الجمعة، مايو 02، 2008

رااح..رااح.. رااااح





خلص خلااااااااااص........


هكذا دوماً الحياة ما إن تعطينا ما نشتهى حتى تسلبة منا لنستشعر أهميتة ونقدر قيمتة لكن للأسف بعد أن يكون الأوان قد فات .....
دى مش فلسفة ولا حاجة........ لا واللهى بجد هى الطبيعة البشرية دى كدة تتمرد وتنتقى وتختار وتذدرى وتفيق على الحقيقة الوحيدة فى الوجود وهى النهاية آآة النهاية مهو معنى وجود البداية فى حد ذاتة أن هناك نهاية حتماً ستأتى يوماً ما ولا يفترض أبداً أن ننتظرها صاغرين متنبهين مترصدين بل أن نعمل مٌتقين فى كل همسة وسكنة وحركة وكدة يعنى ........
تقولولى بقى إية الفلسفة اللى نأحت عليكى يابت يادودى دى ومناسبتها إية؟؟ أقولوكو...
أصل أنا زى ما قولتلكو قبل كدة كنت باخد كورس إنجليزى فى البلد الشقيق طنطا وخلاااااااص........... الكورس خلص وعدت لقواعدى المنزلية سالمة..
ورجعنا بقى تانى للتفكير والملل والقلق والنووووووم مش عارفة لية عندى إحساس قد يصل لحد الجزم إنى أنا الوحيدة ف الحياة للى ماليش لازمة واللى مبشتغلش وماليش رسالة
يمكن عقدة نقص... يمكن لأنى متعودتش أعيش بدون هدف .... يمكن لأنىمكونتش أتوقع إنى أجلس ف المنزل بعد التخرج أصلاً ... لأنى تقريباً كنت بشتغل أثناء الدراسة
وكنت عاملة فيها ولا أهم سيدة أعمال ف الكون ...... (حتى أصحابى كانوا بيقولولى كدة)

نرجع بقى للكورس بصراحة أنا زعلانة علشان خلص مش بس لأنى رجعت أقعد ف البيت وبس ومش بخرج كتيير لأ .. بس لأن( المضروب) الكورس بدأ يحلو جداً فى نهايتة بعد ما بدأنا ورش عمل ومشاريع مع الجروب اللى زى العسل اللى كان معايا ف الكورس وكمان لأنى بدات أكتشف شخصياتهم الى كانت مخبياها أقنعة الجدية والصرامة طول فترة الكورس
العيال طلعو زى العسل أوى بلا إستثناء وكلهم نشاط ومرح وخفة دم (أحمد واحمد ومحمد وخالد ومحمد وبسام وهبة وفاطمة ودرين وغادة ...) وكلهم فعلاً

تعاون بدون مقابل فعلاً حسسونى إننا كلنا إخواات وكان عزائى الوحيد اننا تبادلنا الإيميلات ف اللحظات الأخيرة مما يعطيعنى الأمل فى محادثتهم يوماً ما.. بجد حسيت بحالة غريبة من الفقد فى آخر يوم حسيت إنى بفقد حد عزيز اوى عليا ومش هشوفوا تانى ويالة من إحساس
ممييييييت...... قااااااتل ....

شعرت بأنة يوم الوداع الكبير فاليوم أودع هذة الوجوة وتلك الأشخاص والأماكن والشوارع وقاعة المحاضرات وكلية التجارة ومحطة القطار حتى هؤلاء الناس اللذين لاتربطنى بهم اى علاقة من اى نوع أشعر تجاههم أيضاً بالفقد حسيت يوميها إنى ماشية عاوزة أقوول لكل حد بيقابلنى (هتوحشنى أوى) مش بس كل حد كمان كل حاجة.. كل مكان شاف ذكرى بسيطة ليا مع ناس حبيتهم أو حتى ناس معرفتهمش حتى هؤلاء البنات الفرى والشباب الفانكى بردو حسيت تجاههم بالفقد والوحشة ..... لا أدى إن كانت تلك ما يطلق عليها الحساسية المرهفة أم ماذا بالضبط

