السبت، أكتوبر 11، 2008

أ ُولد اليوم ..



وكأنى أ ُولد اليوم

وكأنى أ ُولد من جديد وكأن أيامى الماضيه لم تحسب بعد من تاريخ حياتى
اليوم أشعر بوجودى أكثر من أى وقت مضى
اليوم أتعامل مع الواقع بصفتى الجديدة
كصحفيه

اليوم أستعمل ورق الد شت بدلا ً من المناديل الورقيه
(وهو أمر متعارف عليه جدا ً فى المؤسسات الصحفيه تعجبت له فى البدايه ثم إندمجت )

اليوم أبدأ فى أولى خطوات حبوى نحو هدفى الأكبر
اليوم أشعر أنى أنجز عملا حقيقيا ً
ربما يعتقد البعض
أنى أبالغ

لكنها الحقيقه من وجهة نظرى
فاليوم كان هو اليوم الأول من إحتكاكى الواقعى بدنيا البحث عن المتاعب
بدنيا الصحافه

وما يزيد الأمر أهمية ً بالنسبة لى أنى تحملت مسئوليه موضوع كامل
منذ اليوم الأول تحريراً وتصويراً وصياغه بمفردى

(من المتعارف عليه أن أبدأ أشارك بعض الزملاء مواضيعهم فى البدايه قبل أن اتحمل مسئوليه موضوع بأكمله )

كانت مظاهرة بشارع القصر العينى بمبنى وزارة التعليم العالى
كلمة مظاهرة جعلتنى أفزع قليلا ً
لكننى عندما ذهبت وجدت الأمور هادئة وما هو سوى تجمع فقط

ربما تتسائلون الآن عن سبب المظاهرة او التجمع هذا
وأجيبكم انها إحدى فصول المسرحيه الهزليه للتعليم فى مصر
ودليل على مدى الإستهانه بمستقبل شبابنا
وإغتيالهم نفسيا
ً

323 طالب وطالبه قاموا بتحويل أوراقهم من كليات مختلفه الى اكاديمية الشروق الخاصه
وبعد الإنتظام شهر كامل فى الدراسه ودفع المصاريف وحضور العملى
يفاجئ الطلاب بشئون الطلبه تخبرهم بأنهم ليسوا من المقبولين لديهم
لعدم وجود اماكن كافيه بالأكاديميه

ويطالبونهم بالتحويل لأى معهد متوسط آخر

مهزله مهزله يعنى مش اى كلام دا غير ان المعهد يلقى باللوم على الوزارة والوزارة تلقى باللوم على الناس والطلبه

حاجه مسخرة يعنى


المهم الموضوع كان محمسنى جدا والناس كانت متعاونه معايا جدا ويمكن دة اكتر شئ ساعدنى وأسعدنى فى نفس الوقت

وحسيت انى بدأت المشوار الجد
وخاصة ان الجريده من ال3 الكبار ....

وانا حبيت أفرحكم معايا لأنكم تهمونى جدا ويهمنى تشاركونى اللحظات الفارقه فى حياتى

( وسامحونى لتقصيرى اللى هعوضه اليومين الجايين فى الزيارة والتعليق
صحفيه بقى ياعالم .. )

ودعواتكم معانا بقى

هناك 96 تعليقًا:

كيارا يقول...

اوووووول تعليق

كيارا يقول...

مبروك لمولدك واحتكاك بالصحافه

اما اللي ذكرتيه بجد قمه بالاستخفاف

ومهزله حقيقيه

حسن حنفى يقول...

الف مليوووووووون مبروك ان شاء الله تحققي كل احلامك وتحلامك تكبر معاكي
تحياتي

الطائر الحزين يقول...

الف مبروك وفقك الله وسدد خطاك وابعد قلمك عن المبايعات

kafrawy يقول...

مبررررررررررررررررررررررررررو ك



ياعم الصحفيه مش هتقولى اسم الجورنال ع ابقى اشتريها ع خاطرك انتى وبس

هههههههههههه


سلام

☼♫♪ عمــاد الدين يــوسف ☼♫♪ يقول...

