الاثنين، يوليو 06، 2009

ازاى ماخفش؟؟...




فـــــاكر

فاكر اول يوم حبيتك
فاكر اول لمسة إيد

فاكر أول نظرة عشق
فاكر لما جريت وياك

-أنا مش فاكرة-

فاكر المطر
ازاى كان ويانا بيجرى

ازاى كانوا يبيصوا
علينا الناس

وازاى عيونهم حسدتنا

ازاى كانوا بيقولوا
مجانين

فاكر ازاى رديت عليهم
وصرخت فيهم

ايوا مجنونة أنا بيه
مجنونة بحبه
وعشقانه ف عنيه

-أنا مش فاكرة-

فاكر لما شربنا الشاى
كانت كوباية وحيدة
بس كانت بتكفى ساعتها

فاكر لما لسانى لسعنى
فاكر البوسة ساعتها
لما حولت الألم
لضحكة خجلانة وحيدة
خايفة من عيون الناس

فاكر ازاى حولِـــت اللسعه لنسمه
فاكر ازاى حولِـــت البرق
شموع حوالينا بتضوى

-أنا مش فاكرة-

فاكر لما بصيت فى عنيا
زعقتلى برموشك
صرخت اوى فيا
قولتلى

متخافيش مادمت معاكى
من يوميها خلاص مبخفش

من يوميها
بقى ليا ظهر

من يوميها اتعودت
أشرب الشاى سخن
اتعودت أتحمل ألمه

وأتحمل إن لسانى يلسعنى
عشان أفتكرك
ويتحول الخوف فى لحظة
لحـــب
فاكر..؟؟

-أنا مش فاكرة-

فاكر اول هدية كانت ليا
فاكــر لونها
فاكر عيونها
فاكر ضحكتها ؟؟
فــاكر كلامها ..؟؟

فــاكر الوردة ..؟؟؟

لسه معايا مش فى كتابى
ولا كراستى

الوردة لسه جوا عنيا
لسة بسقيها بدمعى
كل ما أفتكر
انك غبت

بغمض عينى أوى وأحضنها
وأقولها متخافيش
بكرة هيرجع تانى

مع انها عارفه
ان اللى بيموت مبيرجعش

الوردة امبارح سألتنى عليك
كوباية الشاى كان نفسها فيك
حتى دموعى بتحلم بيك

وأنا مستنيه

فاكر الشاى
فاكر الناس
فاكر المطر
فاكر الخوف
فاكر الوردة؟؟

كل دوول بيسألونى عليك
بس أنا بسأل أكتر

إزاى هشرب شاى من تانى سخن
ازاى هجرى اودام الناس فى البرد
مين هيدفينى بإيديه
مين هيضمنى بعنيه؟
ازاى أبطل أفكر فيك
ازاى مفتكركش
ازاى أخونك
ازاى أحب ؟

صدقنى حاولت
بس فشلت

قوللى
ازاى وانت بعيد
ماخافش

قوللى مكانك ها جرى عليــك
وأوعدك أنى ماخفش

لو مش جاى ابعتلى جواب
اشرحلى وقوللى وعلــمنى
ازاى لو تانى ماجتش

مـــاخفـــــش ..

هناك 32 تعليقًا:

ola_barakat يقول...

دعاء
والله بكيت وانا باتابع دموعك المحبوسه
رائعه جدا كلماتك ومعاناتك ودموعك
بس كلمه انا مش فاكره بحس انها دخيله علي الموضوع
ازاي الحب ده كله وازاي هو بعد عنها وهي نفسها يبعت يقولها اي حاجه ؟ معني كده انه هجرها ولا مات فعلا ولا بعد عنها بدون ارادته ؟
لكن بجد جميله جدا

ola_barakat يقول...

اسمحي لي احتفظ بيها لانها جميله جدا
وياريت تنشريها ع الفيس بوك عشان اكبر عدد من الناس يشوفوها

mohamed ghalia يقول...

أكيد لسه فاكر
دايما هايلة يادعاء
ربنا يسعدك دايما

adel يقول...

والله تحفة قوي
علي الرغم من الحزن اللي ملئ الكلام

احييك علي الكلام ده و الاحساس ده

ماء تشرين يقول...

مش هقدر اقول اكتر من انها جميله اوى اوى بجد حسيتها اوى يادعاء مش عارفه اقولك ايه غير انى كانى كنت شايفك قدامى بجد جميله تسلم ايدك

عاشقة القمر يقول...

كلمات جميل اوي منك يادعاء
من يومي عايش ليك

وحياتي واقفة عليك

أنا كنت ايه قبلك أنا

وأنا حبقى ايه بعديك

خايف مع الأيام

تنسى اللي بيننا قوام



وبخاف ألاقي فيك حاجات زمان ماكنتش فيك

ياحبيبي توعدني .. أمنتك أمانة بلاش

منساش وانت ماتنساش

ولا اتغير وتتغير .. والدنيا ماتبعدناش



ياحبيبي توعدني .. لو نبعد سنين وسنين

ونعيش وية ناس تانيين

مفيش حاجة تقدر تنسيك كان حبيبك مين



ازاي ماخفش عليك

وازاي أعيش غير بيك

دنا صعب تاني أعوضك

وصعب تاني ألاقيك

promise is promise يقول...

