الأربعاء، فبراير 25، 2009

دواير .. دواير ..




دواير ....

ولما توحشنا الحاجات
ونفترق
من غير وادع
بنلاقى حلم بيتسرق
بيختفى او يتحرق
بس المهم
ان الحياه
رافضة يوم تتقتل
=رافضة=


رافضة الدموع
رافضة حبى يكون خضوع
رافضة ابدأ بالرجوع
رافضه أحن لقلب قاسى
رافضه يوم إنى أتفهم
إن قلبى كان أنانى

أنانى ومن يومى
بفكر فيا وبس
خايف أفكر مرة ف غيرى
أندم وأقول ياريتنى
ما فكرت ف غيرى
أصل غيرى طول عمره أنانى
فاهمه وشايفه
قاريه حرف .. حرف
= حرف =


حرف
يجيبنى .. حرف يودينى
حرف بيبنى .. وحرف يهد
حرف بيبعد .. حرف يشد
حرف يطبطب .. حرف بيمتهن الجرح
= الجرح =



الجرح دا وشم ف قلبى
برفض أمحية بالدم
ممنوع يوم منو تقرب
أو حتى تحاول الحب
= الحب =



الحب دموع وجراح
الحب ألم مصنوع
بالدم ف آخر العمر
الحب ألم مطلوب
بنعيش نطوية وندوب
= ندوب =



بندوب فى الدنيا دى
دووب
وبنرفض نلقى عيوب
جوانا أو برانا
العين ويانا بتلعب
يوماتى استغمايه
وياترى مين اللى هيكسب..
= يكسب =


مكسب
كلمة من حياتى محيتها
من يوم ما عرفت حقيقتها
قررت أخسر بس
لما عرفت إن المكسب
إنى أعيش من غير قلب
= قلب =


قلب
دا يعنى حاجة بتنبض
تسكن فينا غصباً عنا
بتحس وتشعر
بتسعدنا وبتحينا
وبتخلينا ازاى نتأقلم
لو يوم دوقنا الخيانه
= الخيانه =



الخيانه بقت أساسية
زيها بالظبط زى الحرية
مطلب شعبى ولا سياسى
مبقتش تفرق ياعنيا
= عنيا =


عنيا وجعانى ومزغلله
مش عارفه مالها متنشنه
يمكن من كتر النور
ولا من كتر الضلمه
مبقتش عارفه
ألاقيلها حل
= حل =




حل ايه دا اللى عاوزنى أدورلك عليه
شايفنى حلال العقد
ولا شايفنى دكتوراة فى التحاليل
روق وفووق الحل واحد
وقدامك ملزووق
ملهاش حل
طنشها ورووق
= طنشها =



ولما الواحد يبقى مفروض يطنش
هيطنش إية ولا إية
معادله سهله
طنش دماغك
وسيبها تتخبط
ف الحيط
وسيبها وسافر
خليها توحشك
= توحشنى=



بتوحشنى كتير ضحكتها
بتوحشنى ساعات
زحمتها
بتوحشنى كمان
ضمتها
بتوحشنى كتييييييير
لمتنا حواليها
وضحكنا فيها وسكوتنا

بتوحشنى مصر
وانا فيها وبعيد
اوى عنها

........

هناك 70 تعليقًا:

Nasimlibya `√ يقول...

بتوحشني مصر وانا فيها وانا بعيد عنها



ررروعة يا دعاء نيال مصر بيك وبقلبك وقلمك


بجد ادراج هايل كل منكمل جزء من النص يتولد نص جديد

فعلا انت هايلة وكل مشوف بوست ليك جديد نعرف انه تفوق ع اللي قبله

ربي يوفقك ويحفظك

Mafrousa يقول...

عنها كتبوا كتير
عنها كتبو الشعر و الزجل
عنها كتبوا كتب و مقالات
عنها اتكلمو الاجانب و اعجبوا بيها
عنها دبرو المكايد ووقعوها فيها
عنها دوروا الناس و اترموا فى حضنها
عنها اتقال كتير و كتير
عنها نزلت آية فى كتاب الله
عنها انا بقول انها بلدي

حلو اوي يا دعاء

adel يقول...

دواير دواير

انتي كتابتيها في كام يوم دي

ده انا بنهج بعد ما خلصت قرايه

ههههههههههههههههه

بس انتي اختصرتي كل الاحاسيس في قصيدة واحدة

هتكتبي ايه بعد كده

حلوة بجد

انا حره يقول...