اختي الكريمه
اولا / مبروك من كل قلبي ووفقك الله دوما
ثانيا / يصلني جيدا هذا الشعور المبهر الذي يدعو الى الطيران فرحا مع اول عمل يسند اليك من الصحيفه كاملا مكتملا فقد خضت هذه التجربه واشعر الآن بمدى راحتك النفسيه التي اسأل الله ان يديمها عليكي على الدوام
تحياتي

قلب مصرى يقول...

ألف مليون مبروك يادعاء ويارب لما نقرا اسمك بين الصحفيين الكبار، لكن أتمنى ألا تؤثر توجهات الصحيفة التى تعملين بها على قناعاتك الشخصية بالنسبة للوضع الحالى فى بلدنا الحبيب، أعنى أننى أرجو ألا تتحولى إلى صحفية فى جريدة قومية تفكر بدماغ أمن الدولة.

مهيج الجماهير يقول...

أولاً : الف مبروك على تحقيق حلمك و عقبالى
ثانياً : انا دايماً بشوف الصحفى ده حاجة كبيرة قوى و دوره كبير جداً .. و يمكن حلم من أحلامى الكتييييييييييييييرة قوى اللى محققتش ولا واحد منهم ... كان انى ابقى صحفى

و بالنسبة بقى لموضوع كية الشروق و الحاجات دى ..
فاذا مكانوش هيعملوا كدة الناس بتوع الكلية هترزق منيييييييييين ؟؟؟

يللا ربنا يرحمنا برحمته بقى ...

و ابقى قوليلنا على اسم الجريدة بقى علشان أبقى ألى امى تشتريها و تقراها
D:
** أصلها هى اللى بتقرا جرايد عندنا **


تحياتى

!!! عارفة ... مش عارف ليه يقول...

الف مبروك يا دعاء
تستحقين هذا وأكثر

وإن شاء الله للأمام دائماً وكل تدويناتك السابقة تدل على نبوغ
وقدرة هائلة على متابعة قضايا الساعة وذهن يقظ وتفاعل إيجابي مع محيطك

دومتي دوماً مبدعة
وليد

mohamed ghalia يقول...

بالتوفيق إن شاء الله فى حياتك القادمة
وإن شاء الله تكونى صحفية كبيرة قوى
بس ابقى افتكرينا دايما
تحياتى

ahmed_k يقول...

بالتوفيق دايما يا دعاء
والصحافه عالم جميل وممتع
وفي نفس الوقت متعب جدا
ومسئولياته عظيمه
وإن شاء الله إنتي قدها

وبخصوص المظاهره اللي ذكرتيها
للأسف في بعض الهيئات العلميه
ميفرقش معاهم مستقبل الطلبه
وبيتعاملوا معاهم من منطلق
إستهبال واضح , يعني أيه مفيش أماكن ؟
أمال أخدوا منهم المصاريف وخلوهم ينتظموا لمدة شهر ليه ؟
حاجات غريبه بتحصل في مصر

ربنا المعين على الإستهبال المتفشي ده

خواطر رئيس شاب يقول...

الف مبروك

وان شاء الله تكون صحفية ناجحة

بالتوفيق

غير معرف يقول...

الف مليون مبروك يااجمل واصغر واجدد صحفية ف البلد ودايما خللي قدام عينيكي المقولة من جد وجد وانا عارف كويس انك هتكوني ف فترة قليلة جدا ان شاء الله من اشهر صحفيي مصر بس المهم تكوني نفسك وتعملي دنيا صحفية خاصة بيكي انتي وبس اسلوبك هو الاهم من الخبر نفسه وربنا معاكي يااستاذة والي الامام ياروووووووميل-احمممممم اسف قصدي الي الامام يادودي -ياجمل مواجهات عرفناها وهنعرفها كمان
سلام
اخوكي وصديقك المخلص هيما عطاالله

Abu Shahin يقول...

يعنى خلاص اجتازنا فترة التدريب وبقينا صحفيين كبار قد الدنيا
:)

بالتوفيق يارب يا دعاء
ومن نجاح لنجاح

اساسا لما التعليم يبقى عشوائى اكيد قرارات المسؤلين هاتكون عشوائية

ماتغبيش علينا وماتقطعيش الجوابات
:)

محمد عبد القوى يقول...

