الأربعاء، سبتمبر 10، 2008

مستنيين إية؟؟


مستنيين إيه؟؟؟
بعيداً بقى عن إن الناس هتقوول هى البت مواجهات مالها مواضيعها كارفه فجأة كدة على
إصلاح وإلتزام ليه ؟؟
وأنا هقولكوا بس ف الآاخر....
الموضوع اللى عاوزة أتكلم فيه هو موضوع الإلتزام والتدين
ياترى هو فعلا ً كآبه وخنقه وتضييق ؟؟ولا راحه وإطمئنان وبدايه لحياه جديدة أحلى ؟؟
قرب من حاجات المفروض نحبها ولا بٌعد عن حاجات بنحبها واتعودنا عليها بالفعل
حاجه صعبه مش هنقدر عليها ولا سهله وممكنه ؟؟
فى صالحنا ولا ضدنا ؟؟
هنبقى بعديها أحسن ولا أسوء؟؟
علاقاتنا هتزيد ولا هتقل ؟؟ ضحكنا وإبتسامنا هيختفى ولا هيزيد ولا هيتقنن؟؟
طب هويعنى إية أصلا ً إلتزام من وجهة نظرنا ؟؟
الصلاة والصوم وغض البصر ؟؟
ولا حاجة أوسع بكتيير من كدة وأشمل؟ طب ليه لما واحد او واحدة بيتدينوا أصحابهم بيخافوا او ع الأقل
بيقلقوا وبيقطعوا علاقتهم بيهم تدريجياً ؟؟
ياترى لغباء وسوء تصرف من الشخص نفسة ؟؟
ولا غباء وسوء فهم من الأشخاص اللى بيعرفهم؟؟
الأسئله كتير أوى والإجابات مش بالضرورة تكون زى ما كل حد فيكم توقع دلوقتى
بس السؤال والحاجة اللى بتلح عليا فعلاً
هو الشخص اللى بعيد أوى عن ربنا وبيقول لما ربنا يشاء هيهدينى
ياترى هو عاوز يكون افضل فى علاقتة بربنا فعلا ً ولا خايف يقرب وشايف إن مفيش أمل؟؟
ولا مأجل وخايف على الشكل الحالى لطقوسة اليوميه وعلاقاته؟؟
ولا كلامو دة مجرد تلكيك للتسويف مش أكتر؟؟
أنا لاأدعى الكمال أو الإلتزام بمعناة المفروض
لكنى أحاول وأدعو الله
والموضوع فعلا ً شاغلنى أوى
هو الناس والشباب هيفضلوا لحد إمتى مأجلين خطوة إنهم يقربوا من ربهم
ويمشوا فى الطريق الصح عارفه إنهم ممكن يكونوا خايفين بس بردو دة مش مبرر كافى
عوزاكم تشاركونى التفكير وتحاولوا تجاوبوا على أكبر قدر من الأسئله دى
ممكن نوصل لنقطة بدايه صح تعيننا كلنا .. هدانا الله وإياكم إلى الفردوس
ياترى إحنا مستنيين إية علشان نبدأ نغير فينا ؟؟؟
مســــــــتنيــــيــــن إيــــــــــــــــــــــــــــــــــــــــه؟؟؟؟؟؟؟؟؟؟
(ألم يأن للذين آمنوا أن تخشع قلوبهم لذكر الله ومانزل من الحق )
(قل ياعبادى اللذين أسرفوا على أنفسهم لاتقنطوا من رحمة الله إن الله يغفر الذنوب جميعا )
(ومن أعرض عن ذكرى فإن له معيشة ً ضنكاً ونحشرة يوم القيامة أعمى قال رب لما حشرتنى أعمى وقد كنت بصيرا قال كذلك أتتك آياتنا فنسيتها وكذلك اليوم تنسى)
صدق الله العظيم

هناك 63 تعليقًا:

Ahmed Al-Sabbagh يقول...

أول تعليق

حجز مكان وجاى

Ahmed Al-Sabbagh يقول...