تصدقى احلى حاجه تكبير الدماغ

يجى عليكى وقت كدا تلاقيك ماشيه وخلاص مش عارفه بتعملى ايه

غلط ولا صح

اديكى ماشيه

بتفرحى نفسك ولو بالكدب

مش بتدى لحد فرصه يوجعك

ماانتى مطنشه بقى اى حاجه واللى يجرا يجرا

عشان الدماغ تعبت من التفكير

والثوابت والحقايق بقت تزييف وكدب

Unknown يقول...

انا مش جاى أعلق على الشعر
انا جاى اعلق على الصورة الجميلة اللى مع الشعر
صورة معبرة اوووووى

بيس

:-)))))

holyday يقول...

السلام عليكم
والله تسلم نهاية شي يعني بدايه ليس الا.
واتمني ليك استمرار
والف سلامه مني
نهاية كلامي ليك


لا تعني الا بداية قرائتي ومتابعه لمدونتك
سلامي
اختك
فتاة من زمن اخر

رئـــــيسـة حزب الأحلام يقول...

فعلا دواير الموضوع مليان دواير وكل ماتخلصى من دايرة تدخلى فى دايرة
تحفة بجد
تحياتى لكى وتمنياتى لكى بالتوفيق

hasona يقول...

السلام عليكم


جميلة الدواير 000الدواير
وأهي دايرة وبتعدي

،،،،
نفس الحالة
تردد وخوف ومجهول
حب وترقب
،،،،،
حب ووداع
سرقة واحتراق واختراق
حب وذوبان
عقل وتوهان
قلب وحيران
نبض بقلبان
،،،
لا تخشي من الالم
فالألم يولد الابداع
ويا ما نعتاد عليه

تحياتي

promise is promise يقول...

هههههههههههههههههههه
تحفه بجد والله يادعاء تسلم الايادى
الجزء ده عجبنى قوى
رافضة الدموع
رافضة حبى يكون خضوع
رافضة ابدأ بالرجوع
رافضه أحن لقلب قاسى
رافضه يوم إنى أتفهم
إن قلبى كان أنانى

تقبلى تحياتى ومرورى
والسلام ختام

احساس لسه حى يقول...

عزيزتى

انتى كاتبه حاجات كتير ومواضيع كتيرة واحاسيس كتيرة

احساس بسرقة الحلم ولو متسرقش بتحرقه الايام

احساس بالرفض والمرفوض اد ده الف مره كمان


بس غيربه انك بتتكلمى على انانية قلبك مش غيرك ايه الواقعيه دى

والحرف انتى بتصدقى اى حرف دلوقتى الكلام ميتصدقش الا بافعال


وكلانا مجاريح ومحدش متجرحش


الحب زى البطيخ يا حمره يا قرعه بس للاسف بعد ما بنعرف لونها بتكلها برضوا


بندوب وبتدور وبندوخ كمان

هو فى حد حاول يعيش من غير قلب ونجح


الخيانه شئ كبير ممكن متكنش خيانه ونقول الظروف

العين بتتعب من كتر الدموع


الحلول مش اد المشاكل مش ملحقه على المشاكل


ما احنا لولا بنطنش مكناش خنعرف معيش


ووحشانى انا كمان مصر اللى مشفتهاش لجد دلوقتى

تحياتى

سلام

PrInCeSS BeRy يقول...

ازيك يا دودو وحشانى كتير يارب تكونى بخير


ما شاء الله عليك حسبتى حسبة ونهيتيها فى كل مقطع باجمل واروع الكتابات ربنا يحميكى يا عثل

حسن حنفى يقول...

بنلف في دواير والدنيا تلف بينا دايما ننتهي مطرح ما ابتدينا

( آلاء)daughter of egypt يقول...

ايوة ده مبدأ في الحياة او حياة المصريين كبر دماغك عشان تعيش لانك هتعشها هتعشهابالطول او بالعرض حلوة قوي

Ehab يقول...

يا نهارك ابيض
اقولك ايه بس
انتي يا بنت دوختيني انا
من خيط لخيط ومن كلمه لكلمه
شقلبتيلي دماغي الله يسامحك
بس تسلم ايديكي بجد
ربنا ينور طريقك دايما
سلااااااااااااااااااااااااااام
اخوكي ايهاب

EMY يقول...

أنانى ومن يومى
بفكر فيا وبس
خايف أفكر مرة ف غيرى
أندم وأقول ياريتنى
ما فكرت ف غيرى
أصل غيرى طول عمره أنانى
فاهمه وشايفه
قاريه حرف .. حرف

بجد تعبير رائع

أبو العريف يقول...