ألف مبروك يامعلمة
يافرحة خالد كساب بيكى
بس أية حكاية جريد من الـ3 الكبار دي؟؟
أنت بتشتغلى فى جريدة قومية؟؟

عصفور المدينة يقول...

وفقك الله

موناليزا يقول...

الف مبروك وربنا يوفقك

جمعاوي(لا للنميمة) يقول...

السلام عليكم استاذة دعاء هههه
خلاص حضرتك بقيتى استاذة كبيرة بقى
عقبال ما نفرح بيكى رئيسة تحرير ان شاء الله

ربنا يعينك على اداء واجبك وييسر لك امورك ويبعد عنك اى اذى
مبروك عليكى ويلا سلام

مصــــري يقول...

ألف مليون * 10^10 مبروك.

وعقبال لما نشوفك رئيس تحرير جرنان كبير ولا نقيبة للصحفيين.

بجد والله فرحتلك مع اني عارف مشبقا للموضوع.
لو تفتكري القعدة اللي كان الصباغ بيحسد وبيقر فيها.

دمتِ بكل نجاح
أسامة

شفقة هانم واحسان بك يقول...

مبروك يا دودو الف الف مبروك بجد انتى تستاهلى كل خير كمان وبدون مجاملة انتى ممتازة واسلوبك هايل
ربنا يوفقك
شفقة

blue-wave يقول...

الف الف الف مبروووووك
وربنا يوفقك يارب

momken يقول...

الف مبروك يا دودو انتى تستاهلى اكتر من كده بكتير

وديماً من نجاح لنجاح يارب

تحياتى

عبده الرايق يقول...

والله انتى بجد تستاهلى كل خير
الف مبروك ليكى
وعبقال ما نشوف ليكى عامود خاص فى جريده كبرى يارب
واظن ان انتى قدها وقدود

mido يقول...

مبروك أيتها الصحافية :) الموهوبة

يعنى انت دلوقتى بتشتغلى يا اما فى

الاهرام او الاخبار او الجمهورية واحدة من دول

ربنا يوفقك

ومتنسيش الدستور

son's egypt يقول...

السلام عليكم
مبروك عليكي وربنا يوفقك في شغلك

nona يقول...

ايه ده ايه ده ايه الاخبار الجامدة دى ربنا يوفقك يا دودى وعقبال ما اشوفك كده رئيسه تحرير كبيرة

اما بالنسبة لمهزلة الطلبة دى ياما هتشوفى اكتر من كده من اهم مشاكلنا اننا مش عارفين قيمة الانسان

شمس النهار يقول...

الف الف مبروك يادودو
عقبال ماتبقي رئيس تحرير
بس هي جريدة ايه
عشان اتابع

عـــاوز حــــقــــى يقول...

ربنا يوفقك يا رب وتكونى من الصحفيين الشرفاء الى عايزين نشوف اليومين دول
واعلمى ان الارزاق مكتوبه من قبل ان يخلق الله البش اساسا فلا تخافى فى الله لومة لائم وربنا يوفقك يا رب

kochia يقول...

اولا مبروك وربنا يوفقك
وثانيا هي فعلا مهنة البحث عن المتاعب
الكلمة امانة
والقلم امانة
ومراقبة الله فيهم هم النجاح

تحياتي

no promises يقول...

بجد مهنه الصحافه دى تستحق لقب صاحبه الجلاله
وان شاء الله تقدرى تغيرى من خلالها كل حاجه للأحلى
بس هل كل اللى بيشتغل فى الصحافه لازم يكون خريج اعلام يعنى؟؟
مينفعش هندسه
اصلى بفكر اعتزل الهندسه

بالنسبه لموضوعك فعادى جدا
انا مره واحده صحبتى نزلوها سنه وفى الاخر فى السنه اللى بعدها اكتشفت انها كانت ناجحه
بس الشؤون قالولها سورى سورى بليييييييييييييز ماتزعليش احنا مكناش نقصد

roody hanem يقول...

