الجمعة، سبتمبر 11، 2009

بحــــبكـــم .. بس





من زمان ماقعدناش مع بعض ولا اتكلمنا ولا رغينا

ولا قولنا كلام فاضى وملوش لازمة ممكن تكون البوستات نفسها كدة
انما الكلام معاكو والفضفضة حالة تانية خالص بجد

عنوان البوست جه ف بالى بدون مقدمات لما جيت اكتب العنوان
لاقيت انو مهم اوى اننا نقول لبعض بإستمرار إننا بنحب بعض .. وبس

عاوزة اتكلم عن أكتر من حاجة ومحدش يقوللى كفاية او اسكتى بقى
انا طالبة معايا رغى

اول حاجة

لقاء الإفطار الأخير بجد كان جميل اوى وفرق معايا فى حاجات كتير
مكونتش متخيلة انو يفرق معايا فيها
شوفت ناس كنت بجد اتمنى اوى انى اشوفها أو مجرد انى أكلمهم ع الميل

زى أستاذ وليد عارفة مش عارف ليه ...
أحياناً مبتبقاش فية كلمات ممكن تقوم بدورها فى وصف أشخاص
بالدرجة اللى يستحقوها
منهم حضرتك
يمكن علشان كدة عرفتك بدون ما حد يقوللى انو انت
وعشان كدة بردو انا هكتفى بالصمت أمام شخص مثلك ...

كمان نور الدين فرحت اوى انى اتعرفت عليك
ابتسامتك بتدى أمــل

الواد عادل : كنت نفسى أشوفوا وعرفتوا من غير ما حد يقوللى انو هو بردو
وهو حد زى العسل كدة ويتحب على طول
انت تفصد اية بإن شخصيتى غير اللى فى المدونة اوعى تكون كنت فاكرنى كئيبة..؟

أستاذ عمرو : يارب ميكونش الصمت دة وراة حـــزن

كيارا : عرفتها بالصدفة وفرحت بيها اوى بت جدعة وطموحة ودماغ ..

ايناس نهر الحب وأختها : أعدت اكتشافهم ناس جميلة من جوة وبرة..

والبت كيكى : رفيقة الكفاح بتوحشنى رغم اننا بنتقابل كتير اليومين دول
ودا مؤشر يقلق .. ههههههههه

جنة : كنت نفسى أوى أشوفك فى اليوم دة بجد انتى مش حد عرفتة ع النت وبس
ياريت تطمنينى عليكى.. وحشتينى

نيجرو : متــــى تعــود ياأصيـــل ؟؟

بالتأكيد دى مش تغطية لليوم بس مجرد حاجات وأحاسيس وصلتنى
من اليوم دة ماكانش ينفع أخبيها على نفسى
وربنا يارب يجازيكى خيراً يادليا وخالد وفاتيما وخيخة وكل المنظمين والحاضرين
فى اليوم دة

الناس دول بيدونى أمل فى بكرة
وربنا يارب يسعد قلوبكم كلكوا زى ما أسعدتونى وفرحتوا قلبى...


تانى حاجة

ناس كتير أوى لما بيشوفونى فى الحقيقة لأول مرة
مش بيصدقوا ان هى دى الشخصية اللى بتكتب الكلام بتاعى دة
وبيقولولى احنا كنا متخيلين حد ضخم وكشرى وكئيب
لدرجة انهم شككونى فى نفسى من كتر ماهما مش مصدقين انى انا مواجهات
ويقولولى انتى شكلك بنوتة أوى وصغيرة
وحد بيحب الهزار والتهريج والضحك

وبصراحة أنا كدة فعلاً مش بحب الكآبة
حتى ناس كتير شاوروا ع النقطة دى ف كتابتى
وكان ردى إن المدونة دى بعتبرها أنا بكل مميزاتى وعيوبى وأفكارى وما يحدث لى وما أشعر به
بالتالى بيطلع فى كتابتى وإلا يبقى التدوين ملوش لازمة
بعتبر نفسى حد حقيقى وبالتالى بردو مينفعش أمثل أو أهرب من الواقع اللى بمر بيه...
فبتطلع الكتابة كدة
كمان أنا برتاح لما بطلع كل حاجة حاسة بيها وبتأكد انى لسة عايشة مع كل حرف بيصدقة القارئ ويحس انو عبر عن حاجة جواة
ودى أقصى لحظات متعتى
م الآخر يعنى .. متزعلوش منى لما تلاقوا كتابتى حزينه

انا اول ما اخترت إسم مواجهات دة كان قصدى بيه ان محدش يهرب من مشاكلة
ولا أى عقبة فى حياتة ويواجهها
يمكن لأنى أنا نفسى عانيت من ناس استخدموا معايا أسلوب الهروب
ودة كان بيألمنى جداً
وكمان أنا بحب مهربش من أى مشكلة أو موقف وأكون أدة
لأن اللى يخاف من العفريت يطلعله

فبالتالى احنا نطلع للعفريت قبل ما يطلعلنا ...

