الخميس، أبريل 03، 2008

لولولولولى بوش إعتزر



بووش إعتزر يامصريين...

يانااااس ياهووووة ياعالم يانايمين ياصاحين ياللى بتفكرول تناموا ويااللى بتفكروا تصحوا شوفتوا اللى حصل؟؟؟؟
(بوش) إعتزر يارجالة إعتزرلنا إحنا آة للمصريين شوفتوا الشرف اللى إحنا فية شوفتوا مكانتنا بقت أد إية فى الدنيا إحنا كدة خلاااص محدش هيقدر يكلمنا فى العالم كلو آة مش( بوش ) إعتزرلنا وهى دى شوية يانااس ....
أحمدك ياارب عيشتنى لحد ما شوفت اللحظة دى... أنا كدة نص أحلامى فى الدنيا إتحققت خلاااص لا لا دا تقريباً أحلامى كلها كمان بس أنا اللى مش مركزة من كتر الفرحة اللى أنا فيها سامحونى بقى وإعزرونى مهو اللحظة دى لحظة تاريخية بردوو مش زى أى لحظة فى التاريخ كلو ....
المفروض بقى يتغير إسمنا من( الشعب المصرى) إلى ( الشعب الذى إعتزر لة بوش) ......
ياة ياااة مش قادرة أوصفلكم كمية الفخر والعزة اللى حاساها دلوقتى دا أنا هاين عليا أبوس الكيبورد زر زر من كتر الفرحة اللى أنا فيها.....
معقولة (بوش) باشا يعتزر لنا على سبب هايف زى دة مش قادرة أصدق ياناس مش قادرة حد يفوقنى أنا حاسة إنى نايمة وبحلم....
إية يعنى سفينة أمريكية كانت بتبلبط فى (مياهها الإقليمية) ولاقت قارب صغير صعلووك يوحى منظرة بالإرهاب وتفووح منة رائحة تنظيم القاعدة ويشبة قائدة إلى حد بعيد الإرهابى المتين ( أسامة بن لادن) مما دفع بعض من قائدى السفينة لإطلاق النار عشوائياً ليقع (أسامة بن لادن) صريعاً ويصاب إثنين من أعوانة..القتلة...
يعنى دفااع مشروع عن النفس ...
ياجماعة الناس ماصدقوا يلاقوا (أسامة) بعد الفترة دى كلها من البحث والتقليب ونكت الجباال والمغاراات علية (قال يعنى مش عارفين مكانة) فلم يشعروا بأيديهم وهى تضغط بكل قوة وعنف على زناد البنادق الآلية بشكل عشوائى فالمهم هو إصابة الهدف
الذى طالما أرق نومهم ....
بس يافرحة ما تمت ......... طلع فى الآخر مش (أسامة)
يعنى تعبهم وحماسهم رااح ع الفاضى...
وطلع واحد كدة تبع البلد اللى كانوا واقفين فيها ساعتها وقاال إية إسموا( بمبوطى) بقى بالذمة دة إسم دة .....
الشئ المهم فعلاً هو الإحباط الشديد الذى أصاب حبايبنا الأمريكان بعد أن خاب أملهم فى إغتيال مفاجئ لواحد كاان قارفهم ومطلع عينهم .......
و الشئ الأهم أن بعض المغرضين اللذين يريدون الإيقاع بيننا وبين الشعب الأمريكى الصديق يعترضوون وينددون ويشجبون ويلوحون ويزمجرون ويهرتلون بكلااام فااضى مالووش أى لازمة ولا يحزنون....... ويقولون كيف؟ ولماذا؟ ومش عارف إية؟؟
مع إن الموضوع بسيييط وواضح جداً وهو القتل الخطأ يانااس
إنتوا مش معايا ولا إية...
طبعاً كلكوا بتسألوا أنا بكتب المقااال دا لية دلوقتى وأنا طبعاً هرد عليكم وأقولكم بكل وضوح ونزاهة وشفافية منقطعة النظير
السبب هو : رسالة قصيرة sms لحبيبنا ورفيقنا (بوش )الإبن
أقولو فيها (ياباشا إحنا شعب فهييم من يومنا وعارفين ومقدرين إن إخواتنا الأمريكان لايمكن أبداً يكونوا بيقصدوا قتلنا أو إستفزازنا لاسمح الله وعلية .. فإن الإعتزار الموجة من سيادتكم لمصر وللمصريين ليس له أدنى ضرورة وليس من حقنا وشايلنها للتقيلة يابرنس ) وكنت عوزاك بس تبلغ حبايبنا اللى أطلقوا النار إننا بندعمهم معنوياً تمام الدعم وأقمنا الحداد 3 ليالى على روحهم المعنوية اللى إهتزت لما طلع أخينا اللى ماات مش( بن لادن)
وعوزاك تصبرهم وتهديهم وتديهم الأمل
وتقولهم الشعب المصرى بيقولكوا خيرها ف غيرها إن شاء الله ولا يكتر علية والزيارة الجاية تصيب ويطلع هو( بن لادن) وساعتها نقيم الأفرااح وليالى الملااح مش أقل من 7 ليالى ....
أنا شايفة نااس (تنحت) وهى بتقرأ إية فية إية أنا قولت حاجة غلط لاسمح الله ياجماعة دا عين العقل وواجب على كل واحد فينا...
إنة يعتزر ويقدم فروض الولاء والطاعة لعمنا الكبير( بوش)
علشان يفضل رااضى علينا وإلا إنتوا عارفين طبعاً هتجوعوا وإنتوا مش حمل قطع المعونة عنكم طب دى هى اللى مصبرانا ع العيشة دى...
وبعدين هو إنتوا هتتلككوا هى جت على حبايبنا الأمريكان طب ما
الإخوة الجيران معانا فووق ع الحدود الشرقية كل يوم والتانى يموتولهم واحد ولا إتنين ولا هى الوطنية (نأحت) عليكوا أوى لما جت من الشعب الشقيق الصديق الرفيق.....
وبعدين ياجماعة دة أجلة ومكتوبالة الموتة دى من يوم ما إتولد الراجل كان ممكن يمووت خنقاً فى طابور العيش أو حتى فى طابور الجمعية يعنى الناس سهلوها علية دا غير بقى ال900 جنية اللى إتخصصوا لأسرتة كمعاش شهرى وشقة إيجار جديد كل دة من المحافظة يعنى كانوا هيحتاجوا أكتر من كدة إية؟؟؟؟
حد يرد عليا ويقوللى ويقنعى يفهمنى....
ولا إنتوا هتفضلوا كدة شعب بتاع تلاكيك طوول عمركم
دا إنتوا مفرووض تفرحولوا مش تعذبوة فى تربتة...
ولا أنا بتكلم غلط؟؟؟؟؟؟؟