اول زياره ليا ومش هتكون الاخيره ان شاء الله

والف مليون مبروك ليكى

ويارب تكونى صحفيه شطوره وقد المسئوليه

على فكره انا من قراء ضربه الشمس الدائميين ومتابعه لميلاتك الرائعه

والبركه فى المعلم خالد كساب

تحياتى

Gannah يقول...

ألف مبروك يا أحلى دودو
فرحانه جدااااا يا ناس
وعايزه نسخ أوزعها على كل اللى اعرفه
عقبال يا رب لما تبقى صاحبة عمود يومى ورئيسة تحرير قد الدنيا
وتكتبى أحلى مواجهات
بحبك يا دودو
تحياتى

ابو على يقول...

مفروك مفروك مفرووووووووك مليون مفروك

حمامة يقول...

الف مبروك ع الشغل
عقبال كل النجاحات
طيب مش تقوليلنا ف اى جريدة علشان نتابعك :)

ربنا يوفقك ..

enjy يقول...

مبروك يا دودو

CAIROCOMPUTER يقول...

الأخت العزيزه مواجهات
كل سنه وانت طيبه
يسعدنا دعوتك للأشتراك بآرائك فى برنامجنا الأذاعى عن النت والمدونات بزيارة مدونتنا
http://netonradio.blogspot.com

ميرو انتكة يقول...

دودى ازيك يا قمر

سورى على التاخير بس بجد مشغوووووووووووووولة جدااااااااا

مبروووووووووووووووووك يا جميل وعقبالى يا رب ههههههههههههههه

سلامة سلامة يا توتى

nona يقول...

الف مبروك يا دعاء و اعقبال لما تبقى احد اعمدة الصحافة الكبيرة و ترفع راسنا
اما بالنسبة الاى حصل للطلابة دة الاعدى بتاع وزراة التعليم
المعهد ياخد الفلوس يشغلها شوية و يكسب فيهم و بعد كدة يقول للطلابة مع السلامة مالكمش مكان عندنا
التعليم فى مصر باة مهزلة كل يوم بتكبر لغاية لما يجى يوم الناس هتبطل تعلم اولادها

صاحب المضيفة يقول...

أهلا بك يا زميلة في عالم الصحافة

والله وبقيتي صحفية وعقبال ما نشوفك صحفية كبيرة كده يارب


تحياتي ولو محتاجه اي مساعدة انا موجود باذن الله

تحياتي

Foxology يقول...

اولا مبروك الوظيفة وان شاء الله تبقى صحفية كبيرة وتبقى مغرورة باة كدة وتتكبرى على البلوجرز :))


ثانيا مفيش فايدة هو ده تعليقى على موضوع التجمع والوزارة

تحياتى :)

رحيق يقول...

دعاء

أتمنى لك التوفيق فى عملك الجديد كصحفية

أهو بقالنا واسطه

ههههههههههههههه

انا لسة ضيف جديد عليكم

أتمنى أن نتابع معا

تحياتى

اهو ده عيبه يقول...

مبروك يا دعاء وللاماما دايما ان شاء الله
وربنا يحقق لك كل اللى بتحلمى بيه

عاشــــــ النقاب ـقــــة"نونو" يقول...

الف مليون مبروك
سعيدة لسعادتك وبتمنالك التوفيق يارب
وفي ذهول للحالة اللي بتغطيها
بس بفتكر ان احنا هنا
ربنا يصلح الحال يارب
كل عام وانتم الى الرحمن اقرب

PrInCeSS BeRy يقول...

ازيك يا دودو وحشانى يا جميل

ربنا يسعدك وتحققى كل احلامك يارب ان شاء الله وربنا يوفقك

احساس لسه حى يقول...

عزيزتى

اول خطوة دى اسهل خطوة

ياما عملنا بديات كتير

بس المهم نكمل البداية

والاهم اننا نحب الشئ ده اللى كنا بنحبه فى الاول ونحس بجماله

بعد مدة من اندمجنا فيه

ربنا يوفقك

تحياتى

سلام

دعاء مواجهات يقول...

كيارا


الله يبارك فيكى ياقمر

دعواتك المستمرة بقى

نورتى بجد

دعاء مواجهات يقول...

