الجمعة، أغسطس 01، 2008

undooo


undo

آة أقصد الآندو بتاع الكمبيوتر دة اة اللى ف كل برامج( مايكروسوفت ) كم يزهلنى ويبهرنى ويعجبنى هذا الأمر الذى تتلخص آلية عملة فى الشكل المعبر عنة سهم يعود للخلف أكيد معظمنا عارفية فهو أشهر من النار ع العلم وليس بحاجة إلى تلك التقديمة اللى ملهاش لازمة ..
كم أفكر فية واسرح معة بخيالى آة لو كان الأوبشن دة موجود فى برنامج حياتنا الممل تفتكر كان اتغير فيها حاجة انا عن نفسى بقول أكيد كان هيتغير فيها حاجات كتير

الأمر (undo) يقوم بالتراجع عن آخر 5 أو 10 أوامر قمت بها فى البرنامج الذى تعمل علية يعنى لو كتبت كلمة ومش عجباك ومش عارف تتمسح إزاى مجرد ضغطة على آندو تحل الأزمة لو مسحت حاجة مش عاوز تمسحها بااردو مجرد ضغطة على آندو ترجعلك الكلمة دى تانى يعنى يرجع الزمن ويمنع الأخطاء ويعطيك أوبشن تصليحها


جميلة دى بجد تخيل كدة مثلا ً إتخانقت مع واحد صاحبك وغلطت اوى وانت بتحبة وصعب اوى تعتزر لة وتتمنى لو اللحظة دى تتمسح من تاريخك أصلا ً ويأتيك هذا الأوبشن من حيث لاتدرى ويمحو تلك اللحظة بكل سهولة ياااة فية كدة ؟؟ آة فية ..

تعالوا نتخيل مثلا ً إن الأوبشن دة متاح لينا ل5 مرات بس ف العمر إية أكتر حاجة كنا هنتمنى تتحذف من برنامج حياتنا ياترى الحب الأول اللى كان سبب ضعفك وهزيمتك؟؟ ولا العبث واللعب وعدم التركيز ف المزاكرة؟؟ ولا التدخين؟؟ ولا الإدمان؟؟ ولا الجواز؟؟ ولا إنك مكونتش تقابل حد معين فى ظرف معين انت ندمت بعد كدة إنك عرفتة اصلا ؟؟ً ولا إنك تكون متولدتش أصلا؟؟

ً ولا إنك تكون مجبتش أطفال؟؟ ولا إنك متكونش للأب والأم دوول؟؟ ولا إنك تكون مش من البلد دى؟؟ ولا إنك متتولدش فى الزمان دة؟؟ ولا إنك متعيشى لما تشوف لحظة براءة (ممدوح إسماعيل) ؟؟ولا إنك تدخل كليتك دى ؟؟ولا إنك تفكر تدخل الجامعة اصلا ؟؟ً

ولا إنك تكون ماهاجرتش من بلدك ولا سيبتها؟؟ ولا إنك قعدت فيها وإتحملتها رغم قسوتها؟؟ ولا جرحك لحد حبك أوى ومايستاهلش منك اللى عملتة معاة؟؟ ولا لحظة ندالة مع حد أخلص ليك؟؟ ولا كلمة طلعت منك غصب عنك فرقت بينك وبين ناس بتحبهم وعملت جواهم حاجز نفسى بينك وبينهم مش ممكن يمحية الزمن ؟؟

ولا تقصيرك فى حق ربك ودينك؟؟
ولا تقصيرك فى حق أهلك؟؟
ولا طريقة تفكيرك فى الناس والأشياء؟؟

يااااااااااااااااااااة
كل دى حاجات ممكن تكون عملتها ونفسك تدووس زرار undo))
علشان تمحيها من حياتك؟؟

أد كدة انا كنت مستهتر؟؟
أد كدة مكونتش بفكر صح؟؟
أد كدة كنت غبى؟؟
أد كدة
وأدكدة
وأد كدة كماااااااااان
وكماااااااااااااااااان

بس تفتكر يكفى إستخدام الأمر undo))
5 مرات فقط لتصليح
كل الغلطات اللى أنا عملتها ومحوها من حياتى محوا ً
السؤال بقى اللى بوجهة لكل حد بيقرأ دلوقتى
كام undo)) هتحتاج تستخدمها لتصحيح أخطائك على مدار سنى حياتك؟؟
طب إية أكتر حاجة ملحة أوى نفسك تعملها آندو وبسرعة شديدة؟؟
إوعوا حد يهرب من السؤال بجد محتاجة الرد علية أوى...


هناك 109 تعليقات:

2ensan wnsan يقول...

اول تعليق

يا سلام لو الاوبشن دي في حياتنا بجد ... كان الواحد غير حاجات كتير ..

كان الواحد لحق نفسه قبل ما يقع في مشاكل .. كان ممكن يلحق نفسه ويعمل undo لوجوده في الظروف دي والاحوال دي

بس برضه لازم للطبيعه البشريه ان الواحد ان الواحد يغلط ويعمل الundo للافعلا اللي بعد كده والا يبقى آله

اما بالنسبه للكام امر undo اللي هحتاجهم فأنا بصراحه مش هقول انا ما بندمش على حاجه عملتها

في حاجات عملتها وندمت عليها بس مش هحتاج اني اعملها undo

Amgad يقول...

ياسلام عليكي يادودو يابتاعة الجديد
فكرة الموضوع فظيعة بجد ولو الخمس اندوهات في حياتي
كنت فضلت ان اعيش جاهلا خيرا من ان اموت بالسكتة من تثقفي

وكنت وفرت الباقي
للمستقبل
يعني مثلا لو اتجوزت ابقي اعمل اندو
ولو خلفت اعمل اندو برده مدام انا اعرف اخلف بعد كده
ولو كبرت في السن اعمل اندو كام سنة
والاخيرة بقي هفكر شوية وابقي اقولهالك في بوست تاني
ولا انتي قصدك خمسة اندو للي فات بس
عموما هو الموضوع عايز تفكير شوية
بس بجد الموضوع تحفة وجديد اوي
خالص تقديري

dido يقول...

