الأحد، ديسمبر 27، 2009

يخرب بيت الضمير ..




يخرب بيت الضمير

ضميرى وجعنى
قولت أسكتوا

جريت ع الأجزخانة
وجبت الدوا

وخلصِت إزازة
وراها إزازة

ولسة شغااال
الوجع

أقولوا كفاية
سيبنى أنام
شوية

وإبقى إوجعنى بكرة
يقوللى

بتحلم دا دة هو وقتوا
ولازم أطهقك

ضميرى وجعنى
وذاد الوجع

ندهت الولية
تدعك شوية
وذادالوجع

ضميرى وجعنى
فقولت أقتلوا

وجبت المسدس
وقولتوا
سَلـــــــــــــِــــــــــم

قاللى لايمكن
أكسر كلمتك
وقام فاتحلى صدرى
وقال يللا نشن..

بصيت وقولتلوا
عاوز كام

وتسيبنى ف حالى أنام
رد بجمود
وبص بصمود
وبان الجحود ..

وقال الضمير
نص التكية ...

قولتوا لااااااااة

دا انت بتحلم
ونشنت فجأة

وهوووووووووب
إترميت قتيل

ومٌت بردد
يخرب بيت الضمير..

هناك 16 تعليقًا:

شمس النهار يقول...

ازيك
كل سنه وانتي طيبه

اعتقد ان ده كله معناه
يعيش الضمير حر مستقل صاحي


وحشتيني


سلامي

محمود البدري يقول...

كل سنه وانتي طيبه وبخير
بمناسبه عاشوراء والسنه الجديده
ويا رب في 2010 تكون كل الضمائر صحيت

واسر البلد اتفك

SHAPE YOUR LIFE (ABOALI) يقول...
أزال المؤلف هذا التعليق.
SHAPE YOUR LIFE (ABOALI) يقول...

اممممممممممممممم
وانتى كنتى عايزاه يسيبك تنامى براحتك ؟؟
طب الحمد لله انه انتصر فى النهايه وطبعا نقول الحمد لله على الضمير المستيقظ الحى .
اشكرك على حسن انتقاء كلماتك
وتقبلى مرورى

Foxology يقول...

ايوووة هو الضمير اللى جايب لنا الكافية ده :))

تحياتى على الكلام الجميل :)

صوت من مصر يقول...

على فكرة الجزمه دى عندى اختها يا دعاء

صوت من مصر يقول...

على فكرة الجزمه دى عندى اختها يا دعاء

mohamed ghalia يقول...

مهو النعوعيات بتاعتنا دى متعرفش تركن الضمير على جنب

adel يقول...

ضمير ايه ؟؟؟
مش فاهم معني الكلمة دي اشاسا !!!!!

أحمد عمارة يقول...

شكرا على الخاطرة

المفروض يريحونا شوية .. وشركات المحمول تعمل خدمة عشان ضميرنا يستريح


شكرا لاستخدامك خدمة الضمير .. رصيدك الحالي لايكفي لعمل أي شيء ف المجتمع.

خواطر شابة يقول...

لو كان الجميع يملك مثل هذا الضمير الحي ماكانتش خربت

mimi يقول...

يعمر بيت الضمير
اللي ساكن في قلبك
اللي بيغذي حبك
لناس تانية كتير

يعمر بيت الضمير
اللي عايش معاكي
علشان يحرس خطاكي
لحظة بلحظة في حضن كبير

"حمد الله علي السلامة"

هناء محمود يقول...

ربنا يديم علينا نعمة الضمير وعام سعيد إن شاء الله

Ehab يقول...

ده ضمير معندهوش ضمير

ضميرك ده صاحبك
وشغال براحتك

بيسكن يطنش لو انت مطنش
ويصرخ ويزعق لو انت هتزعق

لكن والغريبه
كلامك بينكر
وبتقولي انه بيوجع ويحرق
ده تبقى غريبه وعجيبه يا بنتي
مادم لسه فيكي ضمير مش ناسيكي
وعمال ينادي ويصرخ ويزعق
أنتي في واقع حقيقتك يا سكر
في نفس اتجاه ورأيك كرأيه
دي حبة لماضه وعند من سيادتك
قومي يالا فزي وصالحي ضميرك
وشوفي هيطلب ايه تعمليه

بلاها مسكن
بلاها مسدس
هيفضل يصرخ لحد ما تصحي

سلاااااااااااااااااااااااام
اخوكي ايهاب

!!! عارفة ... مش عارف ليه يقول...

ضمير أيه

اللي انت جاي تقول عليه

معلش اسمحي لي اهيس شوية

اصل الموضوع ده بقى متعب أووووووووي


كل سنة وأنت طيبة دعاء

والسنة الجاية إن شاء الله نبقى ناخد بوكيه ورد نحطه على النصب التذكاري

بتاع المأسوووووف على شبابه .. الضمير

دعاء مواجهات يقول...

أرد على التعليقات بعد قليل

...