عدنا

تعرفى

انا اكتشفت ان الوعظات باختلاف اشكالها والوانها واسلوبها واختلاف الواعظ لابس جلابية ولا بدلة مربى دقنة ولا لأ

كلها مجرد زى شكات الدبوس اللى بتنبة

لكن والله لو الواحد معندوش استعداد ما هيبقى ليها اى اثر

وان التغير بيبدأ لما الانسان بينوى ويعوز

لكن غير كدة

تؤ تؤ

تسلم ايديكى

أحمد

2ensan wnsan يقول...

ان الله لا يغير ما بقوم حتى يغيروا ما بأنفسهم وتغيير النفس دا مش شرط يكون تغيير كلي كامل لا حتى لو علامه لو خيط صغير هيجر هدايه كامله وتغيير تام ..

بس المبادره بقى وحب الهدايه ان الواحد يشوف نفسه غلط دا مش كفايه انه يحاول يصلح في حياته وف نفسه يبقى كويس ... مفيش التزام ويحاول يلتزم يصلي ويواظب عالصلاه يلاقي مغريات تانيه تبعده يضرب نفسه عشان يروح يصلي , يدور على اي سبيل للخير يسلكه ..

عايش... ولكن !!!! يقول...

انا هقولك رأيي وعن تجارب شوفتها
اولا موضوع ان الواحد يتدين مره واحده وياخد الموضوع مره واحده كله كده صعب جدااااااا انه يستمر فيه وده عن تجارب شوفتها بعينى لانه بيجيله وقت وبيتخنق او ع الاقل بيمل

الاعتدال فى كل شىء كويس ومحدش بياخد السلم من اخره لازم لما نبتدى نقرب من ربنا يبقى مانخنقش الدنيا ونقعد فى البيت ونكفر الناس كلها لا لو مبتصليش حاول تصلى الفروض وعلى قدك وواحده واحده وصلاتك للفروض هتخليك فى يوم من الايام تصلى السنن ومع الصلاه هتبعد يوم بعد يوم عن الفحشاء والمنكر واى حاجه تغضب ربنا وواحده واحده هتلاقى نفسك بتتاقلم وبتقدر تحس بقيمة الدين ده وبقيمة اللى بتعمله
الموضوع مش صلاه وبس بس الصلاه هى الاساس وهيا اللى بتقود الواحد للى جاى

Mostafa Abdelmoneam Badr يقول...

دعاء
أسئلتك كلها مواجهات.
حتى وانتى بتكتبى تدوينة دعوية.
أنا شايف الأسئلة المرة دى مش للإجابة فى التعليق اكتر من كونها للتأمل والبحث عن الذات.
لكن عجبنى سؤال اسمحيلى أرد عليه
"طب هويعنى إية أصلا ً إلتزام من وجهة نظرنا ؟؟الصلاة والصوم وغض البصر ؟؟ ولا حاجة أوسع بكتيير من كدة وأشمل؟"

لو على المعنى اللفظى هو ده الالتزام فعلا التزام شكلى ظاهرى لعل وعسى أن ينفع.
التعبد وسيلة مش غاية
الالتزام وسيلة مش غاية

لكن المطلب الحقيقى مش التزام وكلمة التزام مش كفاية.
برده هاقولك تربية زى ما قلت فى "المعاكسة".
وسلامة قلب وجوهر.
"إنما بعثت لاتمم مكارم الأخلاق"
وفقه أى فهم عميييق للدين.
"يوم لا ينفع مال ولا بنون إلا من أتى الله بقلب سليم"
"ما سبقكم أبو بكر بصوم ولا صلاة، ولكن بشيء وقر في قلبه"
"ونفس وما سوّاها. فألهمها فجورها وتقواها.قد أفلح من زكاها.وقد خاب من دسّاها"
"من لم تنهه صلاته عن الفحشاء والمنكر فلا صلاة له"

وأخيرا
"من يهده الله فهو المهتد ومن يضلل فلن تجد له وليا مرشدا"
"عليكم أنفسكم لا يضركم من ضل إذا اهتديتم"
" انك لا تهدي من احببت ولكن الله يهدي من يشاء وهو اعلم بالمهتدين"

الموضوع غنى جدا وكلامك غالى جدا
ربنا يبارك فى دعاء

خلاصة علشان بخاف اتفهم غلط
التعبد وسيلة للبلوغ والسلوك فى الطريق الى الله ولكنه ليس الغاية.
التعبد أهم وسائل التزكية وهو شرط أساسى لها ولكن هناك شروط أخرى لابد منها للمعرفة كالإفتقار الى الله والذل لله وشكر العباد والتواضع والتراحم والبعد عن الغل والحقد والحسد والموضوع كبيير.

