الأحد، أغسطس 09، 2009

استحملينى ..






استحملينى

استحملينى ياغاليه
ياللى غيرك فى الحياه
دى ماليش

استحملينى يــا أمى
استحملينى يادمى
ياعيونى

وجفونى
ورمشى الحزين
ياحنينى وخضوعى

ياقوتى وضعفى
ياأغلى شئ عندى
ياكل ما عندى

استحملينى
كدة كلى
بحماقتى وغباوتى
وظنونى وشقاوتى

وفرحتى وحزنى
استحملينى
انا فيكى
طمعان اوى
ف قلبك

استحملينى دا انا بعدك
ماليش وجود
ف الكون

ياكونى وحياتى
وغربتى وقربى

ياحنينة وقاسية
يا معايا وعليا

ياكل ما ليا

استحملى بُعدى ..

هناك 20 تعليقًا:

adel يقول...

مش عارف ااقولك ايه
مش هاقولك وزن و قافية و تعليقاتي السخيفة :)

هاقولك ان الكلام هزني قوي

ويارب تتجمعوا قريب لو انتوا فعلا بعيد
في ناس بيبقوا مع بعض في بيت واحد و ابعد مما تتصوري :)

حسن حنفى يقول...

ربنا يخليكي ليها ويخليها ليكي يارب

Foxology يقول...

ومين غيرها بيستحملنا ؟؟؟؟؟

ربنا يكرمنا ونقدر نوفيهم حقهم وهما يبقو راضيين عننا وندخل الجنة بسببهم :)

تحياتى :)

promise is promise يقول...

ربنا يخليها ليكى يارب ويسعدها بانها تشوفك سعيده يارب

ويبلغك رضاها ويبعد عنك سخطها

اللهم امين

همس يقول...

ربنا يباركلك فيها

ويديم عليها الصحه والسعاده


فعلا دول بيستحملو كتير اوى

يارب يخلهالك

وقوليلها كل سنه وهيا طيبه

ورمضان كريم ليها وليكى

إسلام الدسوقى يقول...

جوايا قلب شجر مقلوع
بعطش إليكي وأحن واجوع
ياللي أنت حبك حرية
في العشق أه ولا شئ ممنوع

موناليزا يقول...

كلماتك جميلة جدا ومعبرة عن حال الغالبية
ربنا يخليكوا لبعض

ليس فقيرا من يحب يقول...

السلام عليكم

كل سنه وانتى طيبه يا حبيبتى

كلماتك جميله اوى

ربنا يخليلك والدتك ويباركلك

فيها يارب

تقبلى تحياتى

فى حفظ الله

*البت المشمشية *حلوة بس شقية * يقول...

ربنا يخليهالك

سومه...مجنونه فى بلد عاقل يقول...

دى بلدنا صح هى الوحيده الى تقدر تشيلنا وتستحملنا مفيش غيرها
ازيك يا دعاء يا بلديات وحشتينى قوى

فاتيما يقول...

مش عارفة يا دودو حسيتها عن البلد دى مش عن الام بس ...
فى كل الحالات أبدعتى يا حبيبتى
و وحشتينى قوى
هتيجى فطار رمضان و لا هتزعلينى ؟!!

لورنس العرب يقول...

هاتستحملك حتى لو لم تطلبي منها هذا الطلب

دعاء مواجهات يقول...

عادل

صح كلامك ياعم عادل

ولا تعليق ..

دعاء مواجهات يقول...

حسن حنفى

ميرسى ياباشا

منور

========

فوكس

اللهم آميين يافوكس

دعاء مواجهات يقول...

بروميز

اشكرك على الدعاءالجميل

منورنى

==========

همس

وليكى انتى كمان ياقمر وحمدلله على سلامتك
بلدك نورت

======

اسلام

اية الكلام الجامد دا كلو بس

جميل بجد

دعاء مواجهات يقول...

موناليزا

ويخلينا كلنا لبعض

احبك فى الله

================

ليس فقيرا من يحب

وانت طيب وبخير ديما

ورمضان كريم

دعاء مواجهات يقول...

البت المشمشية

ويخليهالك انتى كمان ياقمر

=====================

سومة

ياخبر معقولة دى انا صاحية ولا نايمة سومة منورانى ازيك يابنتى وحشاانى جدا بجد ووحشنى كل الناس الحلوة بتاعت زمان

================

دعاء مواجهات يقول...

فاتيما

لالالالا بجد انا كدة ممكن اتحسد فاتيما وسومة وكمان ورا بعض

ازيك ياأم يوسف وحشاانى اوى والله بجد وكنت نفسى اكون معاكم ف اخر لقاء بس للاسف معرفتش الا بعدها

وان شاء الله هكون موجودة لو محصلش اى جديد بس يكون سبت

وبالنسبة للبوست هو صراحة للاتنين امى وبلدى لانى بعيدة عن الاتنين

تحياتى ليكى ياحبى

دعاء مواجهات يقول...

لورنس
فعلا يالورنس هى كدة بدون طلب لدرجة ان الواحد بقى بيتكسف من نفسة بجد

سلام يابرنس

لورنس العرب يقول...

اجمل التهاني بحلول شهر رمضان المبارك وكل عام وانتم بخير


فانوسك موجود في الميكروباص