أيضاً ميس (شرين) اللى درست لنا الكورس وحشتنى اوى ولسة هتوحشنى أكتر بجد إنسانة قادرة على خلق الشخصيات الجادة اللى ليها هدف شعرت معها فى كل إنفعالها بخوفها علينا وعلى مستقبلنا وحتمية أن نغير طريقة تفكيرنا النمطية وأن نسير وفق خطط مدعومة بجداول زمنية لم تكن مجرد ميس عادية فكانت تفاجئنى كل حصة بأشياء جديدة فى شخصيتها سواء معارف واسعة أو حتى صفات نادرة الوجود فبالرغم من أنها لن ترانا مرة ثانية إلا انها دوما كانت تحرص أن تعطينا كل ما لديها

وبصراحة هى فعلا غيرت فى شخصيتى وف طريقة تفكيرى.....
وعلشان كدة بقولها شكراً أوى .... ياريت توصلها كلمتى....

لم يكن هذا كل شئ بل تعرف من خلال هذة المشاوير الشبة يومية بالعديد من الأصدقاء بمعنى الكلمة عن طريق الصدفة البحتة وإكتشفت المزيد عن النفوس البشرية وتعرفت على آخرين كنت أعرفهم سطحياً فكان المشوار فرصة للتعمق فى أعماق شخصياتهم لقد علمنى هذا المشوار الكثيرو الكثيير .....

ولكن ماذا بعد كل هذا الرغى.........
م الآخر عاوزة أقولكو متقفلووش على نفسكوا وتضيقوا أفق علاقاتكم لأن كل مشوار بتعملوا ف حياتك أكيد أكيد هيضيف ليك ويعرفك حاجة مكونتش تعرفها قبل كدة .....

هناك 67 تعليقًا:

محمد صبحى يقول...

حلو الإحساس يادعاء

الواحد مابيبقاش إنسان غير بالتجارب والعلاقات اللى بيعملها وبيتعلم منها

عجبنى البوست

انين الحزن يقول...

ماشي ياعم الفيلسوف

انتي يابت مش قلتي هتيجي اخر يوم في الكورس علشان اشوفك انا معرفتش اسلم عليكي وانا نازله ما انتي كنتي مشغوله بالتليفون ياعم المهم ولا عبرتيني

تلاقيكي بعد مما نزلت قلتي مين اللي سلم عليا

ومع ذلك يله خليني انا جدعه علي طول

بجد مبسوطه اننا اتقابلنا وياريت تفكري في نزول طنطا تاني خدي كورس كمان ما انتي فلوسك كتير

يله سلاموووووووز ياقمر
وزة

rainbow يقول...

الصديقة الغالية دعاء

افتقدتك جدا

اعتدر عن تأخرى المعيب خارج عن ارادتى سامحينى

البوست دسم اوى يا دودى كله احساس وحياة

تكوين صداقات من اهم الاشياء اللى بتشكلنا وبتسيب علامات لا تنسى ولا يمكن الاستهانة بيها فى حياتنا
متفهمة شعورك بالافتقاد تماما عزائك الوحيد حبيبتى انكى قد تقابليهم مرات اخرى ان شاء الله
او قد تقابلين اناس اروع مع الوقت

اعجبنى جدا وصفك الرقيق لمشاعرك فى طريق العودة .. كان وصف صادق ووصل لعمق القلب

اتمنى ان يزول سريعا بإنشغالك فى اشياء مفيدة رائعة

حبى الخالص ومودتى الصافية

هدى

واحد من البلد دى يقول...

عارفة يا دعاء
أنا عمرى ما سبت أصدقائى أبدا بدون ما أسأل عليهم ..ولو على فترات متباعدة..مع إنهم دايما ما بيسألوش على حد..والكلمة المعتادة اللى لما أتصل بحد أسمعها هى(والله أنا عارف إنى مقصر معاك)..ويكون ردى-المعتاد برضه-يا سيدى ولا يهمك المهم إنى أسمع عنك الخير دايما ...ما أجمل التواصل وما أسمى الصداقة الحقيقية التى قلما توجد فى هذا الزمان..
تقبلى مرورى

نوره الخشن يقول...

عارفة هلخصهولك

عرفت قيمتك يااما لما شوفت مراة ابويا

ده من الااااااااخر يعني

Gannah يقول...

