الخميس، مارس 27، 2008

يومياتى..




منوف طنطا رايح جاااى 2



وقفنا فين المرة اللى فاتت آة وقفنا عند القطار وناسة بصراحة يعنى أنا مش هعمل فيها أجنبية ولا حاجة ولا إن الناس دوول مفييش منهم بل بالعكس إكتشفت بعد أن أتممت الأسبوع الرابع أن هذا هو أصل المجتمع وأساسة ففية ترى الناس التعبانة الشقيانة اللى بتجرى على لقمة عيشها وفية تلاقى الناس اللى مفروض بيمثلوا الطبقة المتوسطة فى المجتمع المصرى واللى المفروض بردو إنهم يكونوا الموظفين (المفروض) تمام كدة يمكن ف البداية كنت مستغربة الجو وحاسة إنى فى مغامرة لذيذة من منطلق إن الواحد لازم يحتك بكل حاجة فى مجتمعة ويجربها علشان يعرف أكتر الحكاية ماشية إزاى
بس بعد كدة لاقيت إن الحكاية مش ماشية خالص بالعكس دى واقفة فى إشارة ولا إشارة شارع (القصر العينى) فى القاهرة الساعة 2 ظهراً والناس مخنوقة وتعبانة وزهقانة ومفيش ركنة ولا حتى تاكسى يوصلهم وحتى لو فية تاكسى مش عارفين هيوصلهم فين......
وعاوزة ألخصلكم تجربتى دى فى كام حاجة كدة....
الحاجة الأولى : إنى إكتشفت إن جو القطار(لما يكون فاضى) بيكون أمتع جو فى الدنيا للكتابة والتفكير وتوالد الأفكار وتتاليها لدرجة إنى ساعات مببقااش عارفة أودى الأفكار دى كلها فين فبلحق أكتب عناوين منعنا للزهايمر المبكر.
الحاجة التانية: إن القطار دة واللى بنتكلم عنة فى كلامنا كتيير وبنشبة أى حاجة مبتتأخرش ومبتقفش على إنها قطار طلع كل دا تهييس جامد مووز
وطلع القطار أكتر حاجة بتتأخر فى الحياة مرة كنت رايحة أركب قطار 11.30 لاقيت الدنيا زحمة وأنا عارفة إن الوقت دة بيكون فاضى فسألت هو فية إية قالولى أصل قطار 8.30 لسة ماجااشى فضحكت من جوايا وسكتت هقوول إية يعنى.
الحاجة التالتة: والأكثر أهمية من وجهة نظرى هو إنى عرفت أو تقدر تقوول إتأكدت إن الناس فكرتها عن المنايفة سيئة للغاية بل سيئة بشدة بل سيئة بعنف وبصراحة بقى أنا كلو عندى إلا الحتة دى فأنا أقولها دائماً وكلى فخر لو لم أكن منوفياية لوددت أن أكون منوفياية ومحدش يقوللى لية الأسباب واضحة وضووح الشمس بقى عمرك شوفت فى حياتك شعب محافظة مصرية
منتشر هذا الإنتشار فى أرجاء المعمورة ترووح القاهرة تلاقيهم جداً ترووح طنطا تلاقيهم أوى ترووح إسكندرية تلاقيهم طبعاً حتى برة مصر تلاقيهم ع الآخر ودة مش علشان المنوفية محافظة طاردة للسكان لاسمح الله لأ دا لأن نسبة التعليم عالية جداً فيها وكمان نسبة الذكاء وليس أدل على ذلك من تاريخ مصر الماضى والمعاصر ولا لازم يعنى أفكركم طب دا أنا متهيألى إنى لو نزلت تحت الأرض هلاقى واحد يقوللى أنا سفير المنوفية تحت الأرض ودة شئ يسعدنى طبعاً
لأن الإنتشار دة أهم حاجة فى أى حاجة.
طبعاً هتقولولى إية الموقف اللى حسسك أوى إن المنايفة سمعتهم كدة أقولك ياسيدى مرة روحت أقطع تذكرة عادى يعنى بقوول للراجل واحدة منوف رد قاللى إية تخيل كدة
قاللى منوف قطيعة..... ياخبر إسود أيقنت ساعتها أنى سوف ألبس قضية بتهمة التعدى على موظف عام أثناء تأدية مهامة الوظيفية دون شك
وتملكت نفسى ورديت علية بصوت يملؤة الثقة والبراءة فى الوقت ذاتة لية؟؟
قاللى: بقى متعرفيش لية ؟؟
قولتلو: بنفس البراءة أيضاً لأ معرفش؟؟
قاللى :كنت فاكرك أذكى من كدة....
وعندها كانت العناية الإلهية قد أرادت إنقاذة من بين براثنى وطلعلى التذكرة فأخذتها ومشيت يملؤنى الغيظ والرغبة فى الإنتقاام من هذا الكائن الذى لايعرف تاريخ بلدة صح...
واللى عاوزة أوصلكم ليية م الآخر يعنى إن اللى يحكم على حد لازم يكون يعرفة الأول واللى يحكم على شعب محافظة كاملة لازم بردوو يكون إتعامل معاهم كلهم واحد واحد مبحبش أنا التسطييح والتهميش الفكرى المطلق فى إطلاق التهم وإلصاقها بالناس الطيبيين
ولا إنتوا إية رأيكم؟؟؟؟