تقبلى اعز تحياتى
السلام عليكم ورحمة الله

إنسان || Human يقول...

كل سنة وانتي طيبة ..يادعاء
موضوع في غاية الأهمية
أنا شايف ان نقطة ان بعض الناس بتنظر الي التدين على انه خنقة وبينفروا منه ..أنا اعتقد ان الاعلام له يد في الموضوع ده ..وبيشارك خطير بيحاول يبعد الناس عن الدين
...
للأسف صورة المتدينين في خيالنا مقصورة على المظهر فقط والعبادة وللأسف الناس بتركز على الحاجات دي بس
الدين ..هو نظام حياة متكامل ..المعاملات والسلوكيات هي مثل العبادات تماماً
الدين المعامله
في ناس بتركز على العبادات بس وده أعتقد انه دينه ناقص
..
أنا كتبت الموضوع ده من كام يوم في بوست في مدونة إلا رسولي ولنا في الرسول الأسوة الحسته
elarasoly.blogspot.com

محمد فاروق الشاذلى يقول...

دعاء
دائما ما تتميزين فى إختيار موضوعاتك
الأسئلة هذه المرة فى إعتقادى ليست للمناقشة وتقدير مدى صحة الإجابات من خطأها بقدر ما أرى أنها للتنبيه الذاتى فكل منا وهو يجيب على هذه التساؤلات ستكون إجابته مكاشفة لنفسه أولاً ومن ثم فقد تحقق تحركا فى البحيرة الساكنة وهو أمر مطلوب.
لذا فأنا لن أجيب على هذه التساؤلات ولكننى سأصارح نفسى بها.
أشكرك يا دعاء على إختياراتك المميزة.

تقبلى احتراماتى.

elsha3er يقول...

السلام عليكم اولا انا واحد كنت بعيد عن ربنا وكنت على طول اقول اكيد ربنا لسة مش عايزنى بس الحمد لله ابتديت اتغير انا كنت ما بعرفش اكتب قصايد للرسول اولله لكن الحمد لله دلوقتى بعد قربى من ربنا عرفت واتقدمت انا اسف تقلت عليكى ارجو التواصل سلام

احمد الشاعر

صباح الصباح يقول...

جزاكى اللة عنا خير يا دعاء على ما تقولين ويمس القلوب

ليكوريكا يقول...

علاقاتنا هتزيد ولا هتقل ؟؟ ضحكنا وإبتسامنا هيختفى ولا هيزيد ولا هيتقنن؟؟

جميله التساؤلات دي يا دعاء

وعلافكره الناحيه الروحانيه من الانسان مهمه جدا
ومش متخيله قد ايه ممكن الانسان يحقق كل حاجه عن طريقها

في طب اسمه هولستك ميديسن

يعني الطب الروحاني ومعترف بيه عالميا

ربنا يهدينا كلنا للخير والحق والحقيقه

ويبعدنا عن طريق الغلط بكل اشكاله

ليكوريكا

arsenalwy يقول...

الله يفتح عليكى يادعاء

الألتزام مش صلاة وصوم بس الألتزام ألتزام أخلاق يعنى ألتزام داخلى الأول

والالتزام راحة بال وأستسلام لأمر الله عز و جل

غير معرف يقول...

صح هو يعنى ايه التزام اصلا ؟؟!!!

انا عن نفسى بحاول اوصل لمعناه الفتره دى

الالتزام اللى هيوصلنى لربنا صح

و مش هيخلينى اهجر حياتى و ابطل الحاجات اللى بحبها

عاشان فى وجهه نظرى ربنا مش خلقنا عاشان يعذبنا

و لكن عاشان نحبه و نعبده بحب

شكرا يا دعاء

بوست حلو اوى

سلامات :)

حسن حنفى يقول...