على إسم بلدى التاريخ يقدر يقوول ما شاء
المنوفية عندى أحب وأجمل الأشياء
بحبها بعنف ورقة وعلى إستحياء
وألعنها وألعن أبوها وقت الداء
وأسيبها وأهرب فى درب وتبقى هى الدرب
وألعنها وألعن أبوها وقت الكرب

هناك 62 تعليقًا:

Unknown يقول...

لولولولى أنا جاى احيى وأنقط اول نقطة فى احلى فرح لأحلى بوش وآسفين لتعكير مزاج سعادته وبإذن الله نكون لجنة تنبثق منها لجنةتتفرع إلى لجان مصغرةتناقش الإهمال والتسيب بتاع الصيادين دول وايه اللى جابهم فى ساعته وتاريخه فى المكان ده المفروض يقعدوا فى البيت والحكومة هى اللى هتجيبلهم النقطة -أقصد السمك- لحد عندهم ولا ايه يا دعاء

جهاد خالد يقول...

حرااااااااااااااااام

يعني اتقهر عند فرنسا هانم

اجي اكمل قهر هنا

:(

يااااااااارب

هنخلينا عايشين في الذل دا لامتى

انين الحزن يقول...

دودو ازيك ياقمر

قبل ما اقول اي حتجه انتي سايبه نص البوست فاضي ليه كدا ولا انتي بتقولي كلام في سرنا بتوشوشيني يعني ولاايه نظامك
بالنسبه بقه للبوست بجد كلامك جامد ربنا معانا وينتقم منهم كلهم


انا جبت الدستور بس لسه ماقرتوش

سلاموووووووز ياجميل
وزة

موناليزا يقول...

لا معلش بقى انا زعلانة من بوش جدا لسه جاى يفتكر بعدها بكام اسبوع ما كان يستنى للاربعين احسن ولا كان بيحوش تمن المكالمة ولا بيشحن رصيد عشان يبعت رسالة لا بجد مالوش حق اخص عليك يا بوشبوش مكانش العشم

بطوط حبوب يقول...