السلام عليكم
ازيك يا دودو بجد فكره رائعه بس انا مش هحتاج خمسه بس انا هحتاج كتيييير اوي
هحتاج اعمل اندو وارجع لايام الطفوله علشان ترجع معاها البراءه والقلب الابيض والضحكه الصافيه اللي طالعه من القلب
هحتاج اعمل اندو لحاجات تغضب ربنا انا عملتها ونفسي مكنتش اعملها لان ربنا يستاهل اني اطيعه والطاعه دي هتبقي كرم منه ليا انه خلاني اطيعه
هحتاج اعمل اندو علي وقت من عمري ضاع في حاجات تافهه
هحتاج اعمل اندو لحاجات كتيييييير اوووووي اعتقد ان رقم خمسه ده هيبقي قليل اوي

ahmed_k يقول...

هو ايه أندو ده الأول هههههههه

وخمس مرات متنفعش خااالص
قولي خمسميه أو خمسميه وخمسه وتلاتين تبقى معقوله

علي فكره موضوع الأندو ده ينفع قصه لفيلم خيال علمي
أما أروح أدورلي علي واحد كاتب روايات عشان أقولله الفكره دي


سلاااااااام يا دعاء

ahmed_k يقول...
أزال المؤلف هذا التعليق.
ahmed_k يقول...

معلش يا دعاء أنا بعد ما كتبت التعليق لقيته نزل مكرر عندك لذلك حذفت واحد منهم


سلااااااااام
يا رب ده كمان ميتكررش

blue-wave يقول...

يااااااااااااااة
انا لو عندى اندو كنت غيرت حاجات كتير
ماكنتش دخلت طب
ماكنتش عرفت واحدة جرحتنى جرح عمرى
ماكنتش جرحت واحد صحبى بكلمه معرفش ازاى طلعت منى
ياااااااااة
دى لو بعمرى هاشتريها والله

Mafrousa يقول...

هههههههههه
انا نفسي فى الاندو ده
ماتعرفيش ممكن اجيبه منين؟؟؟؟؟

طبعا كل الناس بدون استثناء نفسهم فى واحد
بس لو عندي حعمل ايه؟؟؟؟؟؟؟

بصي حرجع بيه نفسي تاني للايام اللي كنت فيها في الحرم و مش كنت ارجع تاني
لأن هناك مش بتفكري فى حاجه خاصه بالدنيا خالص
لا قرايب
ولا اهل
ولا حتى بيوحشوكي
وانا عاوزه افضل هناك..علشان مش عاوزه افكر فى حد غير اني اصلي و اعبد ربنا

د. إيمان مكاوي يقول...

بصراحه هنحتاج ال undo في حاجات كتييييير في حياتنا إبتداءً من التفاهات وحتى الحاجات الكبيره ..
تحياتي لك على تقليب المواجع

حسن حنفى يقول...

الصراحه انا شايف ان كلنا محتاجين نعملundo

لان كلنا غلطنا في حياتنا بس انا شايف

اني لو عندي undo كنت رجعت اي موقف

انا لتصرفت فيه بسخافه

كان زماني صلحت كل الاخطاء اللي انا

عملتها وما اكثرها

حسن حنفى يقول...

الصراحه انا شايف ان كلنا محتاجين نعملundo

لان كلنا غلطنا في حياتنا بس انا شايف

اني لو عندي undo كنت رجعت اي موقف

انا لتصرفت فيه بسخافه

كان زماني صلحت كل الاخطاء اللي انا

عملتها وما اكثرها

YaQeeN يقول...

دعاء مواجهات..

الحقيقه قرأت كلامك اصبت بحاله هلع فظيعه..

فعلاً لو الواحد فكر شويه كام اندو هيحتاجها علشان يمسح الحاجات اللى عملها فى حياته او اللى حصلتله..

هتلاقيها كتيره قوى..
كتييييير متتعدش..

اندو على الحكم..
اندو على نفسنا احنا شخصياً..
أندو على القرارات الحاسمه اللى بناخدها فى لحظة غضب..
أندو على حاجه مقدرناهاش وضاعت مننا..

أندو أندو أندو أندو........
كتيييييير قوى..


بس للأسف العمر عمره مايرجع لورا أبداً..
ولا الزمن..


بس شوفى سبحان الله..
ربنا سبحانه وتعالى..أمرناً دايماً اننا نعمل أندو على حياتنا..حياتنا اللى محتاجه تتغير للأحسن..

طول منتى فى الحياه لازم تحاولى تعملى اندو..وان متعملش اندو نخليه اندو..

بادينا اننا نتوب..ربنا سبحانه وتعالى غفور بالعباد..

الأندو بتاعنا غير الاندو الخاصه بالجهاز..

الاندو اللى على الجهاز..بأى شكل من الاشكال هى نفس الطريقه اللى بتعملى بيها اندو كل مره..

الاندو اللى فى حياتنا..لكل موقف بيعدى علينا محتاج اندو شكل وبطريقه شكل..


تحياتى ليكى..
الموضوع ده مهم جداً وكنت محتاجه فعلاً انتى اتناقش معاكى فيه..

وتنورينى فى مدونتى فى اى وقت..

حسن حنفى يقول...
أزال أحد مشرفي المدونة هذا التعليق.
Foxology يقول...

والله يا دعاء الموضوع ده بيدور ف دماغى بقاله فترة طويلة اوى ... ينفع الواحد يبقى عنده اوبشن بتاع Undo ?

عن نفسى كنت اتمنى واحدة بس >>> Undo لأنى اكون غير مصرى بسسسسسسسسس

وزى ما قال احد الشباب الروشين >> لو لم اكن مصريا كان يبقى قشطة جدا

تحياتى :)

son's egypt يقول...

السلام عليكم
الامرة ده يحتاجه الواحد اكتر من 5 او حتي 100 مرة علشان يقدر يصلح اي غلط هو عمله في حياته

Mahmoud البطراوى يقول...

دعاء الحياه كده احسن

اصلا كل الحاجات الى هنعملها ( تراجع دى ) ليها ميزه
حتى الجرح والفشل كان له طعم برضه وكان لازم نذوقه
اه والله

غير معرف يقول...

انتى عارفة

انا اكيد مكنتش هستخدم الاندو دة

لأن حياتى زىما هيا بالاخطاء الكبيرة قوى اللى ارتكبتها وكل الحسنات اللى عملتها وكل الناس اللى عرفتهم وكل المواقف اللى عشتها

زى ما هيا كدة فهى لازم تكون كدة ومش ممكن تكون احسن من كدة والحمد لله على كدة
وكفاية كدة

ايه رأيك بقى فى كدة

صاحب المضيفة يقول...

