السبت، يوليو 12، 2008

الرحلة الحلم



السلام عليكم

إزيكوا جميعاً :

أولا وقبل كل شئ لااازمن أشكر كل الناس الحلوين اللى تابعونى وسألوا عنى كتير وأولهم( نيجرو )باشا والأخت الجميلة الطيوبة( فاتيما) و(واحدة مفروسة) والرائعة رفيقتى فى الرحلة اللى قابلتها خلال وجودة بالمدينة المنورة 3 مرات (جنة) (لو لاكى ياجارتى) إنسانة بجد جميلة اوى ونقية اوى وطيبة زيادة عن اللزوم ربنا يوفقها يارب .. والأخ الجميل (أحمد باشا الصباغ) والجميلة انجى وكاميليا وإبراهيم (برقش) طبعاً والأخت (مجداوية) الرائعة وبرنسيس( بيرى) ونونا العسولة وضياء وكيكى واحمد _k و ( الضاحك الباكى) وهيثم الدهشان وموناليزا وحمامة وميوشة وليكوريكا والبت( وزة أنين الحزن) اللى مصدقتش نفسى لما لاقيتها سايبالى تعليق بعد طوول غيااب و(زوزو) اللى سألت عنى اكتر من مرة و(دعاء) الى إسمها على إسمى ... والأخ العزيز أنس ( صاحب المضيفة) ... وغيرهم كتيير...

وكل اللى رحبوا بيا بعد ما جيت
دكتور بهدوء طبعا و(وزة تانى) والشنكوتى الكبير ومى (مدينة الملائكة) وخالد (همس الأحباب) وإيما و (طارق مؤمن) وبرقش طبعا) والواد أخويا الصغير(أسامة شمو نشادر) وضياء و(أجندا حمرا) وموناليزا تاانى وقمر حياتى (فاتيما) طبعاً و( بلو وويف) وعلاء (عايش ولكن)...

إوعوا حسكوا عينكوا أكون نسيت حد..
محدش يزعل لو إسمة مش مكتوب أنا اصلى لسانى مش مركزة اوى بردوو
...

نيجى بقى للبوست ذات نفسة ...


أنا هقسمة جزئين الأول عن الفترة اللى قضيتها فى( المدينة المنورة) والتانى عن الفترة اللى قضيتها فى (مكة المكرمة) ... وإنطباعاتى بقى وإحساساتى والذى منو ...

(مش عارفة لية عندى إحساس إنى محتاجة سلسلة من البوستات للحديث عن الرحلة وعماله أفكر كتير اوى أكتب إية وأطنش إية؟؟؟ سؤال صعب بردوو...
اقولكوا حاجة أنا هكتب دلوقتى الحاجات اللى ملحة اوى وبعد كدة على فترات لو مش يضايقكوا هبقى اتكلم عن باقى الحاجات ... )

الأسبوع الأول: ( بالمدينة المنورة)

راحة كبيرة وإحساس بالسلام النفسى منذ اللحظة الأولى لوصولى إليها وإحساس بالأمان ربما لاأشعرة فى بعض الأماكن بمصر نفسها أول مرة أحس بالأمان وأنا خارجة وحدى فجراً - ذهاباً للحرم - وجيوبى خاوية تماما من النقود وربما أيضاً اشعر بلا قيمتها ولا جدواها ولا أهميتها لى فأنا فعلاً أشعر بالأمان التام ولا ينقصنى شئ ...

الناس بالمدينة بهم البعض من طيبة الأنصار وأخلاقهم الطيبة فكم أشعر بالسعادة أثناء عبورى للطريق فتتوقف لى سيارة كانت على وشك العبور وينتظرنى ويصر على أن أمر أولاً ولا يتحرك إلا بعد ان أعبر الطريق (حصلتلى كتير اوى الحكاية دى وشوية فى مكة بردو بس مش كلهم ) وأقعد افتكر بقى إن دا لو فى (مصر) عمرة فى حياتة ما كان يعملها ولو على رقبتة دة كان هيطير بسيارتة الفارهة طبعاً ولا يسأل فيا وكم من مرات لاتحصى تعرضت لذلك لدرجة إنى


دلوقتى أصبت بالغرور ومش عاوزة أعبر طريق هنا تانى وأحس بإحساس الناس الى بتدووس على غيرها والمحاولات المستميتة لعبور الطريق جريا خوفاً من السرعة الجنونية التى لاتوقفها إمرأة تعبر ولا مٌسن يسير هوناً ...
والناس بالمدينة بردو قابلين للحوار والنقاش عادى يعنى.. عكس الكثيرين بمكة ..

وزى ما فية ناس جميلة كدة فى المدينة فية ناس بردو بينظروا ليك على إنك فريسة سهلة أو بمعنى آخر سهل إقامة صحوبية معاكى مثلاً لأنك مصرية ومتفتحة وكدة يعنى ومش بتفرق معاكى الحاجات دى ...


وفية اللى كل حياتة أغانى وحب للمطربين المصريين لدرجة إن واحد بيسألنى فى السنترال: انتى شوفتى شرين قبل كدة؟ قولتلوا : لأ
قاللى : أنا أحبها جدا وأحتفظ بكل صورها وأغانيها وكليباتها على جوالى يقول ذلك عارضاً على صور لشرين على هاتفة المحمول ويقولى شوفى كل هدا (شرين أحمد) قولتلوا دا إسمها شرين عبد الوهاب
قاللى: لا إسمها شرين احمد عبدالوهاب .
قولتلوا: ف سرى والنبى ياخويا اول مرة اعرف .
قاللى إذا شوفتيها بالشارع قوليلها فى واحد ف السعودية بيحبك موت .. بتاع ستنرال .. يقولها ضاحكاً
قولتلوا: ماشى إن شاء الله .. ( وأنا ف سرى بقول هو انت فاكر دول بيمشوا ف الشوارع كدة دا انت متعرفش حاجة بقى) ولا شكلوا ميعرفش إنها سافرت تولد ف أمريكا علشان البنت تاخد الجنسية من هناك ولا يكون فاكرنى هروح أزورها ف أمريكا وأنقطها هناك .)

ملحوظة بقى : الشاب دة سنترالة لا يبعد 300 متر عن الحرم النبوى الشريف.. (ولا تعليق)

مش قادرة أقولكوا طبعاً الجو كان أد إية صعب بكل ماتحملة الكلمة من معانى لدرجة أنى لم أستطع كشف وجهى أصلاً فى المناطق المشمسة (لا ملبستش نقاب انا غطيتة بالطرحة بس)
ولا قادرة أقولكوا بردو عن( دور البرد) المتين اللى جالى بعد يومين من وجودى بالمدينة
وكم المعاناة من تغيير الجو من بارد بالفندق لنااااار بالشارع لبارد مرة أخرى بالحرم ...وهكذا... لذا فقد كان هذا البرد أقل واجب طبعاً .
(بس عادى والله صدقونى الواحد مكانش بيحط فى بالوا المهم الواحد يعمل اللى جه للمكان دا من أجلة أهم حاجة الصلاة وقراءة القرآن والدعاء وبس)

وهكذا سار الأسبوع الأول مابين ذهاب وإياب للحرم لصلاة جميع الفروض والمكوث بالحرم لقراءة القرآن والدعاء ومابين بعض المشاوير الليلية بعد صلاة العشاء - للتسوق والذى منو -
(كم هو جميل ورائع أن تتحول حياتك ومواعيدك إلى قبل الصلاة وبعد الصلاة فأهم شئ هو فقط الصلاة ليس سواها ) جميل أوى بجد .

