
هرسم وطن ...
صاحى مقريف حبتين
مش لاقى لقمة
ولا ف الإزازة بؤين
أكلوا العيال الرغيفين
وحبسوا وراهم ..بشويتين
المية اللى راكنهم معطنين
من أسبوعين ..
ناولنى الفرشه ياواد ياحسين
حسك تنطق أو تلسن
بكلمتين ...
مش عارف أرسم ولا يوم
رسمت تنيين ..
بس هرسم معرفش مين ..
ناولنى الفرشه ياواد ياحسين
هرسم وطن
هرسم كراسى مرصوصة
قدامى ع القهوة
من غير بنى آدمين
هرسم عيال من غير إيدين
هرسم إيديهم مبتورين ..
هرسم عقولهم خيبانين
هرسم عيونهم غفلانين ..
هرسم كمان الكوبيات
مليانه شاى .. بارد
ببرودة الوجة والكفين ..
ببرودة العزه اللى ماتت
من سنين..
هرسم وطن
فرحان مزقطط
بيجرى وف إيدة بلونتين
منفوخين .. مليانين هوا
م اللى ملا عقولنا
وقلوبنا .. وعوج الكفتين
هرسم وطن
مفيهوش مواطنين
هرسم حضارة وأهرمات
هرسم نيلين
لجل أول ما النيل يجف
ألاقى غيره ف ثانيتين
هرسم بشر متكتفين
هرسم وجع م الناحيتين
هرسم عنيا مدمعين
هرسم عيالى المجنونين
هرسم نجاتى وايمان وسالم
وهرسمك انت ياواد ياحسين
هبنى الوطن
انا اصل وطنى
مليان أنين ....
إيدة صبحوا مكتفين
رافضين .. غير انهم
يفضلوا ممدودين
للى رايح واللى جاى
واللى عاوز يعين .. يعاين
واللى عاوز يشيل .. يشاور
فتحوا المزاد ..
عرضوا الوطن وعليه هديه
للموتورين
دخل المزاد
م السفاحين ملايين ..
رفعوا التمن
غلو الوطن ..
يوميها بس عرفت
انه ليه تمن
كسبوا المزاد
شالوا الوطن ومروحين
منعونا نتفرج ..
منعونا نلقى نظرة وداع عليه
راح الوطن وفضلنا شوية ورق..
فضلت لنا الخيبه
وفضلنا العار ..
وف ظلنا بيجروا عيالنا الصغار
الخيفانين .. ماسكين ف ديلنا
فاكرين انهم صبحوا بينا محميين
موصلهمش .. ان الظل
بس كان ف الوطن
وماعدنا ننفع نحمى حتى نفسنا
راح الوطن..
راح ظلنا..
وفضلنا شوية ورق..
ماعادش ينفعنا .. الورق
ماعادش .. ينقذ مـ الغرق
ناولنى يللا الفرشة ياض
بتقوللى ايه
مش لاقى لون
مش لاقى حبر
مش لاقى حتى صفحتين
خلص الورق
خلص المدد
خلص الوطن
ومترسمش بكلمتين
أصل الوطن راح من سنين
ياإبنى الوطن ميترسمش بفرشتين
وطننا يإبنى محتاج عمل
مش ناقصة برواز .. ولا ناقصه حتى
فكرتين ..