لا انا علان منه
مكنش العشم
كده عامل فرق بنا
ايه يعنى قتل واحد؟؟
ما احنا كتير
بجد بجد زعلنى

همس الاحباب يقول...

يا سلام ده احنا شعب مفترى بجد
فعلا الراجل تنازل وتواضع واعتذر
يعمل ايه يبوس على ايدينا مثلا
ده يبقى حتى حراااااااام وكتير
وما هو كده ميت وكده ميت انتوا اتحسبوه علينا واحد
بيفكرنى بفيلم المولد بعد انهيار العمارة .
مش عارف اقولك ايه غير لسه انبقى صيد سهل بعد كده لاحفاد القردة والخنازير
ونهاردة اعتذار بكرة يا ترى ايكون ايه
تحياتى خالد

sigon1977 يقول...

الصديقة العزيزة دؤدؤة المرادى مية مية الواقع انا سعيد بالمستوى الجميل دة و الاهتمام بالناس و مشاكلهم اللة ينور و ينجيكى من المباحث sigon_1977@yahoo.com

شـمو نشـادر يقول...

هم يبكى وهم يبكى برده .. حاجه بقت تخنق بجد .. بس مش غريبه على رأيك بأمارة ممدوح اسماعيل اللى سابوه يهرب واكياس الدم وغيره وغيره .. خليها تيجي من سفينة امريكيه ارحم ..
على فكرة حجم الفراغ كبير جدا جدا جدا ابقى شوفى الموضوع ده ..

روابط يقول...

يعنى بوش بوش اعتذر خلاص , الف بركة , لحق نفسه قبل مصر ماتاخد موقف وانتى عارفه مواقفنا خصوصا موقف عبود واحمد حلمى هههههههههههه

غير معرف يقول...

هكذا فليكن اللموع والابداع والفكر والوضوح ليكن دائما هاكذا يدك التى تكتب قوبة مؤثرة معبرة وقلمك ايضا صارخا بكل قوية مدويا فى كل مكان اشكرك الى المزيد.

فرنسا هانم يقول...

عموما قبلنا الاعتذار
ومواطن ورااااااااااااح
وكل عام وانتم بخير
ولا يزعل نفسه بوش ابن ام بوش
هو المصريين لهم تمن ؟؟؟؟؟؟؟؟؟؟؟

رئيس جمهوريه نفسى يقول...

مش احنا بس الشعب الى اعتزر ليه رئيس امريكى سبق لبيل كلينتون الاعتزار عن واقع تجسس للصين حكومه وشعب لما وقعت طياره التجسس الامريكيه

m.sobhy1990@gmail.com يقول...

مساء الخير يادودة

بجد يادعاء أنا قرفت من كل اللى بيحصل حواليا
إمتى الواحد يرتاح
مش عايزها يوتوبيا
بس حاجة تتعاش أحسن من كده

معلش على الرغى بس كنت مخنوق شوية

سلام

غير معرف يقول...

سؤال نفسى حد يجاوبنى عليه
اما لهذا اليل من فجر
لو تعرفي جوبينى قبل ما انتحر

T يقول...

متكبريش الموضوع
عادي
زي اي حاجة بتحصل
عادي
اللي مكنش عادي ان ضابط امريكي يعمل حساب لمواطن مصري حكومته مش هتسأل عليه
عادي

دعاء مواجهات يقول...

-ayman badr
تماااااااك كدة يابرنس عندك حق فى كل حرف مش بس كل كلمة

منورنى

دعاء مواجهات يقول...

- النجمة الصامدة

الله هى الحقيقة بتزعل بقى ولا إية
أمال نجمة إية وصامدة إية
إجمد كدة يامعلم

ربنا معااااااانا

دعاء مواجهات يقول...

- أنين الحزن

إزيك ياوزتى ياقمر

خلاااص بقى ظبطنا كل حاجة
وهاتى الدستور الأربع الجااى
إحتماال كبير يتنشرلى ف صفحة الرأى أو ضربة شمس

دعاء مواجهات يقول...

-monaliza

معلشى بقى خليكى

انتى الكبيرة وسامحية
ما انتى كل مرة تعديهالة
هتيجى ع التافهة دى بقى؟؟؟

دعاء مواجهات يقول...