والحدث الأكثر سعادة لقلبى
الذى إنتظرتة بشغف ... لقائى بالأخت الجميلة (جنة) صاحبة مدونة ( لولاكى ياجارتى)
كم هى طيبة وحنونة وهادئة وجدعة وطفلة رائعة البراءة بالغة الرقة والرومانسية ....
عاوزة أقولها بجد إنتى جميلة أوى .. إتكلمنا فى حاجت كتيير وكل شوية تقوللى يادودو إنتى آخرك إعدادية ولا 2 ثانوى مش عارفة لية يعنى وأنا اقولها مش للدرجة دى يادكتور ....

زورت( الروضة الشريفة) 3 مرات ودعيت هناك ادعية كتيير أتمنى ربنا يقبلها منى
بس الشئ اللى بيقلل من الخشوع الزحام الرهييب ..

وإنتهى الأسبوع الأول بهدوء شديد دون سابق إنذار ورغم أنة كان أسبوع ربنا مِبارِك فية وفى أوقاتة إلا بردو إننا كنا عاوزين نقعد أكتر فى ( المدينة المنورة )..

وبعد المدينة ب15 دقيقة وفى طريقتنا (لمكة المكرمة) وصلنا لميقات الإحرام (أبيار على)
لنحرم لأداء العمرة ولنبدأ الطريق الطويييل جداً لمكة المكرمة 6 ساعات فى الطريق من أصعب ما يمكن إلا إن بردو ربنا بيعين ويهون علينا ..


الأسبوع الثانى: ( بمكة المكرمة )

وصلنا للفتدق لنضع (الباجز) ثم ننزل متجهين للحرم لأداء العمرة بعد صلاة العشاء مباشرة ً
وأكرمنى الله عز وجل بتقبيل (الحجر الأسود) وهو مالم يستطع أحد إخوتى فعلة نظراً للزحام المريع الذى إكتشفنا بعد مرور 3 أيام أنة ليس مريع ولا حاجة وفية اللى هو أريع منة حيث هجمت الأفواج الإيرانية لأداء العمرة وكنت نفسى أسألهم سؤال واحد مين اللى سابوة ف البلد يحرسها؟؟؟

ولست فى حاجة لكى أصف لكم الإنتشار الصحى للمصريين بالمملكة السعودية سواء فى المدينة او فى مكة فموظف الريسبشن مصرى وسائق التاكسى مصرى وبائع الموبايلات مصرى والكاشير مصرى والصيدلى مصرى وبائع الأيس كريم مصرى هذا بغض النظر تماماً عن أفواج المعتمرين المصريين اللذين تعرفهم من على بعد 50 متر .
كما أن هذا أيضاً بخلاف العديد من الأقارب والمعارف اللى قابلناهم هناك فى إطار الأسرة والجيران لدرجة بقى خلتنى أجزم بل وأبصم بالعشرة إنى مش فى الغربة .. أنا ف بلدى..

لدرجة جعلتنى أشعر معها أنى لم أخرج من مصر أصلا ً( وطبعاً دة إحساس جميل جدا ً جداً)
ولا محكيلكوش بقى عن محلات الفول والطعمية هناك وإنتشارها – عاملة شغل جاامد جداً –
حسيت بقى ساعتها انى ماشية ف السيدة زينب مثلا ً....
ولا خفة دم المصريين أثناء أداء مناسك العمرة وفى الطواف حول الكعبة 2 أصحاب او اخوات بيطوفوا مع بعض – هو المفروض لما بنوصل عن الجانب الأيمن للكعبة نلمسة بأيدينا ومرة واحدة تكفى - دوول بقى الأول بيقوول للتانى ياعم عديها المرة دى مش شرط كل لفة يعنى ولا كأنهم بيلفوا بالعجلة على شط مارينا ....

حاجات بقى كانت بتضايقنى هناك الناس اللى مش مراعية حرمة وقدسية المكان وسايبة موبايلاتها مفتوحة والنغمة شغالة والنغمات أغانى خليعة كمان داخل الحرم وأثناء التوجة لزيارة الروضة الشريفة والله لا وكمان بيردوا ويتكلموا ويرغوا ولا كأنهم واقفين فى بلكونة مطبخ أم إبراهيم..
فى دى بقى مش المصريين بس لأ وكمان باقى الجنسيات .. وكلو كوم بقى واللى بيطوفوا وبيتواصلوا بالموبايل أثناء الطواف دوول كوم تانى ...

كمان الأطفال كتروا أوى زيادة عن اللزوم وأهلهم سايبينهم يجروا ويلعبوا ولا كأنهم فى بلكونة مطبخ أم إبراهيم بردو ..

حاجة بقى أخيرة غاظتنى أوى مش بيخلوا الستات تجلس أمام الكعبة فى ساحتها وبيقعدوا يهشوهم زى الفراخ بالظبط لورا لورا لدرجة إنى كنت هتخانق مع الحارس بس هو طلع عاقل ومزودش معايا .. وكمان مش بيدوهم فرصة لتقبيل الحجر الأسود والوقوف بالملتزم مثل الرجال .. مش عارفة لية التفرقة ولية ميعملوش أوقات للنساء حتى...؟؟


إحساس قوى إنتابنى ومازال ينتابنى بإنى هرجع لهناك تانى ولازم أعمل عمرة مرات ومرات بجد ياجماعة فرصة مش لازم أى حد تتاح لية إنة يفرط فيها أو ميسعاش لتحقيقها فى شبابة ..

( النظر( للكعبة المشرفة) متعة لايعرفها إلا من ذاق حلاوة وجمال لحظتها فقط تشعر بالتضاؤل والعظمة لله الواحد القهار والمغفرة والرحمة وحب الله لك بأن تفضل عليك ونولك هذة اللحظة - كتبها الله لكم جميعا ً)

وأخيراً بقى ياجماعة معلشى رغيت كتيير إحنا إتفقنا إنكوا هتستحملونى بقى ولا إيية؟؟

( ياارب ياارب يكتب لكم جميعاً حج بيتة الحرام وزيارة رسوله صلى الله علية وسلم )

إنتظروا قريبا ً المفاجآت المتوالية ....

والسلام عليكم ورحمة الله..

هناك 136 تعليقًا:

mostafa rayan يقول...
أزال المؤلف هذا التعليق.
mostafa rayan يقول...

انا اول تعليق علي هذا البوست الرائع- يكفي انه عن الأراضي المقدسة -يس ياريت تكوني افتكرتيني في الدعاء .. ربنا يتقبل منك ويرزقك عمرات كثيرة وحجات كثيرة ايضا
انتي وانا وكل انسان متشوق ومحب .. مرة اخري يا صديقتي الجميلة مبروك الزيارة .. بارك الله فيكي وتقبل منك

Ehab يقول...

ياااااااااه ربنا يتقبل منك يارب
بجد كلامك جميل قوي عن مكان اقل ما يوصف بيه هو جماله
اشتقت قوي اني اعملها انا كمان
ربنا يكرمنا جميعا بيها
اتمنى ربنا يقدرني بعد زواجي اول سفريه لينا انا وزوجتي اننا نعمل عمره ربنا يكرمنا بيها يارب

المدينه اهلها معروف عنهم انهم اطيب كتير عن المكيين ربنا يسعد ايامك
سلااااااااااااااااااااااااام

Mafrousa يقول...

حمدا لله على سلامتك
ربنا يتقبل
ويوعد الجميع بالزيارة

HERO يقول...

اولا حمد الله على سلامتك
ثانيا يا بختك فعلا شكلك مبسوطة جدا من العمرة دي اللهم لا حسد يعني وربنا يوفقك وتحجي ان شاء الله وتدعيلنا بقى علشان انتي بقيتي بركة
وفعلا الواحد نفسه يحج او يعمل عمرة والله وهو لسة شباب علشان يستمتع بيها
وحمد الله على السلامة مرة تانية
وملحوظة صغيرة انا بقف للناس كتير في الشارع علشان تعدي والله لدرجة اني على وشك اني اتخبط من ورا مرة هههههههه

تحياتي

Empress appy يقول...

