الخميس، مايو 28، 2009

هرسم وطن ...




هرسم وطن ...

صاحى مقريف حبتين
مش لاقى لقمة
ولا ف الإزازة بؤين
أكلوا العيال الرغيفين
وحبسوا وراهم ..بشويتين
المية اللى راكنهم معطنين
من أسبوعين ..

ناولنى الفرشه ياواد ياحسين
حسك تنطق أو تلسن
بكلمتين ...

مش عارف أرسم ولا يوم
رسمت تنيين ..

بس هرسم معرفش مين ..
ناولنى الفرشه ياواد ياحسين

هرسم وطن
هرسم كراسى مرصوصة
قدامى ع القهوة
من غير بنى آدمين

هرسم عيال من غير إيدين
هرسم إيديهم مبتورين ..
هرسم عقولهم خيبانين
هرسم عيونهم غفلانين ..

هرسم كمان الكوبيات
مليانه شاى .. بارد
ببرودة الوجة والكفين ..
ببرودة العزه اللى ماتت
من سنين..

هرسم وطن
فرحان مزقطط
بيجرى وف إيدة بلونتين
منفوخين .. مليانين هوا
م اللى ملا عقولنا
وقلوبنا .. وعوج الكفتين

هرسم وطن
مفيهوش مواطنين

هرسم حضارة وأهرمات
هرسم نيلين
لجل أول ما النيل يجف
ألاقى غيره ف ثانيتين

هرسم بشر متكتفين
هرسم وجع م الناحيتين
هرسم عنيا مدمعين
هرسم عيالى المجنونين
هرسم نجاتى وايمان وسالم
وهرسمك انت ياواد ياحسين

هبنى الوطن
انا اصل وطنى
مليان أنين ....
إيدة صبحوا مكتفين
رافضين .. غير انهم
يفضلوا ممدودين
للى رايح واللى جاى
واللى عاوز يعين .. يعاين
واللى عاوز يشيل .. يشاور

فتحوا المزاد ..
عرضوا الوطن وعليه هديه
للموتورين
دخل المزاد
م السفاحين ملايين ..
رفعوا التمن
غلو الوطن ..
يوميها بس عرفت
انه ليه تمن

كسبوا المزاد
شالوا الوطن ومروحين
منعونا نتفرج ..
منعونا نلقى نظرة وداع عليه

راح الوطن وفضلنا شوية ورق..
فضلت لنا الخيبه
وفضلنا العار ..
وف ظلنا بيجروا عيالنا الصغار
الخيفانين .. ماسكين ف ديلنا
فاكرين انهم صبحوا بينا محميين
موصلهمش .. ان الظل
بس كان ف الوطن
وماعدنا ننفع نحمى حتى نفسنا
راح الوطن..
راح ظلنا..
وفضلنا شوية ورق..


ماعادش ينفعنا .. الورق
ماعادش .. ينقذ مـ الغرق

ناولنى يللا الفرشة ياض
بتقوللى ايه
مش لاقى لون
مش لاقى حبر
مش لاقى حتى صفحتين

خلص الورق
خلص المدد
خلص الوطن

ومترسمش بكلمتين
أصل الوطن راح من سنين

ياإبنى الوطن ميترسمش بفرشتين
وطننا يإبنى محتاج عمل
مش ناقصة برواز .. ولا ناقصه حتى
فكرتين ..

هناك 64 تعليقًا:

adel يقول...

انا عندي امتحان كمان كام ساعة
بس علقت لان الكلام عاجبني قوي قوي و بجد رائع


بس اول جزء التزمتي بالقافية فالوزن جه صعب قوي لكن بعد كده بقيت حلوة

كيكى عوووووو يقول...

هرسم حضارة وأهرمات
هرسم نيلين
لجل أول ما النيل يجف
ألاقى غيره ف ثانيتين

عجبتنى وضحكتنى الجزء دة!!
فعلا مش محتاج حتى فكرتين!!!!
عوووووو

الشعب لابد له من حكومه تشكمه يقول...

هترسمى وطن من غير مواطنين؟؟؟؟؟؟؟؟؟؟؟:(

كلامك بتوجع جدااااااا بس ياريت متنسيش ترسمى ضله جمب نيلها تسوى الف قصر وتقولى كان زماااااااااااااان قبل مالضله يخلوها بملايين..
وبالنسبه للمزاد تفتكرى بجد حد هيشترى؟؟؟؟؟؟؟؟؟ لا عاتقد لانها اصلا اتباعت من زماااااااااااااااااان

تحياتى

بدراوى يقول...