الاحاسيس الصادقة هى اللى بتوصل بسهولة
انا حسيت معاكى بنفس المشاعر و كأنى زيك رحت الكورس و الناس هناك وحشونى
ربنا يديم عليكى نعمة الاحساس المرهف و تقدرى تاخدى كورسات تانية مع مس شيرين
احييها و احى كل انسان يبدع فى عمله و يحاول ان يجعل منه رسالة
انت موهوبة يا دعاء و ان شاء الله تلاقى شغل يناسب موهبتك
راسلى الجرايد و ابعتى قصصك الحلوة اللى بتكتبيها فى المدونة و ان شاء الله نباركلك قريب
تحياتى يا دودو
هامشى بس هتوحشينى يا جارتى

ايمن صديق يقول...

فلسفة عميقة جدا وخبرة طويييييييييييلة اوى يا دعاء
موضوع هايل جدا
تقبلى مرورى

نور يقول...

ازيك يا دعاء كلنا بنحس بنفس احساسك
خصوصا لما تكونى سايبه الصحبه وهتروحى ع الفراغ مش عارفه انتى كده ولا ايه بس انا كده والحاله دى ابتدت من بعد ما اتخرجت و كل الناس اللى حبيتهم وعشت معاهم اربع سنين مابقتش اشوفهم غير صدفه
و زى ما قولتى كل مشوار بيزود من خبرتنا فى الحياه بمعنى اصح بيخلى حياة الواحد حياه ثريه مش بالونه مليانه هوا
تحياتى الجامده جدا ليكى يا جميل وسلام مؤقت كمان

nona يقول...

احساسك معظمنا بيحسوا تقريبا وحسوا قبل كده لما تجبرك الدنيا انك تودعى ناس بتحبيهم وبيحبوكى واكيد هيوحشووك بس يمكن ده شر لابد منه بس عاوزة اقوللك مسير الحى يتلاقى

Ghada & Rofayda يقول...

عزيزتي دعاء ..
بوست جميل و يحمل معني هام جدا :)
--------------------------------
ورجعنا بقى تانى للتفكير والملل والقلق والنووووووم مش عارفة لية عندى إحساس قد يصل لحد الجزم إنى أنا الوحيدة ف الحياة للى ماليش لازمة واللى مبشتغلش وماليش رسالةز
---------------------------------
لي تعليق علي هذه المقوله ....
لقد حزنت كثيرا حبيبتي انك لديك هذا الاحساس لان الانسان بالاخص دونا عن كل الخلق ربنا سبحانه و تعالي خلقه من اجل هدف واضح و محدد .... الهدف ده الكبير "رضا ربنا" ....طيب بردو ازاي
الفكره في الهدف ده انه مفتوح .. بمعني ان ممكن ناخد جزء صغير جدا من الحياه و نقول انا هشتغل عمري كله علي الجزء ده عشان ارضي ربنا سبحانه وتعالي من خلاله .....طيب جزء عملي اكتر :
تعرفي ان من البيت البنت بالذات ممكن يمكون ليها هدف كبير جدا....بردو ازاي عن طريق مثلا انا هدفي اني لما اتزوج اعيش حياه سعيده مع زوجي ... ده هدف ... ويرضي ربنا .... و يسعدني و يسعد زوجي و كل من حولي...طيب اعمل ايه؟؟؟
اولا : كل يوم اقرا صفحه في القران و افهم معناها حلو قوي,
ثانيا: اتعلم امور التدبير المنزلي من والدتي,
ثالثا: ادخل علي النت و ابحث عن الحياه السعيده و اركانها ... ودي بقي ممكن تاخد يمكن تلات ساعات ولا شي في اليوم مع تاني في التلقي ,
رابعا : اقرا كتب في تربيه الابناء.. ده موضوع والله مش سهل ..ده عايز دورات و كتب و علوم بتدرس..
......... الي ذلك
ده كان مثال علي جزء بسيط في الحيا ممكن يتحول الي هدف ارضي بيه ربنا ... و لا اشعر اني بلا رساله :

محمد عبد القوى يقول...