حمد لله على السلامه ويا حبيبتى انا حطاكى على الريدر يعنى اول ما هتكتبى حاجه هعرف انك وصلتى بالسلامه وحشتينى خالص وربنا يرزقك ويرزقنا احنا كمان رحله تانيه وتالته ورابعه وربنا يتقبل منك

اسلام الحضرى يقول...

حمد لله على سلامتك اخت دعاء
وان شاء الله ربنا يتقبل منك

غير معرف يقول...

حمد الله على السلامة هلا هلا بيكى فى مصر وحشتينى اوووى ووحشتنى موضوعاتك ويتقبل الله منك ويكتبها لكل الناس وصفك للرحلة جميل جدااا وانتى قلب زى قلوب الخس بالظبط ربنا يزيدك من الايمان حسيت اووى بكلامك وانا نفسى اطلع عمرة بس بابا قالى لما تجيبى امتياز وده بقى المستحيل بعينه وقررت لما اججى اتجوز ابتدى حياتى برحلة عمرة علشان مع اللى هتجوزه علشان ربنا يوفقنا ويوفقك كمان انك تروحى تانى ومستنين المفاجات ومش تتاخرى علينا

صاحب المضيفة يقول...

أولا حمد لله على السلامة وعمرة مقبولة يارب


ثانيا : أان زعلان ان اسمي مش موجود في لوحة الشرف هنا لكن ملحوقة.


ثالثا : انتي بجد فكرتيني بالذي مضى بجد

انا قضيت من عمري سنين في السعودية كانت زيارة الحرمين شيء اساسي في حياتنا ومس متخيلة كم المشاعر الرهيبة اللي بتجي للواحد كل ما يشوف حد بيتكلم عن الموضوع ده


ربنا يكتبها لنا تاني وتالت ورابع ومية يارب


وعمرة مقبولة يارب ومش تكوني نسيتيني أنس المنوفي في الروضة الشريفة زي ما طلبت منك

zOzO يقول...

حمد لله ع السلامه
والحمد لله انك حققتي حلمك ده
وان شاء الله هتعيديها تاني وتالت ومليون مره ان شاء الله
ربنا يبارك فيكي يارب
بس رحله واضح من كلامك انها كانت حلوه اوي
وميرسي لدعائك
وانك افتكرتي تقولي اسمي
ع فكره انا نجحت
الحمد لله
بجد الحمد لله
بابا فرحان اوي
تحياتي ليكي
ويارب تكون كويسه

Unknown يقول...

حمد الله على السلامة يا دودو يا حبيبتى ليكى وحشة والله وصفك حلو جدا يا دودو انا نفسى قوى ازور الروضة الشريفة اوى اوى بجد امبارح لما كلمتك فى التليفون بعد ما قفلت قلت ايه دة دى قبل ما تسافر سالتنى ادعى لك بايه وانا نسيت اقولها تسلم لى على النبى عليه الصلاة والسلام والله يا دودو نفسى اروح واسلم عليه جدا ......... عارفة انا ماكنتش حاسة انى عايزة اروح قوى غير مرتين فى حياتى ايام برنامج على خطى الحبيب ودلوقتى وانا باقرا كلامك ...........
ان شاء الله تروحى تانى يا دودو وعلى فكرة مش هنزهق من حكاياتك لانى اساسا كنت هاقترح عليكى تعملى سلسلة زى دى بس انت طبعا يا جميل ذكى ومش محتاج اقتراحات...............
ايه دة طولت عليكى باى بقى

رئـــــيسـة حزب الأحلام يقول...

حمد الله على السلامه ياقمر
وربنا يتقبل منك
اوعى تكونى نسيتى تدعى لاخواتك
دمتى بكل خير

همس الاحباب يقول...

حمدلله على السلامة اولا
وعمرة مقبولة ان شاء الله
وربنا يكرمك بالحج والعمرة مرات ومرات
ويكرمنا بزيارة قبر حبيبه المصطفى صلى الله عليه وسلم ويوعدنا وجميع المسلمين بزيارة بيته الحرام
نورتى المدونة يا دودو
وحمدلله على السلامة

مدحت محمد يقول...

دعاء جسمى قشعر والله

وخلتينى دمعت

عارفة انا من اربع سنين طلعت عمرة فى شهر رجب وكانت ايام جميلة للغاية

يارب يتقبل منك يارب

وتكرريها اكتر من مرة ان شاء الله

ليكوريكا يقول...

يارب يا دعاء

بجد وصفك زود شوقنا اوووووووووي للحرم

يارب تكوني راجعالنا من غير ذنوووووووووووب خالص

واتمني برضو كلنا نحج بيت الله الحرام ونتم اسلامنا باذن الله

مستنيين باقي الحكايات

وطوللي براحتك ... كفايه روح الكعبه اللي حاسينها فكلامك

ليكوريكا

Mero.. يقول...

حمد الله ع السلامة
يا سلاااااااااااااااااام فكرتي الواحد باحلى ايام حياته
ربنا يتقبل منك ويكتبهالك تاني وتالت ورابع..
بس اوعي تكوني نسيتي تدعيلي !!!
حمد الله ع السلامة كمان مرة .. :) :) :)

Mero.. يقول...
أزال المؤلف هذا التعليق.
Gannah يقول...

دودو الجميلة
حمدا لله على سلامتك ولو انى كان نفسى تقعدى شوية كمان
بس ايه اللى انتى كاتباه عنى ده ...انا برضه كده ده بس من كرم أخلاقك
وبعدين اعمل ايه مش انتى اللى شكلك صغنونة وامورة كده النهاردة قعدت على سلم الحرم واقول فينك يا دودو وحشتينى
شوقتينى جدا لزيارة الكعبة والقعدة قدامها...ادعيلى اطلع عمرة قبل ما ارجع
انا مستنية الباقى
وصحيح كلامك عن اهل المدينة طيبيين وفيهم الخير
يارب تتكرر الزيارة كمان وكمان
ارجو ابلاغ تحياتى لكل اسرتك
انى احبك فى الله
تحياتى
نسيت بيس يا دودو

نعكشة يقول...

:(

انا نفسي اعمل عمرة انا كمان :(

يارب ربنا يكون تقبلها منك يا رب
و يكرمك بالمزيد
وتحجي و تعتمري تاني كمان

دمتي سالمة وا لف حمد الله علي سلامتك

سلامٌ عليكي

كيكى عوووووو يقول...

عوووووووووووووووووووووو انا جيت اتخديتى
............................
انا كنت جاية اقولك انك واحشنىىىىىىىىىىىىى بجد موووووووووووت
بس لقيت البوست العسل دة.....
.....................ياااااااااااااااة يا بختك بجد وربنا ينولها لينا
..............................
يا ريتنى كنت معاكى بجد....
شوقيتنى مووووووووووووووت
.............................
حبيبتى ربنا يتقبلها منك ويااارب ننولها كلنا
..........................
والله العظيم مش عاااارفة لية يا بنت الذين انتى واحشنىىىىىىىىىى بجد موووووووووووت.
اكبررررررررررررررررر
امواااااااااااااااااة
فى العالم
.........................
جبتيلى الجلباية والطقاقية ولا لسة..
هموتك و احط فى بقك شطة لو نسيتى
...........................
بيس يا حبى
عوووووووووووووووووووووووو

عبده الرايق يقول...

حمدا لله على السلامه يا دعاء
وعمره مقبوله انشاء الله

blue-wave يقول...

شوقتينا للزيارة دى يا دعاء
ربنا يكرمك

wael يقول...