شعرك المرة ديه
بجد يا دعاء
تحفة لوحده
بجد تسلمى على الكلام ده
انتى واخذة فى البوست ده
سكة نجم و على سلامة
بس يمكن انتى اسلوبك مميز
و جميل

الكلام ده و انا بقرا حسيت انه لازم حد يغنيه
وسط البلد و لا وجيه عزيز

بجد تسلم موهبتك و دماغك

عاشقة القمر يقول...

سلام عليكم انا مش مصريه بس بنزل مصر كل سنه بلقها تغيرات الي اسواء والله عظيم بزعل من قلبي بقول ياريت ترجعي زي اول انا من ناس معجب جدا بمصر
كلمات هذه توجع قلب ام عن بلدي نفس طر\يق مصر
بس ممكن تحسنات كثير نحنا مررنا بظروف صعب جدا صبرنا حني ربنا فرجها الحمدالله
بعادين انا بقول دايما وطن هي محتاج الينا نحنا مفروض نصلحها نعمل اي حاجه جميل
بس عايزها راجل جدعان

لورنس العرب يقول...

كلام جميل اوي
بس بيقلب علينا المواجع

Foxology يقول...

خلص الورق
خلص المدد
خلص الوطن


فعلا خلص الوطن :(((((((((

حلوة بس كلها مواجع كتيرة

تحياتى

الست فرويد يقول...

جميل قوى يا دعاء
تحياتى

احساس طفلة محبة للرومانسية بس واقعية يقول...

وجع وجع وجع
حقيقة مؤلمة موجعة
رسمتى جراح
رسمتى الم
رسمتى ناس ميعرفوش معنى الوطن
رائعة يا دعاء
عبرتى بشكل رائع
الصورة كانت وضحة
وكانى شيفاها
فى بيت مصرى بسيط

تسلم ايدك
تقبلى مورى

الشنكوتي الكبير يقول...

نهارك ابيض يا اطيب من النهار الطيب
يا شمس مش حاميه لكن دافيه على جبين الغلبانين
نهارك ابيض يا حنينه وقريبه
نهارك ابيض لون الحليب المندثر والمختلط بالتوكسافين
مع ان قلبك لسه اخضر زي زرعتي عالسطوح
لكنه مصبوغ بالبلاوي المعروفين
صعبان عليا الزرع الأخضر يناذي بطعم الصديد
مخلوط في طعم الميه المسقي بيها من سنين
صعبانه انتي عليا يا صغيره
قلبك مالوش في البهدله
لكن هقول لمين

غاويه انتي راسك تحشريها في البلاوي والمقرفين
استحملي انتي بقى وربنا هو المعين


======================

انتي بقيت مشكله

سلااااااااااااااااااااااام
اخوكي ايهاب

mimi يقول...

دعاء

بجد كلامك أثر فيا اوي .. جرحني ... أنا ليه وطني كده؟
أنا ليه مش عارفة أكون فخورة بوطني ؟

انا مش قادرة اعيش براحتي جوة بلدي؟

ليه لما بسافر بره بفرح ... وهنا لأ؟

مليون سؤال في دماغي عاوزين اجابة ... ومحدش هيجاوب أنا عارفة

تسلم دماغك يا دودو رغم انك قلبتي كل المواجع

نعكشة يقول...

بتعب كتير عشان أعرف أقول الكلمتين اللي في مخي

حتى الكلام مبقتش قادرة اتعبله عشان يطلع
العقل مكتوف بقة قبل الايدين

عامتاً

هيا عجبتني

قوي

سلام عليكِ

محمد علي يقول...

بصراحة اكتر من رائع مالهاش حل يا دعاء يا موهوبة.

مسعدة يقول...

جميلة اوىىىىىىىىىىىىىىىىىىىىىى

ماء تشرين يقول...

كلامك يوجع اوى يادعاء اكتر حته وجعتنا اننا مش نعرف نحمى ولدنا هو احنا نعرف نحمى نفسنا طب نفسنا مش مهم وولدنا يااااااااااااااه على الوطن هو ليه بقه كده هو يعنى ايه كلمه وطن

تسلم ايدك بجد تحفه هى صحيح لونها غامق اوى وبتجع اوى بس بجد تسلم ايدك

تقبلى مرورى

دعاء مواجهات يقول...