- بطوط حبوب

قولو بقى يابطوط

مش عارفة لية عامل فرق يعنى

دعاء مواجهات يقول...

- همس الأحباب

ياخالد النهاردة إعتزر بكرة أكيد هيطنش

هو فية فرق بين الحبايب؟؟

دعاء مواجهات يقول...

shahin-
ينجينا وينجيك


والشعب كلة من الكوميديا السودا اللى عايشينها دى قوول ياارب

دعاء مواجهات يقول...

- أسامة أمين

عندك حق ياباشمهندس

ولسة ولسة ولسة

دعاء مواجهات يقول...

- حازم سويلم


أيوى كدة يعجبنى الناس اللى عارفة آثار بلدها صح كدة

بيس ياماان

دعاء مواجهات يقول...

-محمود

شكراً ع البؤين دوول

دا أقل واجب
بس يهمنا رأيك بس

لية مسجل مجهول؟

دعاء مواجهات يقول...

- فرنسا هانم

بية باشا


إية يانااس النور دة بس مش قادرة أصدق نفسى

لأ بس لازم كنتى قبل ما تيجى تقوليلى علشاان أعمل إستعدادى وأفرشلك المدونة كلها ورد

والله زيارة كريمة وعزيزة ياقمر المدوناات

نتمنى تتكرر...

دعاء مواجهات يقول...

- رئيس جمهورية نفسى

يعنى على أساس إنهم كانوا بيتجسسوا ولا علشان قمر التجسس سقط عندهم سهواً؟؟

أحب أعرف بردو

دعاء مواجهات يقول...

- محمد صبحى

معلشى ع إية بس
أماال إحنا عاملين المدونات دى ليى
مهو علشان نرغى ونفضفض ونطلع اللى جوانا

حاوول تعمل الحياة اللى بتتمناها ومتنتظرهااش تجيلك لوحدها

وف الاول والآخر دة قدرنا

دعاء مواجهات يقول...

- غير معرووف

إوعى تتجنن وتعملها

وتنتحر
لأن ولا حاجة تستاهل

ومتاخدش كل حاجة على قلبك كدة وكبر وعدى وخلييك كبيير


وأحب أطمنك الليل إتصل بيا إمبارح وقاللى الفجر جااى فى السكة بس المواصلات زحمة فا إتأخر شوية بس

متقلقش..

دعاء مواجهات يقول...

-tamer

لالالا إنت فاهمنى غلط أنا ولا مكبرة الموضوع ولا بتااع
بالعكس
انا بعملو (مينى مايز) لأن الناس مزودينها حبتبن

غير معرف يقول...

اولا احب احيكى على اعتزازك ببلدك المنوفية والمقال حلو قووى وربنا يوفقك

MKSARAT - SAYED SAAD يقول...

من اساليب النقد اللي بحبها النقد الساخر
كملي في الطريق دة هتبقى ممتازة
دمتى بكل ود
سيد سعد

العراف يقول...

اولا ازيك يا دعاء انا سعيد بانى اول مره ادخل مدونتك وبجد جميله وموضوع هايل واللى الامام دائما دعاء ربنا يوفقك وعلى فكره شكرا على الكلام اللى انت قولتيه عليا بس انا ما استهلش ده كله شكرا دعاء

غير معرف يقول...

مين بوش اللى انتى بتتكلمى عليه ده يكنش ضابط شرطه اوخباز ففى فرن عيش بلدى او حتى تاجر حديد000؟منتظر الرد

دعاء مواجهات يقول...

nona
سانكس ياقمر دا شئ بسيط

دعاء مواجهات يقول...

- سيد سعد

أكيد السخرية عندنا احنا كمصريين مهمة جدا لأننا بطبيعتنا شعب غير نكدى حتى فى احلك الظرووف إدعيلنا.......

دعاء مواجهات يقول...

- العرااف

على فكرة أنا صعب جدا اجامل حد يعنى كل كلمة لازم تكون فى محلها
اوكى وانت بجد تستاهل

دعاء مواجهات يقول...

- نادر

بووش معقوول متعرفش بووش أيوى عليك نوور هو دة...................

ولد مصري يقول...

السياسة وسنينها

أول مرة أخش عندكم كده الاقي الدنيا مولعة وبتجيبوا في سيرة المعلم الكبير.