بصي بجد انا عشت جو اخر مع هذا البوست ممكن اكون مكنتش مركز خالص في الكلام كل اللي كان قدامي الكعبه بجد انا هموت وربنا يكتبلي زياره لمكه والمدينه
نفسي في المدينه اكتر
انا عملت امتر من 25 عمره في حياتي عشان انا كنت عايش في السعوديه بس بجد هموت وازورها تاني
بجد يابختك ويارب يكون تقبل منك ان شاء الله

maiosha يقول...

دودو
حمدلله على السلامة يا جميل

والله مش عارفة أقولك غيه غير يا بختك .. وصفك بس حسسنى إنى هناك .. نفسى أروح هناك وأبص بس بصة للكعبة قبل ما اموت

ربنا يتقبل منعك يا دعاء إن شاء الله
ويكتبلك عمرة وحج كمان إن شاء الله

بس نكون مع بعض بقى

Mahmoud البطراوى يقول...

ربنا يتقبل منك يااااااااااارب
ويكتبها لينا

عمرو الطاروطي يقول...

بت يا دؤدؤ
فين السبحة اللي قلتلك عليها
عمالة تحكيلنا ع الاجواء الروحانية والناس والمش عارف ايه

ومش واخدة بالك ان فيه ناس مستنية حاجات تانية غير ذكرياتك اليومين دول
على فكرة
ممكن تثبتيني
وتقوليلي
دعيتلك ربنا يفك عقدتك
ساعتها ممكن استنى ع الهدية
بس للحج ان شاء الله
قشطات
بيس

ahmed_k يقول...

حمدا لله علي السلامه يا دعاء
وربنا يتقبل منك صالح الأعمال والدعوات

أنا والحمد لله ربنا أكرمني وعملت 11 عمره وزياره للمدينه المنوره
وفي كل مره كنت بأشعر باحساس الزائر للمرة الأولي من حيث الرهبه والمتعه بالجو الأيماني في حما الحرمين الشريفين
ربنا يكرمنا جميعا ونعود الي تلك البقاع الطاهره مرات ومرات

ودمتي بكل خيييير

!!! عارفة ... مش عارف ليه يقول...

حمد لله على السلامة يا دعاء

عمرة مقبولة إن شاء الله

فعلا ملاحظتك عن اهل المدينة حقيقية
وإنهم اكثر طيبة من أهل مكة

وإن شاء الله المرة الجاية حج بإذن الله
ربنا يتقبل منك إن شاء الله

تحياتي
وليد

Unknown يقول...

السلام عليكم ورحمة الله وبركاته
جبت الفايدة من اول كلمة وهى ان (الرحلة دى فعلآ حلم) وما تصحى منه للأسف الا بعد ماتكونى تركتى المكان وتقعدى تسألى نفسك هو انا رحت صحيح؟ ولا كنت فى حلم؟
حلم جميل ربنا يوعدنا به مرة تانية وتالته ورابعة ولا نهائى من المرات ويتقبل منا ومنك ومن كل من زار يارب
ويوعد اللى مارحوش وينولها لهم.
امين يارب العالمين
زيارتى كانت قبلك (بشوية سنوات)والحمد لله سعدت بالجلوس بقرب الكعبة والصلاة امامها(فى الفجر وما قبل لفجر!!!!) ولكن فى اخر ايام الزيارة مُنعت النساء من الاقتراب
اما زيارة الروضة الشريفة فالحمد لله تمت لكن ايضآ الزحام الشديد ودفع النساء لبعضهن البعض قلل من المتعة للاسف الشديد.
سعدت بالزيارة الكريمة لمكة والمدينة
وها انا اسعد لاجدد الاحساس بها فى بوستك هذا فجزاكى الله خير الجزاء
وشكرآآآآآآآآآآآآآآآآآآآآآآآ

Diyaa' يقول...

آمين...عجبني حكيك أوي
ووصفك للي بيحصل هناك بيثبت
إن كتير أوي بيعملوا العمرة أو الحج بشكل روتيني ومجرد اسمه راح هناك ومش حاسين بقيمة أو بقدسية المكان

وربنا يكتبهالك تاني :)
والمرة الجاية يدولك فرصة ومش يهشوكم لول

المهم..حمد الله بالسلامة تاني وربنا يتقبل
ومش مشكلة دور البرد المهم إنك كنتي هناك
سلام

قوس قزح يقول...

حمدلله على السلامة
عمرة مقبولة ان شاء الله
و الحمدلله انك اتبسطى هناك
و سبحان الله اللى عايش هناك مش حاسس بالنعمة اللى هو فيها
و تلاقيهم بيقولوا يا بختكم انتم ساكنين جنب الحسين و لا السيدة نفيسة
و هم ساكنين جنب الرسول


ربنا يتقبل منك دعاءك ان شاء الله و يرزقنا كلنا بالعمرة او الحج

نشأت العمده يقول...

الف مبروك العمره والعوده يا دودو
كنتى وحشاناو الله من زمان اوى كل ما اجى ادخل على المدونه افتكر انك فى عمره واول ما شفت البوسط على الاميل فرحت صراحه
وصراحه البزست ده من كتر الى فيه مش عارف اعلق على ولا ايه هو اساسا عاوز كام بوسط علشان نعلق عليه
ومبروك العمره وعوده جديده ممتازه ان شاء الله

الطائر الحزين يقول...

تقبل الله منك

عمرة مقبولة ان شاء الله

وياريت تكونى تذكرت الدعاء بظهر الغيب

بارك الله فيك

فعلا حلم وصفاء غير عادى

سنووايت يقول...

الله يا دعاء عليكي

اولا حمدلله علي السلامة
بجد وحشتيني ووحشتني موضوعاتك وافتقدتها
واوعي تكوني نسيتي تدعيلي هناك :(

بس بجد الحمدلله علي العمرة وربنا يتقبلها منك ياااااااااااارب ويغفر لك بها كل ما تقدم من ذنبك يارب
ويرزقنا بالمثل
والمرة الجاية بقي تكون حج ان شاء الله يا دودو

حمدلله علي سلامتك وعودتك لارض الوطن :)

Mohamed Hesham Safa يقول...

فعلا يمكن من أحلى الحاجات اللي في السعودية انك ما بتحسش بغربة لأن المصريين هناك كتير جدا وفي كل مكان المدرسين والمهندسين والدكاترة والتجار وكله ... انا كنت في جدة كتير أحس اننا في مصر حتى اسامي المحلات (شبرا - الهرم) وكنت بجيب لب وسوداني من محل اسمه (تسالي القاهرة) يعني العملية كانت عادية جدا ...
ومرواح مكة كان سهل ... يدوب ساعة ونص بالعربية ... المدينة اللي كانت بعيدة شوية ... انما دلوقتي لازم تأشيرة ومش عارف ايه وحوارات يا جدع ..


ربنا يتقبل منك ...

والسـ ختام ــلام

tarek momen يقول...

عمرة مقبولة ان شاء الله
وطولي براحتك في الكلام علشان ترجعي لنا الذكريات الجميلة و تشوقي اللي لسه ربنا لم يكتب له الزيارة لان الشوق مطلوب

دعاء مواجهات يقول...

- مصطفى ريان

يشرفنى بجد انك اول تعليق

وبجد منسيتكش يامصطفى وكل حاجة قولتلى عليها دعيتها

وبجد ميرسى اوى على التحديثات الجميلة اللى انت عملتها بمناسبة رجوعى والبوست دة

سلااام

دعاء مواجهات يقول...

الشنكوتى الكبير

آآمين ياارب ياإيهاب

وعقبالك كدة ياارب وبجد احلى حاجة ممكن يبدأ بيها إتنين حياتهم الجديدة هى الطاعة ومفيش اجمل من طاعة العمرة

وفقك الله اليها

تحيااتى

دعاء مواجهات يقول...