أنا هأعلف هنا على بوستين..الأخير واللى قبله
بالنسبة لبوست بعد الرياسة فأنا أرحب بتلك المساحة من الحريةولا أمانع أن أدفن فى مقبرة جماعية .. بس ياريت تعملوا ماسورة فى سقف المقبرة أمسك فيها لأن أكيد مش هلاقى مكان فاضى عشان أرقد فيه ..وحتى لو لقيت هأسيبه لو بنت تعدى من باب الجنتلة الفارغة ورسم الدور
أما البوست التانى ففى حاجة أنا مقتنع بيها قوى قوى .. وهى أن كل لحظة بتعدى ما بترجعش - وهى طبعا لحظة ليها قيمتها لأنها جزء من عمرك..يبقى لازم تستغليها صح ، كلمى الناس..أسمعى مزيكا ، أقرى كتاب..شوفى فيلم
المهم أنك ماتشيبيش المخ ده فاضى ، والشخصية دي تقليدية
أرفضى العادى وأطلبى الجديد و الأحسن
أتمنالك مشغوليات جديدة
أخيراً : بوست جديد على قلم الحرية

sigon1977 يقول...

اهلا و سهلا بك فى جروب النوستالجيا الدافئ الحزين و اعراضة المليئة بالمشاعر 0
انة الحنين للاماكن ( الوطن ) ، ( المنزل) ، ( العمل) كل ذلك نشتاق الية بلا سبب الا اننا نتركة ، نظل نفكر فية و نعود الية بالجسد او الروح ، ذلك لا يهم الا اننا نعود دوما ، لا يرحل ابدا بل يبقى 0
انة الحنين لكل ما لم نعلم اننا شعرنا بة عندما كنا هناك ، فلما صرنا هنا بتنا نشعر بالحنين 0 sigon_1977@yahoo.com

كراكيب عادل يقول...

مرحلة من مراحل العمر

بس مميزات المرحلة دي الصدق في الاحاسيس

بعد كدة مش بتفرق كتيييير

اتعودنا

كراكيب عادل يقول...

انا جيت تاني بعد ما شفت تعليقك في البلوج التاني او البيت التاني

بس الاساس هو tiger29.blogspot.com

هو الي فيه المجهود كلة مش اللينك التاي


بس اية الكلام الجميل دة كلة

دنا لقيت حجات مش عارف اشرحها عن نفسي ولا عن الصور

بس الغريبة اني مكنتش بشوف لك اي تعليق قبل كدة علشان كدة احترت لما لقيت مدونتك وكان من البوكت بي سي

وكنت ببحث صدفة طلع لي الكلام مش لما شفت تعليقك وبعدين رجعت البيت فتحت علي المجلة

بجد بجد كلام زي العسل

انين الحزن يقول...

دعاااااااااااااااء

ليك تاجيين عندي تعالي بقه


اوك

سلامووووووووووووووووز

وزة

دعاء مواجهات يقول...

-محمد صبحى

وانا عجبنى انة عجبك

منورن ديما

دعاء مواجهات يقول...

-أنين الحزن

إية ياوزة اة ياختى فيلسوفة غصب عنك

وبعدين كويس بقى انك فتحتى حكاية القطار بتاع اخر مرة

أنا بقى الى كنت مفروسة منك
قاعدة عملالى فيها مهمة وبتبعتى بالبلوتوث لل.....

ولا بلااش نسيح قدام الناس بس المهم انا اخدت بالى

ولما خلصتى سعادتك قال عاملة فيها مثقفة وبتقراى كتااب

وكل دة ياوحشة وانتى عارفة ان دى اخر مرة هنشووف فيها بعض

انا خلااص مش زعلانة دلوقتى بس حبيت اعرفك اننا مش نايمين ع وداننا
وبصراحة ما صدقت المكالمة دى جتلى علشان تعرفى اننا كمان مهمين اوى وفية ناس مبيعرفووش يعيشوا يومهم بدون ما يسمعوا صوتنا
هههههههههههههههههههههه

ماشى ياوزووز

دعاء مواجهات يقول...

- رينبو

هدهوود رووح قلبى

بجد كنت فكراكى مطنشانى

بس ربنا يكون فى عونك بجد

زيارتك نورتنى

على فكرة انا مش لوحدى طوول ما انتوا كلكوا معايا ياقمرى

دعاء مواجهات يقول...