طريقة جميلة للتعبير عن فكرة قديمة بشكل جديد

هو ممكن الطريقة دي تنفع في الذنوب والسيئات فالله سبحانه وتعالى يمحو بالحسنات السيئات ويبدلها عفوا وغفرانا



ربنا يكرمك يارب على المعلومات الطيبة دي


ويرزقنا دايما الاخلاص

ميرو انتكة يقول...

السلام عليكم يا جماعة
ازيك يا دعاء

بجد موضوع جامد
فعلا لو كلنا فكرنانعمل undoلايه فى حياتنا هنلاقى حاجات كتير قوى
منها مثلاـ بعدنا عن ربنا للاسف
ـ ممكن نكون زعلنا ناس كتير فى حياتنا من غير ما نحس

وكتير وكتير قوى بس اكيد كلنا بنتعلم من اخطائنا علشان ما ينفعش نعمل لها undo

سلامة سلامة يا جميل

Mero.. يقول...

هممممم
اعتقد إن خاصية الـUndo
كانت هتخلي حياتي اسهل من اني استفيد منها واتعلم ان تصقل الحياة شخصيتي "حلوة تصقل ؟؟"
ع العمووم اعتقد اني احتاجها مرة او مرتين ومش هكتر ...
تحياتي اختي :)

zOzO يقول...

بجد تبقي الحياه حلوه
كنا غيرنا كتير
خطوات غلطنا واخدناها


مثلا كنت ذاكرت كويس ودخلت الكليه اللي بابا كان بيتمناها ليا
كنت مش زعلت حد مني رغم ممكن يكون مش غير قصد
مش كنت حبيت اي حد ولا وثقت ف حد مهما كان الشخص دا
كلهم صنف واحد
هههههههههههههههههههههههه
ومش عارفه ايه تاني


بجد بوست حلو
تسلم ايديكي يا دعاء
بيسسسسسسسسسسسس

محمد عبد القوى يقول...

اولا انا مش هنا عشان اعلق على بوست واحد
انا هنا عشان اعلق على اخر كام بوست ، واللى اتفاجات بيهم النهاردة ، يعنى اغيب عن المدونة اسبوعين ارجع الاقى ده كله .. الله ينور
بالنسبة للبوست ده ( إندو ) فأحب اقولك ان محتاج عدد كبير جدا ولو الأوبشن متاح فعلا كنت هاحتاج عدد لانهائى من المرات لأنى عارف ان كل غلط ممكن اصلحه وكل كلمة سهل انى ارجع فيها
بالنسبة لبوست انا وطنى فانا متفق معاك انا معدش فى اغنية وطنية بتمسنى غير اغنية شادية معداش على مصر وعلى فكرة اسمها الصحيح ( احلى بلاد الدنيا بلادي )
بالنسبة لقصدتين السياسة فانا طبعا مع القصيدة التانية وعلى رأى العبقرى جمال بخيت ( ياعم بيع ماهى متباعة )
واخيرا : مبروك مرة تانية ع العمرة البوست التانى عن الرحلة هايل ..مستنيك على قلم الحرية بس سيبك من اخر بوست لان انا نفسي مش حابب الصياغة
سلام

rovy يقول...

ازيك يا دعاء موضوعك المره دى عبقرى بجد و اد ايه فعلا كان نفسى يكون الاندو
موجود علشان افضل ارجع بالزمن وارجع كل الناس اللى كنت بأحبهم و رحلوا اما من الحياه او فرقتنا الايام و الزمن .. صدقينى دى اكثر حاجه بالنسبه ليه عاوزه علشانها الاندو ..
و فاكره محمد ابن اخت زوجى اللى طلبت منك تدعيلوا .. لو كان فبه اندوا كان رجع و مانزلش اليوم المشؤم ده من بيتهم و يمكن كان زمانه بيتمتع بشبابه و حياته .. بس صدقينى اكيد ربنا سبحانه و تعالى هو المدبر و هو من بيده الامر علشان كده لازم نرضى و نقول الحمد لله ..

موضوع متميز ولو انه ابكانى حين تخيلت انه بأمكانى العوده لحضن ابى الحبيب رحمه الله او انقاذ محمد ذلك الشاب الذى يبكى قلبى من اجله كلما رأيته ..

دمتى بخير فى رعايه الرحمن
تقديرى و تحياتى

Desert cat يقول...

الاوبشن ده لو موجود فى حياتنا فعلا
كان بقى الحياة ولا اجمل
عن نفسى كنت كل يوم بالليل اعمل Un do لاحداث اليوم مهما كانت بحلوها ومرها علشان ابدا يومى الجديد على نضيف خالص

دكتور بهــدوء يقول...

لو هعمل اندو
يبأه للسنه اللي قبل اللي فاتت واللي قبلهاااا
عارفه

عاملت ناس حلو أوي
بس طلعو مايستاهلوش أبدااا
بس خلصت خلااااص
هتراجع عنهم نهائي
******************
تحياتي لاختياراتك الهايله

أسير الجراح يقول...

البوست الجديد



محتاج رئيك



اتمنى زيارتك




اسير الجراح

kochia يقول...

فعلا حاجاة جميلة لو اقدر اعنل undo لحاجات كتيرة في حياتي
بس انا غالبا اللي هعمل له undo هي تصرفات كان المفروض اعملها ومعملتهاش
يعني هعمل تراجع لعدم تصرفي في موقف ما عشان لو رجع اتصرف
ولو رحع اعمله
وكلمه لو رجع الوقت اقولها

ودلوقتي عاوزة اعمل undo لايه ؟؟

لعدم احترامي لعهد او موعد او كلمة قد اكون خلفتها مضطرة او متعمدة في يوم من الايام

Noha El-arabi يقول...

انا شخصيا عاجبني اختراع
invisible to everyone
متي تختار لنفسك الظهور
:)

بنت الاسلام يقول...

ذنوبي

باستغفار وتوبة نصوحة

اعملها اندو

ياااااااااااارب عفوك ورضاااااااااااااك

تحياتي

محمد فاروق الشاذلى يقول...