سامحونى على سرد الحقيقة فالحقائق جميعها مؤلمه .. لم أقصد أبدا الإساءة لوطنى ربما عبرت فقط عن ألم كامن نتاج ما يحدث

انتظروا الجزء الثانى لتتضح الرؤية أكثر

...

دعاء مواجهات يقول...

عادل

أقدر تماماً توقيت تعليقك فهو فى حد ذاته وسام لكلماتى

اشكرك بشدة ..

دمت بود

دعاء مواجهات يقول...

كيكى

حبى الاول ..

انتى لساكى عايشة مش بتمتحنى يابنتى
رووحى ياشاطرة شووفى مذاكرتك يللا

ههههههههههههههههه

قال ضحكتك قال نكته هى أصلها ..

بيس

دعاء مواجهات يقول...

الشعب لابد له من حكومة تشكمة

لاااا لسة بدرى على مايتباع كلو وطننا غالى اوى بس للى يقدر بس ..

اية حكاية الشعب والحكومة دى ؟؟
انت مين فيهم الشعب ولا الحكومة ..؟؟

نورتنى

دعاء مواجهات يقول...

بدرااوى

ياخبر عليك وعلى مبالغتك يابدراوى

نجم وسلامة وكمان مميز عنهم ووسط البلد ووجية طب تصدق ياجدع انا كدة هموت وانا مرتاحه

ربنا يكرمك ياعم

نورت يابرنس

دعاء مواجهات يقول...

عاشقة القمر

اعتقد ان اكتر نسبة رجال جدعان موجودين فى مصر بالفطرة دون شك

الوضح الحالى لا يدعو لليأس من وجهة نظرى بالعكس ارى انه سيكون بداية لمستقبل افضل انا غير متشائمة وأريدك كذلك

تحياتى وودى

دعاء مواجهات يقول...

لورنس

اعتقد اننا فى حاجة مستمرة لتقليبها هذا

تقبل احترامى ..

دعاء مواجهات يقول...

فوكس

عزيزى لم اقل ان الرجال ايضا قد انتهوا ربنا لأمل لازال يراودنى

تحياتى ومودتى

دعاء مواجهات يقول...

الست فرويد

اشكرك اوى ياست فرويد

نورتينى

دعاء مواجهات يقول...

احساس طفلة محبة للرومانسية بس واقعيه

اعتذر عن هذا الوجع اللازم

رغما عنا الوطن يحيا بداخلنا ..

نورتينى

دعاء مواجهات يقول...

الشنكوتى الجميل

ياااخبر ياهوبا على الكلام اللى متلاقيش لية رد فعل غير انك تتنح وبس كدة وتفتح عينك وتسكت

بجد بجد الكومنت الوحيد هو نو كومنت

منور بلوجك بعد غيبة

بيس

دعاء مواجهات يقول...

ميمى

مش معاكى فى انك متكونيش فخورة بوطنك لان وطنك يستحق انك تفخرى بيه يكفيكى فخرا أنه وطنك مجرد انتمائك لية هو اهم اسباب الفخر .ز هكذا هى فلسفتى

لا اوافقك ابدا على ان الوطن يرتبط بالحزن .. وطننا هو قلبنا احيانا نفرح واحيانا نحزن من

استطاع ان يقتلع قلبة بيدة فليقتلع كل منا وطنة من داخله

تحياتى ومودتى .

دعاء مواجهات يقول...

نعكشة

متعودتش منك على اللخبطة دى

لو اثار الامتحانات اوك هنعديها المرادى

بيس ياجميل

عـــاوز حــــقــــى يقول...

فعلا اكثر من رائع ربنا يبارك فيكى يارب

ان شاء الله البلد دى حالها ينصلح



اسف عن انقطاعى عن زياره المدونه وعن التعليق
ظروف

دعاء مواجهات يقول...

محمد على

اشكرك على رايك

اتمنى الا أخذلك

نورتنى

دعاء مواجهات يقول...

مسعده

مبرسى اوووووووووووى

نورتى

دعاء مواجهات يقول...

ماء تشرين

الوطن لايمكن ايجازة فى لاكلمات ولا يمكن تلخيصة بالأحرف

لاننا حتما سنقصر فى حقة

الوطن هو الهواء الذى نتنفسة نحن فقط القادرون على حمايته

تحياتى وودى

نورتى

وومن يقول...

