الجمعة، مارس 14، 2008

ممنوع ياقلبى تدق ..





ممنوع ياقلبى تدق

ممنوع ياقلبى تدق

وتقولها آآآة لو مرة ..

جتلك مصيبة أوية ...

وتقوول يارب وذدنى ....

ما الدنيا بالمقلوب ..

ماشية وأدينا يادووب

بنعيشها يوم ورا يوم ....

ممنوع ياقلبى تدق وتقوول.....

بحب وبكرة .............

مش بس علشان هو

الأنون واللا يحة ...

لا ياحبيب الروح

ياللى ملياان جرووح

وتحب إية وهتكرة مين؟؟؟

خلييك ف نفسك يلا ...

يمكن فى يوم...

يفتكرك..............

تاريخ مزيف زييف

ما الدنيا بالمقلوب

ماشية وأدينا يادوب....

بنعيشها يوم ورا يوم

ممنوع ياقلبى تدق

مش بس علشان ....

مش فااضى للدقة

دا بردو علشان.....

من يوم ما جييت للدنيا

ومافيكش نبض ياقلبى
............................................

دعاء عمرو









وراح الراجل يدور ع الدعم ....وياريتة ما راااح ؟؟؟؟؟؟؟؟؟؟؟

إنت عارف قبلا معنى الدعم إية - دعم -يعنى مشاركة من الحكومة لفئات الشعب الفقيرة أو الغير قادرة والمسماة مجازاً بمحدودى الدخل والذى يتغنى بة المسئولين فى شتى المناسبات القومية الدينية منها والسياسية بضرورة وصولة لمستحقية من فئات الشعب المطحونة والذى يصل حاليا فى شكل عينى ممثل فى زيت العربيات الذى نستخدمة مكرهين فى الطهى والشظايا المسماة أرزاً نأكلة متغاضين الى آخر ذلك من السلع الفاخرة إسما والرديئة شكلاً ومضموناً بالاضافة طبعا لدعم رغيف الخبز الذى صدرت له تصريحات خيالية وأخرى جهنمية والنتيجة أنة يباع على الأرصفة بخمسة أضعاف ثمنة ولا نستطيع أن ننكر الدعم الأكبر فى دعم شتى السلع الاستراتيجية وأهمها البنزين الذى يتضاعف ثمنة شهراً بعد االأخر بصراحة ياجماعة الواحد خايف ينسى حاجة من اللى بتدعمهالنا الحكومة الذكية النظيفة اسما وشكلا ومضمونا واحد بقى يقوللى طب الحكومة بتجيب فلوس الدعم دى منين ياترى بتجبى علينا أـقولة طبعا لأ دى فلوسنا بردوو اللى بندفعها فى صورة ضرايب او فلوس من مرافق الدولة بدءً بقناة السويس اللى بتجيب فى المتوسط يوميا حوالى 15 مليون دولار على الاقل ومروراً بتصدير الغاز الطبيعى وما أدراك ما الغاز الطبيعى وبيتصدر لمين وبكاام؟؟ ومترو الأنفاق والمواصلات العامة والصادرات المصرية المتعددة من معادن او بترول وخلافة ووصولاً لبيع الهوا آة بيع الهوا يعنى تراخيص الإتصالات وجيل تانى وجيل تالت (وسمعنى احلى سلام للموبايل أبو كاميرتين) دا غير بقى الخصخصة إشى بنووك إشى شركاات وهيئات ومرافق كمان أقوول إية ولا إية بس؟ أنا خايفة بردو أنسى مصدر من المصادر ...نيجى بقى لحتة تحويل الدعم العينى لدعم كااشى أحب أقوول ان الحكاية مش فارقة بردوو سواء عينى سلعى أو كاشى ملاليمى مش حتفرق كتير وعلى رأى المثل حيسخطوك ياقرد يخلووك إية؟؟؟؟؟؟؟ وبعدين هو فين أصلا الدعم اللى بيقولوا علية دة لما رغيف العيش أبو 5 قروش يبقى ب25 قرش ومش لاقينة أصلا ولما زجاجة الزيت (العادى) تبقى ب 10 جنية وكيلو المكرونة ب5 جنية وكيلو الدقيق (اللى منعووة أصلا )بقى ب 4,50 لا بصراحة فعلا لا مساس بمحدودى الدخل لأن هذا لايسمى مساسا بل يسمى إقتناصاً ونهشا ً وتجويعا ً متعمداً ومنظما ً لأهداف يعرفها جميعنا تمام المعرفة

المهم سيبنا من كل الكلام المتفلسف دة وهحكيلكم حكاية حصلت والله بجد فى بلد جمبنا

واحد راجل عادى راح يشترى عيش لعيالة وقف فى الطابور كتييييييير أوى لما زهق والآخر معرفش يجيب عيش قام مشى وراح لأقرب بقاال وإشترى نص كيلو مكرونة وروح البيت عملو للعيال الجعانة وضااف كمية كبيرة من سم الفئران فى المكرونة وأكلها لعيالة ............ إية بس خلاص خلصت الحكاية ؟؟؟؟؟؟؟؟؟؟؟؟؟؟؟؟؟
وأترك لكم التعلييييييييق
؟؟؟؟؟؟؟؟؟؟؟

دعاء عمرو




منوف طنطا رايح جاااااى..........