لو أن هذا الخيار متاح فى حياتنا لكان سبب فى زيادة مشاكلنا وليس العكس فوجود هذا الخيار لعدد محدد من المرات سيحد بالطبع من استخدامه.
فمثلاً الأشخاص المترددين سيدخر هذا الخيار للحظات الأخيرة فى الحياة حتى يصبح لا زوم له.
وهؤلاء المتسرعين سيتنفذون رصيدهم بسرعة كبيرة ثم سيقع فى مشاكل متلاحقة بعد ذلك وكان سيتمنى وجود هذا الخيار فى هذه اللحظات بدلاً من المرات التى استخدمه فيه.
أما هؤلاء المتعقلون الذين سيتخدمونه فى موضعه الصحيح سيقعون فى مشاكل من نوع آخر فمثلاً إذا أغضب أحدهم ورأى أن هذا الخيار أولى به الاستخدام فى أمر آخر مما سيوجد مشكلة أخرى إذ سينتظر الطرف الأخر استخدام هذا الخيار معه.
وهكذا من المشكلات العديدة التى ستنشأ نتيجة سوء استخدام هذا الخيار أو حتى التعقل عند استخدامه.
وإن كنت أتمنى أن يتاح هذا الخيار للسياسيين لتعديل السياسات التى تذهب بنا إلى الجحيم

وشكراً

WhItE HeArT يقول...

يااااااااه

كام اندو هحتاجها علشان اصلح اخطائي كتيييير

بس انا مقتنع بأن اللي حصل مبيتغيرش والاخطائنا مبتتصلحش بسهوله

موضوع عجبني جدااا

وياريت كان الزر ده موجود في حياتنا

تحياتي وموضوع جميل

دعاء مواجهات يقول...

- عبدالله

عجبانتى اوى ثقتك فى افعالك واقوالك دى يابيدو بجد

جامدة ومهمة اوى اننا نقتنع بكل حاجة عملناها فى حياتنا

نورت

دعاء مواجهات يقول...

- أمجد

انا مبسوطة اوى ان الموضوع عجبك

اما انت طلعت حتة طماع يااراجل انت

هتعمل لعمرك يعنى هترجع كل الاحداث والاقوال والافعال بأندو واحدة بس

لا مهندس ع حق وبتحسبها

نورت

دعاء مواجهات يقول...

- ديدو

واحنا فيها نرجع لبياض قلوب الطفولة وبرائتها

بإيدينا نصفى قلوبنا ونصلح اخطاء حصلت

ومنعملش اخطاء تانية

نورتى

دعاء مواجهات يقول...

ahmed _k

اية دة ..؟؟

انا افكار بتتسرق وانا قاعدة ولا اية؟؟

طب لو انت اللى هتكتبها اوكى موافقة

ههههههههههههههههههههه

نورت

دعاء مواجهات يقول...

بلو وييف

بالنسبة لدخولك الطب من حقك لانك لازم تحب دراستك

وبالنسبة لمعرفتك حد جرحك فدة من مصلحتك لانة بيعلمك اكتر وبيديك خبرة اكتر

وبالنسبة للكلمة اللى قولتها لصاحبك

انت بقى حاول تصلح وتفهمة

وبلاااها آندو خاالص


بيس يادكتور

دعاء مواجهات يقول...

مفروسة

حبيبت قلبى

فكرتينى باحلى ايام واحلى اوقات واحلى افعاال فعلا

كفاية ان الواحد مش بيعمل الذنوب دى كلها

ياارب وابقى هاتيلى واحد اندو بنفس الاوبشن معاكى
بيس

دعاء مواجهات يقول...

- إيما

أنا آسفة اوى بجد

انى قلبت عليكى المواجع

بجد مكونتش اقصد بس انا منزلة البوست دة علشان كل واحد يفكر كويس ويراجع نفسة قبل اى فعل او كلمة يقولها

وعلشان يحاول يصلح اللى فات

مش اكتر

بجد منورانى

دعاء مواجهات يقول...

- حسن حنفى

كلنا بنغلط وبنغلط كتير

بس الفرق فى حجم الغلط

ومدى تداركة

تحياتى للصراحة

نورتنى

دعاء مواجهات يقول...

- ميادة رفعت

تحياتى الكبيرة لوصفك وشرحك ان الاندو الوحيدة الحقيقية فى حياتنا هى

(المغفرة والتوبة)

والاستغفار

نورتينى..

دعاء مواجهات يقول...

فوكس

معقوول يافوكس

لدرجة دى؟؟؟؟

طبعا انت حر فى آندوهك وكل واحد حر فى آندوهة

بس جامدة اوى بتاعتك دى..؟؟

طب عاوزة اعرف كنت تحب تكون منين بقى؟؟

سلام

دعاء مواجهات يقول...

son;s egypt

اكيد لأن الأخطاء مش بس خمسة

دوول تراكمات سنييين

بس المهم الى يقدر يفتكرها ويحاول يصلح ع اد ما يقدر

نورت

دعاء مواجهات يقول...

بطوط حبوب

كلامو صح محدش قاال حاجة

انما مجرد التفكير فيها بااردو ميزة

تخلى الواحد يشوف رايح فين وجاى منين

نورت يابرنس

دعاء مواجهات يقول...

المحارب المتيم

هههههههههههههههههه

لاااااااااااااااا

إنت

كدااااااااااا

نورت

دعاء مواجهات يقول...

صاحب المضيفة

اشكرك ع رايك

وطبعا انا قولت من كام تعليق فاتوا ف ردى ع ميادة

ان الطريقة الوحيدة لأندو الواقعى ف حياتنا هى الاستغفار والتوبة

نورت

دعاء مواجهات يقول...

ميرو أنتكة

صح ياميرو ياحبيبتى

الميزة الوحيدة اننا بنتعلم او هكذا المفترض ان يكون

نورتى

دعاء مواجهات يقول...

mero

حد عارف هدفة يانااس

مرة او اتنين بس

مهم بردو نعرف هدفنا

وحلوة (تصقل فعلا)



نورت

بيس

دعاء مواجهات يقول...

زوزو

صح انك تفكرى اصلا ف الحاجت اللى ماكانتش مفروض تكون موجودة

دة ف حد ذاتة اضافة ليكى وللأيام لاجاية

نورت ياقمر

بيس

دعاء مواجهات يقول...

محمد عبدالقوى

ياااة فينك يارااجل من زمان

انا عمالة اجرى جرى ف الردود علشان اوصلك

واقولك انك بقالك بتاع اكتر من شهر ونص مش اسبوعين بس

عموما دا من حسن حظى انك ترد ع كل المواضيع

وعموما عاوز آندو(خد آندووو)

انت تؤمر

___________________________

الاغنية اشكرك ع الاضافة.