دعاء

انا تهت من ساعة ما جيت وانا عمال ألف في دواير
كل ماخرج من دايرة احساس ادخل
ادخل في دواير احساس تاني
لحد ما خلصت قرايه لقيتني بدوخ
من كتر اللف
بس حقيقي تسلمي

ميرا ( وومن ) يقول...

بنلف في دواير والدنيا تلف بينا ونرجع نبتدي من مطرح ما انتهينا

تسلم إيدك ودماغم يا دودو

Foxology يقول...

قلب
دا يعنى حاجة بتنبض
تسكن فينا غصباً عنا
بتحس وتشعر
بتسعدنا وبتحينا
وبتخلينا ازاى نتأقلم
لو يوم دوقنا الخيانه


هو ده الكلام .. الحتة دى اللى بتخلينا نتأقلم على أى حاجة

حلو الكلام يا دعاء

تحياتى :)

غير معرف يقول...

مسااااء الفل
ازيك يادعاء
ايه الحلاوه دي يامعلمه
القصيده حلوه .. بس طويله أوي .. كنتي ممكن تقولي كل اللي عايزه تقوليه في نص اللي كتبتيه تقريبا .. بس بجد حلوه اوي وكلامك بيوصل بسرعه



بقولك .. أنا بعتلك الموضوعين اللي قلتلك عليهم علي ايميلك .. ياريت تقوليلي رأيك وتعرفيني بآخر الأخبار
هفضل مستني لحد ما أعرف ايه اللي هيحصل
بيس بقي



أحمد سلامه

شمس النهار يقول...

جميل قوي البوست
كان زمان بنلعب لعبه كده نقول مطلع اغنيه واخر كلمه تلتقطها الاخري وتجيب اغنيه عليه وهكذا
بس عجبتني مقولة الخيانه رائعه

وعجبني اعتذارك علي الرد علي التعليقات بصراحه كلك زوق يادودو
في ناس مابتكلفش نفسها حتي تعتذر
وانا بصراحه بدخل المدونه مره اتنين تلاته واللي مابيردش علي تعليقي مابدخلش عنده تاني عشان بحس انه مش عايز تعليقي زي ماادخل بيتك وماترحبيش بيه مش هاجي عندك تاني
انا عارفه انك مشغوله بميت حاجه ربنا معاكي

*البت المشمشية *حلوة بس شقية * يقول...

دودو
حرام عليكى نفسى اتقطع لحد ماوصلت للاخر
بس حلوة الدواير دى
مية مية
والقصيدة تحفة

الازهرى يقول...

مش عارف ليه
لكن كل ما اجى واقرأ احس انى بامشى مشوار طويل
موصوف فيه حاجات كتير

تحياتى لقلمك الجميل

دعاء مواجهات يقول...

اية الكلام اللى زى الفل دا كلو بس ياناس بجد اتمنى انو يكون من حقى

بس حبيت اوضح انها مش قصيدة

هى ممكن خواطر حاله معينه عشتها
شخبطات حتى فى ساعة تفكير

بس مش قصيدة

المهم انها تعجبكم متابعاكم ومتابعه كلامكم

ارد عليكم قريبا

تحياتى..

romansy يقول...

ونلف ندور وندور ونلف
ونرجع تانى بين احضانها
نرجع نلاقى الحب ساكن قلبها
نرجع نلاقى الخير لكل يحبها
بس دايما مصر جميله

شيماء جمال(شيمو القمر) يقول...

أولا أريد أن أبدى إعجابى بمدونتك
وحقا الزجل بتاعك ده جامد جدا

وبيوصف حاجات كتير جوانا

تحياتى دمتى مبدعة
شيمو القمر

maiosha يقول...

اااه
دواير

بس جامدة جدا يا دودو.. لإنك فعلا بتدورى حوالين دايرة بس من غير ما تخليا نحس اننا بنعمل كده فعلا

صعبة اوى كتابة حاجة زى كده

يعنى بتخدينا من حالة وتحطينا فى حالة تانية خالص
وبتستخدمى نفس الكلمة بمعنين مختلفين.. وكمان الكتابة بالعامية .. خلت للكتابة بالنسبالى على الاقل نوع من الحميمية والتفاهم

بجد على قد ماهى صعبة على قد ما هى جميلة جدا

وده شيئ متوقع منك

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

على فكرة أنا كنت داخل عندك وأنا متغاظ منك جدا
من ساعة ماعرفت إنك زملكاوية
لأ وكمان مش بتداري
بتقوليها بالمفتشر
آل يعني ولا هامك

علشان كده لاكنت ناوي أقرالك بوستات ولا بتنجانات
كنت داخل أسيب تعليق أهلاوي متعصب وأمشي على طول

بس حقيقي الموضوع شدني
ولقيت نفسي بأقراه لآخره
فكره روعة والتنفيذ أروع

لأ بجد إيه الجمال ده كله
بوست رائع ومميز زي صاحبته
و"عظمة على عظمة يا ست"

تحياتي
إحســـان الأهلاوي

غير معرف يقول...

