الاثنين، يوليو 11، 2011

كــلام .. وخــلاص







تعرف من زمان أووى محستش بإحساسى ده


من زمان أوى محستش انى بفتقدك وانك بتوحشنى

كنت بطلت خلاص أفتكرك كل ما تضيق بيا واتخنق من كل البشر

كنت بطلت حتى تيجى ف بالى لما أزعل من أقرب الناس ليا ..

مش عارفه ليه كل الذكريات اللى كنت خلاص بدأت أرميها ف سلة المواقف السخيفه رجعت تانى تلح عليا .. وتبصلى بكل تحدى وتقوللى انها هتفضل موجوده ومش هترحل عنى  ..

تعرف .. أنا مبقتش عاوزه أسمع أى أخبار عن أى حاجه أو أى حد .. عندى اشباع من الناس والحاجات .. ووحشتنى نفسى أوووى

وحشتنى القعده لوحدى ف مكان مفيهوش غيرى انا وزكرياتى .. مع كل الحاجات والناس اللى بحبها ..

وحشنى أفضى دماغى من كل حاجه ف الدنيا ومردش حتى على رقمى الخاص ..

زهقت أوى من كمية الناس اللى مبتتعاملش معاك ولا تضحك ف وشك الا عشان المصلحه وبسس .. سخيفه اوى الحكايه دى .. مش كده ؟؟

تعرف أنا عاوزه إيه الوقتى .. عاوزة أقعد قدام البحر أكلمه ويرد عليا .. مش عاوزة ناس خالص حوليا .. هما أصلاً وجودهم زى عدمه .. بيعملو تشويش على الأفكار والإحساس وكل حاجه ف الدنيا .. الدنيا بدونهم أحلى كتيير صح؟؟

بقيت بخلص شغل ومش عاوزة أرجع البيت .. الشغل نفسه بقيت بعمله بملل شديد وبشيل هّمه بطريقه جامدة جداً مع انو بقى حاجه معتاده بالنسبه ليا خلاص ..

تقريباً الحاله اللى أنا فيها دى اسمها ســـّدة نفس .. من الدنيا .. ويمكن تكون رغبه فى الوصول لدرجه ما من الإكتئاب ..

تعرف لما كل حاجه تفقد نكهتها وتبقى ماسخه أنا بقى حاسه دا أوى فى اليومين دوول ..

تعرف لما تحس ان كل الحاجات والناس جايه عليك وانت معندكش حتى رغبه ترد على كلامهم او تدافع عن نفسك ..؟؟

أنا بقى كل دا ف نفس الوقت ..

تعرف أنا محتاجه ايه الوقتى ؟؟

محتاجه تبص ف عينى وترد على كل الأسئله اللى نفسى ألاقيلها أجوبه بدون ما أتكلم ولا كلمه ...

وف نفس الوقت مستحيل دا يحصل ..

علشان مقدرش أخون نفسى تانى .. !!







هناك 5 تعليقات:

Foxology يقول...

وحشنى أفضى دماغى من كل حاجه ف الدنيا ومردش حتى على رقمى الخاص

ده احساس عام على فكرة !

الخط الدرامى ممتاز

تحياتى

انا حره يقول...

تسلم دماغك واديكى يادودو

هو دا بالظبط

دعاء مواجهات يقول...

فوكس

هو فعلا ربما يكون احساس عام وربما يكون فيرس ف الجو

ميرسى بجد ..

دعاء مواجهات يقول...

انا حره

تسلمى ..

نورتى

Unknown يقول...

كلامك جميل اوي عجبني وأثر فيه فعلاً