أكتب إليكم بعد 3 أسابيع من التعذيب المتواصل والذى لا يحمل أى معنى من معانى الشفقة والرحمة بين طياتة

بدأ السيناريو بإحساسى البشع بالفراغ القاتل والمميت الذى كاد أن يقضى على ما تبقى لدى من عقل بعد إنتهائى من دراستى الجامعية فى آداب قسم الصحافة 8 شهوور مرووا من عمرى كما السرااب وهو الشئ الأشبة بالموت البطئ سيناريو يومى محفوظ ومكرر ما بين النوم والصحيان والصحيان والنوم وبينهم فترة من الراحة أقضيها غالبا ً فى النوم

سامعة واحد بيقول ولية ما أخدتيش كورساات تسلى وقتك بيها أقولك ياسيدى المشكلة بقى إنى أخدت كل الكورسات أثناء الدراسة توهما ً منى أنى بمجرد إنتهائى من الدراسة سوف أعمل فورا ً وهو الإعتقاد الذى أثبت خطأة تماما ً

دا أنا مش بس أخدت الكورسات العادية اللى هى ال ICDL والإنجليزى لا دا أنا كمان أخدت كورس بورصة وحقوق إنسان وفوتو شوب وكل دة طبعا ً من ذكائى المفرط فلم أدع شيئا ً لأيام فارغة كتلك التى قضيتها بعد تخرجى مباشرة ً لأنى بصراح كنت متأكدة أو متوقعة إن أبويا بأى واسطة ولا بتاع هيشغلنى بس المشكلة بقى إن الحاج عجبتة قعدتى جمبة أوى وقاللى شوية كدة بس تستريح من الدراسة ودوشتها هو تقريبا ً فاكر إن الكلام دة بيأثر فينا
المهم سكتت وإستسلمت فترة كدة ورجعت تانى أفكر طب أعمل إية .. أعمل إية مالقتش غير إن أدور على كورس أكون لسة ما أخدتووش ولاقيتة أخيرا ً( المحادثة الإنجليزى) وبالفعل بدأت ارسم الخطط وأضع السيناريوهات المستقبلية المتوقعة وأخرى بديلة لإقناع السيد الوالد بهذا الأمر وقبل ذلك كنت قد بحثت عن مكان معتمد آخد الكورس فية ومالاقتش أحسن من الجامعة الأمريكية دا من تخيلى طبعا ً طب الكورس بيتاخد فين ..فيين؟؟ أتارى بقى المحادثة بتكون فى المراكز الرئيسية فقط ف القاهرة وطنطا والإسكندرية وأنا لمن لايعرف من الجمهورية المنوفية المتحدة يعنى الموضوع أصبح أكثر تعقيدا ً ومسألة إقناع الوالد أصبحت درباً من دروب المستحيل .....

أأيأس أنا بقى لأ طبعا ً ووجدتها فرصة لمعرفة شعب شقيق مجاور وهو الشعب الطنطاوى وبعد محاولات ومداولات وتطنيشات دامت مدة 3 شهور أقنعت بابا أخيرا ً بمدى أهمية هذا الكورس وأنى ممكن أموت ويضيع مستقبلى لو ما أخدتهووش ووافق بابا أخيرا ً

وجاء اليوم الأول الى كنت بحجز فية الكورس وكان يوم الفالانتين اللى فات وبصراحة أنا الى ظبطت المشوار ع اليوم دة أصلى بحب اشووف الحب فى عيون الناس والأماكن وعدى اليوم آخر تمام رغم الأمطار ....

ثم أتى يوم الإمتحان وعدى بردو آخر تمام وطلعت فى المستوى الثالث علما بأن مجموع المستويات 4 فقط

ثم جاءت المفاجأة المواعيد هتبدأ من بعد الساعة 2 ظهراً مما يعنى أنى لن أصل المنزل قبل العشاء على أقل تقدير لا وكمان 3 ايام فى الأسبوع حاولت إبتلاع الصدمة وصبرت نفسى بعد الكثير من التردد فى إتمام هذة الصفقة وتوكلت على الله وعزمت على إكمال ما بدأتة

لتظهر أمامى مشكلة أكبر وهى إنى ماليش فى بهدلة المواصلات والكلام دة ودلنى أصحابى على القطار كـأسرع وأسهل وسيلة وليتهم ما فعلوا دنيا تانية وعيشة تانية ودماغ تانية ركاب القطارات دول بجد

إية دة أنا طولت عليكم أوى أكملكم الحكاية بعدين بقى ........سلاااااام




















هناك 34 تعليقًا:

شـمو نشـادر يقول...

