زى النهاردة ..

زى النهاردة

فيلم يثيرك للوهلة الأولى ففكرتة حقا تجبر المشاهد على المتابعه
والترقب الحذر فى الوقت ذاته
فطبيعة الأحداث وواقعيتها تفرض الاهتمام والمتعه طوال مدة العرض

زى النهاردة

كلمة بتيجى على بالنا كتير زى النهاردة كان اول يوم اروح فيه المدرسه
ياااه هو الواحد ممكن يفضل فاكر اليوم دة
اة وليه لأ..

زى النهاردة

كان اول مرة اقابل فيها صحبتى الأنتيم
يااه احساس جميل اوى انك تفضل فاكر اللقاء دة
اللى بيرمز لكل معنى للأخوة الصادقة فى حياتك فعلا واللى بتكون صعب تتكرر

زى النهاردة

كان آخر يوم ليا ف السجن
أقصد فى الثانوية العامه اهو اليوم دا بالذات بقى لايمكن يتنسى
اكتر يوم حرقت فية ورق ورميت فيه كتب فى حياتى كنت متغاظة ليا حق طبعا ً

زى النهاردة

طلعت نتيجة الثانويه وكانت ليله
بيـــــــضـــــــا بيعيــــــــد عنــك
اللى رايح يهزق واللى جاى يبستف واللى واقف بيواسى
هيييييييييه دنيا كلنا لها

زى النهاردة

ربنا كرمنى ودخلت الجامعه حلم حياتى أخيرا ً هتنفس
أخيراً هشووف ناس غير وأصاحب ناس غير
بس على مين أصحابك هما هما وراك وراك
بتكتشف بمرور الوقت انهم اصبحوا من اهم سماتك التى تلتصق بك
ويصعب عليك بل يستحيل ان تتخلص منهم ..
ورضينا بالأمر الواقع

زى النهاردة

كنت قاعد مزنوق فى إمتحان البكالوريوس ورئيس اللجنة الله يكرمه بحالة وضع
واقف ومصحصح معانا بزيادة اوى
وخلاص هتفقد الأمل وتسلم بالأمر الواقع يأتيك الفرج ويصاب رئيس اللجنه
( بالمصران الأعور) فجأة ليتم نقله للمستشفى سريعا ً ليخلو لك الجو تماماً
وعييييش بقى يامعلم...

وقتها يتحتم عليك إدراك هذة الرساله العليا
وتفهم الارادة العليا التى تتدخل لإنقاذك ربما ليس من أجلك
بل من أجل أناس ضحوا لتتخرج سيادتك ويفتخروا بيك
(قااال سيادة الوزير يعنى )

زى النهاردة

(ايه ياراجل انت لسه فاكر)
زى النهاردة كان أول مرة أقابلها يوم لا يمكن ابدا أنساه
كانت يوميها زى الملاك خطفتنى من نظرة مقدرتش غير أسلم رغم استهزائى على ما يسمونة بالحب من اول نظرة هذا..

ياااااااااااااااااااااااااة إنه تاااريخ فعلا ً

بس سيبك كل التاريخ دا قابل للنسيان ويبقى يوم أوحد فقط لاتستطيع نسيانه مهما حاولت جاهدا ً

إنه اليوم الذى أرادت فيه السماء أن تكون مبعوثا ً رسميا ً لها من ضمن ملايين
وربما مليارات مبعوثيها على الأرض
لتقوم بآداء السيناريو المحكم الموضوع بدقة متناهيه دون إدراك أو وعى منك

(إنه يوم عيد ميلادك ) كما يسمونه
لذا حاولت جاهدة أن أتناسى هذا اليوم فلم أستطع أبداً وبائت كل محاولاتى بالفشل

فإسمحوا لى أن أبلغكم بالنبأ الأكثر أهمية

زى النهاردة

((( انا جيت للدنيا ...)))

=====================================

أدعوكم لزيارة مجلة ( دماغنا) الإلكترونيه

مختلفه بكل المقاييس

أنتظر التفاعل معنا..

=====================
تحديث : شكر خاص جدا لجنة وكيكى على اجمل هديه عيد ميلاد ف الدنيا

...