التدين ضروري

بس للاسف الناس مش فاهمه معناه علشان كده

بتطبقه غلط

صاحب المضيفة يقول...

كلامك عين العقل فعلا وسؤال دايما بيجي على بالي


امتى كل واحد فينا هياخد الخطة المهمة دي في حياته

امتى



شكرا لموضوعك الشيق والجميل



تحياتي

sigon1977 يقول...

التدين المفاجئ و بصورة متشددة هو المنتشر فى هذة الايام و أتذكر 3 أخوات قريبات لى، منذ عام كامل لم أرهن و كن جميعا غير محجبات و مدمنات للراب و سيلين ديون و كل أنماط موسيقى الغرب ، فوجئت مع زيارتهن مؤخرا بالتكفير لكل غير مسلم و الاسدال شغال و اذدراء و اهانة لكل عمالقة التراث فام كلثوم عجوز تغنى للفسلد و العشق و فريد الاطرش لانة درزى فهو كافر و عبد الحليم منحرف و مضلل 0
تلك أنماط تدين عشوائى مفاجئة غير مرغوبة 0
ملحوظة :( عندما ذكرت مسألة الدولة فى تعليقى السابق على الحجاب كان الغرض أن أوضح أن الحجاب فرض دينى و ليس بالفرض من الدولة و هذا استكمالا للاراء حيث لم أرى أحد ذكر هذة النقطة بمناسبة أن بعض الدل الاسلامية تفرضة بالقوة و الاخرى من الاسلامية تسجن المحجبة ( تونس ) و شكرا 0)

tarek alghnam يقول...

اختى الكريمه
كل عام وانتى بخير
وانتى الى الله اقرب
بوست رائع
فعلا الله يريدنا ان نعود اليه ولكن نفوسنا تأبى
جزاكى الله عنا كل خير
وبارك الله فيكى
تقبلى تحياتى
ودمتى بحفظ الله

د. إيمان مكاوي يقول...

هقولك على حاجه وياريت تصدقيني في نفس الوقت إللي كنت فاتحه فيه مدونتك جالي تعليقك الجميل وإللي بيحسسني إن فيه ناس كتير معايا بحبهم وبيحبوني...جزاك الله ألف خير ..ومش عايزه غير دعائك يا دعاء
والموضوع إللي أثرتيه مهم جدا لأن الإلتزام هو حياتنا ..لكن عارفه أنا لقيت إن الشباب وكتير من الناس مش عايزين يلتزموا لأن ده هيغير نمط حياتهم الغلط إللي عاجبهم ودول مساكين فعلا لأن ضامرهم تاعبهم لكن مش قادرين على الحياة العبثيه إللي عايشينها وده دور كل ملتزم إنه بأخلاقياته المتسامحه وبحياته السهله البسيطه يبين للناس دول سهولة وحلاوة الإلتزام
تحياتي لقلمك
وماتنسينيش في الدعاء ساعة الإفطار لأني عندي إمتحانات الماجستير بعد العيد

هانى المصرى يقول...

كل سنه وانتى طيبه يا دعاء

Jhennifer Cavassola يقول...

Wonder of blog!

Mato Grosso - Brazil


بلوق للعجب!

ماتو غروسو -- البرازيل


Salaam Aleikum

دكتور بهــدوء يقول...

رمضان كريم يا دودو

بوست تحفه بجد
بعتذرلك عن عدم الانتظام
رمضان بأه ربنا يتقبل


وبالنسبه للبوست
عشان احنا فاكرين ان الطريق الصح
مفيهوش سعاده
ولا ايه


بيس

غير معرف يقول...