هاترسمي وطن

جريت وجبت الألوا وجبت كمان الكراس العريض ابو صفحة فاضية بحسبك هاترسمي قوس قزح

لقيتك بجد بترسمي الوطن اتخضيت ورجعت لورا الصورة من غير الوان

بقت حياتنا ابيض واسود بس والسواد هو اللي غالب

بجد تسلم ايديكي ودماغك بجد جامدة جداً

حبارير يقول...

لو ألف ميت مليون طريق

ممكن تضيق

لو بس طعم الحزن عشش ف السكك

لو ألف ميت مليون طريق

مليان بريق

ممكن يا ضي تصير ظلام

لو يوم ننام ...

نصحى نلاقي الحلم عام

رايح لشط النور .. ولكن

نسمع الصرخة تدوي ف قلبنا

لقيوه غريق

لو ألف ميت مليون طريق

وحصان بيرمح ف السبق

نازل زفير ... طالع شهيق

ممكن نهاية الخط

نسمع صرحتك ... وحصان نفق

لو ألف ميت مليون طريق

رسمت كلام مع الأحلام

الحلم ضاع

والكل باع

عند السؤال

نسمع سكات

والحلم مات

والألف ميت مليون ومليون ضحكتك

صبحت آهات

ما انت ف زمان غير الزمان

ولا ليك مكان

الدمعة تسبق خطوتك

وتراب وطن بايع بينهش جتتك

مش باقي إلا الحلم مرسوم ع الحيطان

والخوف جبان

خايف يقرب يتمسك

ما هو الف ميت مليون عميل دلوا عليه

وبان اللي خان

خبصت عليه نظرة عنيه

وطعم المرار اللي مع الريق يبلعه

وخز الضمير مين اللي يقدر يمنعه

لو ألف ميت مليون حكاية

في المراية

تضحك الأحلام معاك

طب ليه أساك

ياللي الدروب مستنياك

ياللا ابتديها بخطوتك

علّي في سماها ضحكتك

راح اللي راح

والكون براح

فيه ألف سكة وسكة تاني من جديد

غير سكتك

حبارير يقول...

يعني ايه كلمة وطن
يعني واو..وطه..ونون
.....
واو دي ...واء
لما ننزل من بطون الأمهات
لسة أول خطوة ليا
علقوني من ايديا
وهات يا ضرب
صرخت ..واء
فكروني باقولها لاااء
شقلبوني
رجلي فوق وراسي تحت
ضربوني فوق دماغي وعلى ضهري
لجل ما اسكت
مش راح اسكت
ايه راح املك غيرها واء
ألف واء واشهد يادهري
لما يحكمنا الغباء
اشهد هنا ثورة رضيع
ثار ع الطعام والبيبرونات
ثار ع الطغاة والبارونات
ثار ع الجميع
دلق اللبن ..سابه يضيع
هطلت سمانا بثورته ماء النبات
و ف كل نقلة بخطوته
تخضر أرض بطلعته
وببسمته ..طل الربيع
مات الوهن
يعني ايه كلمة وطن
يعني واو..وطه..ونون
.....
طه دا طن
يعني ألف كيلو كاملة
وسط ليلة جاتني حملة
حملة يعني حملوني
طرحوني.....للإيدين
ضربوني.....بس فين
قسموني.....ناحيتين
جمعوني ف النهاية لجل ما ابقى صاغ سليم
....
طه وطاوي الحزن كاتمه ف قلبه جوه
لما شاف خير البلد منهوب يا هوووه
لما شاف الحق مربوط اللسان
لما شاف الغدر مطلوق العنان
قال ما تخافوش
وابن البلد بيسلموه للأمريكان
لجل ما الحريم بتوعهم يجلدوه
باللجام زي الحمير بيجرجروه
لجل إبن العم بوش..
ملعون أبوه
والقنابل فوق ولادنا سبعة طن
يعني ايه كلمة وطن
يعني واو..وطه..ونون
.....
نون دا نون
يعني حوت
حوت بيبلع كل راس تعلى قصاده
الروس تموت
حوت يحقق ما أراده
مين يا ناس يقدر يعدي
مين يا ناس يقدر يفوت
والبشر...زي الآلات
خد ..وهات
شفت حاجة ..وانت مالك
مشى حالك
شوف عيالك
لجل هدمة
لجل قوت
بالفصيح....
بنعيش...نموت

حبارير يقول...

وطني البعيد عن الوطن


عبّارةٌ...

قصرُ الثقافةِ...

والقطارْ...

طيارةٌ...

جبلُ المقطمِ...