هناك 43 تعليقًا:

رئيس جمهوريه نفسى يقول...

احجز اول كومنت واقول مبروك مقال الدستور بتاع امبارح على ما اعلق

رئيس جمهوريه نفسى يقول...

اولا موضوع القطار والتامل فيه انا معاكى وخصوصا لما تكون الرحله قمت الامتاع لمده 11 ساعه من قنا الى القاهره ولازم تفتخرى انك من المنوفيه ما بسم الله ما شاء الله المنايفه ليهم اكتر من 30 سنه حكمين مصر
فعلا الحكم على الناس بالمعامله مش بس بالظاهر ودى مشكله كبيره وتاكدى حكمهم على المنايفه اسهل من حكم الناس على الصعايده
مستنى القصيده بدلا من القصه

المـــفـــــــقــــــــوعـــــة مــرارتـهــا يقول...

صعب ان الواحد يفكر في القطر ده كفاية صوته المزعج
تحياتي

رئـــــيسـة حزب الأحلام يقول...

السلام عليكم
انا عمرى ماركبت قطار بس نفسى اركبة

Hosam Yahia حسام يحيى يقول...

الصراحه

نفسى اركب قطر

عمرى ماركبته

و
أهنئك على مقال الدستور

همس الاحباب يقول...

طبعا السفر بالقطار متعة
بس على خط الصعيد
فى غير المناسبات والاعياد
المنوفية دول ناس عسل
بيشتهروا بالبخل
مع انى كل اللى اعرفهم فى منتهى الكرم
والاخلاق كفاية منهم وزة انين الحزن وانتى كمان هما بصراحة فى كل مكان تلاقيهم بس بصراحة يستاهلوا كل خير بس عيبهم انا الرؤساء بتوعهم بيعمروا كتير قوى
اللهم لاحسد والا انتى ايه رايك
تحياتى خالد

غير معرف يقول...

انتى عندك حق احنا مظلومين ويقولوا علينا بخلا انا عايشة فى القاهرة بس من المنوفية فى مقوله بتقول عارف فلان طيب عاشرته يبقى انت متعرفوش ليه بقى نحكم عليهم من قبل ما نعرفهم انا بصراحة معجبة بيكى جدا

ahmed mefrh يقول...

السلام عليكم
انا اتفق مع كل ما قلتيه ماعدا موضوع المنايفه ده

اصلك مدخلتيش جيش
على العموم طبعا كل مجتمع فيه الحلو و الوحش و ممكن نلاقى من محافظه تانيه من هو اكثر فظاعه من المنايفه

ههههههههههه


تحياتى ابو مفراح

بطوط حبوب يقول...

يابنتى حد يقدر يتكلم عن المنافيه دا احنا اقل واحد عندنا رئيس جمهويه

غير معرف يقول...