- واحد من البلد دى

ياخبر كأنك بتوصف مكالمة من مكالماتى لأصحابى الأندال اللى من يوم ما كل واحدة فيهم اشتغلت ولا بتسأل عنى

بجد بيحصلى كدة

نورتنى اوى ومستنياك كتيير

دعاء مواجهات يقول...

- نورة الخشن

ياواااد يابتاع الآخر انت

صحوووز ياقمروووز

جبتى المفيد بجد

دعاء مواجهات يقول...

-gannah

انتى عسولة اوى بجد حسيت بيكى كدة وصعب احساسى يخيب

وصعب كمان حد يحس بيك بدون ما يعرفك او نقووول نادر يعنى

ع فكرة انا بيتنشرلى ف الدستور الأسبوعى والجمهوري الأسبوعى كتيير

نورتينى اوى ياقمرى

دعاء مواجهات يقول...

- أيمن صديق

الخبرة لابد ان نسعى اليها
ودة بقى اللى اكتشفتة لانها مش بتيجى لوحدها من نفسها كدة يعنى

مرور كريم

دعاء مواجهات يقول...

- نور

حساكى قريبة منى
وانى اعرفك اوى كماااان

مش عارفة ليية

بس اللى عارفة اننا لازم نبقى اصحاب اوى

مااااااشى

دعاء مواجهات يقول...

-nona

ودة طبعاً عزائى الوحيد ياقمر

دعاء مواجهات يقول...

-ghada and rofayda

انتى فهمتنى غلط انا اة مش بشتغل بس الحمد له بقرا كتيير سواء كتب او جرايد ومان بيتنشرلى ف الصحف منها الدستور والحمد لله بقرا قرآن وبدات حفظة
كمان بساعد بابا فى شغلة

بس الحكاية انى بطمع فى المزيد واحب دوما الإنشغال الشديد

بس هى دى كل الكاية

دعاء مواجهات يقول...

- محمد عبدالقوى

اولا البوست بتاعك تحفة بجزى ما قولتلك

ثانيا انا مش فاضية اوى كدة
ثالثا نورتى اوى اوى اوى

دعاء مواجهات يقول...

-sigon

صح هو الحنين فعلا

دعاء مواجهات يقول...

-كراكيب عادل

بجد اكتر حاجة مفرحانى دلوقتى ان كلامى عن مدونتك عجبك

وكمان لانى اتطمن عليك لانك اختفيت فجاة

وميرسى ع تعليقك

وبجد الكلام اللى قولتو عن مدونتك اقل بكتير من حبى ليها

دعاء مواجهات يقول...

- انين الحزن

جاييين يابنتى جايين

اية الدوشة دى
الله

أبا يحيى وأدم يقول...

السلام عليكم
هذه اول زياره لى لمدونتك
ربنا يوفقك يارب
بجد احساس جميل وشعور رائع
فمعك حق
فليس هناك فى الدنيا اجمل من صديق يحبك ولا اقسى من صديق يبعد عنك
ربنا يوفقك يارب ويقدر لكى الخير حيث كان ويرضيكى به
د/احمد جمال

دكتور بهــدوء يقول...

رن ترررن تررررررررن
انا جيت
ازيك يا دعاء
ايه الروعه دي تعرفي انا اليومين دول بخلص في حاجات ف الكليه زعلان اوي انها هتخلص لانها برضه كانت مع فريق كويس
بس هيه كده الحاجات الحلوه لازم بتخلص
مش هنساه عمري الفريق اللي انا فيه ده
المهم انا جيت اهو مش هتشربوني حاجه ولا ايه
انا بقول نخليها غدا
اه عشان يبقي عيش وملح
:)
"""""""""""
وهاجي اتغدي هنا كتير بعد كده ان شاء الله
استحمليني بقي زي اخوكي الزوغير
:)
طب امشي بقي اصل اتأخرت بس ان شاء الله جاي تاني

مفقوعة مرارتي من حماتــــــــــــي يقول...

ولا تزعلي نفسك شوفي كورس تاني خديه انا عن نفسي وبكل الفخر اخدت كورس نقاشة وزخرفة وكنت مبسوطة جدا
هو اه جه عليا بخسارة هدومي اللي اتبقعت وبقت شبه هدوم الاسطي عبد الله النقاش بس ولا يهمني
البقع الثابتة دي كانت تاج علي هدومي

خبيب يقول...