حسن حنفى


الله يبارك فيك ويوفقك انت كمان


نورت

دعاء مواجهات يقول...

الطائر الحزين

يارب يبعده عن المبايعات يارب

الواحد مش حمل دة بجد

بدعواتكم وتوفيق ربنا هنثبت ان شاء الله

اشكرك

دعاء مواجهات يقول...

كفراوى

والله ياجماعه انا عارفه انى هحملكوا اكتر من طاقتكم واخليكم تشتروا حاجات مقاطعينها من زمان

استحمونى بقى

انشاء الله ف الموضوع الجاى حقولكوا جورنال ايه

ربنا يبارك فيك

دعاء مواجهات يقول...

عماد الدين يوسف

فعلا ميحسش بيه الا اللى مجرب

تحياتى ليك

بس هو انت صحفى فين؟؟

بيس

دعاء مواجهات يقول...

قلب مصرى

لالالالالالالالالالالالالالالالا

حاشا وكلا

معقول تفكر فيا كدة ياأستاذ

لا طبعا انت عارفنى

متقلقش عليا

انا شعارى كما هو وسيظل دائما لاشئ عندى كى أخسرة

نورتنى

دعاء مواجهات يقول...

مهيج الجماهير

بقى كان نفسك تبقى صحفى وانت اصلا مبتقراش جرايد
ياعم دا حتىا يبقى عيب كبير اوى

وخطأ لايغتفر

هبقى اقول لما ينزل موضوع تانى

بس للأسف لفترة معينه الاسم مش هينزل

بيس

دعاء مواجهات يقول...

عارفه مش عارف ليه

ياخبر بجد اخجلتم قلمنا

كلامك وثقتك وسام يزيدنى شرف واتمنى اكون ادها

سامحنى على التقصير

نورت بجد أستاذ وليد .

دعاء مواجهات يقول...

محمد غاليه

ليه كل الناس بتفتكر ان الواحد لما يبقى حاجه هينسى اصحابه ولاناس اللى بجد هما شئ اساسى فى حياته
لا متقلقش انا مش كدة بإذن الله

نورت.

دعاء مواجهات يقول...

أحمد _ ك

ربنا يكرمك اخى العزيز

دا هو مبقاش استهبال وبس

لا استعباط مغلف بالإستعماء التعمدى

ربنا يحمينا ويبعدنا عنو

نورتنى

دعاء مواجهات يقول...

خواطر رئيس شاب

ميرسى خالص بجد

بس هنحتاجك ياريس ونحتاج خواطرك معانا طبعا

ولا انت مش فاضى
؟؟

نورتنى

دعاء مواجهات يقول...

هيما

بجد مفاجأة ولا أجمل ولا أروع

إنى ألاقى التعليق الجميل دا منك

ربنا يعينك انت كمان ويوفقك

واكون عند حسن ظنك

بيس يامعلم .

دعاء مواجهات يقول...

ابو شاهين


مش كبار اوى يعنى

وبعدين لسه التعيين بدرى عليه

دعواتك معانا وبجد لما بغيب مش بيكون بمزاجى

دعواتك بقى

سلام.

دعاء مواجهات يقول...

محمد عبدالقوى

إحم إحم ...

بصراحه آة كانت فرصة وجاتلى

وقولت بلاش أضيعها

دعواتك معانا

متخفش هذا سوف لن يؤثر على كونى ضربشمساويه دستورجيه صميمه

بيس يابرنس

دعاء مواجهات يقول...

عصفور المدينه

دعوات حضرتك معانا بقى

نورتنى

===================

موناليزا

اله يبارك فيكى ياقمر ويوفقك انتى كمان

سلام

دعاء مواجهات يقول...

جمعاوى لاللنميمه

إيه ياعمنا مش عاجبك ولا ايه

اه بقينا أستاذة كبيرة

بس مش كبيرةاوى بصراحه

ربنا يتقبل منك دعوتك

ويكرمك

منورنى

دعاء مواجهات يقول...

مصرى

هههههههههههههههه

اة طبعا فكراها بس ساعتها

كنت ف قسم تانى رخم اوى ولسه يادوب متخلصه منه وبادئة أتنفس

ميرسى ع دعواتك يابرنس

منورنى بجد جداااا

دعاء مواجهات يقول...