__________________--

القصيدة ياعم احنا كاتبينها ساخرة

انما بيع ماهى متباعة دى نووو والف نوووو

_________________--

جيالك على جناح السرعة

سلااام

دعاء مواجهات يقول...

rovy

انا على قدر سعادتى بإعجابك بالموضوع

على اد حزنى على بكائك وانة فكرك بحاجات مؤلمة

ولا يسعنا الا قول

(قدر والله وما شاء فعل)

تحياتى لكى اختى الجميلة

نورتينى

دعاء مواجهات يقول...

desert cat

فكرة بردو ياجميل

ما كانش حد غلط غلطة واحدة خالص

بس معنى كدة ان كل حاجة بتعمليها ف ايامك ملهاش لازمة؟؟

ولا هتعيشى ازاى بدون زكرياات؟؟

سلام

دعاء مواجهات يقول...

دكتور بهدوء

يااة سنتين بحالهم يامفترى

اية دا

وبعدين مش عوزاك ابدا تندم على حاجة كويسة عملتها حتى لو طلع الشخص دة ميستاهلش

انت بتاخد ثواب حسن المعاملة ولانية


يبقى بلااش تضيعة

نورت يادكتورنا

دعاء مواجهات يقول...

- kochia

انا كمان احيان كتير اوى

بقوول اة لو كنت قولت كذا

او عملت كذا

كان يبقى احسن

لكن برج اقول لنفسى بردو

السكوت احيان كتير بيكون افيد من الكلام

نورتنى ياجميل.

دعاء مواجهات يقول...

- نهى العربى

تعليق على قدر غموضة

على قدر عمقة

ونريد مزيدا من التفسير

____________________-

نفسى اعرف انتى بتختفى فين

بجد بتوحشنى تعليقاتك وكلامك

تحياتى ليكى

دعاء مواجهات يقول...

بنت الاسلام

اللهم آمييين

ياارب لكى ولنا جميعا

نورتى
..

دعاء مواجهات يقول...

قلب مصرى


تفسير وتحليل موضوعى جدا لأمر

بجد بشكرك علية

اما حكاية بقى السياسين فدووا كدة كدة بيستخدموة ولكن ف الخفاء طبعا تبع المصلحة مش اكتر

ارائك متميزة وبجد بتسعدننى زياراتك

منورنى

دعاء مواجهات يقول...

- وايت هيرت

بس تعرف

لو كل واحد عندة وايت هيرت بجد

مش هيحتاج الزر دا كتير

نورت

رئـــــيسـة حزب الأحلام يقول...

RRازيك ياجميل
وحشتينى أوى من امنارح بجد من الناس اللى اراحتلهم
واندو موضوع جامد اوى فى فعلا حاجات كتير عايزة نعملها اندو
تحياتى لك يادودو

Abu Shahin يقول...

دعاء

بعيدا عن اسلوبك الجميل ومقالاتك اللى مابتزهقش
بس احب اختلف معاكى
يعنى ايه اوندو
يعنى ايه نتراجع
احنا لو معملناش الغلط عمرنا ماهنعمل الصح
ومش معنى كده اننا نعمل الغلط
لا نعمل اللى مقتنعين بيه تماما
اكتشفت بعد كده انه طلع صح
خير وبركة
اكتشفت بعد كده انه طلع غلط
خير وبركة برضة
لان "الخطأ هو الذى يدفعنا دفعا مؤزرا لعدم العودة له مرة اخرى "

لو كل غلط غلطناه تراجعنا عنه عمرنا ماهنتقدم
الاعتراف بالاخطاء شئ جميل عشان نتعلم منها
حتى زماننا ده
وممدوح اسماعيل
مهما كان جارح فده بيعلمنا اكتر
و بيكسبنا قوة حتى على سبيل حياتنا الشخصية

واللى مانجرحش ف الحب
واللى مانهزمش واللى مادخنش واللى ماصاحبش ناس رزلة
يكون عاش حياة ناقصة
حياة مبتورة

اقبلى اختلافى معاكى
شكرا يا دعاء

محمد فاروق الشاذلى يقول...

أشكرك على ردك على التعليق وسعدت أن تحليلى للأمور قد أعجبك.

Ahmed Kamal يقول...

فكرة حلوة قوي يا دعاء ..

عارفة أنا كنت في فترة مرهق جدا من كثرة الشغل و المشاكل ، و كنت بنام قليل ، و كانت أحلامي أحيانا بتبقى تفكير في المشاكل ، فأصحى ألاقي نفسي لسه في اللي كنت فيه قبل ما أنام ، في الفترة دي جات لي مجموعة أحلام غريبة جدا ، و المشترك فيها إن الحلم كان فيه أندو ، بنفس الشكل اللي انتي وصفتيه ده :)

و بدأت الحكاية دي تعجبني ، و جزء من مغامرة الحلم كانت إني أعمل أندو في الوقت الصح ، و أعمل save في الوقت الصح ، و بعدين أصحى أقول لنفسي كان حقي عملت كذا وكذا . و بدأ الأمر يتطور بشكل خطير ، لأني بقيت بحاول أعمل أندو و أنا صاحي بنفس طريقة الحلم ، و ببقى مضايق جدا لأنها مش شغالة !! و لما وصلت للمرحلة دي أخذت قرار كان سبب في إن الضغوط قلت من علي جدا ، و بقيت مش محتاج أعمل أندو تاني .

إنتي فاكراني زوغت من الإجابة ، مش كده ؟ أبدا و الله أنا جاوبت خلاص ، و علشان أوضح إجابتي أقول لك إحنا ممكن نندم على حاجات كتير بتحصل في حياتنا ، لكن لو ماكانتش حصلت ماكناش حانندم ولا حانتعلم ، أما اللي مالناش يد فيه ، فمش كفاية إننا نكرهه ، لازم كمان نرفضه ، و ربنا إدى لنا وسائل تغيير علشان نستعملها ، نستعملها مع نفسنا و مع مجتمعنا ، لو رفضنا الوسائل دي ، و دورنا على حلم يحقق لنا اللي احنا عايزينه ، الحلم حايقلب كابوس .

أحييكي :)

أبوعبيده يقول...