ممممممممم ..
مستنيين ايه ؟
مش عارفة.. يمكن مستنيين النموذج الصح يا دعاء؟!
اقصد يعني انه التدين اليومين دول مع الأسف بقى ظاهري أكتر من جوهري.. يعني انا دلوقتي غصب عني و انا بقرأ كلامك اتكونت عندي صورة عاملة كده : ولد بدقن كبيرة مكشر طول الوقت مش هيخلي مراته تشتغل مش هيهزر و مش هيقول انه كل اللي حواليه اشبه بكفرة يعني.. و ده طبعاً غلط ..
بس دي الفكرة السايدة أو اللي انا حاسة انها سايدة دلوقتي..
لكن متهيألي الالتزام الصح بيزيد حياة الواحد جمالاً و نوراً و بيقوي من علاقاته و بيقوي من بصيرته و من حب الناس له.. و العبادات في الآخر بتبقى حاجة بين الواحد و ربنا.. بتبقى علاقة خاصة.. إنما الأعمال بالنيات..
و زي ما قالوا قبلي انه العبادات هي الوسيلة مش الغاية..
موضوع جميل كالعادة يا دعاء..
:) كل سنة و انت طيبة

كلام على بلاطة يقول...

كل عام وانت بخير

Mona Shereif يقول...

عارفه انا بجد ما حسيتش انى عايزة اقرب من ربنا غير لما شفت عمرو خالد ومعز مسعود
ربنا يكرمهم يارب
وفعلا احنا مستنين ايه؟؟
ده ربنا مفيش اكرم منه
كل سنة وانتى طيبه يا دعاء

غير معرف يقول...

بصى أنا كل اللى عايزة أقوله إن الدين الإسلامى يوم ما نزل كان دين لكل زمان و مكان الدين اللى بيه الواحد يقدر يعيش الحياة صح و لو بصينا فى سيرة الرسول (ص) حنشوف أد إيه كان بيهزر و يلعب و كل حاجة..فعمر التدين أبدا ما كان حاجة دمها تقيل...و الله أنا أعرف ناس قريبين من ربنا جدا و لما تقعدى معاهم تحسى أنك ضحكتى ضحك يكفيكى سنة قدام....المشكلة إن ناس فاهمة أنك مدام قربت من ربنا حتقعد تقول حرام و حلال و ممكن متهزرش و لو قالو شتيمة تكشر و على فكرة أنا متأكدة إن الفكرة دى جزء منها كبير نشأ بسبب الافلام و المسلسلات اللى يجبلك المتدين حاجة تقرف لما تشوفه تحول و الشاب الروش هو ده البطل المحبوب و هو اللى فى الآخر بينتصر ...و على فكرة اللى يقولك أنا بس مستنى ربنا يهدينى ده الموضوع مش فى دماغه أصلا لأن الى عايز حاجة بيعملها على طول من غير تلاكيك ..لأنى كنت بقول الكلمة دى لما كان ناس بيقولولى أعدلى لبسك و أتحجبى كنت بقولها كدة عشان أقفل الكلام لكن لما عزت اتحجب فعلا تانى يوم نزلت جبت الطرح و تانى أسبوع كنت جايبة لبس بلوزات طويلة و بنطلونات مش ماسكة ...آسفة إنى طولت عليكى بس الموضوع فعلا حلو أوى

و مدونتك زى العسل
تقبلى مرورى

انى احبكم فى الله يقول...

المدون بجد جميله واحييك عليها وعلى فكرة الموضوع جميل ومكتوب باسلوب جميل تحياتى عليه

رصيف نمره خمســــــه يقول...

يمكن مستنيين

النية و الارادة لتنفيذ النية

القرب من ربنا راحة ورضا وتوكل عليه وحب للاخرين ومعاملتهم احلى معاملة وعلى فكرة بقة المتدينين بشكل سليم هما احلى ناس تحبى تقعدى معاهم وانتى مبسوطة جدا

حلو اوىىىى الموضوع يادودو

سلااااااااام

Diyaa' يقول...