شفقه وإحسان

حبيبة قلبى ربنا يخليكى بجد

كلامك بيرفع معنوياتى

دعواتك معانا بقى

بيس ياقمر

دعاء مواجهات يقول...

بلوو ويف

الله يبارك فيك

ويكرمك

منورنى

دعاء مواجهات يقول...

ممكن

يارب اكون فعلا اد الكلام دة

بجد ميرسى اوى

نورت

دعاء مواجهات يقول...

عبدة الرايق

ياخبر يانااس

عبدة باشا الرايق بنفسه بيقوللى الكلام الجامد دة لالالا انا مقدرش على كدة بجد

ربنا يكرمك ياأفندم يارب واكون عند حسن ظنك

بجد لما بشوفك عندى بحس انى خلاص بقيت من الكبرات بجد

بيس يابرنس التدوين .

دعاء مواجهات يقول...

ميدو

لا ياميدو متقلقش

مقدرش أنساها

كيف السبيل إلى نسيانها

متقلقش ع دماغى ع فكرة

بيس

دعاء مواجهات يقول...

ابن مصر

وعليكم السلام ورحمه الله

اللهم آمين تقبل الله منك

نورت

دعاء مواجهات يقول...

نونا

حبيب قلبى انتى مختفيه فين يابنتى من فترة كدة

بجد افتكرتك نسيتينا ولا لادراسه بقى وبتاع

ماشى ياعم

المهم متنساناش

بيس ياقمرى

دعاء مواجهات يقول...

شمس النهار

الله يبارك فيكى ياجميل

اوكى حقول ف الموضوع الجاى الى هيتنشرلى بس ادعى يحصل موضوع يكون جامد زى دة كدة

وانا ساعتها اقول

بس للأسف مش هيكون عليه إسمى

لآنى ف البدايه

بيس ياجميل

دعاء مواجهات يقول...

عاوز حقى

متقلقش يامحمود باشا

احنا مبنخفش من حد

دعواتك معانا بس

سلام

دعاء مواجهات يقول...

كوشيا

كلامك صح طبعا وربنا يقوينا ونثبت ف كل المواقف دى

دعواتك معانا ياجميل

نورتى

دعاء مواجهات يقول...

نو بروميز

لا طبعا ياجميل مش شرط تكونى خريجة صحافه

المهم الموهبه والقدرة على التميز

نورتينى

دعاء مواجهات يقول...

رودى هانم

اهلا اهلا بريحة الحبايب

والضربشمساويه الجامدين

دى كفايه عندى

ويارب ديما كلامنا يعجبك

بيس ياقمر

دعاء مواجهات يقول...

جنه

لأنك توأم روحى

فلازم تحسى بيا بالشكل دة وتفرحى بالشكل دة

بجد انتى اكبر مكسب ليا ف عالم لاتدوين

ربنا يديم الحب بيننا

بحبااااااااااك

سلام.

دعاء مواجهات يقول...

ابو على

هو ايه دة الى مفروك ياعم

انت قاعد ف مطعم ولا ايه

منوور

دعاء مواجهات يقول...

حمامه

اوكيشن ياقمر

هنقوول بس شويه كدة


ميرسى بجد على شعورك الجميل دة

بيس

دعاء مواجهات يقول...

انجى

الله يبارك فيكى ياقمر

انا عارفه انى مقصرة معاكى بليز سامحينى

وسلميلى عليه اوعى تنسى....

=================

ميرو أنتكه

ماشى ياباشمهندز

ياعم المشغوول انت ماشى يعنى صرفتى نظر عن الصحافه

دعاء مواجهات يقول...

نونا

الله يبارك فيكى ياجميل

حلوة اعمدة دى

قوللى يارب

فعلا فكرة حلوة وهو اللى اتعلموا عملوا ايه يعنى

بيس ياقمر

دعاء مواجهات يقول...

صاحب المضيفه

ياخبر اول مرة اعرف ان حضرتك صحفى

طب فين بقى

لازم اعرف

وميرسى على ذوقك بجد

سلام

دعاء مواجهات يقول...