سلام عليكم
ياااااااه.. سؤال صعب جدا .
والله بجد أنا مش عارف .. انا حاسس أنى متلجم.
يعنى فعلا حاجات كتير كنت أتـمنى أنها متحصلش..
ولما بفكر فيها ألاقى من غيرها كنت هخسر حاجات كتير أوى..
الشر. الحزن. الاخطاء.المصائب..... ألخ
كل شىء له حكمه .. صعب جدا السؤال.
أنا حاسس أنى طماع قوى لدرجه أنى مش عايز أتخلى عن أى شىء عملته صح كان أو غلط..
مش عايز أتخلى عن الصح لأنه صح ومش عايز أتخلى عن الغلط عشان بيحسسنى بطعم الصح..
أنانفسى كل خطأ عملته يمحى ولكن بشرط
ألا تمحى معه كل الخبرات اللى أكتسبتها معاه..
.. ثانيه..
undo موجود بالفعل فى حياتنا بس أحنا اللى مش بنستعمله وبنرفض أن الناس تستعمله..
أنا لو عملت غلط أو جريمه مزريه حتى بالتوبه ربنا سبحانه وتعالى هيغفرها ليه ...والنبى صلى الله عليه وسلم قال ( التائب من الذنب كمن لا ذنب له)
يعنى فى بالفعلundo بس احنا اللى مش بنعمله. ولما حد بيعمله مش بنقبله منه ..ودايما بتكون نظرتناللعاصى التائب أنه مازال عاصياومش هيتغير أبدا وكأنه فى وقاحه الخنزير ولن يطهر أبدا..
وبنتعامل معاه كأرباب وليس كعبيد مثلنا مثله..
قال الشاعر
ومن المأسى والمأسى جمه . قرب الدواء وما اليه وصول.
كالعير فى البيداء يقتلها الظمأ والماء فوق ظهورها محمول...
بالنسبه بقى للخمسه undo معدش ليهم لزمه.. أحنا معانا عدد لا نهائى من undo ..... أن الله يقبل توبه العبد مالم يغرغر..
اللهم تب علينا والمسلمين. آاااامييين

سلاااااااااااام علييييييييييييييكم

دعوة للأمل يقول...

ازيك عاملة اية و الموصوع حلو اوى واكيد الواحد كان غير حاجات كتير اوى فى حياته

السماء الداميه يقول...

نفسى ارجع لما قبل الثانوية العامة

انتى بتتكلمى فى مضوع مهم جدا والله


ويشد بجد ممكن اعرف رايك فى البوست اللى انا منزله جديد على مدونتى

غير معرف يقول...

انسان بدون تناقضات هو ده حلمى انسان بدون عقد ياسلام لو الاندو ده فى حياتنا ارجه بيه لمرحله الطفوله مرحله بنا العقل والفكر واعمل احلى شخصيه سويه من غير عقد بس ياخساره عايزنا نرجع بالزمان قول ل the man ارجع يازمان وده مستحيل

دعاء مواجهات يقول...

رئيسة حزب الأحلام

القلبو عند بعضيها ياسيادة الريس

انتى كمان وحشتينى

كنت نفسى نرغى كتير اوى

بس الظروف بقى

يارب تتكرر تانى ونبقى ع راحتنا اكتر من كدة

كنتى منورة القاعدة

بيس ياقمر..

عروسة ننوسة يقول...

بحيكى على البوست ...وياريت الواحد عنده الاوبشن ده

دعاء مواجهات يقول...

أبو شاهين

اكيد أقبل الإختلاف وبشدة كمان

وأحيك كمان على رأيك

الاختلاف يعنى الحياة

ورأيك يحمل الكثير من العمق والمصداقية مع النفس أنا أؤيدها شخصياً

وهو انك رافض تتنازل عن اى فعل عملتة لأن دة معناة انتقاص خبراتك ومعرفتك

وانا معاك فى كل دة طبعا

وبالمناسبة انا طرحت الموضوع للمناقشة للتعرف اكتر على كل واحد جواة اية وبيفكر ازاى وياترى بيستسهل ولا بيفكر ويصلح غلطة.. مش علشان دى وجهة نظرى الشخصية وكلنا بنتعلم من بعض وانا نفسى اتعلمت من كلامك بجد

تحيااتى ليك

نورتنى

دعاء مواجهات يقول...

قلب مصرى

افتقدناك امباارح جدا

وشبهت ع حد تانى انو يكون انت بجد

من كتر ما كنت نفسى اشووف حضرتك

نورتنى..

دعاء مواجهات يقول...

- أستاذ أحمد كمال

تعليقك لا يحتاج لأدنى رد منى

لأن أى رد هينقص من حكمة وجمال التعليق

والمسج وصلت فعلا ً

تحياتى لشخصكم الجميل

دعاء مواجهات يقول...

أبو عبيدة

اللهم آمين


تحياتى لصدقك

ودى فعلا الاندو الوحيدة المتاحة بحق ف الواقع

تحيااتى ليك

دعاء مواجهات يقول...

دعوة للأمل

مش عارفة لية عندى احساس

انك لسة مكملتيش تعليقك

نورتينى

دعاء مواجهات يقول...

السماء الدامية

اكيد كنت ناوى تزاكر احسن صح

بس كلو الا الثانوية مفيهاش آندو أبدا
متحاولش

هههههههههههههههههه

نورتنى وممكن جدا كمان ويسعدنى..

دعاء مواجهات يقول...

غير معروف

الطفولة مرة واحدة

وكمان ناوى تبنى شخصية سوية

دة معناة انك عارف مناطق الخلل فيك

ومعنى كدة بردو انك تقدر تصلحها ولا اية؟؟

مين حضرتك؟؟

دعاء مواجهات يقول...

عروسة ننوسة

بس مقولتيش هتستخدمية فى اية ؟

نورتى

Unknown يقول...

انا اتاخرت قوى جدا خالص فى قراية الموضوع دة بس عجبنى لما قريته انا شخصيا عندى حاجات بالعبيط نفسى امسحها بس انت بتسالى سؤال صعب يا دودو اكتر حاجة ملحة نفسى امحيها؟؟؟؟
امممممممم اتهاونت فى حقى وماكانش المفروض اتهاون......مش اكتر حاجة ملحة لكن اخر حاجة عايزة استعمل فيها الاوبشن دة

عدنان أحمد يقول...

السلام عليكم

كلامك خلاني اسرح كثيييييير
و كنت بقف عند سؤال سؤال من البوست و افكر

بس انا مقتنع ان اي حد بيعمل حاجة
بتكون من وجهة نظره في وقتها صحيحه و إلا مكنش عملها

بس بصراحه انا نفسي اعمل الموضوع دة و مدخلش كلية التجارة

الحمد لله على كل حال

تحياتي
عدنان

walaa rizk يقول...

يااااااااااه حلو اوى التوبيك ده

دا احنا محتاجين undo

كتييييييير اوى

بس فيه حاجات فعلا الواحد يتمنى يشيلها من قاموس الحياه

بس للأسف مش بتتشال

بس بجد توبيك رائع

اول مره ازور مدونتك

بس بجد الموضوع هايل

دمت بتميز

بنوتة من وسط البلد يقول...