مفروسة

الله يسلمك ياجميل

انا منسيتش دعوتك ع فكرة خاالص

ويوعدك بيها ياارب

سلاام

دعاء مواجهات يقول...

hero-

ههههههههههههههههه

حلوة بقيت بركة دى

يسمع منك ربنا ياارب

ربنا يكرمك انك بتعمل اعتبار للناس مش زى كتير تانييين

منورنى كعادتك

دعاء مواجهات يقول...

- آبى

الله يسلمك ياقمر

ياباشا احنا كنا بنهزرو

مش جد يعنى

انا بس بحب حبايبى ينورونى ديما ف وجودى وغيابى

سلاام ياقمر

دعاء مواجهات يقول...

- إسلام الحضرى


الله يسلمك ياإسلام

وعقبالك ياارب

نورت

دعاء مواجهات يقول...

- nona

ربنا يخليكى ليا ياجميل

بجد انا كمان كنت مفتقداكم جدا

لدرجة انى كنت بحلم بيكوا كلكوا فعلا

ربنا يكتبلك العمرة ياارب

اوعى تنازلى عن الحلم الجميل دة

سلاام ياقمرة

دعاء مواجهات يقول...

صاحب المضيفة

لا طبعا انا دعيتلك

ربنا قدرنى وافتكرتك

اصل تعرف مهما الواحد قاال انة هيعمل مفيش غير اللى ربنا قدرة بس اللى هيحصل فعلا

وانا الحمد لله افتكرتك

ربنا يقويك ع اللى انت فية

حاوول تهرب اسبوعين وترووح تعمل عمرة

سلااام

دعاء مواجهات يقول...

زوزو

الف مليوون مبروووووووووك

فين يابنتى الكاكولا ولا هتاكليها علينا

ربنا ياارب يجعل ايامك ديما خير وفرح ونجااح

سلااام ياقمر

دعاء مواجهات يقول...

- إنجى

ياجميل دى مدونتك وتطول براحتك

وبجد انا فرحانة اوى ان كلامى شوقك

انك تعملى عمرة

وانا عرفت وانا هناك ان مفيش حاجة اسمها حد يسلم لحد ع( الرسول صلى الله علية وسلم)

لإنك بمجرد نطقك لكلمة السلام بيوصل بالفعل

ويااااااااارب يكتبهالك ياجميل ياارب

انتى وكل شاب مسلم ومسلمة

ياااارب

دعاء مواجهات يقول...

رئيسة حزب الأحلام

لا ياقمر متقلقيش منسيتش

الحمد لله لأنى كتبت كل الدعوات ف ورقة واخدتها معايا وكمان دعيتها بعد ما ختمت قراءة القران أمام الكعبة المشرفة

وحشتينى اوى

سلاام

دعاء مواجهات يقول...

همس الأحباب

أولا الله يسلمك

ثانيا الهم آمين آمين آمين

تقبل الله دعائك يارب وأعانك على ما انت فية

تحياتى لهمووسة..

دعاء مواجهات يقول...

مدحت محمد

انا كمان اول عمرة طلعتها كانت من اربع سنين وكمان فى شهر رجب وكان ساعتها موافق شهر 8 ودى التانية

يعنى كنا هناك مع بعض ف نفس الوقت بس الواحد ساعتها بقى كان بردو مش مدرك ولا فاهم اوى

والحمد لله فهمنا وحسينا

ونتمنى انا نرزق بها مراات ومراات

اللهم آمييين

تحيااتى لييك

دعاء مواجهات يقول...

ليكو ريكا

ربنا يسمع منك ياارب ياليكو

ويرزقك بيها

وبجد انتم شجعتونى انى اكتب كمان بوست عن الرحلة

واتمنى يعجبكم ياارب

نورتنى

دعاء مواجهات يقول...

- ميرو

الله يسلمك يامراد

لا الحمد لله منسيتش

بأمارة انك كنت عاوز ربنا يحققلك اللى ف بالك

صح؟؟

يارب يتقبل منى الدعوات


منورنى

دعاء مواجهات يقول...

- جنة

ازيك يارووح قلبى

يااة فكرتينى لما كنا قاعدين نرغى مع بعض وروحت اكلم ماما ورجعتلك جرى

وانتى فاكرة ليلتها اية اللى جرى طبعا

هههههههههههههههههههههههههههه

ياارب تتكرر تاانى يارب ونشووف بعض اكتر كمان


يوصل السلاام

بيس منك زى العسسسل بجد..

دعاء مواجهات يقول...

نعكشة

ربنا يحققلك امنيتك ياارب

المهم تسعى لتحقيقها ومش تشيليها من تفكيرك ابدا

وكمان تخليها هدف امامك

نورتى ياقمر

الله يسلمك...

دعاء مواجهات يقول...

كيكى

اية يابت ياكيكى دة

اية حكاية عوووووووووووو دى

انت اصلك كنتى عفريت واتحولتى ولا اية يابت؟؟؟؟؟؟؟؟؟

الهدية محفوظة بس قوليلى اوديهالك فين

ولا اسيبها ع باب المدونة وانتى تيجى تاخديها احسن؟؟

منورة ياعسولة

دعاء مواجهات يقول...

عبدة الرايق

الله يسلمك ياعبدة باشا ياارب

ويكرمك

بجد والله بفرح لما بشووفك عندى بحس كدة انى مهمة

وانى بقيت من الاعياان


ربنا يرزقك بيها ياارب


سلااام

دعاء مواجهات يقول...

- بلو وويف


صدقنى فعلا عالم جميل

وصفاء وبعد عن الحياة ومشاكلها

ايام ف الجنة

ياارب تكتبلك وتزورها

منورنى

دعاء مواجهات يقول...

وائل

ان شاء الله ربنا هيكتبهالك

مادام الشوق والرغبة موجودين

صمم انت وهتشووف

تحياتى

دعاء مواجهات يقول...

- ميوشة

ياارب ياجميل

بجد متعة لامثيل لها ف الحياة

ياارب يحصل ونتجمع سوا

انتى بجد عسولة اوى

مكالمتك مقدرش اقولك عملت فيا اية بجد

سلاام ياجميل

دعاء مواجهات يقول...

بطوط حبوب

اللهم آميييييييييييين

ياارب

دعاء مواجهات يقول...

- عمرو الطاروطى

فعلا دعيتلك

وياار ب يفكها ويهديك بقى

الهدايا موجودة انت تؤمر

سلاااام

دعاء مواجهات يقول...

أحمد


يارب يا أحمد ياااارب


انا بجد جاية المرة دى وحاسة انى لاااازمن ارجع هناك قريب اوى

سلاااام

دعاء مواجهات يقول...

- وليد

ياارب يكون المرة الجاية حج

بجد بعدها مش هحتاج حاجة من الدنيا

وهتبقى ضربة تمااااااااام

قوول ياارب

دعاء مواجهات يقول...

orahaty

هى أصلا بجد مشاعر مش بتتكرر فى ايامنا كتير

ولااازم نحااول نحتفظ بيها علشان تحمينا وتقوينا وتثبتنا ديما ع الحق


اللهم اميين

نورتينى

دعاء مواجهات يقول...

- ضيااء

جبتها م الآااخر

بيعملوها شكل روتيينى

صح هو كدة بالظبط

ودا طبعا شئ سئ جدا

ربنا ما يكتبوا لحد فينا

نورت

دعاء مواجهات يقول...

- قوس قزح

صح فعلا هو كدة بالظبط

اللىف مكة او المدينة مش بيروحوا الحرم كتير فعلا

دا قلما جدا جدا للأسف

بيقولوا يعنى انهم ف اى وقت هيحتاجوا يروحوا هيروحوا

مش عارفة اية المنطق بالظبط

تحياتى ليكى ياجميل

وياارب ترووحى قريب..

دعاء مواجهات يقول...