معلش يا دؤدؤ انا عارف المواصلات فعلا عذاب ... بس مش مهم كله يهون فى سبيل العلم واهو احسن من القعدة برده .. هيييييه هو ده مصير طنطا الأبدى .. ديما بتفتح حضنها الحنين للمحافظات المكلومة والشعوب الغلبانه .. وبالتوفيق يا دعدوعتى

sigon1977 يقول...

عزيزتى دؤدؤة الشعر كالمعتاد جميل و كالعادة فى انتظار المزيد على نفس المستوى الجيد ,اما التطور الممتاز باهتمامك المتواصل بمشاكل التاس اتمنى الاستمرار و انا اضيف ان الدعم يقل عن الذى ندفعة بحوالى 22 مليار جنية اى اننا من يدعم و ليست الدولة اما المواصلات فنحن يئسنا 1977@yahoo.comsigon_

sigon1977 يقول...

accualy i wnt to say another thing , i hope you never stop writing for akong time sigon_1977@yahoo.com

صالح سعيد يقول...

دودى
ازيك ؟ يا رب تكونى بخير
الموضوع اللى شدنى هو موضوع الدعم
خصوصا الماساه اللى حصلت فى الاخر
بجد ربنا يستر علينا
احنا بنعيش فى زمن صعب جدا
حاسس انى قريب هسمع جملة
لو لم اكن مصريا
لحمدت الله على ذلك
يارب مسمعها

Ahmed Al-Sabbagh يقول...

الصديقة العزيزة .. دعاء عمرو

جمييييييل اوى

بجد مجموعة تدوينات فى بعض جميلة جدا

اسلوبك اكتر من رائع

بس هو ليه حاطة مجموعة مع بعض

يعنى متهيألى كل موضوع من حلاوتة يستاهل يتحط فى بوست لوحدة

ثم انتى كمان فى فراغات كبيرة يعنى ممكن تتنسق اكتر

بالتوفيق ان شاء الله

بجد سعدت كتير بزيارة مدونتك الرائعة

تحياتى

أحمد الصباغ

كراكيب عادل يقول...

انتي بتكتبي بالجملة ولا اية

بس بجد طريقتك حلوة مش مجاملة والشعر كمان

هايل يا دعاء

انين الحزن يقول...

دعاء
انتي من منوف

قوليلي بتركبي قطر الساعه كام وكدا احنا منيافه زي بعضينا

عايزة اشوفك ياريت انا بركب نفس الخط بتاعك

قوليلي هاه
سلامووووووووووز
وزة

sigon1977 يقول...

hi , itis me again go ahead we wait all of the day our writter and for ever we wait sigon_1977@yahoo.com

دعاء مواجهات يقول...

*أسامة أمين

عندك حق يا أوسى ومتهيشش علينا ياطنطاوى انت مااااشى

دعاء مواجهات يقول...

shahin*

بجد ميرسى اوى على تعليقاتك الجميلة مووت دى واللى بجد بتشجعنى وياارب ديما اكون هند حسن ظنك ديما وربنا معاااك ويقويك فى أزماتك دى وربنا يشفيك ياارب انة هو الشاافى العاافى

دعاء مواجهات يقول...

- صالح سعيد

ههههههههههه والله ديمل مضحكنا ومهلكنا كدة ياصاصا وادينا بنتعلم ياباشا وبنحاول نكون حاجة لكن هنيجى جمبك اية بس إشطااااااااااااط ههههههههههههههههه

دعاء مواجهات يقول...

- أحمد الصباغ

بجد انا اكثر سعادة بزيارتك لمدونتى المتواضعة ورأيك فيها اما بقى موضوع البوستات دى فيعنى لأنى لسة بتعلم وكمنا جوايا كلاام كتير اوى عاوزة اطلعة واعبر عنة علشاان آجى للى بعدة فسامحونى ع النقطة دى

دعاء مواجهات يقول...

- كراكيب عادل

ياخبر ياخبر معقوول حضرتك تزورنى وكمان تبدى رايك فى مدونتى وكمان تعجبك لالالا دا كتتتي اوى عليا بجد لأنى من أشد المعجباات بمدونتك وإحتماال كبير اوى أكتب عنها مقاال فى مجلة مصرى الإلكترونية لو تعرفها ولو حصل هبعتلك اللينك هنا اوكى

دعاء مواجهات يقول...