كتبت عن موضوع الاندو ده قبل كده فى خواطر باب (واحد ميكروباص وحياتك) الى عندى:

" كثير ما اتمنى لو تمكنت من عمل الامر Undo للاطباق والحلل عند اتساخها فى المطبخ ..او اذا جرحت اصبعي بسكينة .. او اذا ارتديت ملابسى بالمشقلب .. او اذا اغلقت الباب ونسيت المفتاح بالداخل"


وبالنسبة لباقى الموضوع فكرنى بموضوع تانى كنت كتبته اسمه تعمل ايه لو صحيت النهاردة ولقيت نفسك امبارح وتقريبا كان فيه نفس التساؤلات

يشرفنى لو تشوفيه واسمع رايك
http://kalam-kholasa.blogspot.com/2007/06/blog-post_12.html

اعتذر للاطالة وتحياتى

محمد فاروق الشاذلى يقول...

والله يا أستاذة دعاء أنا كمان إفتقدت وجودى بينكم قوى وكمان كان نفسى أتعرف عليكم جداً لكن ظروفى ملخبة شوية.
إن شاء الله المرة اللى جاية أعرف بدرى شوية علشان أقدر أظبط أمورى.

Empress appy يقول...

انا الالسهل ليه انى اعمل دليت افضل مش بحب الاندو

سعيده انى شوفتك يا دودو

غير معرف يقول...

ياااه افكارك يا دودو فكرة حلوة اوووى انا بقى محتاجة اعمل undo لعشرين سنة اللى غشتهم تقريبا مش بعمل فيهم حاجة تصورى عشرين سنه ومعملتش حاجة عليها القيمة وكمان الاوقات اللى بكون فيها عصبية يعنى كل ما اتعصب اعمل undo انتى بقى لو عندك الاوبشن ده هتعمليى undo لمين ولايه وانتى كمان مش تهربى من السؤال

nigro يقول...

بصي يا دعاء
أنا عن نفسي عاوز اعمل undo خمس مرات بعدد آخر خمس سنين فاتوا من حياتي
مرحلة نهاية الثانوية و بداية الكلية
أعيد فيها حساباتي
و أراجع أفكاري
لأن الحسابات و ألأفكار السابقة ودّتني في داهية من سذاجتها و كمية عدم الإرادة المتشبعة بيها
آخر خمس سنين في حياتي يا دعاء ألا و هم سنين الكلية اللعينة هم -حتى الآن- أسوأ فترة عدت عليا في حياتي و مازلت أعاني منهم حتى اللحظة دي
و أنا السبب في كده
يمكن لو كنت وقتها بنفس تفكيري حالياً كان فيه حاجات كتير اتغيرت
لكن هذا هو ناموس الكون
أن تُخطئ فتتعلم
لله الأمر من قبل و من بعد

-----------------------------
آسف على تأخري في الرد
اصل بمجرد ما خلصت معاكي .. كان معايا شخص آخر على الماسينجر و خلصنا كلام متأخر و كانت دماغي ونّت
-----------------------------


يلا سلام

محمود البدري يقول...

احنا فعلا محتاجين الاوبشن ده

بس على فكره الندم مينفعش

لو محتاجين الاوبشن ده علشان ذنب عملناه فهو فعلا موجود وترجمته في كلمه واحده هي التوبه الصادقه ويرجع الذنب ده حسنه



معلش على التأخير الدنيا تلاهى

يا ريت نشوفي البوست الجديد عندى




MOOOOD

مدحت محمد يقول...

الاندو فى حياتنا هى التوبة

اعتقد ذلك

او الاعتذار لشخص غلطنا فى حقه ولو مقدرناش ندعيله


بس عارفة اصعب حاجة بجد محتاجة اندو

حاجة عملتيها فى حق نفسك

ومش قادرة انتى نفسك تسامحى نفسك عليها

دى بجد فعلا بجد كانت محتاجة اندو

انا لو كانت موجودة كنت هشيل تلت حاجات بالظبط

موناليزا يقول...

ليه الاحراج ده بقى
بس هيفيد بايه والحاجة خلاص حصلت واتسجلت فى سجل حياتك للابد

موناليزا يقول...

ليه الاحراج ده بقى
بس هيفيد بايه والحاجة خلاص حصلت واتسجلت فى سجل حياتك للابد

صيدلانيه طالعه نازله يقول...

جميله قوى ان الواحد يدوس على زرار يقوم ماسح اكتر حاجات وحشه حصلتله
ياااااااااه لو ده حصل انا شخصيا حاجااااااات كتييييييييييييييره قوى حتتغير فى حياتى للاحسن لانى خلاص عرفت الغلط فين و هعرف اصله كويس
ساعتها مش حخلى دقيقه من حياتى تضيع من غير هدف
و حارجع كل مشاريعى القديمه اللى لم اكملها و فشلت و حأحاول انى انجحها

و القادم....أجمل يقول...

بعد الحمدلله على كل شيء

و قدر الله و ما شاء فعل

بس لو محتاجه اعمل undo

يبأه مرات كتييييييييييييييرة جدا
من كلمة و موقف و تصرف و و و و و

و أكتر حاجة اتمنيت اعملها undo

دخولي كلية طب
كان نفسي أدخل اوي صيدلة او هندسة
أو اي حاجة في الجرافيكس

بس الحمدلله و الله
الحمدلله

:)

موضوع جميل يا دعاء
و فعلا مواجهات
:)

دُمت ِ بخير و بسعادة

Mohamed Dawod يقول...

البوست فكرنى بأول مدير ليا اشتغلت معاه فى مصر اول ما اتخرجت واللى اتعلمت منه كتير. كان لسه متعلم كمبيوتر و برامج الأوفيس جديد ومبهور جدا بأمر ال أندو اللى بيخليه يرجع عن اى امر بيعمله وممكن يعمل بيه مصيبه. ومنساش دعوته كل ما نقوله يستخدم الأمر ده يقوم قايل...."الحمد لله الذى جعل لنا أندو".....انا فى حاجه واحده فى حياتى ندمان عليها ونفسى أعملها أندو. "التدخين" ندمان عليه ومش قادر أبطله. كل الناس اللى حواليا بيقولوا انه مش ماشى مع شخصيتى اطلاقا. واى حد بيعرف انى بدخن بستغرب جدا ويقوللى مش باين عليك كأنى طلعت مجنون مثلا. بس مع الأسف خطوه أقدمت عليها مع ضغوط الحياه ومش قادر ابطلها ونفسى مكنتش بدأت فيها.....مش عارف بصدع دماغك بالموضوع ده ليه بس دى فعلا الحاجه الوحيده فى حياتى اللى مندمانى مع انى مبحبش اندم......اسف انى طولت....خالص تحياتى وشكرا

دعاء مواجهات يقول...