عاوز حقى

طبعا لااازم تعلق على كل حاجة علقت معاك ف البوست وتقول كل الى فنفسك كمان


نورتنى

دعاء مواجهات يقول...

الطائر الحزين

الحمد لله تذكرت

ودعيت لكل المسلمين

ولمصر وشبابها

وربنا يتقبل ياارب

دعاء مواجهات يقول...

- سنو وايت

الله يسلمك ياقمر

الحمد لله دعيت دعوات جامعة شاملة علشان منساش حد خاالص


وياارب يتقبل دعائك

افتقدتك كتيير

دعاء مواجهات يقول...

محمد هشام

دا فية احياء كمان باكملها مصريين

ولوازمهم يعنى اكل مصرى وشرب مصرى

الانتشاار اهم حاجة زى ما انت عااارف

نورتنى

دعاء مواجهات يقول...

طارق مؤمن

بجد انتوا حفزتونى للكتابة اكتر

عن الرحلة وجمالها

وان شاء الله انتظروا بوست قادم عنها من اوجة اخرى وزوايا اخرى اتمنى تعجبكم

سلاااااااااام

Mohamed Dawod يقول...
أزال المؤلف هذا التعليق.
Mohamed Dawod يقول...

ايه ده؟ ايه ده؟ انتى وصلتى امتى ؟ حمد الله على السلامه انتى وصلتى وانا معرفش ؟ ربنا يتقبل منك وانشاء الله تكونى اتمتعتى .......ياترى دعتيلى الدعوه اللى بعتهالك ولا لا؟ طبعا مش معقول حتفتكرى كل الدعوات اللى جاتلك وربنا يقويكى......لتانى مره حمد الله على السلامه ويارب تكونى بخير دايما....تحياتى وشكرا

Mohamed Dawod يقول...

تعليق تانى بعد ما قريت البوست.....أكتر حاجه لقتت نظرى صاحب محل الموبايلات ده اللى بيحب شيرين وبينه وبين الحرم 300 متر بس. الواحد ساعات بيكون فى نعمه ومش حاسس بيها وممكن تكون سعادته جنبه وهو مصمم يدور على متعته وسعادته فى اماكن تانيه واشياء اخرى.....سبحان الله وربنا ما يجعلنا منهم....الحاجه التانيه موضوع الحر فى بلاد الخليج كلها.....ربنا يتقبل منك ويكتبهالنا يا دعاء.....شكرا

دكتور بهــدوء يقول...

حمد الله ع السلامه يا دعاااااء
فكرتيني بالذي مضي
اصل انا عملت كزا عمره قبل كده
إييييييييييييييييه
رجعتيني لزمن حلو أوي
ووصفك ما شاااء الله
بس موصفتيش حاجه مهمه للسيدات المصريات هناك
الزغاريد اول ما الحته اللي فيها المنبر وقبر النبي
المصريين اهما حيويه وعزم وهمه
_________________________________
_________________________________
سوري يا دودو ع التأخير بس انا لسه كان عندي امتحان امبارح وعندي واحد تاني بكره
ربنا يتوب علينا بأه ونخلص
هاااانت اتناشر يوم وابأه فاضي تماما ليكي

نونو يقول...

يا نهار ابيض حمد لله على سلامتك مع انها متأخرة
بس انا مبسوطة انى عرفت شخصية جميلة اوى بالشكل دة
مع انى كان نفسى اعرفك من زمان
وتدعيلى فى عمرتك بس مش مهم يكفينى الدعاء بظهر الغيب
بجد سعييدة اوى بلقائك ومعرفتك
انتى شخصية فعلا محترمة وياريت نكون اصحاب
عقبال الحج

الميكروباص يقول...

لم أكن أزورك لأني كنت عارف انك مسافره
حمدا لله على السلامه وتقبل الله ان شاء الله

انين الحزن يقول...

بت يادعاء

بصي بصي اوي كدا
تدقيني لو قلتلك اني يوم ما انتي نزلتي تحديث وكدا انا روحت البيت مسكت التليفون ولسه هاكلم حرتك لقيت الحراره قطعت تاني انتي شراره ولا التليفون هو اللي شراره

اول والله ما التليفون يرجع هااتصل بيكي بس يارب متكونيش زعلانه مني

وبالنسبه للبوست انا بجد يابختك مش لوحدك اللي بتحلمي بالعمره انا نفسي اوي والله

سلامووووووووز ياقمر
وزة

رئيس جمهوريه نفسى يقول...

حمد لله على سلامتك وعمره مقبوله ان شاء الله
اسف على عدم السؤال ولكن ظروف خاصه بيه
ربنا يوعدنا جميعا ان شاء الله بالزياره ويكتب ليكى تكررارها كما تتمنى

سبهللة يقول...

الف مبروك يا دودو وحمدا لله على سلامتك
وعايزة أقولك ان عشت فى السعودية فترة من الزمن
وبالنسبة لسائقى السيارات اولا كلهم محترمين وبيقفوا فى الاشارة حتى لو الساعة 4 الفجر ومافيش حد فى الشارع غيره
ثانيا فى هناك احترام للستات غيرعادى
اولا هو احترام ثانيا هو خوف من الستات لان اى ست هناك ممكن تروح الشرطة وتقول فلان ضايقنى
خلاص كلامها مقدس وفلان دة يطلعوا عينه وعين اللى جابوا فى الشرطة عشان كدة لا تملك اى سيارة الا الوقوف امام اى ست بتعدى
تحياتى ليكى
وان شاء الله الرحلة تتكرر تانى وتالت وكل سنة ان شاء الله

ادم المصرى يقول...

مشاء الله عليكى يا دعاء بجد بوستك جميل جدا بارك الله فيكى ولكى ولمن قرأ كلامك جزاكى الله كل خير

أحمد بكر يقول...

حمد الله على السلامه و عقبال الحج و مدونتك بجد جميله
دمتى بخير

دعاء مواجهات يقول...

محمد داوود

عيب عليك طبعا منسيتش ودعيت بكل اللى انت كنت عاوزة كمان

وياارب يستجيب منى

ويكتبهالك ياارب

نورت

دعاء مواجهات يقول...

دكتور بهدوء

الله يسلمك

ولا يهمك ربنا يعينك وينجحك

نورت الدنيا كلها

دعاء مواجهات يقول...

نونو

ربنا يكرمك ياارب

دا انتى الى زى العسل وكمان مدونتك تحفة

وشئ يشسرفنىا ننا نكون اصحاب بجد

بيس ياقمر

دعاء مواجهات يقول...

لورنس العرب

ولا يهمك

الله يسلمك

ويتقبل منك


نورت

دعاء مواجهات يقول...

أنين الحزن

لا ياختى انتى بس اللى شرارة مش انا

انتى عاوزة كمان تجيبيها فيا ولا اية

يلا امشى

مشوفش وشك الا لما تكلمينى وتصالحينى

ياوحشة..

دعاء مواجهات يقول...

- رئيس جمهورية نفسة

ولا يهمك ربنا معااك ويعينك ياارب

انا مش بزعل من النااس الحلوين ابدا

ربنا يتقبل منك دعائك

سلااام

دعاء مواجهات يقول...

- سبهللة

يسمع منك ربنا ياقمر

بس بردو مش كلهم بيخافوا

فية شوية كدة مش مظبوطين خاالص

تحياتى ليكى

ونورتى الحياة كلها بزيارتك دى

لاازم تتكرر كتيير

بيس ياقمر

دعاء مواجهات يقول...

آدم المصرى

اللهم آمين

نورت

دعاء مواجهات يقول...

بيكر

ميرسى دا من ذوقك

نورتنى منتظرااك كتير

سلام

PrInCeSS BeRy يقول...