مش حتة خناق ولا مشاكل ولا شغب يعنى زى ما البعض بيعتقد
والمواجهه فى اغلب الأوقات بتبقى مع نفسى كمان .. ودا مش عيب
بالعكس دا شئ صحى جداً ...

تالت حاجة

أنا نسيت أقولكوا إنى من 3 أسابيع فزت فى مسابقة أدبية اسمها
عيـــش وحــلاوة
بقصيدة فصحى تم نشرها فى كتاب موجود حاليا فى الأسواق
اللى يحب يشوف الكتاب هو فى مكتبة البلد امام الجامعة الأمريكية
وإسمة عيش وحلاوة بردو ...
والقصيدة الفائزة هى دى..

رابع حاجة
البوست دا كان هيعفن ع الجهاز كتباة من 4 أيام ومفيش نت
فبالتالى بردو محدش يزعل من قلة زياراتى ومتنسونيش ويارب اكون حد بيفرق معاكو
بشكل ايجابى ويارب ما يحرمنى منكم ... ابداً أبداً أبداًً ...

وادعولى كل ما تفتكرونى بالثبات والقوة وازالة الكرب والظلم عنى

خامس حاجة

اجتهدوا بقى وشدوا حيلكم فى الأيام الأخيرة من الشهر الكريم
وأكثروا من الدعــــاء ..
تقبل الله منا ومنكم صالح الأعمال والأقوال والأفعال

سبحان الله وبحمد سبحان الله العظيم
اللهم صلى وسلم وبارك على سيدنا محمد فى الأولين والآخرين
وفى الملأ الأعلى إلى يوم الدين .

هناك 30 تعليقًا:

adel يقول...

هههههههههه
حمدالله علي السلامة
عاجبك اسيب المذاكرة و اجي ارد عليكي هنا
مممم بس يلا مش مشكلة

انا مش قصدي متخيلك كئيبة بس مش بالضحك و الهزار ده يعني
ماعلينا موضوع كبير قوي قوي
ههههههههههههه

عموما وصلك خبر يوم الحد ... في لقاء تفاصيله عن دايلا قوس قزح
-------
مبروك الجايزة :)
وعقبال كده جايزة احسن شاعرة في مهرجان ابوكبير للشعر الفلاحي
-----------
النت النت ... النت لما لما لما لما لما
هههههههههه
كويس انه جه

نعكشة يقول...

الف مبروك يا قمر على القصيدة

ربما سأقرأها فى وقت لاحق

...

كل سنة وانتِ طيبة

........

سلام عليكِ

Eslam Eldosoky يقول...

الاستاذة اللي مش كئيبة
دعاء مواجهات
جميل أنك تجديدي حبك للناس اللي بتحبيهم
بكلمه بسيطه ومعبرة بحبكم وبس أكيد تكفى
وأكيد كل اللي عرفك هيقولك زيها
المواجهه شئ مش صعب ولا حاجه
لكن محتاجه أكتر من الصدق بشوية
محتاجه حبة شجاعه
تحياتي
ومبروك على العصيدة
:)
القصيدة يعني

Kiara يقول...

ههههههههههههههههههههههه عثل وربنا
وانا بقي بموووووووووووووت فيكي ياثكرايا

بس اعترررررررررررفي حالا بالا ما المقصود بدماااااااااااااااغ ؟؟

يلا انا راجعه تاني بس بعد الاحتراف الرسمي فهمى نظمي

Kiara يقول...

انا رجعت بس مش الرجعه اللي قلت عليها في الاول بس رجعت اقول بقي ان بجد اليوم دا كان من اجمل الايام اللي مرت في حياتي :)

Kiara يقول...

اه اه نسيت

وقابلت ناس بجد ماشاء الله عليهم

Kiara يقول...