بس أنا اللى غلطان مواجهات ايه بس اللى أدخل أتفرج عليها هوه انا ناقص

على العموم مادام جيت عندكم لازم أشهد شهادة حق الكلام موزون

وعلى العموم نتمنى تشرفونا بزيارتكم في همسات مصرية ويومياتي

تحياتي

canary يقول...

طب خليها كمان زغروطه عشان الحبايب وهو انتى مستهونه لما البيه الباشا رئيس اكوى دوله فى العالم يعتذر لناس زيكو؟وعلى فكرة هو معتذرش هو اتأسف بس لان دى ليها معنى ودى ليها معنى مختلف فى السياسه اتأسف يعنى اعلن حزنه وبس لكن اعتذر يعنى تحمل المسؤليه ويقدم تعويض مناسب واحنا طبعا لأننا اغنى واكرم منه مش عاوزين منه حاجه لأن الصياد الشحات دة الدوله هى اللى هتصرف على عياله من بعدة .
تعرفى ان المدونات دى هى السبب الاكيد فضغط دمى اللى بقى بايظ دة
على فكرة صحيح كنت عاوزة اسئلك سؤال
انتى دعاء مواجهات بتاعه الدستور؟
والا دة تشابه فى الاسامى القتاليه والثوريه بس؟تحياتى ليكى

Mona Shereif يقول...

هههههههههههههههههههه
هو مين بوش ده صحيح؟؟؟؟

هم يبكى وهم يضحك

الأستاذ يقول...

لأ خالص طبعاً مش غلطانة حضرتك
لكن كل الفكرة إنه هو اللي غلط إنه يموت في وقت زي ده
م كان يموت بدري شوية علشان عيلته تاخد 900ج معاش ومكافأة نهاية الحياة
وشقة إيجار جديد تلاقيهم هيدفعوا فلوسها من ال900ج
بدل م يفضل كان عايش كدة وقارف عيلته وكلهم عايشين في ضنك
أهو ربنا سهلها هو راح من هنا وهما جالهم الرزق من هناك
يلا وللبمبوطية حظوظ
أصل محدش بيبفتكر حد غير لما يموت يا إما يكرموه أو يعملوله تمثال وكدة
أو يدوا عيلته فلوس يتمتعوا بيها بعد م مات المهم إنه ميشوفهاش وهو عايش وزيه زي غيره محدش يعرفه في الحياة خالص .. مرة واحدة الشعب يسمع عنه عيلته تلاقي الحكومة بتصور معاهم في إعلانات برسيل ويكسبوهم الجنيه الدهب
مع أطيب تمنياتي إني أكسب المرة الجاية
تحياتي

مصر اللى مشفتهاش يقول...
أزال المؤلف هذا التعليق.
مصر اللى مشفتهاش يقول...

اقتراح تغير اسم البلد ده جااااامد أوى.. اعرضيه على صاحب البلد ولو عجبه بكرة هتبقى حاجة كبيييييييييييييرة اوى..:D

غير معرف يقول...

العزيزة دعاء احييكي علي اسلوبك الساخر والبسيط الاسلوب والعميق الفكرة في كتاباتك وبالنسبة لموضوع بوش فهو لم يعتذر لكنه عبر عن اسفه بس وفيه فرق بين الاتنين في العلاقات الدبلوماسية بين الدول وعموما اعتذر عبر عن اسفه ولا حتي كح مش هتفرق وياما اشقائنا كتير ماتوا ع الحدود ومحدش اتكلم
تحياتي هاني فؤاد

Hosam Yahia حسام يحيى يقول...

ممممممممم



ياريته ما اعتذر

يكفينا الشعور باف

ba7re يقول...

لولولولى
انا من مصر
يعنى شعب ياخد على قفاه و ميقولش لأ لأ
و يعنى احنا اللى غلطانين و نستاهل ضرب الجزم
أسفين يا بابا بوش
اسفين يا ماما يو اس ايه
طويل العمر يطول عمره
و ينصره علينا هااااى هىىىىى

مدونتك ظريفة اوى
سلام :)

واحد من البلد دى يقول...

والله يا دعاء يا بنتى أنا طول عمرى باحب(البوش)ده..وعمرى ما زعلت منه أبدا ....يا خرابى ....يا لهوى....هوه فيه حد يزعل من (البوش)..بعد إذنك بقى يا بنتى أروح أجيب طقم السنان بتاعى.....بدل ما انا عمال اقول على (البوس).....بوش......ههههههههه أرجو الزيارة

محمد عبد القوى يقول...