الإجابة بيني وبين نفسي وطبعاً إجابة طويلة عريضة وحتي فكرتني أنا شخصياً بموضوع كان نفسي أكتب فيه من زمان

بس في سؤال عايز أجاوبك عليه
أكيد التدين مش خنقة وتضييق لكل حد هيفهمه صح يفهم دينه ويفهم الدنيا عبارة عن إيه ويفهم هو مخلوق ليه ويفهم فكرة الخلق نفسها ويفهم فكرة الصبر..بس كده يا ستي لو اتفهم كل ده التدين مش هيشكل أي عائق للسعادة والقناعة والحياة المعقولة المبنية علي أساس الرضا والإيمان مش هقول الحياة اللي فيها كل الأحلام بتتحقق بس علي الأقل يكون في اقتناع


كل سنة وإنتي طيبة

Foxology يقول...

والله يا دعاء شوفى من الآخر كدة كل واحد فينا عاوز يعمل حاجة خير هيعملها ومفيش داعى انه يضحك على نفسه ويقول ان شاء الله لما ربنا يهدينى ولما ربنا يأذن والكلام ده

كون ان الواحد يقرب من ربنا ده شئ جميل لكن الأجمل انه لما يقرب من ربنا ميبعدش عن الناس ولا ايه ؟؟؟ ميبقاش انا قريب من ربنا وملتزم شكلا ومضمونا وابقى منفض للدنيا واللى فيها مينفعش ! مسيبش صاحبى اللى بيعمل حاجة غلط احاول اقربه ليا اكتر وبالحسنى مش اشوفه ادور وشى الناحية التانية ولا اول لما اشوفه استعيذ بالله من الشيطان الرجيم زى ما بيحصل للأسف قال ايه بيفكرنى بايام الجاهلية واللى انت بتعمله ده مش جهل ؟؟

الموضوع ده عاوز بلوج لوحده يا دعاء انا عن نفسى شوفت كتير وعندى كلام كتير بس فعلا مستنيين ايه علشان نصلح نفسنا الأول وبعد كدة نصلح علاقتنا بربنا اللى بالتالى هيوفقنا اننا نصلح علاقتنا ببعض مش كدة ولا ايه ؟

تحياتى :)

Unknown يقول...

دعااااااااااااااء

انتي فين

Unknown يقول...

دعاء تعرفي ان دي اجمل مواجه قريتهالك


تعرفي ليه

عشان بنواجه نفسنا
عشان بجد كلنا فينا الغلط
وكلنا جوانا التفريط والتقصير
ربنا يتولانا برحمته يارب


دعواتك للكل يا دعاء

دمتي موفقة وبخير

تحياتي

just me يقول...

انا مش مستشهد بايه من القران الكريم لأنك استشهدتى بيه

بس فى برنامج الطريق الصح
كانت كلمات التتر بتقول

شيل الدين من الدنيا
هتتجول فى ثوانى لغابه
بس ازاى الماس هتقرب لو شايفينه كأبه

اخر جمله تقريبا فيها رد على سؤالك من وجهه نظرى

كل الناس عاوزه تقرب من ربنا بس الدنيا بتغريها وفاكرين ان الدين يعنى الناس مكشره وكل حاجه حرام فبيبعدو اكتر

ربنا يهدينا يارب

ميرام يقول...

السلام عليكم ..
دعاء ..
انا بجد مش عارفه مدونتك دي كانت تايهة عني فين ..
بجد حلو قوي ..
كلامك منطقي ومرتب وبسيط ..

المهم ..
احنا فعلا عندنا مشكله كبيرة ..
كل الناس فاهمه ان الدين رجعيه وكآابة وانطوائية .. وبعد عن اللذات
مع ان الواحد بجد لما بيقرب لربنا بيشوف جمال الدنيا بجد ..
ونفسه بتستكين وبتطمئن ..
وكفاية ان الايمان بيقوي التوكل والاحتساب ..
فيبقى الواحد مش قلقان من بكره ..
وان كل اللي ربنا كاتبه خير .,
( لو يعلم الملوك ما نحن عليه من اللذة لحاربونا عليها بالسيوف)

تحيــــاتي لقلمك ..

دعاء مواجهات يقول...

أشكر الجميع على المشاركة الإيجابيه

نفعنا الله وإياكم بصالح الأعمال

==========================

أرد غدا ً بمشيئة الرحمن على التعليقات

لا تنسونا من صالح دعائكم

Mero.. يقول...