دي طبيعة اللحظات الجميلة

تنتهي سريعا ..

لكن يبقى الاستفادة من الخبرات والتجارب ومعرفة الناس ..

ويبقى إننا ممكن نفضل على تواصل من خلال الانترنت ..

نحن نحيا في عالم التكنولوجيا !

---

دمتِ بخير

Mero يقول...

مش عارف للاسف ولا لحسن الحظ بعد الفترة الواحد بعتاد على الفراق والتباعد والصدمات..
الاكيد انه في فترة مع كل بداية هيستشعر وجود نهاية ومع الوصول للنهاية هيكون استعد لها خلاص..
لكن زي ما قولتي اهم حاجة فعلا ان الواحد يستفيد من مشاويره اكبر استفادة وميقفلش على نفسه ويسافر ويلف..مش شرط حتى يتعرف بناس جداد ..المهم انه يلف ويتحرك ويشتغل

تحياتي ع البوست الجمييل والاسلوب الخفيف..

سنووايت يقول...

نصيحة حلوة اوي بجد
كل ما بنقابل ناس اكتر ونتعرض لمواقف اكتر كل ما بنحس اننا قدامنا كتيييير اوي نقابله في الحياة
بس ما تزعليش , وسعي افقك من تاني واكيد هتلاقي الحياة حدفتلك حاجة حلوة جديدة قريب :)

رئـــــيسـة حزب الأحلام يقول...

ازيك ياجميل انتى باين عليكى عشريه اوى وحاولى تاخدى كورسات كمان الى ان تجدى عمل مناسب وانا قبل ماشتغل الشغلانة اللى اى كلام دى وكنت باخد كورسات انجليزى على كمبيوتر على كل شئ وكنت بطلع رحلات مع الجروبات دى سابت ذكريات جميلة الى الان اتذكرها
وانا ماقدرش اتأخر عنك يادودو

همس الاحباب يقول...

ياااااااااه تصدقى حسيت انى باقرا لاارسطو ولا افلاطون
يلا ما علينا فلسفة بفلسفة وايه يعنى
بس بصراحة عبرتى عن مشاعرك الداخلية تجاه الناس بمنتهى الرقة والرومانسية
وفعلا كلها احاسيس صعبة وخصوصا لحظة الفراق والبعد لحظة قاسية
عامة تسلم ايديكى
وبوست لذيذ جدا
تحياتى يادودو
خالد

mayada يقول...

ازيك يادعاء بشرب شاي بلبن انا
باين عليكي عشريه مبقاش في حد كده
عمله نادره انت والله
بس عاره كل الكلام اللي قلتيه ده
انا حسيته لما خلصت كورس الكمبيوتر
والحمد لله طلعت منه بصاحبه اكتر من اخت
واللي يعيش ياما يتعلم وياما يشوف
وحكايه الشغل دي جايه جايه ان شاء
الله اوعي تياسي
نورتي هناك ياعاء وانا مش عارفه عملت ايه هنا هههه

monaliza يقول...

احساس مؤلم حقا بانتهاء شئ انتى اتعودتى عليه واسمحيلى اقترح عليكى بعض الاشياء اللى ممكن تستخدميها وتقضى بيها وقت فراغك
ليه ماتعتبريش انه حان الوقت للاستمتاع بكل مايستهويكى ومكنتيش بتعمليه عشان الكلية والدراسة يعنى مثلا مارسى جميع هواياتك
اشترى كتب واقراى فى كل حاجة
حاولى تختمى القران او تتعلمى تجويد
ادخلى المطبخ وورينا مواهبك
فيه برامج كتير مفيدة فى التليفزيون
زورى اقربائك اللى بقى لك كتير مازورتيهمش ولو عملتى ده افتكرينى وادعيلى لانك بجد هتبقى مبسوطة بعدها
كلمى صحباتك واعزميهم عندك وانتى كمان روحيلهم
ده الى فى دماغى دلؤتى يادودو بس تاكدى ان فيه حاجات كتير ممكن تعمليها ماتخليش احساسك ده يسيطر عليكى انتى ليكى فايدة كبيرة جدا يكفى انك مسلمة
دمتى بخير ياقمر

appy يقول...