عندك حق يا معلمة
المرحلة الجاة هى امريكا ثم امريكا ثم امريكا
وعلى رأى القرموطى هما بيطلعوا عين ابونا عشان المعونة بس حقهم
اسيادنا وتاج راسنا
وبمناسبة المنوفية اهديك رائعة محمد فؤاد ومدحت العدل ..يعنى اية كلمة وطن

دعاء مواجهات يقول...

alad_ masry

سياسة مين وبتاع مين؟؟

حد جاب سيرتها؟؟؟

ربنا ما يدخلها وسطينا ويجعل كلامها خفيف علينا

دا احنا بنتكلم عن راجل حبيبنا وصاحبنا

دعاء مواجهات يقول...

canary

الف مليوووون سلاااامة عليكى وع ضغك ياقمر طب دى حتى المدونات دى هى النسمة اللى بتخفف عن الواحد منا

آها انا دعاء مواجهات بتاع الدستور
يعنى كسااب
يعنى الميل وآخرة
يعنى ضربة شمس

وانا وانت

دعاء مواجهات يقول...

some times

اية محدش يعرف الواد بوش بتاع الفول اللى ع الناصية

اية الأمية دى؟؟؟؟؟؟؟؟

دعاء مواجهات يقول...

الأستاذ

يعجبنى انا الناس اللى هارشن التيتة وجايبين اخرها


لا بجد استاذ فعلا

سانكس اوى

دعاء مواجهات يقول...

مصر اللى مشفتهاش

إية ياعم هى سايبة؟؟

بس الا قوللى هو مقر النايب صاحبها دة فين ف الارض ولا القمر؟؟؟

دعاء مواجهات يقول...

هانى فؤاد

أحب اشكرك على الإيضاح طبعا

وكمان على اهتمامك وتعليقك

وادينا بنتعلم ادينا ادينا بنتعلم...

دعاء مواجهات يقول...

ba7er

ايوى كدة اعترف بغلطك اعترف

هااااى هييييئ

دعاء مواجهات يقول...

واحد من البلد دى

ههههههههههههههههه


وابقى هاتلنا طقم معاك هدية الزيارة الجاية يمكن نحتاجة

دعاء مواجهات يقول...

محمد عبدالقوى

معونة مين ياعم هو احنا حتاجينها اصلا


دا الخير مكفى وزااااااايد ع الآخر بطلوا تشاؤم بقى

الف شكر يامعلم ع الهدية بد بمووت فيها اصلا منتحرمش..

غير معرف يقول...

عاوزك تكتب حاجة يا دعاء عن الاضراب وشكله كان ايه عندكم بس خليكي حذرة واتكلمي براحة خالص لحسن بقوا بيقبضوا ع المدونين الايام دي وياريت قبل ما تكتبي حاجة امسحي بيناتك الشخصية عشان محدش يعرفك بس هم كدا كدا هيعرفوا يوصلولك هههههههه انا عقدتك متخافيش احنا وراكي وهنعملك حفلة قصدي حملة تضامن معاكي وهتبقي مشهورة ياعممممممم زي اسراء عبد الفتاح ايه رايك بجد اكتبي حاجة عن الاضراب وكل واحد يكتب عن تجربته مع الاضراب في تعليقاته
تحياتي وتقديري هاني فؤاد

دعاء مواجهات يقول...

هانى فؤاد

إية ياباشا بس انت عاوز تضيعنا ولا إية إضراب مين ياعم وبتاع مين هو فية حاجة إسمها إضرااب أصلا أنا عن نفسى مسمعتش عنة

انت سمعت؟؟؟

Diyaa' يقول...

قصدك اعتذر ؟ :))
عادي بقي..اللي بيحكم يهمه الكرسي مش كام مصري بيموت أو هيموت
وكفاية إنه اعتذر..المرة الجاية هيطلب تعويض عن الذخيرة المهدرة
يلا..حسن الختام

دعاء مواجهات يقول...

- diyaa

والله اعندك حق المرة الجاية

هيطلب تعويض لان المصريين المطلوق عليهم الرصاص ميستحقووش تمنة طبعا

تحيااتى لييك

نورتنى