الثلاثاء، يوليو 27، 2010

حكاية .. كـــدبة

بعتذرلك دلوقتى بس
عشان مش هينفع ف نص القصه
نغير الحدوته
بعترفلك .. بالقوة والجبروت
وبقولك بجد مش هينفع
تكمل الحدوته
بنهاية تانية وابطال خايبين
مسرحنا للأسف مفيهوش
بنى آدميين
قادرين يحافظوا ع البطله
الحلوة الصغنونه
اللى كانت ف يوم
بريئة
....
سيبنى أقولها ف مرة بس
كفايــــــة .. كدب
لا الحب كان ف الأصل حب
ولا الخيانة كانت جديدة
الحكاية م البداية للنهاية
كانت مجرد تمثــيل
والبطل اللى صدق قلبه
يمكن ماكانش بيكدب عليه
بس بردو مقالش حـــق
....
من حق البطله ترجع
زى البداية بريئة
ومن حقك تفوق وتعرف
ان الحكاية مكانتش جـــــد
ولا كنت يوم كومبارس ولا هى
تنفع تكون بديل
....
سيبها وابعد يمكن ف يوم
تقدر تلاقيلها قلب
قادر يحزن بجد
ويفرح بجد
لو ف يوم شاف الضحكة مرسومة
على شفايف كانت ف يوم بريئة
....
وعلشان مش هينفع ف نص
القصة نقلب الحدوتة
يبقى أحسن
نوهم الجمهور
ان البنوتة الحلوة الصغنونه
اللى كانت عامله بطله
مع انها ف الأصل بريئة
ماتت عشان
مبقاش خلاص مكان
للبراءة
ونقولهم
قتلها الكدب
اول ما يوم صدقت
انها بطلة
وبدأت ف الكدب
....
وانت كفاية عليك
تعيش ف وهم
وتصير لوهم

هناك 10 تعليقات:

Foxology يقول...

اولا : حمد الله ع السلامة

ثانيا : الكلام جميل جدا والجميل اللى فيه التصوير على انها مسرحية وان الظروف ممكن تخلينا نغير الأحداث ونوهم الجمهور كمان ان الأحداث طبيعية مفيهاش تغيير

تحياتى

رحاب صالح يقول...

حبيبتي دعاء
الاول الف حمدالله بالسلامة يا جميلة ويارب تقومي بالسلامة
كلامك وجعني يا دؤدؤ وبجد حسستيني حكاية بنت بريئة كانت بتحب الحب ولكنها بريئة متعرفش ان الحيادة غدارة وان اللي حبته كان بس بيلعب بيها
تحياتي يا قمر وووحشاااني

t3ban يقول...

مين الي يقدر يؤجع البراءة
تحياتي

همس الاحباب يقول...

كل سنة وانتى طيبة
ورمضان كريم
*كما تعودنا منك على فعل الخير
ندعوك للمشاركة فى يوم خير جديد
التفاصيل هنا
http://kouskoza7.blogspot.com/2010/08/blog-post_12.html
و هنا
http://hams07.blogspot.com/2010/08/blog-post.html

engy يقول...

حمدلله على السلامه
لكن للاسف فقدت يا وطنى البكارة

دعاء مواجهات يقول...

فوكس

الله يسلمك وميرسى رايك ف الكلام

منور

دعاء مواجهات يقول...

رحاب

الله يسلمك

هى دى الحياة او لنقل احدى وجوهها منورة

دعاء مواجهات يقول...

تعبان

كل حد يقدر يعمل دة

لانو مبقاش زمنها نورتنى

دعاء مواجهات يقول...

انجى

جامدة يابنتى اوى الكلمة دى ..
الله يسلمك

دعاء مواجهات يقول...

ال