الجودة
كلماتك فى حب الوطن حلوة جدا جدا جدا
لكنالفكرة تعتقدى ان وطانا كمان بيحبنا ولا لا
هو دا السؤال اللى شغال بالى الفترة دى يمكن لاقيت اجابته بس كل فترة يظهر جوايا
وارجع تانى لكلامك فعلا اكثر من رائع حتى فى تصويرك للحب مع العنف الممارس عليك بيفضل الحب دا طاقة الامل اللى بترسم النور للمستقبل
دمتِ بكل حب و ود وفى رعاية الله وحفظه دائما يارب

Me7'o يقول...

يخرب عقلك إنتى بتكتبى التحف دى إزاى إنتى لازم تسجليهم باسمك فاهمة؟؟؟
لازم

!!! عارفة ... مش عارف ليه يقول...

النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر


صلاح جاهين
-------------


بلا مبالغة ما قرأته في مدونتك ذكرني بكلمات جاهين مش عارف ليه إنما أكيد في حاجة تربط بينهم

يمكن يكون عشق الكاتبين أوووي للبلد دي رغم اللي بتعمليه فينا وفيهم

يارب يجي يوم وتحس بقى بعشاق تبرها


شكراً جزيلاً دعاء

وليد

سبهللة يقول...

دعاء
دة الميل بتاعى
raniarachad@yahoo.com
ابعت لى الميل بتاعك وقولى فيه انك دعاء مواجهات النهار عشان ابعت لك دعوة لقراءة مدونتى لانها اتقفلت للعامة وبقت مفتوحة للى عندهم دعوات بس
سلام عليكم

الشنكوتي الكبير يقول...

طب ابقى خليها تنفعك


سلاااااااااااااااااااااام
اخوكي ايهاب

أحساس لسه حى...كلام من جوه روح لكل روح يقول...

عزيزتى

بنحبها واحنا مخنوقيين منها

بس الحب وحده لا يكفى

كلامك حلو اوى

لما قريتها فى الاول قولت مين اللى بتتكلم عنه ده محدش يستاهل

بس طلع اللى يستاهل

فقعوا عنيا
طفوا النور القايد فيا
قطعوا لســانى وشلوا ايديــا

وبــردو بحبــك


تحياتى

سلام

أحمد مختار عاشور يقول...

أحلى حاجة كتبتيها يا دعاء..بجد برافو

دعاء مواجهات يقول...

بشكر كل الناس الجميلة اللى علقت وبجد انتوا اللى بتشجعونى وكلامكوا هو اللى بيبنينى

دعواتكم معايا

ارد عليكم قريبا جدا
بحبكم ..

محمد التميمى عبدالحق يقول...

فعلا مش هتقدر متحبهاش
لان مش بمزاج حد الحب

فكرة من الزمن ده يقول...

الله يادودو ايه الجمال ده كله
والله جميلة ومش قادرة اقولك ايه اجمل من ايه
كلها على بعضها جميلة اوي

دعاء مواجهات يقول...

نسيم ليبيا

آآآميــــــــــن

ويخليكى لينا ياقمر ..

منورانى

دعاء مواجهات يقول...

يونيك

اكيد كمصدقين اوى كمان

اشكرك على رايك
نورتنى

دعاء مواجهات يقول...

شمس النهار

جميل اوى تعبيرك دة راائع

منورة كعادتك وارجو تعذرينى لتقصيرى

تحياتى

دعاء مواجهات يقول...

ماء تشرين

اسعد كثيرا بمرورك
وتسعدنى كلماتك

نورتى

دعاء مواجهات يقول...

عادل

بجد مش لاقية كلمه اقولهالك

بجد ديما كلامك بينور التعليقات عندى

سلامى

دعاء مواجهات يقول...

نعكشة

مجرد انك نفسك تعمليلها احجة وتكونى حد صالح ينفعها انك بتحبيها صدقينى دا داء لا منة نريد الشفاء

منورة

دعاء مواجهات يقول...

احساس طفلة محبة للرومانسية بس واقعيه

لخصتى ياجميل لااازم
المثلث يكمل صح كدة

منوراانى

دعاء مواجهات يقول...

اة وكفى

ياااة يانورا يابنتى انتى بجد وحشانى بتطرف بس لما اشووفك بس ولا انتى مش ناوية

بيس ياقمر وميرسى ع رايك

دعاء مواجهات يقول...

رومانسى

مادامت اتحست يبقى اكيد جميلة

اشكرك بشدة

نورت

دعاء مواجهات يقول...

عاشقة القمر

نحبها لانها اهل لذلك لانها حقا تستحق لانها اعطت دون مقابل

تحياتى ليكى

دعاء مواجهات يقول...

مها العباسى

دا اساسى يعنى

نورتينى ياقمر

تحياتى

دعاء مواجهات يقول...

فوكس

اة ياسلام عليك فكرتنى فعلا بالحاجة الوحيدة الكويسة ف لافيلم ملهاش حل الاغنية دى

تحياتى ليك بجد ..

دعاء مواجهات يقول...

بلو وويف

اشكرك بجد

----------------

بدراوى /

اشكرك ياكبير بس هو فعلا مأثر ..؟

نورت

دعاء مواجهات يقول...

ملكة بحجابى

اشكرك بشدة ياأميرة على كلماتك الراقية ورايك فى الكتابه
اتمنى ديما كلامى يعجبك

تحياتى وودى

دعاء مواجهات يقول...

سويت فيوليت

ميرسى

نورتينى

--------------------

thunder

سؤالك مش هتلاقيله اجابة ملموسة اكتر من سنين عمرك الى استحملتك وانت عايشهم فيها بدون ما تمل منك

تحياتى ومودتى

دعاء مواجهات يقول...

ميخو

يخرب عقلى مرة واحدة
هههههههههههههههههه

اووك لا ياعم م الناحية دى متقلقش

نورت

دعاء مواجهات يقول...

وليد

شرف اتمنى فعلا ان اكون استحقة ان كلماتى تذكرك بكلمات العبقرى جاهين

ودعنى انا اللى اشكرك

على دفعاتك المتلاحقة

...

دعاء مواجهات يقول...

سبهلله

علم وينفذ

بس لية كدة ..؟؟ مش بحب التقييد بس اكيد ليكى ظروفك
تحياتى

دعاء مواجهات يقول...

محمد التميمى

طبعا مش بإيدنا

نورتنى

----------------

فكرة من الزمن دة

اشكرك على رايك وكلماتك الجميلة

منورة

دعاء مواجهات يقول...
أزال المؤلف هذا التعليق.
دعاء مواجهات يقول...

الشنكوتى الجميل

ااة هتنفعنى ياخويا عندك مانع
هههههههههههههههههههههههه

منور ياعم ايهاب ..
-
------------------

احساس لسة حى

اكيد محدش يستاهل غيرها طبعا

تحياتى ليكى .

دعاء مواجهات يقول...

احمد مختار عاشور

مرورك وحدة يكفى دون قول كلمة

تحياتى ومودتى

دعاء مواجهات يقول...

اواصل الرد على تعليقات البوست

السابق لاحقاً

اتمنى المعذرة..

تحياتى وحبى ومودتى ..