مستنيين اللي بيحصل للناس عشان تتغير :D
بالصدفة ايده تخش في كوبس الكهربا يمسكه تيار 240 فولت ينفضه نفضه محترمة تفوقه وتعلمه الأدب... :) :) :)
جزاك الله خيرا... كل سنة وانت طيبة دعاء..وآسف على تقصيري في المتابعة الفترة اللي فاتت ..

دعاء مواجهات يقول...

الصباغ

هو بعيدا عن انى مجبتش سيرة البرامج ولا الوعظات ولا المشايخ

ياترى انت شايف الوقت لامناسب دة المفروض يكون امتى؟؟

منورنى

دعاء مواجهات يقول...

عبدالله غنيم

طب واحنا المروض نفضل نتحجج بالمغريات دى لحد امتى بقى؟؟


ربنا يهدينا جميعا

دعاء مواجهات يقول...

عايش ولكن

تحياتى الجامدة جدا لكلامك ياعلاء

وهو دة اللى مفروض يحصل طبعا

اننا ناخدها واحدة اوحدة ومنكونش متعصبين بالشكل دة

المهم نبدأ منستناش مصيبه تحصلنا علشان نقرب.

دعاء مواجهات يقول...

مع اصرارى

لية تتفهم غلط

انت جبت دلائل قويه ومحدش يقدر يشكك فى صحتها

وزى ماقولت البناء كبير والمهم بدء العمل

يوم لا ينفع مال ولا بنون إلا من أتى الله بقلب سليم"

صدق الله العظيم

دعاء مواجهات يقول...

هيومان

اكيد محدش يقدر ينكر ان الدين مش بس

مظهر ومش بس كلام

ومعاك جدا فى ان الاعلام ليه دور فى تشويه الصورة

لكن كمان احنا اصبحنا اكتر وعيا

هكذا اعتقد

نورتنى

دعاء مواجهات يقول...

قلب مصرى

أخجلتم توضعنا

اكيد مكاشفة النفس والتفكير فى الموضوع

اهم كتير من التعليق عليه بمجرد كلام

تحياتى لشخصكم الكريم

نورت

دعاء مواجهات يقول...

الشاعر

ولا تقلت ولا حاجة

الهدف من التدوينه او التدوين بشكل عام هو النقاش والحديث

ربنا يديم عليك التغير للأحسن دائما

نورت

دعاء مواجهات يقول...

صباح الصباح

جزانا واياكم

اللهم نفعنا بخير الحديث

نورت

دعاء مواجهات يقول...

ليكوريكا

اللهم آمين

ويتقبل منا صالح الاعمال

وفعلا المشكله ان كتير شايفين الحكايه تضييق وخنقة

وهى بجد مش كدة ابدا

نورتنى

دعاء مواجهات يقول...

ارسنلاوى

اين انت من فترة؟

اتمنى يكون خير

كل سنه وانت طيب وبخير ديما

دعاء مواجهات يقول...

ماجنوليا

اكيد تساؤلاتك دى منطقيه جدا

وليس بها اى درب من الجنون

وانا شايفة ان البحث عن مرادفات ومصطلحات

مش مجدى بالمرة

المهم العمل والتقدم

نورتينى

دعاء مواجهات يقول...

حسن حنفى

اصبت التوصيف

اللهم قونا وثبتنا جميعا

=================

صاحب المضيفه

هو اكيد هدايه من الرحمن الاول وكمان رغبه مننا

نورت مكانك

دعاء مواجهات يقول...

محمود

انا ضد هذة النوعيه من التدين وغالبا بيكون مظهر وكلام فقط

تقبل تحياتى

==============

اشكرك على التوضيح وآسفة لو كلامى ضايقك

دعاء مواجهات يقول...

طارق الغنام

اللهم آمييييييييين

ولك المثل

دعاء مواجهات يقول...

إيما ام البنين

اكيد مصدقااكى

وربنا ياارب يكرمك وتنجحى باعلى تقدير

كلامك عن البوست يتلخص فى

( زائغين بين ذلك لا الى هؤلاء ولا الى هؤلاء)

نورتى

دعاء مواجهات يقول...