دودووووووووووو وحشتيننى اوى اوىىىىى حمد الله على السلامة انا اسفة يا قلبى اتاخرت والنبى ما تزعليش منى بحبك اوىىىى ومبسوطة انى شفتك والتاج بتاعك مستنيكى ومش مهم تجاوبى علية بس بجد وحشتينى اوىىىىىى وربنا يكتبهالى انا كمان ويكتبها للكل يارب اموااااااااااة

Unknown يقول...

الف حمد الله ع السلامة شكلها متاخرة اوى

خسارة كنت عايزة الحقك عشان تدعيلى

دمتى بخير يا حاجة مواجهات
:)

Ahmed Al-Sabbagh يقول...

صديقتى العزيزة جدا جدا جدا

دعـــاء هــــانم مـــوجهات

البوست ده بوست غير عادى

ولا يليق بيه اى تعليق

او ما تعرفيش كم سعادتى لرجوعك بالسلامة

ده لوحدة محتاج خمسبعتاشر كومنت فى بعض

وزيارتك للاراضى المقدسة : يعنى زيارة حد بحبة اوى اوى لحد بحبة اوى اوى اوى

والله حاسس انى انا اللى عملت عمرة

بجد ربنا يتقبل منك ويكرمك وتعيشى وتزورى مرااات ومرااات ونزور النبى سوا

تحياتى

خالو أحمد
:)

RaRa يقول...

الف حمدلله على السلامة
وانا اسفة بجد على التأخير
وعدم السؤال
وان شاء الله عمرة مقبولة
وانا حسيت نفس احاسيسك لانى اعتمرت قبل كدا
وبجد بجد مافيش اجمل من كدا احساس

دمتى بألف خير وسعادة

فارس بلا جواد يقول...

أولا حمد الله ع السلامة
أسف علي التأخير بجد .. بس قلت أسيبك تاخدي نفسك .. وتردي علي السيل الجارف من التعليقات .. وغير كمان الكم الهائل اللي هتروريه من المدونات
عشان كده قلت خليني في الروقان
عمرة مقبولة باذن الله .. والبوست المره دي جميل فعلا وفعلا كان نفسي حد يوصفلي شعور الناس وهي هناك .. ومالاقتش وصف أحسن من كده
ربنا يوفقك دايما وترجعي للمواجهات اللي مستنياكي
تحياتي

زى الهوا يقول...

ربنا يتقبل منك , وياااااااااااااااابختك

غير معرف يقول...

انا قريت عن رجوعك بالسلامة عند استاذنا أحمد الصباغ وجيت اشوف لقيتك ماشاء الله محبوبة قوى وحمدلله على السلامة يا استاذة دعاء

هيثم

t3ban يقول...

ربنا ينولهنا جميعا
بجد الواحد نفسة يزور السعودية تاني يطهر نفسة
شكرا لزيارتك

rovy يقول...

الف حمد الله على سلامتك
اسفه على تأخيرى النت عطل كام يوم وكل حاجه اتلغبطت .. الحمد لله لعودتك بخير ..
اختى جنه طمنتنى عليكى و قالت لى اد ايه انتى رقيقه و انسانه جميله ربنا يحميكى .. بأشكرك للدعوات اللى شلتيها امانه و وفتيها ربنا يكرمك و يجازيكى كل خير ..

كل الشكر للرحمن على سلامتك

تحياتى

فاتيما يقول...

دعاء
أنا أسفة إتأخرت عليكى قوى
بس إعذرينى
إنا قريت البوست من بدرى بس مكنتش فى مزاج معتدل لكتابة تعليق
لكن دلوقتى الحمدلله
أنا معاكى فى التفاصيل و مستمتعة لحد ما جبتى سيرة النظر للكعبة و جسمى كله إتنفض و عينى رغرغت
يا رب يا رب أروح و يكتبلى أشوفها
و كل من يتمنى و قلبه يصبو إاليها
ماما راحت العمرة تلات مرات
و لولا ظروفنا فى السنين اللى فاتت كانت راحت كل سنة
ربنا يفتحها علينا و المرة الجاية أروح معاها و اخد اخويا محؤم
و لا شكلى هستنى يوسف لما يبقى محرمى
دعاكى ليا مرحش يا دعاء
بس أنا اللى يظهر خدت على النكد و مبقتش أشوف كويس الفرحة و أعيشها دون منغصات
ألف حمدلله ع السلامة و ربنا يكتبهالك تانى إن شاء الله

مواطن زهقان يقول...

الف حمد اله ع السلامه
ربنا يتقبل منك يارب

ويوعد كل مشتاااااااااق

إنسان || Human يقول...

الرحلة الحلم ...إنتي عارفه بجد أنا أول مره أقرء بوست طويل وماحسش ان هو طويل فعلاً ..ماحستش بيه خالص
...
حمدالله على السلامه ..عقبال الحج إنشاء الله
قلبتي عليا المواجع ..فكرتيني بأخر مره أبص فيها النظرة على الكعبة..ألقيت النظرة الأخيرة ولم أراها بعد ذلك الا في التلفزيون ..
..
فعلاً المدينه هاديا جداً جداً...الشوارع فاضيه ..وهادئة جداً تحس كده بسلام داخلي أول ماتشوفي المآذن بتاعت الحرم من بعيد..
وأهلها طيبيين فعلاً ...أما مكة صعبين شويه
إحنا كنا بنقول عليهم قريش....كان حتى في ستات تبع الحرم منتقبات عناف جداً ..بيزقوا وحالتهم حاله ..
بس الصراحه ..المصريين كاسفينا هناك بجد ..تسول وحاجة زفت خالص ..؟
على العموم مستنيين اللي لسه جاي
وحمدالله على السلامه
يااااه هو أنا كتبت كل ده ..برده ماحستش

WhItE HeArT يقول...

كده تسبقيني

انا كنت في رحله مماثله الايام اللي فاتت المدينة وبعدين مكه برضه وكنت هحكي حاجات كتير انيت سبقتيني بيها

ههههههههه

القلوب عند بعضها

كل الحاجات اللي انتي بتقوليها كان نفس اللي انا حاسه

ماعدا الدفعه الايرانيه انا كنت حاسس ان المصريين هما الاغلبيه انا مكنتش بمشي متر الا متكعبل في واحد مصري


وبعدين حتت يخصصوا للستات وقت في مكه ده شيء ممنوع لإن ده فيه انك تحرم واحد من الطواف في وقت هوه عايزه وده محرم تماما وميقدروش يعملوا كده اما في المدينه فبيحصل وبيعملولكم زي مجرى كده ويوصلوكم للروضه اللي كنت هموت فيها وامة لا اله الا الله داست على راسي لدرجة اني حسيت اني هعمل زي كرتون توم و جيري ووشي يتساوى بالارض


المهم ربنا يتقبل منك بس انا عايز اسألك سؤال

هل انتي كنت رايحه بهدف عمرة رجب وله عادي جت بالصدفه؟؟

اصل انا كنت رايح بالصدفه بس اغلب المصريين مقتنعين بشيء اسمه عمرة رجب اللي هيه في الاصل بدعه اصلا


تحياتي لك وللمدونه الرائعه

عًٍمًرٌٍوٍ آلنْوٍبٌَِى يقول...

ربنا يتقبل منك يا دعاء

دعتيلى زى ما قولتلك ولا فضلتى تدعى لنفسك وبس هههههههههههههه
كلامك ووصفك للمدينة ومكة والمكرمه جميل جداااا .. فعلا فية تشابه كبير بين وصفك ووصف والدى للمكان ده ..
ربنا يكتبها لكل المسلمين زياره بيت الله الحبيب

تقبل الله منك يا دعاء

دعاء مواجهات يقول...

برنسيس بيرى

ازيك انتى ياقمر

واحشانى اكتر بكتيير

مش زعلاانة منك طبعا

ربنا يتقبل منك..