كل شء بيكون له نهايه بس الاحسن اننا نكمل حتى حياتنا لها نهايه

غير معرف يقول...

يقول صلى الله عليه وسلم (نعمتان مغبون فيهما كثيرامن الناس الصحه والفراغ)00000000000000000اما عمنا مطران فكان بيقول متفرد بصبابتى متفرد بكابتى متفرد بعنائى0000 وانا بقول ليه طنطا ضلمه فجاءه كده انا عرفت السبب 0نادر

النجم القادم يقول...

السلام عليكم

معلش انا ملحقتش اقرا علشان عندى مذاكرة وفاتح النت بسرعة كده بس اعدك بالقراة

جزاكى الله خيرا على الزيارة للمدونة ونتمنى تكرارها دوما ولكى من كل الاحترام والتقدير

rovy يقول...

سعدت بمرورى لمدونتك ..
موضوع البوست ده هايل ورجعنى لأيام الدراسه واد ايه كان بيبقى فيه طعم لاحساس اخر يوم فى كل مره واد ايه بيكون صعب قوى .. الحقيقه مش بس الاشخاص كمان حتى الاماكن احيانا وانتى بتودعيها بتبقى عاوزه تحضنيها وتحسى انك سايبه حته منك فيها . يمكن لاننا بنحس ان ده زمن راح ودايما اللى بيروح ما بيتعوضش بس انا دلوقت بقى عندى فلسفه جديده من شدة ما المواضيع دى المتنى هو ان اللى فات لو ما بيرجعش ممكن يجى احسن منه . بس ده بالنسبه للوقت والمكان لكن صعب يكون للاصحاب
ربنا يجمعكم على الخير دايما .
ودمت بخير واسفه انى طولت كده من اول تعليق بس البوست حكم .
تحياتى
rovy

مطرح ما ترسى....دقلها يقول...

البلوج حلو ولذيذ قوى

ونفس الاحساس حسيته وانا باخد كورس ادارة عندنا هنا

وكمان طريقة سردك ممتازة

بارك الله فيك

محمد شمس الدين يقول...

عاوزة أقولكو متقفلووش على نفسكوا وتضيقوا أفق علاقاتكم لأن كل مشوار بتعملوا ف حياتك أكيد أكيد هيضيف ليك ويعرفك حاجة مكونتش تعرفها قبل كدة

حاضر

شوكرن على النصيحة

:)

nona يقول...

كده يا دودو تدفنى قلبك لالا مش قلب دودو اللى بيطلع الشعر الجميل والقالات العسل دى يدفن عاوزة اقولك انك ان شاء الله هتفضلى قوية بحب الناس الكتير كتير اللى بيحبوكى يادودو ياااااااااااا جاااااااااااااااامد

دعاء مواجهات يقول...

- أبا يحيى وآدم
بجد احلى كلام واجمل دعوة فى الدنيا
ونورتنى بجد جدا جدا

وربنا يخليلك يحيى وآدم ولازم نشوفك ديماً

سلاام

دعاء مواجهات يقول...

- دكتور بهدوء

ياخبر بس كدة دا انت تشرفنى

دا انا عليا حبة مسقعة وطشة ملوخية انما إية محكيلكش

انت هتدووق بقى وتحكم

اوكى
مستنياك
نورتنى

دعاء مواجهات يقول...

- مفقوع مرارتها من حماتى

انتى عسولة اوى بجد
اول مرة اشووف حدبيتعلم النقاشة فى كورس

نورتينى ومستنيااكى كتير

سلاام

دعاء مواجهات يقول...

- خبيب

عندك حق ودة عزائى الوحيد

شرفتنى زيارتك اوى
اوى
اوى

Hosam Yahia حسام يحى يقول...

بوووست روعه بجد


منك نتعلم يا استاذه دعاء


ربنا يوفقك

دعاء مواجهات يقول...

-mero
المهم ان الواحد يتحرك

كلمة جامدة وعميقة


صح كدة

دماغك بخير ع فكرة

نورتنى

دعاء مواجهات يقول...