وانهيارْ

هم قد أحلوا قومنا دار البوارْ

يا أهلنا !!

لستم ضحايا وحدكمْ

كلنا اليوم ضحايا

نحن أجدادُ الضحايا

ثم أولادُ الضحايا

ثم أحفادُ الضحايا

والضحايا.....

من ضحايا..

يولدون

أسيادُنا منذ الأمدْ

بعبيدهم..

لا يأبهون

وبأرضنا...

من لم يمت بالسيف

مات بغيظه

فالذلُ يعدو خلفنا

والفقر يصفع وجهنا

والقهر قد حاط بنا

والموت يجثم فوقنا

....

ياربنا.....ياربنا

ما الحل في أوطاننا؟

ما الحل في أوطاننا؟

فيجيبني سوطُ الولاةِ لأمرِنا

يا ابن الكذا

خذ حلّنا

عش بائسا

نم عابسا

مت يائسا

وببحر الرقص بليلتنا

عش بالحزن

ومت بالهم

وداء الغم

وكن مأساة

لا مساواة

أو مواساة

....

قالت أمي المقهورةْ

والموؤدةُ

تحت الأنقاضْ

ياولدي

حتى لو أمسكت بكفك

يوما حلمك

هذا الوطن بُنيََّ

بعييييييد ْ

بعييييييييدْ

بعيدْ

عن وطنكْ

حبارير يقول...

عذرا دعاء

أطلت عليكم ولو شئت زدتكم

نحن بلا وطن

حتى إشعار آخر

وآسف أني أكثرت عليكم

ايوشة يقول...

مش هضيف اكتر من اللى اتقال بجد تسلم ايديكى حلوةجدا ولازم تعجب اى انسان

عاشقة الأحزان يقول...

السلام عليكم


حبيبتى

الغاليه

سعدت بمرورك الكريم

ان شاء الله يبقا الود والتواصل


وكلماتك فى غايه الروعه تسلم ايديك

تحياتى

ايناس

thunder يقول...

عارفة كلامك خالنى افكر فى حاجة ويمكن اصيغها واكتب عنها احنا عاملنا زى طفل صغير واقف وماسك بايديه خيال لحد كبير وفكر ان دا امله وحميتها انما لما بيكبر عرف واقتنع انه كان متمسك بى السراب . هو دا حالنا كلنا ماسكين فى سراب لكن مش عاوزين نفوق اساس من دا ومقتنعين ان الخيال دا طاقة النجاة
كلمات بجد جميلة جدا جدا
وبجد فكرته معبره اوى
دمتِ بكل حب و ود وفى رعاية الله وحفظه دائما ياارب

زى الهوا يقول...

:(

همس الاحباب يقول...

رسمتى فابدعتى
كتبتى فابكيتى
نعم هى صورة الوطن
بكل حسرتنا عليه
تسلم الايادى
ودمتى مبدعة دائما

نعكشة يقول...

مش الامتحانات أكثر منها الموضوع نفسة اللي حضرتك كاتبه عنه

بس يمكن الامتحانات مين عارف

سلام عليكِ

شمس النهار يقول...

في ايه يادودو ليه الاحباط ده
انا بقا هرسم وطن جميل في ايدين شغاله
وناس فرحانه
يمكن ربنا يرضي علينا ويكرمنا

ســـهــــر يقول...

هرسم حضارة وأهرمات
هرسم نيلين
لجل أول ما النيل يجف
ألاقى غيره ف ثانيتين

ملهاش حل يا دعاء
على فكرة والله انا احساسى بيقولى انك لو كتبتى فى صحيفة او نزلتى ديوان هتبقى حاجة جامدة جدا
عندك ملكة رهيبة فى التعبير
ربنا يوفقك يارب


بس على فكرة انتى اللى غايبة عنى فين بقا ؟

وحشتينى يا ست الكل

فكرة من الزمن ده يقول...

ازيك يادودو
وحشتيني
ايه الكلام الجامد ده
بجد تحفة

كلام جامد اوي
ومؤثر وحلو في نفس ذات اللحظة
واكتر كلمة وجعتني اوي


إيدة صبحوا مكتفين
رافضين .. غير انهم
يفضلوا ممدودين
للى رايح واللى جاى
واللى عاوز يعين .. يعاين


بجد زي المواويل العشبية والماثورات
سمعت فيها صوت زي عبد الرحمن الابنودي
ابدعتي بحق
تحياتي

كيــــــــــــارا يقول...