بيس ياقمر

دعاء مواجهات يقول...

عاليا حليم

كأنك لحقتينى بالظبط

انا دعيت لكل المصريين

والمسلمين

اللهم اجعلنى مستجاب الدعوة)


نورتينى

دعاء مواجهات يقول...

أحمد الصباغ

بجد يعجز لسانى عن الرد

او الكلام بعد الكلام الى قولتوا

ياأحمد

مش هقول غير

إن ليك نفس المكانة عندى إن لم يكن أكثر بكثييير..

وربنا يتقبل دعوتك....

نورت

دعاء مواجهات يقول...

رارا

الله يسلمك ياقمر

ولا يهمك انتى تيجى وقت ما تحبى اصلا

منوراانى طبعا

دعاء مواجهات يقول...

فارس بلا جواد

ربنا يخليك يارب

زى ما انت حاسس بيا كدا بجد

بس بجد بجد النيو لوك تحفة

بيس

دعاء مواجهات يقول...

زى الهوا

عقبالك يااااارب

نورتينى

دعاء مواجهات يقول...

هيثم سعيد

الله يسلمك ياهيثم

وبصراحة مفيش كلمة ولا حرف ولا كلمات

ولا جمل

تقدر توفى العزيز الصباغ حقة

نورتنى

منتظراك كتير

دعاء مواجهات يقول...

تعبان

ربنا يكتبهالك ياارب

وتخف بقى


نورت

دعاء مواجهات يقول...

- رووفى

الله يسلمك ياقمر

ربنا يخليكى

دا اقل واجب طبعا

نورتى كعادتك

وربنا يكرم النت وميقطعش تانى بقى..

سلااام

دعاء مواجهات يقول...

- فاتيما

الله يسلمك ياقمر

وصدقينى انتى اول ما تروحى هناك وتصفى قلبك

مش هتحسى انك زعلاىانة ابدا من اى حد ف الحياة وهتشعرى بأمان كبير اوى بجد

ع فكرة البوست الاخير بتاعك الهمنى وكتبت قصيدة علية

اكييد هوريهاالك ياقمر

بييس

دعاء مواجهات يقول...

- مواطن زهقان

ربنا يسمع منك ياارب


نورتنى

دعاء مواجهات يقول...

- hu- man

اكتب كمان ولا يهمك

كل كلمة بتسعدنى اكتر بجد

وانت نورتنى

وربنا يتقبل مننا جميعا صالح الأعمال

سلااام

دعاء مواجهات يقول...

- وايت هيرت

لا أنا رايحة عمرة عادية

ومعرفش يعنى اية عمرة رجب ولا مش رجب أصلا

اللى اعرف عمرة رجب يعنى فى شهر رجب ومعرفش ليها مدلول تاانى
؟؟؟؟؟


(بس سورى بقى الإيرانيين كانوا هاجمين هاجمة بيضا)

انت مكونتش بتشوفهم كل يوم فى ساحة الحرم المكى بعد الشرووق مباشرة ً


نورتنى بجد..

دعاء مواجهات يقول...

- عمرو النوبى

اللهم آميين

طبعا ً دعيتلك

ولكل الشباب والمسلمين

ربنا يتقبل منى


سلاااااام...

الريم يقول...

حبيبتى زيارة موفقة وعمرة مقبولة انشالله وانا مبوسطة ان اول تعليق اكتبهولك تهنئتك على العمرة وعقبال الحج انشالله

حمامة يقول...

متتصوريش انا مبسوطه اد ايه انك دعتيلى
ربنا يتقبل منك يا حبيبتى
ويكتبهالنا جميعاً :)

حمدلله ع السلامة يا دودو

عروسة ننوسة يقول...

الف الف حمد الله على السلامة يا حاجة...اللهم تقبل منك ويوعدنا بالزيارة مثلك

Foxology يقول...

اولا : الف حمد الله ع السلامة وتقبل الله منك وربنا يكرمنا كلنا بالزيارة الشريفة

ثانيا : وصفك دقيق جدا للحرمين والحالة النفسية فى المدينة واان مجرب الحقيقة مرتين لدرجة انى حسيت ان انتمائى بالكامل للمدينة المنورة وانى مش عاوز اخرج منها ابداااااااااا

ثالثا : السلبيات اللى قولتى عليها دى حاجة عادية جدا وبتحصل فى المساجد هنا قبل ما تحصل فى الحرم وعليه العوض فى الدماغ السليمة اللى لسه بتفكر صح

رابعا : اوعى تكونى نسيتينى فى الأمانة اللى قولتلك عليها انا مستنى ترجعى علشان اسألك :)

تحياتى وحمد الله ع السلامة مرة تانية :)

شهد الكلمات يقول...

حمد الله ع السلامة و يارب يكتبهالنا و يكتبهالك مرة تانية و تالتة و رابعة كمان يالا ان شالله ما حد حوش

و مستنين المفاجات المتوالية اللي قلتي عليها

تقبلي مروري

تحياتي

أبوعبيده يقول...

سلام عليكم
مش عارف اقولك ايه. انا حاسس بغبطه شديده اوى . ربنا يتقبل منك ويجعلها مش أخر مره.ويهديكى ويبارك فيكى ويجعلك احسن من قبل كده بمليون مره قصدى بمليار مره.وادعيلى ربنا يكرمنى ويهدينى ويتوب عليه وعلى عصاه المسلمين.
وسلام عشان انا الكلام بيفتح معايا
ربنا يتقبل منك ....
سلام عليكم

دعاء مواجهات يقول...

الريم

ربنا يخليكى ياقمر

دا انتى الى نورتينى

سلااام

دعاء مواجهات يقول...

- عروسة ننوسة

الله يسلم ياجميل

اللهم آميين


نورتى

دعاء مواجهات يقول...

- حمامة

الله يسلمك ياجميل

دا اقل وااجب


نورتى

دعاء مواجهات يقول...

- فوكس


لا طبعا الحمد لله منسيتش

دا انا كنت كاتبة كل حاجة


نورت

دعاء مواجهات يقول...

- شهد الكلمات

ههههههههههههههههههه

قوللى يارب بس ياجميل

اووكى

واول المفاجآت حتكون النهاردة

بالليل اوى

نورتى...

دعاء مواجهات يقول...

- أبو عبيدة

ويتقبل منا جميعا

صالح الأعماال

اللهم آميين

دعيتلك...

نورتنى اوى

غير معرف يقول...

هو النقاب حرام00000؟

دعاء مواجهات يقول...

غير معروف

مهو لو كنت معروف

ولا انا اعرف أقولك ياأستاذ إية

كنت ناقشتك؟؟؟؟؟؟؟؟؟؟

غير معرف يقول...

السلام عليكم

عمرة مباركة ان شاء الله ومقبولة

واعتذر عن تأخرى فى الرد لظروف قهرية

كتب الله لك الحج والعمرة ثانية ان شاء الله

دعاء يقول...

أزيك يا دعاء مصر نورت بعودتك يا بنتي ..

و بجد بجد كلامك يدخل القلب أنا هتجنن أساسًا وربنا يكتبهالي إن شاء الله .. بس انا طماعة ونفسي في الحج على طول الأول..

وصفك للرحلة رائع جدًا ..

طبعًا انا متأخره جدًا في الرد، بس كنت عيانه اليومين ألي فاتو ..

ربنا يثبتك يا رب ويكتبهالك تاني ويكتبلك الحج كمان ..

دعاء مواجهات يقول...

المحارب المتيم

ربنا يعينك

والله يسلمكم

ويتقبل منك

نورت

دعاء مواجهات يقول...

دعاء

الف مليون سلامة عليكى ياجميل


ربنا يشفيكى ياارب

ويكتبلنا الحج جميعا


بيس