حلي فكرا انا لسه مرجعتش اءاءاءاء اما تحترفي ياكمييييييييل ابقي اكي اكمل وكفايه رغي بقي الله

ايه الناس دي عليكو رغي فظيييييييييييح

mimi يقول...

عيش وحلاوة.... يعني نقول كفارة؟؟

هههههههههههههههه


أنا بجد اللي نفسي أشوفك

كل سنة وأنتي طيبة

mimi يقول...

وألف مبروك الجايزة صحيح

تمنياتي بدوام التفوق

Asmaa mahaba يقول...

انا قعدت انزل تحت تحت تحت عشان يمكن الاقى تذكره ببلاش للماجيك لاند وعلى عزومه عشاء بمناسبه انك بتحبينا
ملاقيتش حاجه وبعدين افتكرت انك منوفيه زى حالاتى فعزرتك:))

فاتيما يقول...

خاااااااااالص يا دودو
مين قال كآبة و بتاع ؟!!
الناس تفكيرها فى حاجة تانية يا حبيبتى
أصلك ما شاء الله عندك جدية
و نضج
و جرأة غريبة و قوة
فى مواجهة أى موضوع تتطرقى إليه
ناهيك بقى عن الشعر الجميل اللى انا شخصياً كنت واحدة من المحظوظين بيه لدرجة إنى سميت الكتاباتى الخاصة بيا بعض من هذيانى نسبة إلى قصيدة من اجمل ما مسنى اتشرف بيه جداااااااااااااااو طبعا فاكراها
( احترف الهذيان ) ....
اللى يكون كدا و يكتب بالقوة دى
فى المخيلة يدى على واحدة كبيييييييرة و الدنيا لطمتها شويتين و كدا
لكن لما بيشوفوكى بقى
بيلاقوكى بنوتة رقيقة خالث
و حسك هادى
و صغنونة
و لهذا الإنطباع بيكون عكس شوية الصورة التخيلية إنك جد و معندكيش ياما أرحمنى و بتاع
و دا مش وحش على فكرة لأنك بتطلعى فى الواقع احلى من الخيال و دى معادلة مبتحصلشى لناس كتير ..
مشكرين على الخمس حاجات
و انا
كمان
بحبك جداااااا

!!! عارفة ... مش عارف ليه يقول...

والله إنت إنسانة جميلة ومتصالحة مع نفسك أوووي والحمد لله

وفعلا من أجمل المفاجأت اللي كانت في اليوم ده هو تعرفي عليكي

والحمد لله إن الرغبة في التعارف كانت موجودة عندنا إحنا الاتنين

وزي ما أنت قولتي عن تعليقاتي على بوستاتك أنا كمان بكون مستمتع لما بقرا لك بوست يعني كل منا مستفيد والبركة في مدونة "مواجهات" اللي فعلا هي مواجهات وده هو سر تميزك وتفردك بخط مختلف عن ناس كتير وعمق في التفكير بعيداً عن الصوت العالي

دعاء إنت تستاهلي كل خير

وربنا يوفقك للخير دايماً

وزي ما كنتي مبسوطة باليوم ده

أكيد كل اللي قابلوكي كانوا سعداء همه كمان ... وأنا واحد منهم :)


وبالنسبة لفوز "موت آخر" مش غريب أبدا وهي فعلا تستحق النشر زي حاجات كتير لك

وهي فعلا رائعة والجميل فيها إنها لا ترتبط بحدث تموت بموته بالعكس من الممكن أن تقرأ ويعاد تذوقها لسنوات وسنوات ..


وإن شاء الله عقبال ما نشوف كتاب خاص بك يحمل توقيعك

وإن شاء الله دايماً إلى مزيد من التوفيق والنجاح

وليد

الازهرى يقول...

شكل الصيام اكن مأثر عليهم وفيش حد خد باله من الحقيقه
يا بنتى انت الكآبه نفسها
خلاص خلاص من غير عياط بس
نقول الحقيقه بالرغم من اننا اتقابلنا لخمس دقايق بالكتير الا انى لاحظت فعلا ان شخصيتك جميله ومرحه ولها كاريزما خفيفه وملحوظه

وكفايه كلام عن اللقاء بقى انا خلاص جبت اخرى كان نفسى اكون موجود فيه لكن الحمد لله على كل حال

تحياتى دوما

الازهرى يقول...

بالمناسبة نسيت اشكرك على سؤال لكن كانت شي ظرف كده
ربنا يفك عننا وعن الجميع كل كرب

شمس النهار يقول...