اشكرك يا صاحبة القلم الجسور والكلمات المعبرة والاحساس الصادق لكن هناك المذيد لهذا القلم وتلك الكلمات وهذا الحساس اتمنى المزيد ثانيا مرورك العظيم على مدونتى المتواضعه ووضع اول تعليق شرف كبير من صاحبة القلم الجامح المكبل القوى الضعيف اطلقى العنان للقلم فسوف يصل الى ما تنتهى الية الاقلام الحرة اشكرا

محمد عبد القوى يقول...

اولا ماوصفش ليك سعادتى لما الصدفة وصلتنى لمدونتك..مدونة دعاء مواجهات اللى دايما تثير أعجابى على صفحات الدستور برسائلها لخالد كساب
كما برضة ماوصفلكيش صدمتى لما عرفت انك من المنوفية قطيعة ... والحكاية مش حكاية المنوفية ولكن ما ناب مصر منها من 2 حكام متتاليين جابوها ورا ، صحيح واحد منهم رجع سينا بس التانى باع نص البلد ... يابنتى انا مش قادر اقولك كمية النكت اللى طلعت على بلدك وبغض النظر عن انها ظالمة ومجيرة بس كلها حلوة ودمها خفيف ... انتوا موقفكم اشبة بموقف العرب فى اتهامهم بالأرهاب..السيئة تعم ، والسيئة اللى جت من عندكم طالت مصر بحالها
واخيرا لو كلامى الصريح لدرجة الوقاحة ضايقك يبقى مفيش داعى تزورى مدونتى اما لو العكس يبقى ياريت تشرفينى قريبمبروك مقال الدستور
سلام

إنسان || Human يقول...

هو القطر مواعيدوا تمام إلا في البلدي...ولذلك المثل بتاع الالقطر لاينطبق أبداً عندنا
...
ثانياً موضوع المنايفة ده مشكلة لأنه ينطبق على الكثير من المحافظات الأخرى
زي دمياط
والصعيد
وكده
والتعميم ده أكتر حاجه سيئة فعلاً
أما عن التاريخ إلي أنت بتقولي عليه
المنوفية
كفاية إن هي أفرزت لينا الكثير من البلاوي السياسيةوإلي
أعتقد ان هو صدفة لا أكثر

شاب نفسة يحقق حلمة يقول...

السلام عليكم
المرة الوحيدة اللي ركبت فيها قطر كنت رايح الاسكندرية علشان اقدم في المدرسة الرياضية العسكرية هناك وده كان من تسع سنين يعني كان عندي حوالي 10 سنين يعني كنت لسه طفل معرفتش معني التامل
تحياتي ليكي

almasry يقول...

مش هقدر أقولك ان بتوع المنوفيه او المنايفه دول ناس طيبين جدا انا عشت مع ناس منهم مع انى دقهلاوى يعنى الرجوله والأدب والشهامه يعنى ... (عاررف اننا مش قاعدين فى فرح ) المهم والله كلهم طيبين لكن بسزاجه

تحيـاتى
المصـــــــرى

دعاء مواجهات يقول...

- رئيس جمهورية نفسة

أشكرك جدا على الرأى الموضوعى وإن شاء الله القصيدة ف أقرب وقت وأتمنى تعجبك

دعاء مواجهات يقول...

- مفقوع مرارتة من حماتة

ما أنا قولت ما بيكون فااضى

دعاء مواجهات يقول...

- رئيسة حزب الأحلااام

فلتجعلى هدفك فى المرحلة القادمة هو تحقيق هذا الحلم على فكرة مدونتك رائعة ومتميزة

دعاء مواجهات يقول...

- حسام يحيى

من كام شهر كنت بقوول كدة وكان نفسى أركبة بردوو ربنا يققلك أمنيتك

وأشكرك وأشكر الجميع على متابعتهم ليا من خلال الدستور

دعاء مواجهات يقول...

- همس الأحباب

ربنا يخليك يارب دا حضرتك اللى عسل قوول بقى للى مضطهيدنا وفهمهم إننا ملنااش ذنب

دعاء مواجهات يقول...

- nona

عليكى نور جبتى م الآااخر نورتينى

دعاء مواجهات يقول...

- أبو مفرااح

أنا يمكن فعلا مدخلتش جيش بس دخلت بيوت وقلوب طيبة اوى ونقية أوى ويمكن هى دى مشكلتنا

دعاء مواجهات يقول...