رافضة الدموع رافضة حبى يكون خضوع

بتوحشنى مصر وانا فيها

حلوة اوووى القصاقيص دى

وحلاوتها فى بساطتها
وانها طالعة من القلب


ووووووووووووووووووووحشتينى وهكلمك بس
هيا ظروف وادعيلى تعدى

آه وكفى يقول...

الجرح دا وشم ف قلبى
برفض أمحية بالدم
ممنوع يوم منو تقرب
أو حتى تحاول الحب

طبعاً ولا الحب هيمحيه طول مانتي رأيك فالحب أنه

الحب دموع وجراح
الحب ألم مصنوع
بالدم ف آخر العمر

ــــــــــــــ

مودكـ مش عاجبني لينا قاعدة

ســـهــــر يقول...

مفيش اى تعليق يوفى حق البوست الرائع دة
بجد انتى لخصتى كل المشاعر الحلوة فى بوست ولا احلى منة

دمتى مبدعه

mahasen saber يقول...

مصر عامله زى ولادنا بتوحشنا وهيا معانا وقدامنا ومهما تعملبنخاف عليها ونختلقلها اعزار

عارفه يا دودا يظهر ان احنا اليى امهاتها مش هيا بس اليى امنا

وحشتينى يا دوده كنت فين يا جميله

Unknown يقول...

السلام عليكم

دعاء ياجميل ازيك

المواجهه المره دي مع الكلمات والحروف

بس بجد اكتر من هايله

قريتها كلها وحسيت اني بتسحب من طقطوقه للي بعدها

بجد جميلة جدا
تسلم ايدك


برقش


احم احم اسف علي طول الغياب

Eslam Eldosoky يقول...

البنت اللى فردت شعرها ف عب القمر
مكنتشى مجرد ضحكة برئية إختفت تحت رجلين الزمن
و لا حتى كانت هى الكلمة اللى خنقتها تلابيب الشفايف
البنت كانت حلم عدا علينا من سُكات .
.........................................
.................................
.......................

تعرفينى ؟
: لا .
أعرفك ؟
: أه .
تعرفينى ؟
: أه .
أعرفك ؟
: لا .
الأرض أصلها بتنشق.
واللى خلق الربكة .. ريحة شروقك

Hossam يقول...

سلام عليكم
اكيد مش كده خالص
انتى ازاى عرفتى تدمجى الكلام ده على مصر
بجد انتى تحفة والله
الكلام مكنتش متوقع انه فالاخر هيكون كده
ربنا يبارك فيكى
تحياتنى
سلام

دعاء مواجهات يقول...

اعتذر وارد على التعليقات غدا بإذن الله

تحياتى لكم جميعا ..

دعاء مواجهات يقول...

نسيم ليبيا

اشكرك على كل هذة المشاعر الجميله

احبك فى الله

نورتى كعادتك

دعاء مواجهات يقول...

واحدة مفروسة

اية دا انتى سبتى الفرسة وبقيتى تكتبى شعر ولا ايه؟؟

وحشااانى

دعاء مواجهات يقول...

عادل

فى يوم واحد بس ياعم

انت جاى هنا تقر ولا ايه ..؟؟
ههههههههههههههههه

منور

دعاء مواجهات يقول...

انا حرة

تصدقى انك جبتى م الاخر يابنتى فعلا كلامو كلو صح

بيس

دعاء مواجهات يقول...

بدراوى


ماشى ياعم مكانك ونورت

دعاء مواجهات يقول...

هوليداى

انتى من الجيل الجديد ف التدوين اللى بستمتع اوى بزيارته

منورة كالعاده

دعاء مواجهات يقول...

رئيسة حزب الاحلام

الحياة كلها زى الدواير دى بالظبط

صح ياريسة؟؟؟

دعاء مواجهات يقول...

حسونة

الالم هو الافع الاول للابداع عندى

اشكرك على لاتحليل الجميل

نورتنى

دعاء مواجهات يقول...