هانى علوان

وانت طيب وبخير ديما

نورت

====================

ماتوا غورسو

مرورك شرفنى

معناة اننا وصلنا للعالميه

يارب تفهم كلامى

دا لو جيت هنا تانى يعنى

بيس

دعاء مواجهات يقول...

دكتور بهدوء

صح يادكتور

انا بحب الاغنيه دى اوى ع فكرة

وربنا يعينك على العبادة

وانا مش زعلانه طبعا

دعاء مواجهات يقول...

ريم

سألتى وأجبتى احلى اجابه على نفسك

متهيالى حكاية القدوة مجرد حجة وبس

صدقينى

نورتى

==================

كلام على بلاطه

وحضرتك طيب وبخير ديما

دعاء مواجهات يقول...

انا ودماغى

كلامك كلو صح والاصح اننا عارفينو بمعنى اننا مادمنا عارفينو محدش هيعرف يلعب ف دماغنا ولا اعلام ولا غيره

صح

رايك ف المدوزنه شرف ليا

نورتى

دعاء مواجهات يقول...

SOMETIMES

فعلا الخطاب الدعوى الجديد

الميسر بيساعد وبيجذب ناس كتير

عن نفسى متبعاهم جدا

دمتى بخير

دعاء مواجهات يقول...

انى احبكم فى الله

اشكرك علىرايك
واتمنى ديما مشاركات هادفة
نورتى


================

رصيف نمرة خمسه

طب وهى النيه هتيجى بناء على ايه ولا ازاى هنستناها تيجى اصلا

احنا اللى لازم نسعى بالفعل

نورتى ياقمر

دعاء مواجهات يقول...

ضياء

ما دام قولت بينك وبين نفسك

يبقى اكيد هعرفها

منك

والاقتناع تفتكر يجى ازااى؟؟

نورت

وانت طيب

دعاء مواجهات يقول...

فوكس

كلامك مفيهوش كلمه طبعا

التدين والدين كلو يسر وليس عسر

وكمان دين وسطيه لا تشدد كما نرى

بس انا اعتقد ان دة يكون نتيجة ان الواحد زى ما كان بعيد اوى اوى

بيقرر بقى انو يقرب اوى اوى

فبيغلط اوى اوى

بس كدة

نورتنى

دعاء مواجهات يقول...

برقش

انا هنا فى الحياة يادكتور

انت اللى فين بس
؟؟

انت فهمت مغزى البوست تمام اوى

ودةا هم حاجة عندى

ان هدفه الاول يتحق جوا كل واحد فينا ويفكر ويواجه نفسه بقى وكفاية تلاكيك وحجج


نورت

دعاء مواجهات يقول...

لست ادرى بااردو

انا كنت عاوزة اكتبها بصراحه ف البوست

ويمكن هى من اسباب كتابه البوست اصلا

بحبها اوى وهى معبرة اوى فعلا

نورتى

دعاء مواجهات يقول...

ميرام

ربنا يكرمك

كلامك شرف ليا

اتمنى اكون ديما عند حسن ظنك

نورتى

دعاء مواجهات يقول...

ميرو

ولا يهمك المهم انى اتطمنت عليك

ويارب خير

وانت بخير ديما

صح انا بردو شايفة ان الاغلب بيستنى مصيبه بعدها بقى يفكر يقرب

تحياتى ليك

شمس النهار يقول...

المشكله ان مرادف تدين عند اغلب الناس يعني عبوس وتكشيره
الغلط في الفهم الغلط للدين
افهم صح
اقرب صح
ودينا دين معامله كل حاجه ليها ثواب وعقاب
تبسمك في وجه اخيك صدقه
الكلمه الطيبه صدقه
لوفهمه صح هنقرب من بعض صح
وهنعين بعض علي الطاعه
واهم حاجه الخلق الطيب

دعاء مواجهات يقول...

شمس النهار

اشكرك على الفهم الصح

اللى بتمنى بجد يكون عند كل البنات ومقتنعين بيه

نورتى ياقمر