- أنين الحزن

أيوى ياجميل انا منها تقريبا وبركب قطار الساعة 10.10 بس هعرفك ازاى بقى ردى عليا اوكى سلاااام

رئـــــيسـة حزب الأحلام يقول...

السلام عليكم مدونتك جميلة اوى اما الدعم دة فهو كلام وبس عشان الانتخابات وكله ببقى كلام فى كلام

m.sobhy1990@gmail.com يقول...

مرحبا يادعاء المنوفية ولّادة على طول والله
أخيرا لقيت مدونتك دوختينى ياشيخة
اللى بقراه ليكى ف الدستور جميل بجد
فيه زيارات جاية كتير

على فكرة إحنا بلديات

t3ban يقول...

موصلات
دعم
غاز
خصخصة
عبارات
داخلية
خارجية
اوي تظلمي قلبك ولا تقلبي عليه
هو ملهوش ذنب
المشكلة في الي احنا عايشين فيه

ADMIN يقول...

saheh ya doaa anty btktby mara wahda ana akt anzel anzel anzel lahed ma weslet alsha ard aleky almohem shkran ala zeartk lmdonty almtwda
ala fekra anty aslobek helw kow

شاب نفسة يحقق حلمة يقول...

السلام عليكم
اقول ايه بس ربنا يرحمنا بجد من اللي احنا فية
تحياتي ليكي وان شاء الله هبقي متابع دائم ليكي

nigro يقول...

ازيك يا دؤدؤ
مدونتك جمييييييلة
و اسلوبك حلو قوي و سهل
آه ليا سؤال كده
انت ليكي علاقة بضربة شمس

انين الحزن يقول...

خلاص اوك

بس بتروحي امتي لان 10 و10 من منوف يوصل طنطا 11 باين مش عارفه بالظبط

بس قوليلي معادك وانتي مروحه

بصي انا بروح في قطر 3ونص الا هو 4 يعني من طنطا هاه

حلو المعاد دا بالنسبالك
قوليلي
سلامووووووووز

وزة

دعاء مواجهات يقول...

رئيسة حزب الأحلام

الدعم موجود وكل حاجة بس هو اللى بيتوة فى السكة ومش بيوصل لمستحقية

دعاء مواجهات يقول...

- محمد صبحى
أهلا بالمنايفة أهلا

ميرسى على رأيك فى مدونتى وتابعنى فى الدستور بردو اوكى سلااااااااااامحشى

دعاء مواجهات يقول...

- anwer

يعنى م الآخر هنجيب اللوم ع الظرووف ولا إية بقى ونفضل ساكتيين؟؟؟؟

دعاء مواجهات يقول...

- شاب إسكندرانى

ميرسى على رأيك وبجد انت مدونتك كنت اول مرة أدخلها بس أثرت فى تفكيرى على فكرة
خاصة الموضوع بتاع آآآسف

وأتمنى كل الشباب يفوقوا بدرى وميستنووش علشان يتأسفوا فى وقت مينفعش فية الأسف وانا بقترح علييك تحااول تصلح كل أخطاءك دى بشكل واقعى مش مجرد أسف محدش هيعرف بية غيرنا إحنا

دعاء مواجهات يقول...

- شاب نفسة يحقق حلمة

يارب أكون عند حسن ظنك ديما ونحب نشوفك كتييير

دعاء مواجهات يقول...

-nigro

أيوى ليا علاقة جامدة بيها
دا انا من المؤسين الأوائل للضربة
كما أنى ضربشمساوية أصيلة طحن وإسأل كسااب كماان

بس كلو بالميل حضرتك زى أى حد يعنى بس الكلام الجامد هو الى بيتنشر ديماً

دعاء مواجهات يقول...

- أنين الحزن

دة ميلى mwaghat_d@yahoo.com

إبعتيلى موبايلك وقوليلى إنك إنتى وياريت لو يكون ف ميل عنوانة أنين الحزن وأنا حكلمك ونتفق أوكى

سلااااااااااااااام

Gihad N. Sohsah يقول...

الف ميت مليون تحية من الشعب الطنطاوي...وانا اقول طنطا كانت منورة يوم الفلانتين لية؟؟ اتاري

همس الاحباب يقول...

رائع جدا ومدونة رقيقة
وبالتوفيق دائما
وربنا يوفقك
تحياتى ويسعدنى تواصلك

دعاء مواجهات يقول...

- صانعة الآحلام

دا بس من ذوقك ياقمر

دعاء مواجهات يقول...

- أنا كمان يسعدنى التواصل ومدونتك دمها خفيف جدا

غير معرف يقول...

احسن حاجة حكاية السم دي
هى اللى هتحل لنا مشاكلنا
علشان يفرح اللى فى بالى

أحلام عمرنا يقول...

ربنا يخليكي يا دعاء ونورتي المدونة بتاعتي مرسي بجد ليكي