- سنو وايت

صح الكلااام

انتى نفسك حاجة جميلة وجديدة اتحدفتلى

ميرسى ع كلامك ياقمر نورتى

دعاء مواجهات يقول...

- رئيسة حزب الأحلام

ياريسة ان غبتى عن العين فالقلب لن ينسااكى

ففية تسكنين وعلية تسيطرين

شرفتينى ياعسولة

دعاء مواجهات يقول...

- همس الأحباب

ومالو ما نتفلسف لنا شوية

احنا ملناااش نفس يعنى ولا اية ما كلو بيتفلسف ياعمنا

ميرسى ع رأيك بجد

دعاء مواجهات يقول...

-myada
طبعا نورتى ياقمر

انا بحب اسم ميادة اوى ع فكرة

وشكلك عسولة اوى كماااااان

نورتينى ومتقطعيش نورك عنى

اوكيشن

دعاء مواجهات يقول...

-onaliza

بجد كلامك كلو صح وانا الحمد لله بعمل منة كتيير

اقتراحات غالية

ومشاركة ايجابية منك ياقمر

ارجو دوااام التواصل بيننا

دعاء مواجهات يقول...

-appy


صح الكلاااااااام

دعاء مواجهات يقول...

- غير معروف

هههههههههههههه ميرسى على ذوقك

دعاء مواجهات يقول...

- النجم القادم


نورتنا يانجم وبعدين العادى ان النجوم صعب تطلع لنا بسهولة ولا يهمك

دعاء مواجهات يقول...

-rovy

أولا انتى تطولى زى ما انتى عاوزة

ثانيا حكمتك الجديدة صح يارب اقدر اطبقها

ثالثا نورتينى وزودتى دماغى حتة

سلااااموز

دعاء مواجهات يقول...

- مطرح ماترسى دقلها

بشكرك ع رايك

ويارب يفضل اسلوبى يعجبك ديما

دعاء مواجهات يقول...

- محمد شمس الدين

لا شووكر على وااجب


نورت يابرنس

دعاء مواجهات يقول...

-nona

لما القلب يبقى سبب ضعف لازم ساعتها يتدفن ويتقتل ويتدااس علية

ميرسى على دعمك ياجميل بس عاوزة اعرف انتى او انت ميين؟؟؟

دعاء مواجهات يقول...

- حساام يحيى

ميرسى ع رايك

لسة بدرى على استاذة دى

ادعيلنا بس

نورتنى

غير معرف يقول...

هااااى دعاء .....ازيك ؟ .....كلامك جميل و احساسك بجد مرهف يدل على صدق مشاعرك تجاه الاخرين .....جميل اننا نحب اللى حوالينا و نتعاون معاهم .....جميل اننا كل يوم يعدى علينا نكتسب فيه معلومة جديدة , صديق جديد ......كل ده طبعا بيفرق معانا , وليك حق تزعلى ان الكورس انتهى , انا مقدرة شعورك ده لانى كتير حسيت بيه لما اكون مشتركة فى اى دورة تدريبية او معسكر , قد ايه بعد ما نكون اتعودنا على بعض و فهمنا بعد نتفارق بسرعة كده .....بس ده هى الحياة كده لقا و فراق.....والجميل اننا نتعلم من اوقاتنا الحلوة دى .....ونتواصل بعد الفراق باى طريقة كانت؟!.....تعرفى انا دايما انا اللى ابدا بالسؤال عن اصحابى حتى لو هم مش سالوا , وجيرانى مع انه ممكن يمر وقت طويل جدا من غير ما هم يتصلوا بيه , لكن مش بيهمنى و مش بانتظر منهم مقابل سؤالى و اسال عليهم انا برضه .....كل واحد له ظروفه طبعا , بس على امل ان التواصل يستمر .....عارفة انى بطول عليكى .....بس بجد الحديث معاكى بيشد .....سلام ..(داليا)..سلام

دعاء مواجهات يقول...

داليا

انا مشاركتك بجد بتسعدنى جدا

وتعرفى انى انا كمان كدة ديما بسال وبقلق عليهم بس بعد ما اشتغلوا وقبل كمان وحياتك مبقووش يعرفونى

وبردو بسال
تحيااتى ليكى ياقمر

بجد ديما منوراانى

بيييس