- بطوط حبوب

ياعم الواثق إنت طب وطى صوتك شوية بس

دعاء مواجهات يقول...

- محمود السويفى

تعليق عميق يمل من المعانى ما تعجز عنة الأقلام ويحملنى مسئولية أتمنى ان اكون قدرها

دعاء مواجهات يقول...

- محمد عبدالقوى

أولا موصفلكش سعادتى لسعادتك لما لاقيت مدونتى لأن دة معناة إنى كلامى كان بيعجبك وعلان كدة كنت بتدور او نفسك تلاقى مدونتى

ثانياً مقدرش أوصفلك صدمتى لصدمتك لما عرفت إنى منوفياية بس أنا روحى رياضية وكنت متوقعة كلامك دة وأكتر

بس إنت نفسك قولتها مش كاية المنوفية ف حد ذاتها يعنى إحنا ذنبنا إية قوللى انت بقى

مرورك وتعليقك شرفنى

وكل ال عاوزة اوصلة اننا مش ف عصر الميكانيك علشان نفضل نكم ع الناس والأفراد بكل عمياانى لازم نفكر شوية بشكل منطقى ولا إيية؟؟؟

دعاء مواجهات يقول...

human-

هو دة الكلاام الصح نفسى الناس تفهم كدة ان كل مكان فية كويس وفية وحش.

دعاء مواجهات يقول...

- شاب نفسة يحقق حلمة

ربنا يكتبهالك وتركبة بس يكون قطارنظيف تعرف أنا كمان نفسى تحقق حلمك .

دعاء مواجهات يقول...

- almasry

عندك حق بس مين يقدر ومين يفهم
شكرا لرأيك بجد .

Empress appy يقول...

دعاء
انا ليه صديق منوفى على فكرة هو كويس جدا وبصراحه مشوفتش منه حاجه وحشه خالص مالص
وغير كده بيعزمنى عندكم فى قويسنا نقعد فى البرج ده وبنأكل فطير وحاجات بطير هههههههههه

انين الحزن يقول...

اولا كدا

انا مبسوط جدا جدا اني قابلتك النهارده

ونضارتك حلوة اوي علي فكره كل ما اجي اقولك انسي

ابقي قوليلي الراجل الا قطعلك التذكره ده شباكه فين

احلي حاجه عجبتني فيكي انتماءك للمنوفيه

تسلمي يادودو علي حبك ليه
سلاموووووووووووز
وزة

sigon1977 يقول...

احلى صباح و مساء لدؤدؤة العزيزة العزاء العزاء لركوبك سكك حديد مصر 0 لسنا فى حاجة للوصف عشان السب و القذف و انتى عارفة اما مسالة المنتايفة اعتقد انك ما فهمتيش اللى عاز الراجل يقولة فكرى شوية فى كل المنايفة و حتعرفى هو طهقان لية 0 وباااااااااى و سوررررررى على التاخير فى التعليق 0 sigon_1977@yahoo.com

تــــايه ومش تـــايه يقول...

فى حد منوفى هنا الاول ؟
عارفه ايه مدايقنى منكو حرف النون .حرف مبحبهوش دايما يسيب الكلمه ويروح يخرج من منخيرى مش عارف ليه.مينفعش تلغوه ؟
بس على فكره انتو اللى عامليين الصيت ده لنفسكو.يعنى بتنتشرو بسرعه .بس انا معايا ناس فى الكليه منايفه زى الفل هما اللى ماليين علينا المدرج

شـمو نشـادر يقول...

ازيك يا دؤدؤ .. الموضوع لذيذ ودمه خفيف .. عايز اقوللك ان انا كمان لما بكون راكب السوبرجيت من السويس لطنطا بتيجي فى دماغى كمية افكار جامده جدا بس بنساها كلها اول ما انزل .. مش عارف ايه السر فى موضوع المواصلات ده .. بس من هنا لازم نوجه التحيه وسلام مربع لوزير النقل والمواصلات منصور شيفروليه على كمية الالهام اللى بيوفرها للبنى ادم مننا ..

ساعد نسرين الايمن يقول...