بروميز

عاجبنى اوى اسم مدونتك

ليها معانى جامدة اوى وحلوة

اوى اوى اوى

بيس

دعاء مواجهات يقول...

احساس لسة حى

مادام الاحساس حى يبقى فية امل وامل كبير كمان

منورة اوى اوى

دعاء مواجهات يقول...

بيرى

ياااااااااة اخيرا افتكرتينا

يابنتى قلقت عليكى اوى

بحبك

بيس

دعاء مواجهات يقول...

حسن حنفى

بموت ف الاغنية دى اوى

اوى اوى

منور

دعاء مواجهات يقول...

مصرية وبس

احنا شعب الفرفشة والاختراعات كلها ياقمر

بيس

دعاء مواجهات يقول...

الشنكوتى الجميل

ربنا يخليك ياهووبا ويتقبل دعواتك لاجميلة دوما دى بجد

بنفقتدك بجد

دعاء مواجهات يقول...

ايمى

الاروع انو عجبك

نورتى

دعاء مواجهات يقول...

ابو العريف

بعيد الشر عليك م الدوخة ياعم

نورتنى

دعاء مواجهات يقول...

وومن

تسلميلى انتى ياحبى الاول

بيس

دعاء مواجهات يقول...

فوكس

ميرسى يامعلم

دا بس من تذوقك وحسك الرائع

بيس

دعاء مواجهات يقول...

سلامة

انت فين ياسلااامه

اية الغيبة دى كلها

انا رديت ع الميل ياابنى

وبالمناسبة دى مش قصيدة
\

بيس

دعاء مواجهات يقول...

شمس النهار

انا اللى بيقولو عليها المشغولة الفاضة ازاى بقى فسريها انتى

عاوزة تواصل حى بينا لو ممكن انا ميلى ف البروفايل

بيس

دعاء مواجهات يقول...

البت المشمشية

الف سلامة ع نفسك ياقمرنا المتحرك

منورة يابنتى

دعاء مواجهات يقول...

الازهرى

كلمتك وسان على قلمى وتعطينى دفعة للامام

اشكرك بقلبى

دعاء مواجهات يقول...

رومانسى

يارومانساويتك ياجدع

كل حاجة بتعرف ترد عليها

بيس

دعاء مواجهات يقول...

اعترافات قلب

ازيك ياشيمو ياقمر انا كدة مش هعرف ادلعك ولا اوصفك بس يعجبنى اوى القمر الى عارف انو قمر

نورت ياقمر

دعاء مواجهات يقول...

ميوشة


ازيك يابنتى واية اخبار الفشل ع حسك كدة

بيس

دعاء مواجهات يقول...

شفقة واحسان هانم وبيه

اية ياعم انت داخل فينا شمال كدة لية حد كلمك

اهلاوى ع نفسك ياعم مش علينا

لما اشوفك بس
هعضلك شفقة واخليها تعيط كمان

نحن نختلف عن الاخرون شفت ازاى اجبرتك انك تقرا وتعلق كمان وتعجب بالكتابه

ههههههههههههههههههههه

بيس

دعاء مواجهات يقول...

نونا

صوتك رقيق زى كل كلمة بتكتبيها

بيس

دعاء مواجهات يقول...

ااة وكفى

لو كان دة اللى هيخليكى تقلقى عليا وتقررى تتنازلى وتحددى ميعاد ونتقابل يبقى اقلقى اوى اوى اوى
هههههههههههههههههههههههه

لا متقلقش ياقمر

انا موجهات بردو.

دعاء مواجهات يقول...

سهر

اشكرك رقتك والكلام الى اتمنى اكون استحقة

بيس

دعاء مواجهات يقول...

محاسن صابر

تعبير جديد فعلا هى اللى بنتنا فعلا

منورة

دعاء مواجهات يقول...

برقش

المهم انك رجعت وهو دة المهم

ليك افتقاد محصلش فعلا

بيس

دعاء مواجهات يقول...

حقودى

دا انت مطلعتش حقودى داانت طلعت شااعر جامد جدا

اية الجمدان دا كلو

لينا قاعدة وروقة

بيس

دعاء مواجهات يقول...

حسام

يعنى مقدرش اقول غير ان دة اقل حاجة عندنا يامعلم

ههههههههههههههه

منور

محمود البدري يقول...

حلوة اوى اوى وعجباني موت

بجد مش لاقي كلام يعبر.



بتوحشني مصر وانا فيها وانا بعيد عنها
بس بصراحه احنا فيها زي بعيد عنها

مستني جديدك الاجمل