ازيك

القصيده جميله وكلماتها قويه جدا

انت تستهلي كل خير يادودو

مين قال انك كئيبه
بالعكس انا ماشفتكيش بس عارفه انك لطيفه وخفيفة الدم

حساكي بنوته مصريه ميه بالميه

كيكى عوووووو يقول...

هع
رفيقة فى الجاهدية!!!!
فى عيش وحلاوة!!
وعيش ومسامير وكل حاجة!!!
مممممممممممممم هنعمل ايه فى بكرة ها؟؟!!

غير معرف يقول...

جميلة القصيدة جدا .. واحلى مافيها حقيقة أشرتى اليها .. أن الموت نفسه بطريقة كريمة قد عز فى زماننا التعيس

قصيدة فى صورة طلقات متتالية تصيب العقول وتدمى القلوب

ألف مبروك دعاء

دعاء مواجهات يقول...

ماتسيب قال يعنى بيذاكر الدكتوراة

ابو كبير دا ان شاء الله تدخلو انت

ومش هنصوتلك كمان

يللا غوور

دعاء مواجهات يقول...

نعكشة

الله يبارك فيكى ياقمراية

يارب تطمنينى عليكى ديما

سلااام

دعاء مواجهات يقول...

اسلام

صح يااسلام كلامك فى الجون
والاهم كمان ان ةالشجاعه تكون فى موقعها بمعنى انى معملش شجاعة واضيع نفسى

العقل مطلوب

نورت

دعاء مواجهات يقول...

كيارا

مابلاش فهمى ونظمى دوول احسن بيجيبولى حساسية مزمنة

ادينى قولتلك يعنى اية

يارب نشوفك قريب

منورة

دعاء مواجهات يقول...

ميمى

ايوا بالظبط كدة كفارة

وان اقول السجن للجدعان

ههههههههههههههههههههههههه

نفسى اشوفك بجد ..

مينفعش نبقى جيران اسماً بس

سلام

دعاء مواجهات يقول...

سومة

اية ياعم التسييح ياعم فية اية بقى انا بتخانق مع الاغراب وانتى جاية تغلطى فى هويتى

عموما انا هعما نفسى مشوفتش كلامك

يللا تصبحى على خير ياقمر

دعاء مواجهات يقول...

فاتيما

تعرفى انك عندك قدرة على تحويل القبح لجمال

مش عارفة لية جالى ىاحساسى من كلامك

انتى حد جواة كميات من الطاقة الايجابية برغم كميات الطاقة السلبية المحيطة بيكى

ربنا يخليكى ليا

واكيد فاكرة القصيدة بتاعتك مقدرش انساها لاو انساكى ياأجمل قلب ف الدنيا ..

دعاء مواجهات يقول...

عارفة مش عارف ليه

تقدر تقول دى مثلا المرة العاشرة اللى بقرأ فيها تعليق حضرتك ومتقوليش لية بس هو كدة

كلماتك تقوى وتدفعنى للأمام

دمت بخير وود لمن تحب ..

دعاء مواجهات يقول...

الأزهرى

ماشى اغلط اوى اغلط

بس على فكرة انا مش بعيط من حد لا حاجة مااشى

وحمدلله ع سلامتك

وانا اتكلم براحتى على فكرة مدونتى وانا حرة فيها

سلام

دعاء مواجهات يقول...

شمس النهار

ربنا يخليكى ليا يارب ويبارك فيكى ياحلى شمس

انا كمان متخيلاكى ونفسى اشوفك قوللى ياارب

بحبك

دعاء مواجهات يقول...

كيكى

ما عملنا وخلاص

بس كانت ليلة جميلة صح ..؟؟

غير معرف يقول...

اولا مبروووووووووووووك على الجايزة

و بجد فضفضة حللللللللوة أوى

بس أنا الحمد لله عمرى ما تخيلتك حد كشرى و ضخم و الحاجات الغريبة دى

D:

بجد كان نفسى اكون فى اللقاء بتاعكم ده و كنت جاية فعلا بس طلعلى ميتنج غبى كدة من تحت الارض


و انا كمان يا دودو و الله بحبك و بسسسسس

دعاء مواجهات يقول...

شريف

الله يبارك فى حضرتك وبجد رايك دا شرف ليا وكمان قريب اوى من راى حد كان لسة قايلو امبارح

نورتنى