ياااااااااااااه يادودو

قولتي كلام كتير

جوا قلوبنا كلنا

وجعتينا يادودو :(

حـــــدوتـــــة يقول...

السلام عليكم

كلمات جميله وسلسة

دى اول زيارة ليا
وإنشاء الله مش الاخيرة
شكرا على زيارتك لمدونتى
ويارب تكون عجبتك

ارجو التواصل دائما
سلالالالالالالالالالالالالالالالالالالالالالالالالالالام

kochia يقول...

جميل اننا نحاول نرسم وطن فيه كل اللي بنتمناه
بس فعلا للاسف الوطكن مش بيترسم
ولا بيتلون
ولا بيتغني
الوطن بيتعمل بايدين ناس بتحبه

موضوع جميل جدا
وتعبيرات قوية

تحياتي

واحد من الناس يقول...

ببرودة العزه اللى ماتت
من سنين..

الله الله الله عليكي يا دودو

بجد كان نفسي تكتبي حاجه كده من زمان

ده احسن موضوع شعري قرات ليكي

اشعارك كلها بتعجبني بس ده اجملهم علي الاطلاق

مستني باقي رسوماتك

سلام

ملكة بحجابى يقول...

هرسم عيال من غير إيدين
هرسم إيديهم مبتورين ..
هرسم عقولهم خيبانين
هرسم عيونهم غفلانين

الله عليكى يادودو
وحشتينىىىىىىى


تقبلى مرورى بحبر قلمك
واستقرارى بين سطورك
:)

ملكة بحجابى

ميرام يقول...

جميــل يادعاء
تقبلي مروري

سبهللة يقول...

ارسمى براحتك
ياريت كل الرسم
حلو كدة زى رسمك

سبهللة يقول...

قريت البوست تانى من حلاوته
وعشت معاه
وعينى دمعت
تسلم ايدك

سبهللة يقول...

قريت البوست لتالت مرة
ودموعى مغرقة الكيبورد
مش عارفة اقولك ايه
انا هانقله عندى
مش هاينفع احط له لينك
دة لازم يتكتب تانى وتالت وعاشر
وفى كل مدونة
يسلم قلبك
وتسلم ايدك

أبو العريف يقول...

دعاء
جميله قوي مواجهاتك كالعاده
بس ياريت لونقدر نرسم
نرسم حاجه جميله بجد
نرسم امل
نرسم حياه
وياريت بلاش نرسم جراح
عارف ان الانسان ساعات احاسيسه هي اللي بترسم
وساعات يقول
انا ارسم ايه
ارسم جمل
صبار
ارسم امل
وساعات كتير برسم ملل
ارسم صدي صوت في الفراغ
وارسم براح
ارسم ضجيج
وارتاح وانا برسم تعب
وارسم كتب اقراها
واما انتهي منها
برسم سرير وانا م
وارسم عليه احلام

وارسم وطن
واعشقه
وان يوم تعبت
اكرهه
واموت فداه
وقت المحن

تحياتي

بعبعه يقول...

جميله جميله جميه يا دعاء بجد

ربنا يكرمك

عالم صوفي يقول...

حلو يا دودو

حبيبـــــــة القمـــــر يقول...

دعاء
بسجل اعجابي بكل ماخطته يمينك
واع>ريني فاتني كتييييييير في فترة غيابي هروح اقراه وارجعلك تاني
تمنياتي بالتوفيق ياقمرة

Lady E يقول...

هو الوطن مرسوم كده يا دودو

لو حبينا نرسمه هنرسمه بالصورة اللي نتمناها ويارب يبقى في يوم من الأيام وطننا اللي بنتمناه

كلامك حلو بجد

تسلم ايدك

دعاء مواجهات يقول...

عاوز حقى

اشكرك على رايك

وربنا يوفقك

تحياتى

دعاء مواجهات يقول...

أكمل الرد على

التعليقات يوم الخميس بإذن الله

تحياتى لكم جميعا.

انتظر آرائكم فى الجزء التانى من القصيدة ..

Me7'o يقول...

يااااااااااااه عليكى
والله العظيم أول مرة فى حياتى أقرا شعر ويخلى عينيا تدمع

أنا عرفتها من عند سبهللة وقلت آجى أحييكى هنا

حقيقى برافو عليكى

دعاء مواجهات يقول...

اعتذر عن التأخر فى الرد على التعليقات نظرا للظروف النتيه
السيئة

تحياتى ومودتى