منايفة ؟

بيقولك في سنة 2010 المنايفة هيبقوا اكتر من البني آدمين

معظم الناس فكرتهم غلط عن المنايفة ؟
يعني المنايفة دول ناس كويسة ؟

بامارة مين ؟
انور السادات
ولا حسني مبارك
ولا كمال الشاذلي
ولا جمال مبارك
ولا علاء

احيانا اشعر ان المنوفية ديه ماسورة مجاري كونية
تخرج فقط الحشرات ليحكموا مصر
المنوفية بلد فيفي عبده
بلد روءسا ء وراقصات زي ما قال سمير صبري
بلد علي حلوة الدكتور اللي كان عندنا في الجامعة
المنوفية بلد صولات الجيش
وقطاعين الطرق
المنوفية اخرجت نماذج غاية في السوء
المشكلة ان الناس دول انتشروا اوي
وبعدين فعلا انا مؤمن بنظام القولبة
يعني بجد انا عمري ما شوفت منوفي كويس او كريم

بس موضوع القطار انا معكي فيه
فعلا
اهتزازات القطار بتدي مساحة للتامل

نصحية ليكي مش تقولي انك منوفية تاني ؟

ده البنات وهم مش منايفة مش بيتجوزا
تجي تعلينها انتي علي الملا جدا

انا مش اقصدك انتي
بس عندي غلي من شوية المنايفة الاغبياء اللي حكموا البلد
كرهني في خط بحري كله

غير معرف يقول...

والله يا دودي المدونة كلها لذيذة خالص وحكاية القطر دي جميلة وكمان اللي عجبني انك بتدافعي عن منوفيتك اووي برغم كل شيء

دعاء مواجهات يقول...

-آبى الجميلة
تنورى وتشرفينا ياقمر فهمى الناس اللى مش عاوزة تفهم بقى

دعاء مواجهات يقول...

- أنين الحزن
بجد ياوزة ياقمر أنا الى فرحانة اوى بجد إنى قابلتك وإنتى بجد زى البسكوتة وإن شاء الله نتقابل تانى وتالت على خير والنظارة ممكن تاخديها هدية إتفضلى ولا تغلى ع الجميل

دعاء مواجهات يقول...

- تاية ومش تاية

يعنى لو لاغينا النون هتحب المنايفة ومش هتتضايق؟؟

دعاء مواجهات يقول...

- أسامة أمين

عندك حق ياواد يا أوسى ياباشمهندس الجاز إنت إختفيت فين بس يا إبنى

دعاء مواجهات يقول...

- ساعد نسرين الأيمن

على حب بلدى التاريخ يقدر يقول ما شاء أنا بلدى عندى أحب وأجمل الأشياء بحبها بعنف ورقة وعلى إستحياء وألعنها وألعن أبوها وقت الداء وأسيبها وأهرب فى درب وتبقى هى الدرب


أنا فخورة بكونى من المنوفية ياكابتن ولا يهزنى كلمة من كلاام اى حد أوكى ى ى ى

دعاء مواجهات يقول...

- غير معروف

سانكس بجد بس دة أقل واجب المفروض إن الواحد يعملو لبلدة طبعاً

خايف من الحقيقة يقول...

دعاء
لما الروح ها اللي تسافر
لما القلب هو اللي يجري بعيد
لما عقلنا يكسرحدود الواقع
نتامل ونفكر ونحلم
ونقضي وقت جميل حتى لو في القطر
بس بمجرد الوصول للمحطة
اي محطة
ترسا مراكب افكرنا في مواني الحياه الصعبه ونلم الشراع وتتبقى من الرحلة شوية حروف

محمد فرج على يقول...

و الله يا دعاء قطارات المنوفيه خاصه اللي رايحه مص ما فيش اسوا منها ممكن تشوفي ده في مدونتي دنيا الكلام
في بوست قطار العذاب الدائم علي الرابط
http://doniaelkalam.blogspot.com/2006/11/blog-post_01.html

d.o.*3 يقول...

على فكره انتي شخصيه جميله جدا وده بان من كلامك وعلى فكره انتي شخصيه موهبه ربنا يوفقك
وعلى فكره في موضوع في دماغه نفسي أعمله بس محتاج أشخاص يملكون الموهبه في كتابه المواضيع العمه والشعر والقصص