دعاء

مش ممكن كلماتك رائعه ومؤثره جدا

والحمد لله على نعمه النسيان اللى تجعلك تتذكرى الاشياء بادق التفاصيل وفى الوقت نفسه تتدعى النسيان

دمتى بكل خير

والسلام ختام

أنــا يقول...

مش عارفة اقولك ايه ..
بجد بجد بجد.. أثرتي فيا بشكل مخيف..
تسلم ايديكي ويسلم احساسك ..
ياااه انتي جميله اوي بجد ..
تحياتي بشده يا دعاء

غير معرف يقول...

طول عمرك فظيييعة و إحساسك بيوصل بشكل مؤثر أوى..بجد بحس انها مدونة ليها طعم مختلف


بس انا مش فاهمة ليه كلمة أنا مش فاكرة دى محطوطة كتير و هو باين أوى انها لسة بتحبه و فاكرة بدليل انها ذكرت الأحداث اللى بينهم

كفايـة طيبـة يقول...

لمست حاجة فيا اوى
احساسها عالى اوى

Me7'o يقول...

أنا رابع مرة أخش على المدونة أقرا البوست وأخرج من غير إحم ولا دستور

إحساس عالى قوى

طبعاً علشان أنا مش عارف الوضع بالظبط فهعلق على الكلمات

ويا رب يجمعكم ببعض تانى ويقرب كل بعيد ويقربنى أنا كمان من مراتى المرمية فى مصر دى
ههههههه

تحياتى

الصورة دى تحفة
معبرة قوى

blue-wave يقول...

الللللللللللللللللللللللللللللللللللله
بجد عجبتنى جدا جدا جدا
تسلم ايدك

Foxology يقول...

جميلة جداااا يا دعاء كلها احساس عالى جدا والتساؤلات اللى فيها قاتلة جدااا

تحياتى :)

Unknown يقول...

أنت حد رائع قوي
كلامك بجد حركني جدا
ده مش بس حب ده احساس ملوش مسمى في الوجود لإنه أكبر من كده بكتير
ربنا يكرمك

نعكشة يقول...

على فكرة الشاي السخن قوي مش كويس على اللسان

Unknown يقول...

السلام عليكم
ازيك
أخيرا شرفتيني في مدونتي بجد والله فرحت قوي من زماااان وأنا متابعك وكذا مرة كتبت تعليق بس زمان قوي ربنا يكرمك نورتي المددونة كلها والله وهستناكي علطول
أنا بكتب الكلام ده لإني فرحت قوي بزيارتك فجي أشكرك وأقولك يارب متقطعيش
خالص تحياتي

دعاء مواجهات يقول...

شكرا لكل من ترك تعليق

ارد على التعليقات اليوم

تحياتى لكم

دعاء مواجهات يقول...

علا

كلماتك بجد وسام كبير اوى اتمنى انى اكون استحقة

ولا يسعنى سوى انا قول ان ما يخرج من القلب حتما يصل للقلب

تحياتى لقلبك الرقيق
وبالمناسبة كلمة انا مش فاكرة دى قصدها تقول انها بتحاول تنسى او بتكذب على نفسها بالكلمة دى بس فشلت

نورتى.

دعاء مواجهات يقول...

محمد غالية

اشكرك على رايك وديما بجد منورنى

تحياتى

دعاء مواجهات يقول...

عادل

دعنى احييك على متابعتك المستمرة لكلماتى واهتمامك بالرد عليها

ودى وتقديرى

دعاء مواجهات يقول...

ماء تشرين

وهذا هو ما يعنينى ان تصل لقلوبكم جميعا

هذة هى شهادة نجاحى الحقيقية

تحياتى وودى ومحبتى ..

دعاء مواجهات يقول...

طيف السودان

رقيقة هى الكلمات تنفع اغنية حلوة اوى

تحياتى ومودتى
نورتى

دعاء مواجهات يقول...

بروميز

يااة انت فين من زمان وحشتنى التعليقات المتميزة بجد

تحياتى وودى

دعاء مواجهات يقول...

انا

اشكرك بشكل مخيف على الاحساس الرائع بالكلمات فلولاة ما كانت جميلة

نورتى

دعاء مواجهات يقول...

انا ودماغى

رايك فى مدونتى شهادة اعتز بيها بشدة

اما عن سبب الكلمة فراجعى اول تعليق ليا على علا وهتعرفى

منورانى ديما

دعاء مواجهات يقول...

كفاية طيبة

الاحساس الصادق

دائما ما يصل دون حواجز او صعوبات
تحياتى على الاحساس الراقى

نورتى

دعاء مواجهات يقول...

ميخو

اشكرك بشدة على الاهتمام بالبوست
وعلى فكرة دا مجرد حالة ابداعية فقط
وليست واقع

اشكرك مرة تانية

نورت

دعاء مواجهات يقول...

بلو ويف

اشكرك على رايك الجميل

نورتنى

دعاء مواجهات يقول...

فوكس

لا شئ يقتل مثل البعدوالخيانة

عزيزى فوكس منور

دعاء مواجهات يقول...

كاتب مصرى

انة الصدق وليس الحب

نورت

دعاء مواجهات يقول...

نعكشة

ساعتها ماكانش مهم اية كويس واية حلو بقدر اية يجمعنا

تحياتى ليكى ياقمر ..

atteto يقول...

رائع