فوكس

هههههههههههههههههههههههه

حتى انت يافوكس بتفكر فيا كدة

ماشى ياعم

الايام بيننا

بيس يابرنس

دعاء مواجهات يقول...

رحيق

انتى خلاص بقيتى مننا

وانتى تؤمرى لو احتجتى اى حاجه أؤمرينى بس

سلام

دعاء مواجهات يقول...

اهو دة عيبه

الله يخليكى ياجميل

دعواتك بقى

منورة

دعاء مواجهات يقول...

نونو عاشقة لانقاب

اله يبارك فيكى

خلاص الواحد مبقاش يستغرب اى حاجه ف الزمن دة

نورتى

دعاء مواجهات يقول...

بيرى

ازيك يابنتى يالى بتختفى فجأة وتظهرى فجأة انتى

طمنينى عليكى بجد وحشاانى اوى

بيس ياقمر

دعاء مواجهات يقول...

احساس لسه حى

ميرسى بجد اوى على كلماتك دى

وعندك حق ف كل كلمه

المهم الاستمرار وليس فقط البدايه

ربنا يوفقك

نورتنى ..

كيكى يقول...

الله الله يادودو
والله يا بنتى تستهلى كل خير بس اية دة انتى كمان الى عملتى كل حاجة فى الموضوع صور وصياغة وكدة...والله يابنتى انا نسيت اقولك فى التليفون مين عمل كل دة طلعتى انتى بجد والله ماشاء الله عليكى وبجد بجد عجبتنى اوى اوى صياغة الموضوع يا واد انت يا متمكن...
ام بخصوص الموضوع...
فا دة مش جديد علينا الاهمال ولا ستهتار بمستقبل الاخرين والامبالاة المنتشرة فى بلدنا..وقلة الخبرة وانعدم الثقة فى هيئات حكومية حاجة تقرف
اففففففففففففففففففففففف
..........................
فكك المهم...
انك تفضلى بحماسك دة ونشاطك وتستمرى دايما للافضل ولا حسن وتكونى قدوة لغيرك وتعرفى ازاى تاثرى فيهم وتستفيدى وتفيدى
دعاء بجد مبروك يا حبيتى
للامام دائما
عووووووووووووووووووووووووو

غير معرف يقول...

الى الامام يادعاء

عاوزين نشوف سكينة فؤاد الجديدة ببلاط السلطة الرابعة

وفقك الله

عمار المنصورة

دعاء مواجهات يقول...

كيكى

الله يخليكى ويبارك فيكى ياجميل

انتى الوحيدة اللى اخدتى السبق وشوفتى الموضوع

دعواتك معايا بقى

بيس

دعاء مواجهات يقول...

عمار المنصورة

ميرسى خالص واشكرك على ثقتك الغاليه

وكلو بإذن الله

نورتنى

واحد من الناس يقول...

الف مبروك
ربنا يوفقق

ياريت تقوليلي اسم الجريده علشان اتابعك



moood

mony يقول...

الف مبروك لمولٍدك في عالم الصحافة

و عقبال ما نشوفك ماشية علي رجليكي بثبات فيها ان شاء الله

و تحقكي كل امانيكي بالخير انشاء الله

دعاء مواجهات يقول...

واحد من الناس

الله يبارك فيك يامحمود

بس متهيألى لما تعرف إسمهامش هتتابعها

ههههههههههههههههههه

اصلها منهم

عمومالما يتنشرلى هقول هنا ف المدونه بس طبعا ف لابدايه بدون اسم

بيس

دعاء مواجهات يقول...

mony

ميرسى ياجميل

الهم آمين

عجبتنى ماشيه على رجليكى دى اصل مش ديما الواحد بيمشى على رجله

نورتى ياقمر

كفايـة طيبـة يقول...

الف مبرووك ياقمر ... عقبال كل حاجة حلوة فى حياتك يارب :)

ابقي قولى جريدة ايه وعمودك اسمه ايه عشان اتابعك بقي :)

دعاء مواجهات يقول...

كفايه طيبة

الله يبارك فيكى

لااة مش لدرجة عمود مرة واحدة

لسه بدرى

...