لظروف تهييسية هرد ع التعليقات بكرة ان شاء الله اللى هو النهاردة يعنى
بس لما افووق.

ادعوولى..

سلااااااااام

دعـاء عـلى يقول...

أكيد هو أوبشن حلو لو الواحد عايز يرجع عن كام قرار
بس وسط اللى واحد بيشوفه اليومين دول
بيتمنى أوبشن restart
ده بقه عشان لما الكمبيوتر يهنج و الموضوع يجمد و يحلف ما يتحرك
و بما اننا مهنجين من زماااااان و حالنا مجمد و حالف ما يتحرك
يبقى ندعى ربنا .. يا رب يا رب
أوبشن restart
سلاماتى

دعاء مواجهات يقول...

- enjy

دى مدونتك ياقمر

وانتى تيجى وقت ما تحبى

وكويس اننا نعرف قيمة نفسنا

والاهم من المعرفة هو اتخاذ الحذر ف المرات القادمة

تقبلى تحياتى ياقمر


بيس

دعاء مواجهات يقول...

- اسير حبيبتى

كلامك مظبوط والدليل هو ان كل واحد بيكون عاوز يعمل حاجة بيفضل مصمم عليها مهما حد حاول يقنعة

تحياتى ليك

نورت

دعاء مواجهات يقول...

عاشقة الأقصى

اشكرك بشدة

وشئ يسعدنى فعلا ان كلامى يعجبك

نورتينى

اتمنى دوام التواصل

سلاام

دعاء مواجهات يقول...

بنوتة من وسط البلد

نورتينى

انا معجبة بتدويناتك اوى

وفرحت اكتر اما عرفت بتلاقى أفكارنا

تقبلى تحياتى

اتمنى دوام التواصل

دعاء مواجهات يقول...

قلب مصرى

اتمنى ذلك بشدة

تحياتى لشخصك

سلااام

دعاء مواجهات يقول...

appy

حلوة الديلبت بردو

وعميييقة

انا اسعد بجد

انتى عسوولة اوى

بيس ياقمر..

دعاء مواجهات يقول...

nona

يااة للعشرين سنة بحالهم يامفترية

للدرجة دى

لاا بجد الكلمة دى خطيرة ولا زم تلحقى نفسك بجد

_________

بالنسبة ليا بقى هعمل آندو لكل حد دخل حياتى واديتو قيمة واعتبار وماكانش يستحق دة ومقدرنيش

ولكل كلمة قولتها جرحت حد او زعلتوا منى ولكل التصرفات السيئة بشكل عام.

نورت ياقمر..

دعاء مواجهات يقول...

نيجرو

آخر 5 سنين بمعنى انك مكونتش عاوزو تدخل هندسة اصلا ؟؟

ولا تصرفاتك فى الخمس سنين دوول حدد بليز ياباشمهندس ؟؟

طوول براحتك ع الاااخر

منورنى

دعاء مواجهات يقول...

واحد من الناس

صح يامحمود

كلامك انا قولتوا ف رد ع تعليقات قبل كدة

نورتنى

حااول تفتكرنا

بيس

دعاء مواجهات يقول...

مدحت محمد

وياترى اية هما التلات حاجات دوول بقى

اكيد سر صح؟؟

نورتنى

واتفق معاك ف الرأى

تحياتى

دعاء مواجهات يقول...

موناليزا

مجرد التفكير

واعادة الحسابات حاجة فى صالح الانسان

وتفيد ف المستقبل

تحياتى ليكى

نورتينى

دعاء مواجهات يقول...

صيدلانية طالعة نازلة

مادام اللى حصل حصل

يبقى نحافظ ع بكرة

وبكرة اكيد اجمل

نورتينى

بيس

دعاء مواجهات يقول...

والقادم أجمل

اكيد هو عمو مكتب التنسيق دة

انا عارفاة كويس اوى

نورتى ياقمر

وربنا يحققلك كل امانيكى


اتمنى دوام التواصل

سلاام

دعاء مواجهات يقول...

محمد داوود

هى فعلا حاجة سيئة

بس اهم خطوة للتخلص منها هو الارادة والنية والدعاء

وان شاء الله ربنا يعينك بس انت عين نفسك ورمضان فرصة كويسة اوعى تضيعها فى التوقف عن التدخين ..

انا مصدعتش ع فكرة دى مدونتك

وكلامك بيسعدنى

نورت مكانك

سلااام

دعاء مواجهات يقول...

-duaa ali

ههههههههههههههههههه

حلو بردو ريستارت مش بطال

واهو ينفع بردوو

نورت

اتمنى دوام التواصل

سلاام

abo salah يقول...

بعد السلام عليكم

هذا يرجعنا للسؤال الأصعب

هل نحن مخيرين أم مسيرين فى دنيانا ؟

ولو فى اندو بالشكل دا
هنتعب اوى
ومش هنرضى ب 5 ولا حتى ب 100
لأن كل واحد هيبقى عايز يغير حاجات كتير
بس اكيد هيكون فى جانب سلبى للاندو دا
عارفة ليه ؟

لأن وجوده هيخلينا ما نفكرش ولا نستخدم عقلنا فى التدبير والتفكير طالما اى غلط سهل نرجع فيه .. يعني همكون زى الألات

بالنسبة ليا مش عارف والله كنت هاستخدم ال 5 اندو فى ايه .. لازم اكر بكرة حياتى عشان اشوف انهى اكتر 5 يستاهلوا يتعملوهم اندو
ههههههههههههههههههه

عامة لو البتاع دا نزل الأسواق قوليلي .. مفيش ضرر من التجربة

موضوع جديد ومميز

تحياتى

دعاء مواجهات يقول...

أبو صلاح

فعلا مشكلتة انة هيجمد عقولنا تماما

اكتر ماهى اصلا مجمدة ومستوردة استعمال الخاارج

لما تكر البكرة خللى بالك لا متعرفش تلفها تانى

وابقى قوللى لاقيت اية مستاهل ال5 آندوو

منورنى كعادتك

بيس